So Da Biara Wubisa Sɛ, “Yehowa Wɔ He?”

1, 2. (a) Wɔ Yeremia bere so no, na Yudafo no ne Onyankopɔn ntam te dɛn? (b) Dɛn na na anka ɛsɛ sɛ Yudafo no yɛ wɔ tebea a na wɔwom no ho?

NÁ Yeremia retew nusu. Ná ɔredi tebea a ne nkurɔfo wom saa bere no ne asɛm a na Onyankopɔn ama waka afa nea ɛbɛba wɔn so daakye no ho awerɛhow. Onyae a na anka ne ti yɛ nsuti, na n’aniwa nso yɛ nsuaniwa, sɛnea ɛbɛyɛ a obetumi akɔ so asu bere nyinaa. Esiane tebea a na ɔman no wom nti, sɛ na Yeremia redi wɔn ho awerɛhow a, na ntease wom. (Yer. 9:1-3; monkenkan Yeremia 8:20, 21.) Ná Yudafo no mfa Onyankopɔn mmara nyɛ hwee, na na wontie Yehowa nne, enti na mmusu bɛba wɔn so.—Yer. 6:19; 9:13.

² Nanso, Yudafo no amfa nea Yehowa ka faa wɔn abrabɔ ho no aniberesɛm koraa, na mmom nea na wɔrepɛ ate afi wɔn nyamesom akannifo no hɔ ara ne sɛ wɔbɛka akyerɛ wɔn sɛ ‘biribiara rekɔ yiye.’ (Yer. 5:31; 6:14) Ná wɔte sɛ ayarefo a wɔrehwehwɛ oduruyɛfo a ɔbɛka nea ɛyɛ wɔn asom dɛ akyerɛ wɔn na wabu n’ani agu sɛnea wɔn yare no yɛ hu no so. Sɛ woyare denneennen paa a, so w’ani rennye ho sɛ wɔbɛyɛ wo yare no ho nhwehwɛmu yiye sɛnea ɛbɛyɛ a wubenya ayaresa ntɛm? Saa ara na na anka ɛsɛ sɛ Yudafo a wɔwɔ Yeremia bere so no hwehwɛ obi a ɔbɛka sɛnea wɔne Onyankopɔn ntam asɛe no ho asɛm akyerɛ wɔn pefee. Ná anka ɛsɛ sɛ wobisa sɛ: “Yehowa wɔ he?”—Yer. 2:6, 8.

 3. (a) Dɛn na anka na Yudafo no betumi ayɛ de abua asɛmmisa a ɛne “Yehowa wɔ he” no? (b) Ɔkwan biako bɛn na na Yudafo no betumi afa so ahwehwɛ Yehowa?

³ Sɛ Yudafo no bisae sɛ “Yehowa wɔ he?” a, anka ɛbɛkyerɛ sɛ na wɔhwehwɛ Onyankopɔn akwankyerɛ ansa na wɔasisi gyinae akɛse ne nketewa. Yudafo a na wɔwɔ hɔ saa bere no anyɛ saa. Nanso, sɛ na wɔsɛe Yerusalem na wɔsan fi Babilon ba a, na ‘wɔbɛhwehwɛ Yehowa.’ Sɛ na wɔyɛ saa a, na wobetumi ahu Yehowa ne n’akwan. (Monkenkan Yeremia 29:13, 14.) Ná wɔbɛyɛ dɛn atumi ayɛ saa? Ɔkwan biako a na wobetumi afa so ayɛ saa ne sɛ wobefi wɔn komam abɔ Onyankopɔn mpae de ahwehwɛ n’akwankyerɛ. Saa na Ɔhene Dawid yɛe. Ɔka kyerɛɛ Onyankopɔn sɛ: “O Yehowa, ma minhu w’akwan; kyerɛkyerɛ me w’atempɔn.” (Dw. 25:4) Hyɛ asɛm a mpaebɔ Tiefo no nam Yeremia so ka kyerɛɛ Ɔhene Sedekia wɔ n’ahenni afe a ɛto so du mu no nsow. Ɔkae sɛ: “Frɛ me, na megye wo so, na mɛka nsɛm akɛse ne nneɛma a wonte ase na wunnim akyerɛ wo.” (Yer. 33:3) Sɛ na ɔhene no ne ɔman a wɔabɔ ko no frɛ Onyankopɔn a, na Onyankopɔn betumi aka nneɛma a ‘wɔnte ase,’ kyerɛ sɛ, Yerusalem a na wɔbɛsɛe no na wɔasan akyekye wɔ mfe 70 akyi no ho asɛm akyerɛ wɔn.

4, 5. Akwan foforo bɛn na na anka Onyankopɔn nkurɔfo no betumi afa so ahwehwɛ Yehowa?

