Mmofra Bisa Sɛ . . .

Hena Ankasa Ne M’adamfo?

“MAKƆ sukuu wɔ ɔmantam yi mu mfe fĩ awotwe, nanso wɔ saa bere no nyinaa mu no mintumi nnyaa adamfo biako pɛ mpo,” saa na Ronnie de sũ kae. “Me ne m’agya nsen so, me nã nte m’ase, na me ne me nuabea kõ. Minni obiara! Obiara mfrɛ me wɔ telefon so. Minni obiara a me ne no kasa. Obiara nnim sɛnea mete nka na obiara nsusuw me ho. Ɛtɔ bere bi a misusuw sɛ merentumi nnyina ano bio!”

Ronnie fi ɛyaw mu ka mmɔbɔ a asetra a adamfo nnim yɛ no ho asɛm. Ebia woanya nkate ahorow a ɛte saa ara bere bi. Mmofra pii te nka saa. Ɛnyɛ wɔn nyinaa na wotumi nya nnamfo ankasa. Nhwehwɛmufo a wɔwɔ Nebraska Sukuupɔn mu (U.S.A.) hui sɛ “sukuupɔn mu adesuafo ne wɔn a ankonamyɛ haw wɔn kɛse, na ntoaso sukuu adesuafo na edi hɔ.” Ebia afoforo a wo ne wɔn nni nkitaho bɛma woatew wo ho. Wɔ saa tebea horow yi mu no adamfo ankasa ho hia.

Adamfo Ankasa Ne Dɛn?

Adamfo ankasa ne obi a ɔyɛ nea ɛsen nea nnipa pii a yenim wɔn a yekyia wɔn da biara yɛ no. Wɔbɔ amanneɛ sɛ Afrika ɔman bi kaa nnipa binom ho asɛm sɛ “kwan so nnamfo” ne afoforo nso sɛ “koma mu nnamfo.” Dɛn ne “koma mu adamfo”? Mmofra pii kyerɛkyerɛɛ mu.

Semone a wadi mfe 18 no kae sɛ: “Adamfo ankasa ne obi a ɔde ne ho fam wo ho wɔ mmere pa ne mmere bɔne mu. Ɔne nea ɛnyɛ gye nko na ɔne wo gye mo ani na mmom ɔne wo di awerɛhow nso. Sɛ biribi haw wo a wubetumi aka akyerɛ w’adamfo no bere nyinaa na woanya obi a wubesu akyerɛ no.” Saa nkyerɛkyerɛmu no te sɛ Bible de no, ɛkenkan sɛ: “Adamfo dɔ bere nyinaa mu, na ɔbɛyɛ onua wɔ ɔhaw bere mu.”​—Mmebusɛm 17:17, The Bible in Basic English.

Yiw, wɔ Bible mu no, adamfo ne obi a ɔdɔ yɛn. Ebia yebedi mfomso asusuw sɛ yɛn nnamfonom ne wɔn a wɔkamfo yɛn. Ɔkwan foforo so no, sɛ ɔyɔnko bi ka kyerɛ yɛn sɛ yɛadi mfomso a, ebia ‘ebepira’ yɛn nkate ahorow. Nanso wɔ Mmebusɛm 27:6 no Bible in Living English bɔ kɔkɔ sɛ: “Ɛsɛ sɛ wode ho to ɔdɔfo pira so kɛse sen mfewano a efi ɔtamfo hɔ a ɛyɛ nnaadaa.” Enti ehia sɛ yɛhwɛ yiye na ahopɛ amma yɛampaw nnamfo bɔne.

Obi a ohuu hia a eyi ho hia ne James a wadi mfe 18 no. Ɔkae sɛ: “Nea ɔyɛ adamfo ankasa wɔ me fam ne obi a woyɛ bɔne a ɔka kyerɛ wo na ɔbɔ mmɔden sɛ ɔbɛboa wo ma woagyae.” Marvia a wadi mfe 26 a ogye tom no kae sɛ: “Ɛtɔ bere bi a obi a ose ɔyɛ adamfo bɛhwɛ wo ma wɔakɔ ɔhaw bi mu na afei waka sɛ, ‘Mihui sɛ na worekɔ ɔhaw mu, nanso na misuro sɛ mɛka akyerɛ wo.’ Nanso sɛ adamfo ankasa hu sɛ worefa ɔkwammɔne so a, ɔbɛbɔ mmɔden abɔ wo kɔkɔ ansa na aka akyi​—sɛ onim mpo sɛ ebia w’ani rennye nea ɔka no ho a.’

Nanso hena na ɔbɛkyerɛ nea ɛteɛ ne nea ɛnteɛ? Obi wɔ hɔ a wahu nea ɛfa asetra ho no pii sen nea yɛn mu biara ahu. Ɔno ne adesamma Bɔfo, Yehowa Nyankopɔn. Wɔ Bible mu no ɔkyerɛ yɛn sɛnea yɛde yɛn nkwa bedi dwuma na ama yɛanya akomatɔyam, sen sɛ yebehu amane a mfaso nni so. Mmebusɛm 2:6-9 kyerɛ yɛn sɛ, sɛ yetie Onyankopɔn na yedi afotu ahorow a ɔde ma no so a, yɛbɛte “ɔkwan pa nyinaa” ase.

