Mikael, Ɔbapɔmma Kɛse No Nkonimdi a Etwa To
“Ɛbere no mu na Mikael, ɔbapɔmma kɛse a ogyina hɔ ma mo man mma no bɛsɔre agyina.”—DANIEL 12:1.
1. Su bɛn na wiase sodifo pii ada no adi wɔ Onyankopɔn tumidi ho, na ɔkwan bɛn so na kusuu fam hene no nso ayɛ saa ara?
HENA ne [Yehowa] a metie ne nne na mama Israel akɔ?” (Exodus 5:2) Eyi ne nsɛm a Farao ka de twaa Mose mpoa. Bere a Farao pow sɛ obegye Yehowa Nyamesu kɛse no atom no, osii ne bo sɛ ɔbɛma Israel akɔ so atra nkoasom mu. Sodifo afoforo abu Yehowa animtiaa saa ara, na Daniel nkɔmhyɛ no mu ahemfo no nso yɛɛ saa ara. (Yesaia 36:13-20) Nokwarem no, kusuu fam hene no akɔ akyiri asen saa. Ɔbɔfo no se: “Ɔbɛma ne ho so adi onyame biara so akokurokosɛm, na ɔbɛka anwonwasɛm atia anyame mu [Nyankopɔn] no. . . . Na ɔremmu n’agyanom anyame, na ɔremmu mmea anigyede no ne onyame biara, na obedi ade nyinaa so akokurokosɛm.”—Daniel 11: 36, 37.
2, 3. Ɔkwan bɛn so na kusuu fam hene no gyaw ‘n’agyanom Nyankopɔn’ kɔsom “onyame” foforo?
2 Bere a kusuu fam hene no rema nkɔmhyɛ yi abam no, ɔpow ‘n’agyanom Nyankopɔn’ (anaa, “ne nananom anyame,” The New English Bible), sɛ́ wɔyɛ Roma abosonsomfo anyame anaa Kristoman Baasakoro nyame no. Hitler de Kristoman dii n’ankasa atirimpɔw ho dwuma, nanso nokwasɛm no kyerɛ sɛ ɔbɔɔ ne tirim sɛ ɔde Germanfo asɔre foforo bi besi Kristoman ananmu. Kusuu fam hene a odi hɔ no hyɛɛ nkurɔfo nkuran ankasa ma wogye dii sɛ Onyankopɔn biara nni hɔ. Enti kusuu fam hene no ayɛ n’ankasa ne ho onyame, na ‘wadi obiara so akokurokosɛm.’
3 Nkɔmhyɛ no toa so sɛ: “Obedi abannennen nyame no nĩ asi wɔn ananmu, na onyame a n’agyanom nnim no no, ɔde sika ne dwetɛ ne abohene ne afɛfɛde bedi no nĩ.” (Daniel 11:38) Nokwarem no, kusuu fam hene no de ne ho too nnɛyi nyansahu mu akode ahorow, “abannennen nyame no” so. Wɔ awiei bere no nyinaa mu no, wahwehwɛ nkwagye afi saa “nyame” yi hɔ, na ɔde ahonyade pii abɔ afɔre wɔ n’afɔremuka so.
4. Dɛn na kusuu fam hene no atumi ayɛ?
4 “Ɔne onyame nanani bi bebom ne abannennen a ɛyɛ den sen biara no adi ma asi no yiye. Obiara a obu no no, ɔbɛma wanya anuonyam ma abu so, na wama wadi nkurɔfo bebree so; na ɔbɛkyɛ asase no de ayɛ akatua.” (Daniel 11:39, New World Translation) Kusuu fam hene no de ne ho ato n’akodi mu “onyame nanani” no so ayɛ ade ma “asi no yiye,” na wada ne ho adi sɛ obi a ɔwɔ akodi mu ahoɔden kɛse wɔ “nna a edi akyiri” yi mu. (2 Timoteo 3:1) Ɔde amammui fam, sika fam, ne ɛtɔ da bi a, akodi fam mmoa tuaa wɔn a wogyinaa ne nhyehyɛe ahorow akyi no ka.