⁴ Ɔkwan foforo a na anka Yudafo no betumi afa so ahwehwɛ Yehowa ne sɛ wɔbɛhwehwɛ wɔn abakɔsɛm mu ahwɛ sɛnea Yehowa ne ne nkurɔfo dii. Sɛ wɔyɛɛ saa a, anka wohuu nea ɛma wonyaa Onyankopɔn anim dom ne nea ɛmaa ne bo fuw wɔn. Ná Yudafo no wɔ nhoma ahorow a Mose kyerɛwee no ne Israelfo ho abakɔsɛm ne Israel ne Yuda ahemfo ho kyerɛwtohɔ a Onyankopɔn ma wɔyɛe no. Sɛ Yudafo a na wɔwɔ Yeremia bere so no dwinnwen saa nsɛm no ho, ɛnna wotiee Onyankopɔn diyifo nokwafo no a, anka wobetumi anya asɛmmisa a ɛne “Yehowa wɔ he?” no ho mmuae.

⁵ Ɔkwan a ɛto so abiɛsa a na anka saa Yudafo no betumi afa so ahwehwɛ Yehowa ne sɛ wobesua biribi afi nea wɔn ankasa ne afoforo afa mu no mu. Ná eyi nkyerɛ sɛ ɛsɛ sɛ wɔsɔ biribiara a wɔpɛ sɛ wɔyɛ hwɛ ansa na wɔahu sɛ eye, mmom no, na anka wobetumi asusuw nneɛma a wɔn ankasa yɛe wɔ bere bi a atwam ne adwene a Yehowa nyae wɔ nea wɔyɛe no ho ma aboa wɔn. Sɛ wɔde wɔn ani too fam a, anka wobehu sɛnea Onyankopɔn tee nka wɔ nea wɔyɛe no ho.—Mmeb. 17:10.

 6. Nkuranhyɛ bɛn na wubetumi anya afi asɛm a Hiob kae no mu?

⁶ Afei momma yensusuw akwan a yebetumi afa so ahwehwɛ Yehowa wɔ yɛn bere yi so ho. Sɛ woresisi gyinae anaa wopɛ sɛ woyɛ biribi a, so wotaa bisa sɛ, “Yehowa wɔ he?” Ebinom betumi ate nka sɛ wɔntaa mmisa saa asɛm no sɛnea anka ɛsɛ sɛ wɔyɛ bere a wɔresisi gyinae. Sɛ saa na ebia wote a, mma w’abam mmu. Bere bi, tete agya nokwafo Hiob mpo kɔɔ tebea a ɛte saa mu. Bere a ɔkɔɔ ahokyere mu no, ɔbɛyɛɛ obi a odwen ne nkutoo ho. Ɛho behiae sɛ Elihu twe n’adwene si su bi a nnipa taa da no adi so. Elihu kae sɛ: ‘Wɔn mu biara anka sɛ, “Ɛhe na Onyankopɔn, me Bɔfo Kɛse no wɔ?”’ (Hiob 35:10) Elihu hyɛɛ Hiob nkuran, na ɔka kyerɛɛ no sɛ: “Gyina hɔ komm, na dwinnwen Onyankopɔn anwonwadwuma ho.” (Hiob 37:14) Ná ɛho hia sɛ Hiob hwɛ Yehowa abɔde akɛse a na atwa ne ho ahyia ne sɛnea na Onyankopɔn ne nnipa di no. Hiob nam n’ankasa suahu so huu Yehowa akwan. Bere a Hiob gyinaa amanehunu a ohyiae no ano na ohuu sɛnea Yehowa dii nneɛma ho dwuma akyi no, ɔkae sɛ: “Mekasae bere a mente ase, efisɛ ɛyɛ nneɛma a ɛyɛ nwonwa dodo ma me, nneɛma a minnim. Wo ho asɛm kɛkɛ na metee, na afei de m’aniwa ahu wo.”—Hiob 42:3, 5.

 7. Sɛnea wɔayɛ ho mfonini wɔ kratafa 116 no, dɛn na yɛrebesusuw ho?

⁷ Odiyifo Yeremia de, ɔkɔɔ so hwehwɛɛ Yehowa, na ohuu no. Yeremia anyɛ n’ade te sɛ ne man mufo no, mfe pii a ɔde somee nyinaa mu no, ɔkɔɔ so bisae sɛ: “Yehowa wɔ he?” Wɔ nsɛm a edi so wɔ saa ti yi mu no, yɛnam nea Yeremia yɛe so behu ɔkwan a yebetumi afa mpaebɔ, adesua, ne yɛn ankasa suahu ahorow so ahwehwɛ Yehowa ahu no.—1 Be. 28:9.