Sɛ wowɔ adamfo a ɔde ne ho to saa afotu fibea no so, obi a ne nsusuwii ne ne kasa teɛ a, obetumi de nneɛma pa ama wo na ɛdenam saa yɛ so no, ɔbɛboa wo ma wɔasisi gyinae ahorow a nyansa wom. Ɛyɛ ntease pa nti na Bible no ka “adamfo afotu a efi komam dɛ a ɛyɛ” ho asɛm no.​—Mmebusɛm 27:9, The Amplified Bible.

So Oniiko a Wopaw No Fa Ho?

Wɔkyerɛ sɛ wobisaa Henry Ford a waka baabi no sɛ, “Hena ne w’adamfo paa?” Bere a wasusuw ho kakra akyi no, obuae sɛ, “W’adamfo paa ne nea ɔma nneɛma pa a ɛwɔ wo mu no da adi.” Enti, mmofra pii ahu hia a ɛho hia sɛ wɔhwɛ yiye wɔ nnamfo a wɔpaw mu no.

“M’asetra di adanse sɛ ɛnyɛ ‘nnamfo’ nyinaa na wɔma nea eye wɔ wo mu no da adi,” saa na Peggy a wadi mfe 23 no kae. Saa ababaa yi kyerɛe sɛ, sɛ́ obi a ná onnya nnii mfe aduonu no, wɔhyɛɛ no ma ofii fie na awarefo bi, Bill ne Lloy, faa no adamfo bɛyɛ nea ɛboro afe. Bere a ɔne saa abusua yi te no, wɔkyerɛkyerɛɛ no nneɛma pii faa Onyankopɔn ne Bible no ho. Peggy kae sɛ: “Minyaa anigye, akomatɔyam ne asomdwoe ankasa wɔ asram a midii wɔ wɔn nkyɛn no mu. Nanso ankyɛ efisɛ, srɛ a wɔsrɛɛ me sɛ mentra hɔ akyi no, mifii hɔ kɔkaa ‘nnamfo’ afoforo bi ho.

“Ankyɛ na misuaa nneɛma pii fii me ‘nnamfo’ foforo no hɔ​—mfiri a wɔde bɔ nnwom wia, sika a ɛnyɛ yɛn de a yekoyi wɔ sikakorabea, marijuana a wɔnom, ne awiei koraa no, sɛnea yebenya Amerika sika dɔla 200 da biara de atɔ nnubɔne anom,” saa na Peggy kae. “Saa bere no misusuwii sɛ saa nnipa yi pɛ m’asɛm ankasa, nanso akyiri yi mihui sɛ nea na wɔpɛ ara ne sika, nnubɔne anaa biribiara a na wobetumi anya afi me hɔ.”

Afei, bere a odii mfe 18 no, ohyiaa aberante bi a ɔde Ray a ɔfaa no adamfo na ɔmaa no nnubɔne ahorow a obetumi anom nyinaa​—kwa. Peggy bɔɔ amanneɛ sɛ: “Misusuwii sɛ me haw ahorow nyinaa asã. Ɛho renhia sɛ miwia ade na misisi afoforo bio. Nanso ɔkyerɛɛ me gyantrabɔ. Na na minim sɛ edu anwummere biara a Ray bɛba hɔ.”

Nanso, Ray bɛyɛɛ ɔdepɛfo kɛse na na ɛda adi sɛ ɔno nso ani gyee sika a Peggy de brɛ no no ho. Wɔ mmɔden a ɔbɔe sɛ obegyae ne ho a ɔde to ne so mu no, Peggy gyaee nnubɔne no nom. Peggy paee mu kae sɛ: “Nanso na Ray bɛba abɛkorɔkorɔ me na ɔde nnubɔne no ama me. Na ansa na mehu no na wanya me bio.” Enti, awiei koraa no, oguan fii kurow no mu fii saa ‘adamfo’ yi nkyɛn. Nanso so na obenya adamfo ankasa da bi?

Ɔkaee abusua a ɔne wɔn trae, Bill ne Lloy, a na wɔyɛ Yehowa Adansefo no nokware dɔ no, ɔhwehwɛɛ Adansefo afoforo wɔ beae foforo a ɔte no. Ankyɛ na Adansefo baanu baa ne pon ano. Peggy bɔɔ amanneɛ sɛ: “Anigye maa nisu guu me bere a meyɛɛ mmea baanu a wɔn ho adwiriw wɔn no atuu no. Matumi agyae me kan ‘nnamfo’ no nyaatwomyɛ no, nanso hwɛ nnipa a wɔyɛ nnamfo ankasa ni.”

