Tumidi Ho Apereperedi​—Dɛn Na Ebefi Mu Aba?

“APUEI YƐ APUEI, na Atɔe yɛ Atɔe, na abien no renhyia da, kosi sɛ Ɔsoro ne Asase behyia wɔ Onyankopɔn atemmu agua kɛse no anim.” Nea ɛrekɔ so nnansa yi wɔ tumidi ho apereperedi a ɛrekɔ so wɔ Apuei ne Atɔe aman horow ntam no ma Rudyard Kipling anwensɛm no yɛ te sɛ asɛm bi a wɔaka no nnansa yi ara.

Nanso, sɛ obi ka Apuei ne Atɔe apereperedi ho asɛm a, asɛmfua “Apuei” no nkyerɛ apuei fam ankasa, na saa ara na “Atɔe” nso nkyerɛ aman a wɔn nyinaa wɔ atɔe fam wɔ asase so baabi. Nnɛyi Komunist afã no nyɛ Rusia ne apuei fam Europa aman horow no nkutoo, na mmom Afrika aman horow bi ne Cuba ka ho. Eyinom mu biara nni hɔ a yebetumi aka sɛ ɛwɔ apuei fam asase so ankasa. Saa nso na “Atɔe fam” aman horow no binom ne Canada, Denmark (a Greenland ka ho) , Iceland, Norway, Australia, New Zealand ne Japan. Aman horow yi mu binom wɔ hɔ a yentumi nka sɛ wɔwɔ atɔe fam ankasa. Ɛnde, dɛn nti na nkurɔfo ka “Apuei fam ne Atɔe fam apereperedi” ho asɛm? Efisɛ mfiase no na “Ntawntawdi” no wɔ aman akɛse abien​—Rusia ne Amerika​—a biako wɔ Europa apuei fam na biako wɔ atɔe fam no ntam titiriw. Enti, sɛnea nneɛma ayɛ no, “Apuei” ne “Atɔe” no anya sɛnkyerɛnne kwan so asekyerɛ.

“AHENE” BAANU A WODI ASI

Na, wɔ Daniel ti a ɛto so 11 no mu no, Bible no nso de asɛm “benkum fam hene” ne “nifa fam hene” ka amammui tumi horow a wɔne wɔn ho di asi no ho asɛm. Mfiase no na “ahene” baanu yi wɔ Daniel nkurɔfo​—a na wɔyɛ Yehowa Nyankopɔn tete nkurɔfo ankasa nso no​—asase a ɛwɔ Mfinimfini Apuei no benkum fam ne nifa fam.

Nkɔmhyɛ no mmamu fii ase bere a Aleksander Ɔkɛseɛ no wui na wɔkyekyɛɛ Makedonia anaa Hela Ahemman no mu anan maa n’adedifo no akyi. Eyinom mu baanu, Seleuko I ne Ptoleme I, mu biako bɛyɛɛ “benkum fam hene” na biako bɛyɛɛ “nifa fam hene.” Mmarima yi mu biako na ɔhyehyɛɛ benkum fam anaasɛ kusuu fam Seleucid Ahemman no na obiako nso na ɔbɛyɛɛ Misraim a ɛwɔ nifa fam anaa kesee fam no Ptoleme Farao a odi kan no. Mfehaha pii no, wɔn a na wɔyɛ Onyankopɔn nkurɔfo asase no bɛyɛɛ nea tumi horow abien yi dii ho aperepere, bere a wɔkoe sɛ wobedi so no.

Sɛnea ɛtaa ba no, bere a bere rekɔ so no, atumi horow a “benkum fam hene” ne “nifa fam hene” no yɛɛ wɔn ho mfonini no kɔɔ so sakrae. Nanso tumidi ho ntawntawdi no kɔɔ so wɔ mfehaha no mu. Saa nkɔmhyɛ yi ka siei nso sɛ “ahene baanu” no ntam apereperedi no bɛkɔ so de abedu “awiei bere no mu.” (Daniel 11:27, 35, 40)a Ɛnnɛ yehu sɛ wiase tumidi ho apereperedi rekɔ so kɛse sen bere biara wɔ wiase no fã a ɛyɛ Komunist ne nea ɛnyɛ Komunist no ntam. So “ahene baanu” yi betumi ayɛ akuw abien a wɔresi akan yi ho mfonini anaa? Ma yɛnhwɛ.