 8. Mmere bɛn mu na Yeremia bɔɔ Onyankopɔn mpae?

⁸ Yeremia nam mpae a ofi ne komam bɔe so hwehwɛɛ Yehowa wɔ mfe pii a Onyankopɔn nam no so kasa kyerɛɛ Yuda man no mu. Ɔbɔɔ Onyankopɔn mpae hwehwɛɛ mmoa bere a na ɛsɛ sɛ ɔka asɛm a nkurɔfo ani nnye ho, bere a ɔtee nka sɛ ɔrentumi ntoa so bio, ne bere a na ɔnte nea enti a na nneɛma bi rekɔ so ase no. Onyankopɔn tiee no, na ɔkyerɛɛ no ɔkwan a ɛsɛ sɛ ɔfa so. Momma yensusuw nhwɛso kakra bi ho nhwɛ.

 9. (a) Nsɛm bɛn na Yeremia kae wɔ Yeremia 15:15, 16, na dɛn na Yehowa yɛ maa no? (b) Wususuw sɛ dɛn nti na ɛho ho hia sɛ woka sɛnea wote nka ho asɛm wɔ wo mpaebɔ mu?

⁹ Bere bi a wɔsomaa Yeremia sɛ ɔnkɔka atemmusɛm bi no, ɔtee nka sɛ na obiara redome no. Enti odiyifo no ka kyerɛɛ Onyankopɔn sɛ ɔnkae no. Susuw mpae a ɔbɔe a wɔayɛ ho kyerɛwtohɔ wɔ Yeremia 15:15, 16 no ho hwɛ. Saa mpaebɔ no mu na ɔkaa sɛnea ɔte nka wɔ mmuae a Onyankopɔn de maa no no ho asɛm. (Monkenkan.) Yeremia kaa sɛnea na ne ho yeraw no ho asɛm wɔ saa mpaebɔ no mu. Nanso, bere a onyaa Onyankopɔn asɛm na odii no, n’ani gyei! Yehowa boaa no ma ohuu hokwan a wanya sɛ Onyankopɔn din da no so na ɔreka Onyankopɔn asɛm. Yeremia tumi huu baabi a na Yehowa wɔ pefee wɔ asɛm yi mu. Dɛn na yebetumi asua afi saa asɛm no mu?

10. Bere a odiyifo no kae sɛ ɔrenkasa wɔ Yehowa din mu bio no, dɛn na Onyankopɔn yɛe wɔ ho?

¹⁰ Bere foforo nso a Imer ba ɔsɔfo Pasur boroo Yeremia no, Yeremia kae sɛ ɔrenkasa wɔ Yehowa din mu bio. Dɛn na Onyankopɔn yɛe wɔ mpae a Yeremia bɔe no ho? (Monkenkan Yeremia 20:8, 9.) Bible nka sɛ Onyankopɔn fi soro kasa kyerɛɛ Yeremia. Mmom no, Onyankopɔn asɛm bɛyɛɛ sɛ ogya a ɛredɛw a wɔato mu wɔ ne nnompe mu ma enti na ɔrentumi nka n’ano ntom. Nokwarem no, bere a Yeremia fi ne komam kaa n’asɛm kyerɛɛ Onyankopɔn na ɔmaa Yehowa apɛde a ɔbɛyɛ kanyan no no, ɛhyɛɛ no nkuran ma ɔkɔɔ so yɛɛ nea na Onyankopɔn pɛ sɛ ɔyɛ no.

11, 12. Ɔkwan bɛn so na Yeremia nyaa asɛm a obisa faa abɔnefo a na ɛte sɛ nea asi wɔn yiye no ho mmuae?

¹¹ Bere a Yeremia hui sɛ asi abɔnefo yiye no, ɛhaw no paa. (Monkenkan Yeremia 12:1, 3.) Ɛnyɛ sɛ na odiyifo no rekasa atia Yehowa trenee, na mmom na ‘n’asɛm’ ho mmuae na na ɔrehwehwɛ. Ne koma mu asɛm a ɔkae no da no adi pefee sɛ na ɔne Onyankopɔn wɔ abusuabɔ pa, sɛnea abofra ne n’agya a ɔdɔ no kasa no. Nea na Yeremia nte ase ara ne nea enti a na Yudafo pii redi yiye ɛmfa ho sɛ na wɔyɛ abɔnefo no. So Yeremia nyaa mmuae a ɛmaa ne bo tɔɔ ne yam? Yehowa maa no awerɛhyem sɛ, obetu abɔnefo ase. (Yer. 12:14) Bere a Yeremia huu nea ebefi asɛm a ɔbɔɔ Onyankopɔn mpae wɔ ho no mu aba no, ɛbɛyɛ sɛ ɛmaa ahotoso a na ɔwɔ sɛ Onyankopɔn bu atɛntrenee no mu yɛɛ den. Ɛno nti, ɛbɛyɛ sɛ Yeremia kɔɔ so bɔɔ Onyankopɔn a ɔyɛ n’Agya no mpae mpɛn pii kaa n’asɛm kyerɛɛ no.