Na Peggy su bɔne ahorow no nso ɛ? Peggy kyerɛkyerɛɛ mu sɛ: “Anyɛ me den sɛ medi ne nyinaa so​—gye sigaretnom nko. Mpɛn pii no mintumi, na mesrɛ Yehowa fafiri. Afei me nnamfo no mu biako kae sɛ, ‘Sɛ́ wobɛbɔ mpae asrɛ fafiri bere a woantumi akyi mmom no, dɛn nti na wunni kan mmɔ mpae nsrɛ ahoɔden bere a wote nka sɛ ɛsɛ sɛ wonom bi no?’ Saa nyansahyɛ a ayamye wom na ɛfata yi na ɛboae. Enti ɛdenam me nnamfo no mmoa so no mitumi dii ɔhaw yi so koraa. Nea edi kan wɔ mfe pii mu no metee nka wɔ me mu sɛ me ho atew na mihuu nea sɛ́ obi benya obu ama ne ho no kyerɛ.”

So wɔn a na wɔyɛ Peggy nnamfo ankasa no nyɛ nea ɛda adi? Abirabɔ bɛn ara ni! Bere a “nnamfo” bi ma obuu bra bɔne ahorow pii no, nnamfo pa afoforo maa no nea ɛbɛhyɛ no nkuran ma wadi eyinom so. Nkɛntɛnso ahorow yi mu nea ɛwɔ he na wo nnamfo nya wɔ wo so? Wɔn abrabɔ gyinapɛn ahorow te dɛn ankasa? Ampa, ɛnyɛ mmofra nyinaa na wɔn ani gye nyamesom ho, nanso ebia wo de w’ani gye ho. Sɛ saa a, ɛnde wopɛ nnamfo a wɔn nso ani gye Onyankopɔn ho. Wobɛyɛ dɛn atumi ahu sɛ ebia wo de no te saa? Fi ase ka Onyankopɔn ho asɛm kyerɛ wɔn na wubehu no ntɛm ara.

Aseda bɛn ara na Peggy de ma sɛ onyaa nnamfo ankasa a ‘wɔdaa nea eye wɔ ne mu no adi’ mmom sen nea enye no! Ɔhwɛɛ n’akyi no, ɔkae sɛ: “Sɛ Bible no ka sɛ, ‘Wo ne anyansafo mmɔ, na dan onyansafo, na nea ɔne nkwasea bɔ no hu amane’ a, ɛyɛ nokware turodoo. Minim! Sɛ me ne saa nnipa a wɔdɔ Nyankopɔn no nkutoo faa ayɔnko a, anka mikwatii saa nneɛma ahorow a mprempren mekae a ɛyɛ me yaw no nyinaa. Menam ɔkwan a ɛyɛ yaw so huu nea ayɛ m’adamfo ankasa.”​—Mmebusɛm 13:20.

[Kratafa 23 adaka]

SO ONII NO YƐ ADAMFO ANKASA?

So saa nipa no di wo nokware, sɛ mpo nea ɔkae no yɛ nea epira a?

● Sɛ ɔhaw ahorow to wo a, so oniiko no gyaw wo?

□ So saa nipa no suban ahorow bɛboa wo anaasɛ ɛbɛsɛe w’asetra?

● Oniiko no gyinapɛn ahorow wɔ ɔbarima ne ɔbea nna ho ne nea ɛyɛ abrabɔ pa hyia dɛn?

● So onipa no di atoro, wia ade anaa osisi afoforo wɔ w’anim?

● Din bɛn na saa nipa no wɔ?

● Ɛhe na saa nipa no abrabɔ de no rekɔ? So ɛyɛ ɔkwan koro no ara a wonam so anaasɛ wopɛ sɛ wofa so no?

● Dɛn nti na onipa no pɛ sɛ ɔfa wo adamfo? So wowɔ biribi a ɔpɛ?

● Dɛn na w’awofo susuw wɔ nea woapaw no no ho?

● So biribi wɔ hɔ a ɛkyerɛ sɛ onipa no te nka sɛ ɔwɔ asɛyɛde wɔ Onyankopɔn ho?

[Kratafa 23 adaka]

“Me ba, mpo [Yehowa] nteɛso, na mma n’animka mmfono wo. Na nea [Yehowa] dɔ no na ɔka n’anim, sɛ agya yɛ ne ba a ɔdɔ no. Nhyira ne onipa a ohu nyansa, ne onipa a onya ntease. Na emu adenya ye sen dwetɛ de, na ne mfaso sen sika amapa. Ne bo yɛ den sen mmota, na afɛfɛde nyinaa, wɔmfa nto ho. Onyinkyɛ wɔ ne nifa mu, ne benkum kura ade ne anuonyam. N’akwan yɛ akwan a ɛyɛ fɛ, na n’asa nyinaa yɛ asomdwoe. Ɛyɛ nkwa dua ma wɔn a woso no mu, na nhyira ne nea okura mu.”​—Mmebusɛm 3:11-18.

[Kratafa 21 mfoni]

“Adamfo ankasa wɔ me fam ne obi a woyɛ bɔne a ɔka kyerɛ wo na ɔbɔ mmɔden sɛ ɔbɛboa wo ma woagyae.” So wo nnamfonom bɛyɛ wo saa?