“ABANNENNEN NYAME”

Bere a ɔkaa “awiei bere” no ho asɛm ara pɛ no, Daniel nkɔmhyɛ no toaa so sɛ:

“Na [benkam fam] hene no bɛyɛ nea ɔpɛ, na ɔbɛma ne ho so adi onyame biara so akokurokosɛm, na ɔbɛka anwonwasɛm atia anyame mu Nyankopɔn no . . . Na ɔremmu n’agyanom anyame . . . Na obedi abannennen nyame no nĩ asi wɔn ananmu, na onyame a a’agyanom nnim no no, ɔde sika ne dwetɛ ne abohene ne afɛfɛde bedi no ni.”​—Daniel 11:36-38.

Tumi akɛse abien no mu nea ɛwɔ he na akasa atia “anyame mu Nyankopɔn,” Yehowa, no kɛse, na wafrɛ nyamesom sɛ “adubɔne a ɛsɛe nkurɔfo adwene”? Wɔn mu nea ɛwɔ he na mfe pii no ɛde ne sika ayɛ atuo titiriw sen sɛ ɛbɛyɛ butru; akodi mfiri akɛse ne wimhyɛn mmom sen aduan, ntade ne nneɛma afoforo, na ɔnam saa yɛ so ahyɛ “abannennen nyame” no anuonyam? “Ɔhene” bɛn na wasom “onyame a n’agyanom nnim no”​—nyansahu kwan so akodi​—na “ɔde sika ne dwetɛ” adi no nĩ, a ɔntwentwɛn ne nan ase koraa sɛ ɔde nea ɔman no wɔ no fã kɛse no ara bɛyɛ akodi ho nneɛma anaasɛ ɔde bɛhwɛ asraafo? Akyinnye biara nni ho sɛ nnɛyi “benkum fam hene” no ne Komunist wiase a Rusia di wɔn anim no.

Wɔ 1977 mu tɔnn no, U.S. Ahobammɔ Dwumadi Kuw no gye toom sɛ Rusia asraafo na “wɔn ho yɛ den sen biara wɔ wiase, a wɔwɔ atuo ne mfiri akɛse.” Saa ahosiesie yi yɛ nea akodi ho adwene a wɔde hyɛ mmofra tirim wɔ sukuu mu nso ka ho. Wɔtwe mmerantewa a wɔadi mfe 18 nyinaa kɔ sraadi mu, ma wodi mfe abien wɔ asraafo a wɔnam fam anaa wɔn a wɔde wimhyɛn di ako mu, anaasɛ wodi mfe abiɛsa wɔ ɛpo so asraafo mu. Na kosi sɛ wobedi mfe 50 no wobetumi afrɛ wɔn ama akodi bere biara a ɛho hia, a ɛkyerɛ sɛ, mprempren no, Rusiafo ɔpepedudu pii wɔ hɔ a wɔakyerɛ wɔn akodi a wobetumi aboaboa wɔn ano ntɛmntɛm.

‘ANIM A NIFA FAM HENE NO NE NO BESI’

Esiane sɛ nnɛyi “benkum fam hene” no ne Komunist aman a Rusia di wɔn anim no nti “nifa fam hene” no renyɛ obiara sɛ aman a wɔnyɛ Komunist de, a Amerika di wɔn anim a wɔne no di asi no. Ɛdefa “ahene” yi ho no, Daniel nkɔmhyɛ no kɔ so ka sɛ: “Na awiei bere no mu na nifa fam hene no ne [benkum fam hene] no besi anim.”​—Daniel 11:40.

Ɔko no akyi no “nifa fam hene” no ‘asidi’ no fii ase brɛoo wɔ 1947 mu denam “Truman Nkyerɛkyerɛ” a na wɔpɛ sɛ “wɔde siw ano” no so. Eyi akyi, wɔ 1949 mu no, wɔhyehyɛɛ aman a wɔmpɛ komunism no fekuw a wɔfrɛ no NATO, na akyiri yi, wɔhyehyɛɛ ahobammɔ akuw afoforo. ‘Asidi’ no mu yɛɛ den wɔ Vietnam ko a ɛto so abien no mu. Nanso ɛkame ayɛ sɛ saa akodi yi ne nkogu a Atɔe fam dɔm no dii no sii adwene a “mmorɔnoma”​—wɔn a wɔwɔ Amerika ne aman horow a wɔka ne ho no mu a wɔpɛ sɛ wɔne Rusiafo siesie asomdwoe mu​—no kura no so dua sɛ ɛfata.