¹² Bere a na Sedekia ahenni reba awiei na Babilonfo betwaa Yerusalem ho hyiae no, Yeremia kaa Yehowa ho asɛm sɛ obi a ‘wabue n’ani rehwɛ nnipa mma akwan nyinaa sɛ obetua obiara ka sɛnea n’akwan ne ne nneyɛe so aba te.’ (Yer. 32:19) Yeremia tumi huu Yehowa adwene wɔ atɛntrenee ho, ɛne sɛ na Onyankopɔn rehwɛ nea obiara reyɛ, na na ɔretie mpae a n’asomfo fi wɔn komam rebɔ no. Saa ara nso na na abɔnefo no behu adanse pii a ɛkyerɛ sɛ Yehowa ‘tua obiara ka sɛnea n’akwan ne ne nneyɛe so aba te.’

13. Dɛn nti na wowɔ ahotoso sɛ Onyankopɔn apɛde bɛyɛ hɔ?

¹³ Ebia yɛn adwenem nyɛ yɛn nãã wɔ sɛnea Onyankopɔn redi n’apɛde ho dwuma nnɛ ne sɛnea obedi ho dwuma daakye wɔ atɛntrenee ne nyansa mu no ho. Nanso, sɛ yedwinnwen nea Yeremia faa mu no ho na yɛka sɛnea yɛte nka wɔ yɛn komam ho asɛm kyerɛ Yehowa wɔ mpaebɔ mu a, ebetumi aboa yɛn. Sɛ yɛka yɛn asɛm kyerɛ Yehowa saa a, ebetumi ama ne mu ahotoso a yɛwɔ sɛ n’apɛde bɛyɛ hɔ ɔkwan biara so no mu ayɛ den. Sɛ mpo seesei yɛnte nea enti a nneɛma rekɔ so saa no ase yiye anaa nea enti a Onyankopɔn apɛde rekɔ so sɛnea ɛte no a, yebetumi aka akyerɛ no wɔ mpaebɔ mu sɛ yɛwɔ ahotoso sɛ n’apɛde bɛyɛ hɔ ɔkwan biara so. N’apɛde bɛyɛ hɔ wɔ ɔkwan a ɛfata so ne bere a onim sɛ eye paa mu. Eyi bɛbam ɔkwan biara so; ɛnsɛ sɛ yɛn adwenem yɛ yɛn nãã wɔ ho da. Yɛbɛkɔ so abisa sɛ, “Yehowa wɔ he?,” a nea ɛkyerɛ ne sɛ, yɛbɛbɔ mpae ahwehwɛ sɛ yebehu n’apɛde, na yɛahu adanse a ɛkyerɛ sɛ n’apɛde reyɛ hɔ.—Hiob 36:5-7, 26.

14. Yɛyɛ dɛn hu sɛ Yeremia yɛɛ Onyankopɔn nkurɔfo ho abakɔsɛm mu nhwehwɛmu?

¹⁴ Ná Yeremia nim hia a ɛho hia paa sɛ onya ‘Yehowa ho nimdeɛ.’ Ɛno nti na obisae sɛ, “Yehowa wɔ he?” no. (Yer. 9:24) Ɛbɛyɛ sɛ osuaa Onyankopɔn nkurɔfo ho abakɔsɛm bere a na ɔreboaboa nhoma ahorow a ɛnnɛ wɔfrɛ no Ahene nhoma a edi kan ne Ahene nhoma a ɛto so abien no ano no. Ɔhyɛɛ da bɔɔ “Solomon ho nsɛm nhoma,” “Israel ahene bere so nsɛm nhoma,” ne “Yuda ahene bere so nsɛm nhoma” no din. (1 Ahe. 11:41; 14:19; 15:7) Ɛno nti, obehuu sɛnea na Yehowa adi tebea ahorow ho dwuma. Yeremia tumi huu nneɛma a na ɛsɔ Yehowa ani, ne adwene a Yehowa nyae wɔ gyinae a nkurɔfo sisii no ho. Ná obetumi nso ayɛ nhwehwɛmu wɔ nhoma ahorow a na Onyankopɔn ama wɔakyerɛw a na ɛwɔ hɔ saa bere no mu. Ná saa nhoma ahorow no bi ne nea Mose, Yosua, Samuel, Dawid, ne Solomon kyerɛwee no. Akyinnye biara nni ho sɛ, na onim adiyifo a wɔtenaa ase ansa na wɔrepaw no sɛ odiyifo no ne wɔn a na wɔwɔ ne bere so no ho nsɛm. Ɔkwan bɛn so na ade a Yeremia ankasa suae no boaa no?