“Awiei Bere no Mu”
5, 6. Ɔkwan bɛn so na kesee fam hene no “apiapia” kusuu fam hene no, na dɛn na kusuu fam hene no ayɛ wɔ ho?
5 Daniel 11:40a, NW kenkan sɛ: “Awiei bere no mu na kesee fam hene no ne no bedi apiapia.” Nkurɔfo asusuw sɛ eyi ne nkyekyem a edi hɔ no benya mmamu wɔ yɛn bere yi akyi. Nanso, sɛ “awiei bere no” a wɔka ho asɛm wɔ ha no ara ne nea wɔka ho asɛm wɔ Daniel 12:4, 9 no de a, ɛnde ɛsɛ sɛ yɛhwɛ nsɛm yi mmamu kwan wɔ awiei bere no nyinaa mu. So kesee fam hene no “apiapia” kusuu fam hene no wɔ saa bere yi mu? Yiw, ɛte saa. Wɔ wiase ko a edi kan no akyi no, ɛda adi sɛ asomdwoe ho nhyehyɛe a wɔde twee kusuu fam hene no aso no yɛɛ “apiapia,” a ɛbɛma wayɛ biribi de atua ka. Bere a kesee fam hene no dii nkonim wɔ wiase ko a ɛto so abien mu akyi no, ɔde nukla akode ahorow a ɛyɛ hu ko tiaa nea ɔne no di aperepere no, na ɔhyehyɛɛ akodi mu apam a ɛyɛ den bi a wɔfrɛ no NATO de tiaa no. Mfe bi akyi no, nyansahu mu nneɛma akɛse a wɔde hu aman afoforo nsɛm mu ne afei amammuisɛm ne akodi mu ntua ahorow bɛkaa ‘n’apiapia’ no ho.
6 Dɛn na kusuu fam hene no yɛɛ wɔ ho? “[Kusuu] fam hene no de nteaseɛnam ne apɔnkɔfo ne ahyɛn bebree betu aba no so sɛ ahum na waba nsase no so abɛsen sɛ nsu a ayiri.” (Daniel 11:40b) Kusuu fam hene no atrɛw ne tumidi mu wɔ nna a edi akyiri yi abakɔsɛm mu. Wɔ wiase ko a ɛto so abien mu no, Nasi “hene” no yiri traa n’ahye so kɔɔ aman a atwa ne ho ahyia mu. Wɔ ɔko no akyi no, ‘ɔhene’ a obesii n’ananmu no kyekyee ahemman bi a ɛyɛ den wɔ aman afoforo so. Wɔ Amerika ne Apuei Fam aman ntam ntawntawdi no mu no, kusuu fam hene ne kesee fam hene no gyinaa aman a wɔne wɔn ho di ako, ne atua a wɔtew tia nniso wɔ Afrika, Asia, ne Latin Amerika akyi ne wɔn ho koe. Ɔtee nokware Kristofo, brɛɛ wɔn dwumadi ase (nanso wantumi ansiw wɔn ano ɔkwan biara so). Na n’akodi ne n’amammui ntua ahorow no ma onyaa aman bi so tumi. Saa ara na ɔbɔfo no hyɛɛ nkɔm: “Na ɔbɛba asase Fɛfɛ [Onyankopɔn nkurɔfo honhom mu tebea] no so, na nnipa bebree bɛtotɔ.”—Daniel 11:41a.