Nanso ɛkame ayɛ sɛ nea ɛrekɔ so wɔ amammui mu nnansa yi no kyerɛ sɛ wɔn a wɔte sɛ “akroma”​—wɔn a wɔpɛ sɛ wɔne Komunist aman no di asi ankasa​—no rehyɛ “mmorɔnoma” no so. Ɛte sɛ nea ‘asi’ a “nifa fam hene” ne “benkum fam hene” di no mu reyɛ den. Nea ɛyɛ anika no, Anglo-Amerika biakoyɛ wɔ ‘asidi’ yi mu no yɛ nea atesɛm krataa mu amanneɛbɔ yi sii so dua. “Britania Ɔmampanyin, Margaret Thatcher, a ɔne Owura Reagan yɛ adwene wɔ Kremlin mu ahotoso a onni no mu no ne NATO amampanyimfo no mu nea watumi ada ne gyinabea adi pefee. Ɔkae Yawda anadwofa [January 29, 1981] sɛ biribiara nni hɔ a ɛkyerɛ sɛ Rusia pɛ asomdwoe ankasa.” (International Herald Tribune, January 31, 1981) Faako na “nifa fam hene” no betumi ne no adi ‘asi’ akodu no yɛ ade a ɛyɛ anigye sɛ yebehu wɔ nna a ɛwɔ yɛn anim no mu.

Na, sɛnea yɛbɛhwɛ kwan no, “benkum fam hene,” a nnɛ egyina hɔ ma Komunist aman no sɔre tia saa ‘asidi’ yi. Wɔkaa eyi nso siei wɔ Daniel nkɔmhyɛ no mu, ti 11. Ma yɛnkenkan:

“Na benkum fam hene no de nteaseɛnam ne apɔnkɔfo ne ahyɛn bebree betu aba no so sɛ ahum na waba nsase no so abɛsen sɛ nsu a ayiri. . . . Na ɔbɛteɛ ne nsa nsase no so. Na obenya sika ne dwetɛ akorade.”​—Daniel 11:40-43.

NEA “BENKUM FAM HENE” NO YƐ

Nea Rusia yɛ wɔ asi a “nifa fam hene” no ne no redi nnansa yi ho no da no adi sɛ ɛnyɛ “benkum fam hene” no adwene ne sɛ ɔbɛma wɔatwiw afa no so. Efi Wiase Nyinaa Ko II so no, Rusia ‘ateɛ ne nsa’ afa “nsase” ne “akorade,” a ngo a wɔde yɛ petrol ka ho.

Sɔre a wɔsɔre tia Atɔe fam aman no ayɛ amammui kwan so nso, efisɛ aman a wɔfrɛ wɔn ho Wiase a Ɛto so Abiɛsa no mufo a bere bi a atwam no na aman afoforo di wɔn so no pii redan ako Marx amammui adwene a ɛyɛ komunist de no so. Eyi ama Rusia anya nkɛntɛnso wɔ Asia, Mfinimfini Apuei, Afrika ne kesee fam Amerika aman horow bi so. Bio nso, “benkum fam hene” no anya nkɔso kɛse wɔ nniso horow a asraafo tu gu denam Komunistfo mmoa so mu, na eyi ma otumi de n’amamui adwen ne akodi mu mmoa ne mmoa afoforo ‘kɔ nsase a ɛtete saa so.’

Bere a wɔwɔ asraafo bɛboro ɔpepem anan wɔ Rusia ne apuei fam Europa, ne ntwitwiridii 50,000, wimhyɛn a wɔde di ako 5,775, ɛpo ani akohyɛn akɛse 289 ne anyɛ yiye koraa no ɛpo ase akohyɛn 257 no, “benkum fam hene” no betumi “de nteaseɛnam ne apɔnkɔfo ne ahyɛn bebree” atu “abɛsen sɛ nsu a ayiri.”