15. Ɔkwan bɛn so na ɛbɛyɛ sɛ Elia nkɔmhyɛ no mu nhwehwɛmu a Yeremia yɛe no boaa no?

¹⁵ Yeremia na ɔkyerɛw Ɔhene Ahab a na odi ade wɔ Samaria no yere Yesebel otirimɔdenfo no ho nsɛm. Ne nsɛm a ɔkyerɛwee no bi ne asɛm a Elia kae sɛ akraman na ebedi Yesebel nam wɔ Yesreel asase so no. (1 Ahe. 21:23) Wunim sɛ bɛyɛ mfe 14 akyi no, wɔtow Yesebel faa mfɛnsere mu maa Yehu pɔnkɔ twiw faa no so, na akraman dii ne nam sɛnea Yeremia kyerɛwee no pɛpɛɛpɛ. (2 Ahe. 9:31-37) Elia nkɔmhyɛ no mu nhwehwɛmu a Yeremia yɛe ne sɛnea nkɔmhyɛ no mu nsɛm nyinaa baa mu pɛpɛɛpɛ no na ɛbɛyɛ sɛ ɛmaa Onyankopɔn asɛm mu gyidi a na ɔwɔ no mu yɛɛ den. Nokwarem no, nea na Yehowa ayɛ wɔ mmere a atwam no ho ade a odiyifo no suae no na ɛhyɛɛ ne gyidi den ma otumi kɔɔ so yɛɛ n’adwuma no.

16, 17. Wususuw sɛ dɛn nti na Yeremia tumi kɔɔ so bɔɔ ahemfo a wɔn tirim yɛ den a na wɔwɔ ne bere so no kɔkɔ?

¹⁶ Ma yensusuw nhwɛso foforo ho. Ɛmfa ho sɛ na wɔretaa Yeremia no, wususuw sɛ dɛn na ɛma otumi kɔɔ so bɔɔ ahemfo a na wɔn tirim yɛ den te sɛ Yehoiakim ne Sedekia no kɔkɔ? Ade titiriw a ɛmaa Yeremia tumi yɛɛ saa ne sɛ, Yehowa maa no yɛe sɛ “kurow a wɔabɔ ho ban ne dade dum ne kɔbere afasu” wɔ Yuda ahemfo no anim. (Yer. 1:18, 19) Nanso, mommma yɛn werɛ mmfi sɛ na Yeremia ayɛ Yuda ne Israel ahemfo a wodii kan bae no ahenni mu nsɛm ho nhwehwɛmu akɔ akyiri. Ná wakyerɛw ato hɔ sɛ Manase asisi ‘afɔremuka ama ɔsoro asafo nyinaa wɔ Yehowa fie adiwo abien hɔ,’ na na Manase de n’ankasa ba abɔ afɔre wɔ ogya mu ahwie mogya a edi bem pii agu. (2 Ahe. 21:1-7, 16; monkenkan Yeremia 15:4.) Nanso, ɛbɛyɛ sɛ na Yeremia nim sɛ bere a Manase brɛɛ ne ho ase na ɔkɔɔ so bɔɔ Yehowa mpae no, Yehowa ‘tiee ne nkotɔsrɛ,’ na ɔsan de no sii n’ahenni so.—Monkenkan 2 Beresosɛm 33:12, 13.

¹⁷ Yeremia anka mmɔborɔhunu a Yehowa daa no adi kyerɛɛ Manase no ho asɛm wɔ nhoma ahorow a ɔkyerɛwee no mu. Nanso, Manase wu akyi mfe 15 pɛ anaa nea ɛte saa na Yeremia fii ase hyɛɛ nkɔm. Enti, ɛbɛyɛ sɛ Yeremia tee nea esii bere a ɔhene no sakra fii n’amumɔyɛ ho no. Nneɛma bɔne a Manase yɛe ne nea efii mu bae a Yeremia yɛɛ mu nhwehwɛmu no ma ohuu nea enti a mfaso wɔ so sɛ ɔka kyerɛ ahemfo bi te sɛ Sedekia sɛ wɔnhwehwɛ Yehowa mmɔborɔhunu ne n’adɔe. Ɔhene a na wagye dimmɔne wɔ abosonsom ne mogyahwiegu mu no mpo tumi sakrae ma wɔde ne bɔne kyɛɛ no. Sɛ wone Yeremia a, so anka Manase ho nsɛm no bɛhyɛ wo nkuran ma woakɔ so ayɛ adwuma bere a na ahemfo foforo a wɔn tirim yɛ den redi tumi no?