7. Aman bɛn na kusuu fam hene no antumi anni so?
7 Nanso, ɛmfa ho sɛ—wɔ kesee fam hene no ani so no—kusuu fam hene no ada ne ho adi sɛ obi a ne ho yɛ den no, ontumi nnii wiase nyinaa so. “Eyinom befi ne nsam afi: Edom ne Moab ne Amonfo mu fã kɛse.” (Daniel 11:41b) Wɔ tete mmere mu no, na Edom, Moab, ne Amon wɔ Misraim ne Siria ntam baabi. Yebetumi de wɔn agyina hɔ ama nnɛyi aman ne ahyehyɛde ahorow a kusuu fam hene no de n’ani sii so nanso wantumi anni so no.
‘Misraim Remfi mu Mfi’
8, 9. Nkɛntɛnso bɛn na kusuu fam hene no anya, wɔ kesee fam hene no mpo so?
8 Ɔbɔfo no toa so sɛ: “Ɔbɛteɛ ne nsa nsase no so na Misraim asase remfi mu mfi, na obenya sika ne dwetɛ akorade ne Misraim afɛfɛde nyinaa adi so, na Libiafo ne Etiopiafo bedi n’anammɔn akyi.” (Daniel 11:42, 43) Kesee fam hene no, “Misraim,” mpo antumi ankwati nea efi kusuu fam hene no nhyehyɛe a ɔyɛ de trɛw ne tumidi mu bae no. Sɛ́ nhwɛso no, kesee fam hene no dii nkogu kɛse wɔ Vietnam. Na “Libiafo ne Etiopiafo” no nso ɛ? Saa aman a na ɛbɛn tete Misraim yi betumi agyina hɔ ama aman a faako a ɛwɔ no bɛn nnɛyi “Misraim,” a ɛtɔ mmere bi a edi kusuu fam hene no ‘anammɔn’ akyi no.
9 So kusuu fam hene no adi ‘Misraim akorade’ so? Ɛda adi sɛ onnii kesee fam hene no so, na ɛde besi 1993 no, wiase nsɛm tebea akyerɛ sɛ ebia ɔrenyɛ saa. Nanso wanya ɔkwan a kesee fam hene no de ne sika di dwuma no so nkɛntɛnso kɛse. Esiane kusuu fam hene no ho suro nti, kesee fam hene no sɛe sika kɛse afe biara na ama wanya asraafo dɔm, akohyɛnkuw, ne wimhyɛn a ɛyɛ den a wɔde di ako. Wɔ eyi mu no, yebetumi aka sɛ kusuu fam hene no ‘adi’ sɛnea kesee fam hene no de ne sika di dwuma no “so.”
Kusuu Fam Hene no Ɔsatu a Etwa To
10. Ɔbɔfo no kyerɛkyerɛ ahemfo baanu no ntam apereperedi no awiei mu dɛn?
10 So ahemfo baanu yi ntam apereperedi no bɛkɔ so daa? Dabi. Ɔbɔfo no ka kyerɛɛ Daniel sɛ: “Nsɛm a [kusuu fam hene no bɛte] afi apuei ne benkum fam beyi no hu, na ɔde anibere kese befi akɔ sɛ ɔkɔsɛe na wadwerɛw nnipa bebree. Na obesi n’ahemfi ntamadan ɛpo [kɛse no] ne bepɔw fɛfɛ kronkron no ntam, nanso n’awiei bɛba a obi nni hɔ a obedi aboa no.”—Daniel 11:44, 45.
11, 12. Amammui mu nsɛm a esisi nnansa yi ara bɛn na ɛfa kusuu fam hene ne kesee fam hene ntam apereperedi no ho, na nneɛma bɛn na yennya nhui?
11 Saa nsɛm yi nnya nsisii, enti yentumi nka ɔkwan a nkɔmhyɛ no bɛfa so anya mmamu no ho nsɛm pii. Nnansa yi, ahemfo baanu no ntam amammuisɛm asakra. Apereperedi kɛse a na ɛkɔ so wɔ United States ne Europa Apuei Fam aman ntam no ano adwo. Afei nso, woguu Soviet Union wɔ 1991 mu na enni hɔ bio.—Hwɛ March 1, 1992 Ɔwɛn-Aban, nkratafa 4, 5.