Sɛnea amanneɛbɔ ahorow kyerɛ no Rusia asraafo wɔ Afghanistan, Cuba, Ethiopia, Iraq, Libya, Mali, Mauritania, Vietnam, Syria ne South Yemen, sɛ yɛrenka akodi ho afotufo a wɔwɔ nsase afoforo pii so no ho asɛm a. Rusia ɛpo so akohyɛn nenam ɛpo ahorow so, a Mediteranea no nso ka ho. Faako a Komunist “benkum fam hene” yi bɛkɔ ma ‘wakɔhyɛn nsase’ afoforo so no yɛ ade a daakye nkutoo na ɛbɛkyerɛ.

“AHENE” BAANU NO NYINAA BA WƆN AWIEI

Baabiara a “nifa fam hene” no ‘bɛpem so’ akodu biara, ne sɛ ebia “benkum fam hene” no betwiw afa nsase afoforo so ankasa te sɛ “nsu a ayiri” anaasɛ ɔrenyɛ saa no, ade biako yɛ nea akyinnye biara nni ho: Sɛnea Daniel nkɔmhyɛ no kyerɛ no, “ahene” no mu biara renni ne yɔnko so nkonim korakora. Ɛdefa “benkum fam hene” no ho no, nkɔmhyɛ no se: “N’awiei bɛba a obi nni hɔ a obedi aboa no.” (Daniel 11:45) Na, nkɔmhyɛ foforo a ɛte sɛ eyi ka wɔ Anglo-Amerika Wiase Tumi, a “nifa fam hene” no yɛɛ ne ho mfonini, no ho sɛ “obebubu a ɛnyɛ obi nsa na ebebu no.”​—Daniel 8:25.

Ɔkwan bɛn so na “ahene” yi bɛba wɔn awiei a “ɛnyɛ obi nsa ɛna ebebu” wɔn a “obi nni hɔ a obedi aboa”? Ɛnyɛ onipa so na wɔn awiei nam bɛba. Daniel nkɔmhyɛ no kɔ so sɛ: “Ɛbere no mu na Mikael, ɔbapɔmma kɛse a ogyina hɔ ma wo [Daniel, me enti Yehowa] man mma no bɛsɔre agyina; na ɛbɛyɛ ahohia bere a efii sɛ ɔman bae no besi bere no so ɛmmae da.” (Daniel 12:1) Mikael nyɛ obiara sɛ Yehowa hene a wapaw no Yesu Kristo. (Fa toto Adiyisɛm 12:7-10 ho.) “Ahohia bere” no ne “ahohiahia kɛse” a wɔbɔɔ din wɔ Yesu ankasa nkɔmhyɛ a ɛfa “wiase awiei” ne n’ahenni mu a ‘ɔba’ ho no mu no.​—Mateo 24:3, 21; Luka ti 21.

Nkɔmhyɛ ahorow yi a enya mmamu nnɛ no da no adi sɛ yɛte “awiei bere” no mu nnɛ. Ɛrenkyɛ Yesu bɛma Komunist “benkum fam hene” ne “nifa fam hene” a wɔnyɛ Komunistfo no aba awiei. Ampa, Ɔhene Yesu Kristo a wɔde no asi ahengua so no de “afoa nnamnam” bi “bɛbobɔ”wɔn ne amammui aman afoforo nyinaa, na ‘ɔde dade poma ayɛn wɔn.’ (Adiyisɛm 19:11-21) Na nkɔmhyɛ foforo nso a ɛyɛ nwonwa a ɛwɔ Daniel nhoma no mu no mmamu bewie du, efisɛ yɛkenkan sɛ: “Na ahene [amammui tumi horow] no nna no mu no, ɔsoro Nyankopɔn bɛma ahenni a wɔrensɛe no da, na wɔrennyaw n’ahenni mma ɔman foforo bi so, na ebebubu ahenni horow no nyinaa ama asã, na ɛno de ebegyina daa.”​—Daniel 2:34, 35, 44.

Saa ahenni no de asomdwoe a enni awiei bɛba asase so wɔ trenee nhyehyɛe foforo mu. (2 Petro 3:13; Adiyisɛm 21:1-5) Emu no, amammui “ahene” a wɔhyɛ afoforo so biara rentra hɔ. Eyi ne “ahenni” a woabɔ ho mpae no, sɛ wobɔ “Awurade Mpae” no a. (Mateo 6:9, 10) Ɛno ne adesamma anidaso koro pɛ. Yehowa Adansefo ani begye sɛ wɔbɛboa wo ma eyi ayɛ wo nso w’anidaso.

[Ase hɔ asɛm]