18. Dɛn na na Yeremia betumi asua afi Uriya asɛm no mu, na dɛn nti na wubua saa?

¹⁸ Bere a na Yeremia reyɛ ne nkɔmhyɛ adwuma no, akyinnye biara nni ho sɛ, osuaa biribi fii sɛnea ne beresofo no yɛɛ wɔn ade wɔ tebea ahorow bi mu no mu. Wɔn mu biako ne odiyifo Uriya a ɔhyɛɛ nkɔm tiaa Yerusalem ne Yuda wɔ bere a na Yehoiakim redi tumi no. Nanso, esiane sɛ na Uriya suro Ɔhene Yehoiakim nti, oguan kɔɔ Egypt. Ɛno akyi no, ɔhene no somaa mmarima bi ma wɔkɔfaa Uriya fii Egypt bae, na ɔma wokum no. (Yer. 26:20-23) Wususuw sɛ Yeremia suaa biribi fii nea ɛtoo Uriya no mu? Ɔsɛe a na ɛreba Yudafo so ho kɔkɔbɔ a Yeremia kɔɔ so de maa wɔn, ná mpo ɔyɛɛ saa wɔ asɔrefie hɔ no, da no adi sɛ osuaa biribi fii mu. Yeremia kɔɔ so daa akokoduru adi, na Yehowa annyaw no. Ɛbɛyɛ sɛ Onyankopɔn kaa Safan ba Ahikam koma ma ɔbɔɔ Yeremia a na ɔyɛ ɔkokodurufo no ho ban.—Yer. 26:24.

19. Dɛn na Yeremia tumi hui wɔ Yehowa ho bere a ɔsomaa adiyifo kɔɔ ne nkurɔfo nkyɛn mpɛn pii no?

¹⁹ Yeremia san suaa biribi fii sɛnea Yehowa de no dii dwuma ma ɔbɔɔ ne nkurɔfo kɔkɔ no mu. Wɔ Ɔhene Yehoiakim ahenni afe a ɛto so anan no mu no, Yehowa ka kyerɛɛ Yeremia sɛ ɔnkyerɛw nsɛm a na waka akyerɛ no fi Yosia bere so besi saa bere no nto hɔ. Dɛn nti na Onyankopɔn kaa saa asɛm yi kyerɛɛ no? Ná ɛbɛhyɛ ankorankoro nkuran ma wɔatwe wɔn ho afi bɔne ho, na wɔde wɔn bɔne afiri wɔn. (Monkenkan Yeremia 36:1-3.) Yeremia a na ɔsɔre anɔpahema de Onyankopɔn asɛm kɔbɔ nkurɔfo no kɔkɔ no mpo srɛɛ wɔn sɛ wonnyae atantanne a na wɔreyɛ no. (Yer. 44:4) So ɛnna adi pefee sɛ nea Yeremia ankasa faa mu no ma ohui sɛ ayamhyehye a Onyankopɔn wɔ ma ne nkurɔfo nti na ɔsomaa adiyifo no? So ɛno amma Yeremia ankasa yam anhyehye no? (2 Be. 36:15) Enti, wubetumi ahu nea enti a bere a Yeremia nyaa ne ti didii mu wɔ Yerusalem sɛe no mu no, ɔkaa asɛm a edi hɔ yi sɛ: “Yehowa adɔe nti na yɛn ase nhyewee, efisɛ ne mmɔborɔhunu to rentwa da. Ɛyɛ foforo anɔpa biara.”—Kwa. 3:22, 23.

20. Dɛn na wubetumi ayɛ de asuasua Yeremia bere a worehwehwɛ Yehowa no?

²⁰ Sɛ woresisi gyinae da biara da a, so ɛyɛ a wudwen Onyankopɔn apɛde a wobɛyɛ ho ma enti wubisa sɛ, “Yehowa wɔ he?” (Yer. 2:6-8) Yeremia anyɛ n’ade te sɛ Yudafo a na wɔwɔ ne bere so no, na mmom ɔhwehwɛɛ ade nyinaa so Tumfoɔ no mmoa bere nyinaa wɔ ɔkwan a na ɛsɛ sɛ ɔfa so mu. Akyinnye biara nni ho sɛ, nyansa wom sɛ ansa na yɛn mu biara besisi gyinae no, ɛsɛ sɛ yesuasua Yeremia na yɛhwehwɛ Yehowa adwene.