12 Enti mprempren, hena ne kusuu fam hene no? So ɛyɛ aman a na wɔka kan Soviet Union ho no biako anaa? Anaasɛ nea ogyina hɔ ma no no resakra koraa sɛnea ayɛ mpɛn pii no? Yentumi nkyerɛ. Hena na ɔbɛyɛ kusuu fam hene no bere a Daniel 11:44, 45 benya ne mmamu no? So ahemfo baanu no ntam apereperedi no mu bɛyɛ den bio? Na nukla akode akɛse a ɛda so ara wɔ aman pii mu no nso ɛ? Daakye na yebehu eyinom nyinaa.
13, 14. Dɛn na yenim wɔ ahemfo baanu no daakye ho?
13 Ade biako na yenim. Ɛnkyɛ, “nsɛm a” kusuu fam hene ‘bɛte afi apuei ne benkum fam a ebeyi no hu’ no bɛkanyan no ma watu ɔsa atia nkurɔfo. Saa ɔsatu yi de “n’awiei” bɛba ntɛm. Sɛ yesusuw Bible nkɔmhyɛ afoforo ho a, yebetumi asua pii afa “nsɛm” a ɔbɛte no ho.
14 Nanso, nea edi kan no, hyɛ no nsow sɛ wanka sɛ kusuu fam hene no bɛyɛ saa nneɛma yi atia kesee fam hene no. Ɛnyɛ nea ɔne no di aperepere kɛse no na ɔbɛsɛe no. Saa ara na ɛnyɛ kusuu fam hene no na ɔbɛsɛe kesee fam hene no. ‘Ɛnyɛ onipa nsa,’ na mmom Onyankopɔn Ahenni na ɛbɛsɛe kesee fam hene (a wɔde abɛn a etwa to a aboa bi nya gyina hɔ ma no wɔ nkɔmhyɛ afoforo mu) no. (Daniel 7:26; 8:25) Nokwarem no, awiei koraa no, Onyankopɔn Ahenni bɛsɛe asase so ahene nyinaa wɔ Harmagedon ko no mu, na ɛda adi sɛ ɛno na ɛbɛba kusuu fam hene no so. (Daniel 2:44; 12:1; Adiyisɛm 16: 14, 16) Daniel 11:44, 45 kyerɛkyerɛ nsɛm a ebesisi ma akowie ɔko a etwa to no mu. Ɛnyɛ nwonwa sɛ, sɛ kusuu fam hene no awiei du a, “obi nni hɔ a obedi aboa no”!
15. Nsemmisa a ɛho hia bɛn na aka a ɛsɛ sɛ yesusuw ho?
15 Ɛnde, nkɔmhyɛ afoforo bɛn na ɛkyerɛkyerɛ “nsɛm” a ɛkanyan kusuu fam hene no ma ofi adi sɛ ‘ɔkɔsɛe nnipa bebree,’ no mu? Na henanom ne “bebree” a ɔbɛpɛ sɛ ɔsɛe wɔn no?
Asɛm a Efi Apuei Fam
16. (a) Adeyɛ titiriw bɛn na ɛsɛ sɛ esi ansa na Harmagedon aba? (b) Henanom ne “ahene a wofi owia apuei” no?
16 Ansa na ɔko a etwa to, Harmagedon bɛba no, ɛsɛ sɛ wɔsɛe nokware som tamfo kɛse bi—Babilon Kɛse a ɔte sɛ aguaman, wiase nyinaa atoro som ahemman no. (Adiyisɛm 18:3-8) Onyankopɔn abufuw kuruwa a ɛto so asia a wohwie gu sɛnkyerɛnne kwan so Eufrate asubɔnten mu no twa ne sɛe ho mfonini. Asubɔnten no yow, “na wɔasiesie kwan ama ahene a wofi owia apuei nohɔ.” (Adiyisem 16:12) Henanom ne saa ahene yi? Ɛnyɛ obiara sɛ Yehowa Nyankopɔn ne Yesu Kristo!a
17. (a) Dɛn na Bible no kyerɛ yɛn wɔ Babilon Kɛse no sɛe ho? (b) Dɛn na ebetumi ayɛ asɛm a ‘efi apuei fam’ no?
17 Wɔkyerɛkyerɛ Babilon Kɛse sɛe no mu pefee wɔ Adiyisɛm nhoma no mu: “Mmɛn du a wuhui no [‘ahemfo’ a wodi ade wɔ awiei bere no mu no], ne aboa no [aboa kɔkɔɔ a ogyina hɔ ma Amanaman Nkabom ahyehyɛde no], wɔn na wɔbɛtan aguaman no, na wɔayɛ no pasaa, na wada adagyaw, na wɔadi ne nam, na wɔde ogya ahyew no.” (Adiyisɛm 17:16) Nokwarem no, amanaman no ‘sɛe nam bebree’! (Daniel 7:5) Nanso dɛn nti na ahemfo, a kusuu fam hene ka ho no bɛsɛe Babilon Kɛse no? Efisɛ ‘Onyankopɔn de hyɛ wɔn komam sɛ wɔmma ne tirim asɛm mmra mu.’ (Adiyisɛm 17:17) Asɛm a ‘efi apuei fam’ yi betumi akyerɛ Yehowa adeyɛ, a ɔnam ɔkwan a n’ankasa paw so de hyɛ nnipa akannifo komam sɛ wɔnsɛe nyamesom mu aguaman kɛse no, ma afata.—Daniel 11:44.
Asɛm a Efi Kusuu Fam
18. Hena bio na kusuu fam hene no de n’ani si no so, na ɛhe na eyi de no gyina bere a n’awiei ba no?
18 Nanso kusuu fam hene no da n’abufuw adi wɔ biribi foforo so. Ɔbɔfo no ka sɛ “obesi n’ahemfi ntamadan ɛpo [kese no] ne bepɔw fɛfɛ kronkron no ntam.” (Daniel 11:45) Wɔ Daniel bere so no, na Mediteranea ne ɛpo kɛse no, na bepɔw kronkron no ne Sion, faako a bere bi na Onyankopɔn asɔrefi wɔ no. Enti, wɔ nkɔmhyɛ no mmamu mu no, kusuu fam hene a wafa abufuw no tu Onyankopɔn nkurɔfo so sa! Ɛnnɛ, wɔ honhom mu ntease mu no, ‘ɛpo kɛse no ne bepɔw kronkron no ntam’ a ogyina no yɛ Onyankopɔn asomfo a wɔasra wɔn, a wofi “ɛpo” a ɛne adesamma a wɔatew wɔn ho afi Onyankopɔn ho mu, na wɔn anidaso ne sɛ wɔne Yesu Kristo bedi hene wɔ ɔsoro Sion Bepɔw so no honhom mu tebea.—Yesaia 57:20; Hebrifo 12:22; Adiyisɛm 14:1.
19. Sɛnea Hesekiel nkɔmhyɛ no kyerɛ no, yɛbɛyɛ dɛn atumi ahu faako a asɛm a ɛkanyan Gog ntua no fi? (Hwɛ ase hɔ asɛm no.)