21. Sɛ obi kasa tia wo denneennen wɔ asɛnka mu a, mpae bɛn na wubetumi abɔ?

²¹ Ɛnyɛ nsakrae anaa biribi kɛse bi a ɛsɛ sɛ woyɛ wɔ w’asetena mu ho nko na ehia sɛ wohwehwɛ Yehowa. Sɛ nhwɛso no, sɛ woyɛ nhyehyɛe sɛ wobɛkɔ asɛnka da bi a, so ɛsɛ sɛ wohwehwɛ Yehowa? Ebia wosɔree no, na ewim tebea nye mma asɛnka. Ebia asasesin a moayɛ nhyehyɛe sɛ morekɔyɛ afie afie asɛnka wom saa da no yɛ nea motaa yɛ mu adwuma. Ebia wobɛkae sɛ ebinom wɔ saa asasesin no mu a wɔyɛɛ wɔn ho sɛ nea wɔn ani gye asɛm no ho nanso wɔde biribi yii wɔn ho ano ne afoforo nso a wobuu mo animtiaa. So wubetumi abɔ mpae saa bere no abisa sɛ, “Yehowa wɔ he?” Sɛ woyɛ saa a, ebetumi aboa wo ma woakae sɛ asɛm a worekɔka no yɛ asɛm a ɛho hia, na woahu paa sɛ ɛyɛ Onyankopɔn pɛ sɛ woka saa asɛm no. Afei, wobɛba abehu sɛ Yehowa asɛm na ɛma w’ani gye na ɛma wudi ahurusi sɛnea ɛyɛɛ Yeremia no. (Yer. 15:16, 20) Akyiri yi, sɛ wuhyia obi wɔ asɛnka mu na sɛ ɔkasa tia wo denneennen anaasɛ ohunahuna wo mpo a, wubetumi asan aka sɛnea wote nka no ho asɛm akyerɛ Onyankopɔn wɔ mpaebɔ mu. So wobɛyɛ saa? Mma wo werɛ mmfi sɛ Onyankopɔn betumi ama wo honhom kronkron sɛnea ɛbɛyɛ a wobɛyɛ w’ade wɔ ɔkwan a ɛfata so, na ɔpɛ a wowɔ sɛ wobɛka Onyankopɔn asɛm no bɛma woadi ehu a aka wo no so.—Luka 12:11, 12.

22. Dɛn nti na wobetumi asiw mpaebɔ bi kwan?

²² Ɛyɛ papa sɛ yebehu sɛ wobetumi asiw mpaebɔ bi kwan. (Monkenkan Kwadwom 3:44.) Yehowa antie Yudafo atuatewfo no mpaebɔ, efisɛ ‘woyii wɔn aso fii no ho,’ na wɔkɔɔ so yɛɛ nneɛma bɔne. (Mmeb. 28:9) Ɛbɛyɛ sɛ Yeremia huu asuade a ɛwom no pefee, na saa na ɛsɛ sɛ yɛn nso yehu: Sɛ obi anyɛ mpae a ɔbɔ ho adwuma a, obedi Onyankopɔn huammɔ, na ɛrentumi mma Onyankopɔn ntie ne mpaebɔ. Enti, ɛho hia paa sɛ yɛhwɛ yiye na yɛanyɛ biribi a ebetumi ama yɛadi Yehowa huammɔ.

23, 24. (a) Sɛ yebehu Yehowa apɛde a, dɛn na ehia sɛ yɛyɛ? (b) Dɛn na wubetumi ayɛ na ama woanya ade a w’ankasa wusua so mfaso kɛse?

²³ Mpae a yebefi yɛn komam abɔ ahwehwɛ Yehowa akwankyerɛ akyi no, ɛsɛ sɛ yɛn ankasa kɔ so sua ade, ɛno ne ɔkwan titiriw a yɛfa so hu Yehowa apɛde. Ɛnnɛ, yɛwɔ nneɛma a na Yeremia nni bi. Yɛwɔ Bible mũ no nyinaa. Sɛnea Yeremia yɛɛ nhwehwɛmu kɔɔ akyiri bere a na ɔreboaboa nsɛm a Onyankopɔn ma wɔkyerɛw too hɔ no ano no, wo nso wubetumi ahwehwɛ Onyankopɔn Asɛm no mu na woahwehwɛ n’akwankyerɛ, na woabisa sɛ, “Yehowa wɔ he?” Sɛ wohwehwɛ n’apɛde na wode wo ho to no so a, ‘wobɛyɛ sɛ dua a wɔadua wɔ nsu ho, a ne ntini tenetene kɔ asu no nkyɛn.’—Monkenkan Yeremia 17:5-8.

²⁴ Sɛ wokenkan Kyerɛw Kronkron no na wudwinnwen ho a, bɔ mmɔden sɛ wubehu nea Yehowa pɛ sɛ woyɛ wɔ tebea ahorow mu. Wubetumi ahwehwɛ nnyinasosɛm a wopɛ sɛ wokae na wode yɛ adwuma wɔ w’asetena mu. Sɛ worekenkan nsɛm a esisii tete, Onyankopɔn ahyɛde ahorow, Onyankopɔn nnyinasosɛm, ne Onyankopɔn Asɛm no mu nsɛm a nyansa wom a, wo de, hwɛ sɛnea saa nsɛm no betumi aboa wo ma woasisi gyinae wɔ w’asetena mu da biara da. Onyankopɔn betumi afa n’Asɛm no so ma woanya asɛm a wubisa sɛ, “Yehowa wɔ he?” no ho mmuae, na aboa wo ma woahu sɛnea wubedi tebea a ɛyɛ hu mpo a wubetumi ahyia no ho dwuma. Wubetumi ahu “nneɛma a wonte ase na wunnim” anaa wunsusuw ho saa wɔ Bible mu!—Yer. 33:3.