19 Hesekiel a ɔtraa ase wɔ Daniel bere so no nso hyɛɛ Onyankopɔn nkurɔfo a wɔbɛto ahyɛ wɔn so wɔ “nna a edi akyiri no” mu ho nkɔm. Ɔkae sɛ Gog a ofi Magog, a ogyina hɔ ma Satan Ɔbonsam, na ɔde saa ɔtaa no bɛba. (Hesekiel 38:16) Wɔ sɛnkyerɛnne kwan so no, ɛhe na Gog fi ba? Yehowa nam Hesekiel so ka sɛ: “Wubefi wo trabea [kusuu] fam ano nohɔ tɔnn aba.” (Hesekiel 38:15) Enti, asɛm a ‘efi kusuu fam’ no betumi ayɛ Satan akwan a ɔfa so kanyan kusuu fam hene no ne ahemfo afoforo no nyinaa ma wɔtow hyɛ Yehowa nkurɔfo so no ma afata.b—Fa toto Adiyisɛm 16:13, 14; 17:14 ho.
20, 21. (a) Dɛn nti na Gog bɛkanyan amanaman no ne kusuu fam hene no ma wɔato ahyɛ Onyankopɔn nkurɔfo so? (b) So obedi nkonim wɔ ne ntua no mu?
20 Esiane sɛ “Nyankopɔn Israel,” ne nnipakuw kɛse no mu nguan foforo no nyinaa nyɛ Gog wiase no fã bio nti na ɔde ntua kɛse yi ba wɔn so no. (Galatifo 6:16; Yohane 10:16; 17:15, 16; 1 Yohane 5:19) Gog de ahoɔyaw na ɛhwɛ “ɔman a wɔaboaboa wɔn ano afi amanaman mu, a wɔrenya [honhom mu] ahode ne agyapade” no. (Hesekiel 38: 12, NW; Adiyisɛm 5:9; 7:9) Wɔ saa nsɛm yi mmamu mu no, Yehowa nkurɔfo renya wɔn ho nnɛ sen bere biara a atwam. Wɔ Europa, Afrika, ne Asia aman pii a na wɔabara wɔn wɔ hɔ no, wɔde ahotɔ som mprempren. Efi 1987 kosi 1992 no, “ade a wɔpɛ” bɛboro ɔpepem biako fi amanaman no mu baa Yehowa fie, beae a wɔde ɔsom kronn ma no. Wodi yiye na wɔwɔ asomdwoe wɔ honhom fam.—Hagai 2:7; Yesaia 2:2-4; 2 Korintofo 8:9.
21 Bere a Gog hu Kristofo honhom mu tebea no sɛ “asase a ano da hɔ,” a ɛyɛ mmerɛw sɛ obetumi adi so no, ɔyere ne ho denneennen sɛ obeyi eyinom afi hɔ na ama watumi adi adesamma nyinaa so. (Hesekiel 38:11) Nanso odi nkogu. Sɛ asase so ahene no tow hyɛ Yehowa nkurɔfo so a, ɛde ‘wɔn awiei bɛba.’ Ɔkwan bɛn so?
Ɔhene a Ɔto so Abiɛsa
22, 23. Sɛ Gog to hyɛ Onyankopɔn nkurɔfo so a, hena na obegyina hɔ ama wɔn, na dɛn na ebefi mu aba?
22 Hesekiel ka sɛ Gog ntua no yɛ sɛnkyerɛnne a ɛbɛma Yehowa Nyankopɔn asɔre adi ama ne nkurɔfo na wasɛe Gog dɔm no wɔ “Israel mmepɔw so.” (Hesekiel 38:18; 39:4) Eyi kae yɛn nea ɔbɔfo no ka kyerɛ Daniel no: “Ɛbere no mu na Mikael, ɔbapɔmma kɛse a ogyina hɔ ma wo man mma no bɛsɔre agyina; na ɛbɛyɛ ahohia bere a efii sɛ ɔman bae no besi bere no so ɛmmae da, na ɛbere no mu na wobegye wo manfo afi mu, obiara a wobehu sɛ wɔakyerɛw ne din nhoma no mu no.”—Daniel 12:1.