25, 26. Dɛn nti na yebetumi anya osuahu ahorow so mfaso?

²⁵ Bio nso, wubetumi asusuw osuahu ahorow ho, w’ankasa wo de ne afoforo nso de. Sɛ nhwɛso no, ebia wubehu sɛ anuanom bi nkɔ so mfa wɔn ho nto Yehowa so, sɛnea Uriya yɛe no. (2 Tim. 4:10) Wubetumi asua biribi afi nea wɔyɛe no mu, na nea ɛtoo wɔn no bi anto wo. Mma wo werɛ mmfi sɛnea Yehowa ne wo di no adɔe so no, na kae sɛ Yeremia nso ani sɔɔ ayamhyehye ne mmɔborɔhunu a Onyankopɔn daa no adi kyerɛɛ no no. Ɛmfa ho sɛnea tebea a wowom yɛ den fa no, nnya adwene sɛ Ɔsorosoroni no nnwen wo ho. Odwen wo ho, sɛnea na odwen Yeremia ho no.

²⁶ Bere a woredwinnwen sɛnea Yehowa ne ankorankoro di nnɛ ho no, wubehu sɛ ɔma yɛn akwankyerɛ da biara wɔ akwan ahorow so. Ababaa bi a ɔyɛ onuawa a ɔwɔ Japan a wɔfrɛ no Aki tee nka sɛ ɔmfata sɛ Kristoni. Da bi a na Aki ne ɔmansin sohwɛfo yere nam asɛnka mu no, Aki kae sɛ: “Mete nka sɛ Yehowa rebɛfe me afi n’anom, nanso mesensɛn n’ano, na meresrɛ no sɛ ɔmma me bere kakra.” Ɔmansin sohwɛfo yere no hwɛɛ n’anim dinn, na ɔkae sɛ: “Sɛ ɛnyɛ wo na woreka a, anka minnim da sɛ woyɛ Kristoni a ɔyɛ boturobodwo!” Akyiri yi, Aki dwinnwen asɛm a ɛhyɛ nkuran a ɔmansin sohwɛfo yere no kae no ho. Nokwarem no, ná biribiara nni hɔ a ɛkyerɛ sɛ Yehowa abu no sɛ ɔyɛ boturobodwo da. Ɛno akyi no, Aki bɔɔ Yehowa mpae sɛ: “Fa me kɔ baabiara a wopɛ. Nea wopɛ sɛ meyɛ biara no, mɛyɛ.” Saa bere no ara mu no, Aki kɔɔ ɔman bi mu, na na kuw ketewa bi wɔ hɔ a wɔka Japan kasa a na wohia obi a ɔte kasa no a obetumi atena hɔ ne wɔn asom. Nea ɛkɔbae ne sɛ, sɛɛ na saa ɔman no mu na wɔwoo Aki ma enti na ɛnyɛ den sɛ obetu akɔ hɔ akɔboa. Nanso, sɛ okodu hɔ a, ɛhe na na ɔbɛtena? Onuawa bi a na ne babea atu afi ne nkyɛn akɔtena baabi foforo maa no baabi tenae. Aki de n’asɛm no baa awiei sɛ: “Biribiara kɔɔ so pɛpɛɛpɛ te sɛ nea na wɔadi kan atoto nneɛma dedaw; ná Yehowa abue kwan bi ama me.”

27. Dɛn nti na ɛsɛ sɛ woma asɛmmisa a ɛne sɛ, “Yehowa wɔ he?” no hyɛ wo nkuran?

²⁷ Anuanom mmarima ne mmea pii betumi aka osuahu ahorow a wɔn ankasa anya a wɔtee nka sɛ Onyankopɔn maa wɔn akwankyerɛ. Ebetumi aba sɛ wonyaa akwankyerɛ a ɛte saa bere a na wɔrekenkan Bible anaa bere a na wɔn ankasa resua ade. Ebia wo nso woanya osuahu a ɛte saa pɛn. Ɛsɛ sɛ woma osuahu a ɛte saa hyɛ abusuabɔ a wo ne Yehowa wɔ no mu den, na ɛhyɛ wo nkuran ma wufi wo komam bɔ mpae daa. Nya ahotoso sɛ, sɛ da biara yɛkɔ so bisa sɛ, “Yehowa wɔ he?” a, ɔbɛkyerɛ yɛn n’akwan.—Yes. 30:21.