23 Wɔ 1914 mu no, Yesu—ɔsoro kofo Mikael—bɛyɛɛ Onyankopɔn soro Ahenni no so hene. (Adiyisɛm 11:15; 12:7-9) Efi saa bere no, wasɔre agyina hɔ ‘ama Daniel man mma.’ Nanso, ɛnkyɛ, ‘ɔbɛsɔre agyina’ wɔ Yehowa din mu sɛ Ɔhene-Kofo a wontumi nni no so nkonim, na “wadi wɔn a wonnim Nyankopɔn ne wɔn a wɔantie yɛn Awurade Yesu asɛmpa no were.” (2 Tesalonikafo 1:8) Asase so aman nyinaa, a Daniel nkɔmhyɛ no mu ahemfo no nyinaa ka ho, “besu.” (Mateo 24:30) Bere a wɔda so ara wɔ ‘Daniel nkurɔfo no’ ho adwemmɔne no, ‘Mikael, ɔbapɔmma kɛse no’ besɛe wɔn pasaa.—Adiyisɛm 19:11-21.
24. Ɛsɛ sɛ Daniel nkɔmhyɛ ho adesua yi ka yɛn dɛn?
24 So yɛn ho mpete yɛn sɛ yebehu nkonim kɛse a Mikael ne ne Nyankopɔn, Yehowa bedi no? Saa nkonimdi no bɛkyerɛ ‘ogye,’ nkwagye, ama nokware Kristofo. (Fa toto Malaki 4:1-3 ho.) Enti, bere a yɛde akwanhwɛ a emu yɛ den twɛn daakye no, yɛkae ɔsomafo Paulo nsɛm yi: “Pae mu ka asɛm no, gyina mu ɛbere a eye ne nea enye mu.” (2 Timoteo 4:2) Momma yenkura nkwa asɛm no mu pintinn na yɛmfa nsi nhwehwɛ Yehowa nguan bere a yɛda so ara wɔ bere a eye mu no. Yɛreyɛ adu nkwa mmirikatu no awiei. Yɛabɛn akatua no. Ɛmmra sɛ obiara besi ne bo sɛ obegyina mu akosi awiei, na ɔno nso anya nkwa.—Mateo 24:13; Hebrifo 12:1.
[Ase hɔ asɛm]
a Hwɛ Adiyisɛm—N’awiei Koraa Abɛn! a Watchtower Bible and Tract Society of New York, Inc. na wotintimii no, nkratafa 229-30.
b Ɔkwan foforo so no, asɛm a ‘efi kusuu fam’ no betumi ayɛ nea efi Yehowa hɔ, esiane ne nsɛm yi a ɔka kyerɛ Gog no nti: “Na ɛbɛba sɛ mede akɔtɔkorɔ . . . bewurawura w’afono mu, na mede wo aba.” “Mema . . . woatu afi kusuu fam ano nohɔ tɔnn aba, na mede wo maba Israel mmepɔw so.”—Hesekiel 38:4; 39:2, NW; fa toto Dwom 48:2 ho
So Wote Ase?
◻ Ɔkwan bɛn so na kesee fam hene no wɔ awiei bere yi nyinaa mu?
◻ Dɛn na yennya nhui wɔ nea ebefi ahemfo baanu no apereperedi no mu aba no ho?
◻ Nneɛma abien bɛn na ebesisi ansa na Harmagedon aba a sɛnea ɛte biara no, ɛbɛka kusuu fam hene no?
◻ Ɔkwan bɛn so na “Mikael, ɔbapɔmma kɛse” no bɛbɔ Onyankopɔn nkurɔfo ho ban?
◻ Dɛn na ɛsɛ sɛ yɛyɛ wɔ nkɔmhyɛ a yɛasua ho ade no ho?
[Mfonini wɔ kratafa 19]
Kusuu fam hene no agyaw n’agyanom anyame akɔsom onyame foforo
[Mfonini wɔ kratafa]
Atifi hɔ benkum ne mfinimfini: UPI/Bettmann; ase hɔ benkum: Reuters/Bettmann ase hɔ nifa: Jasmin/Gamma Liaison