Nna A Edi Akyiri​—Dɛn Na Edi Hɔ?

“Nokware mise mo sɛ, awo ntoatoaso yi rentwam, gye sɛ eyinom nyinaa aba mu ansa.”​—Yesu Kristo, Mateo 24:34.

ERE a Yesu rekyerɛkyerɛ “wiase awiei ho sɛnkyerɛnne” no mu no na ɔkaa asɛm a wɔafa aka wɔ atifi hɔ no kyerɛɛ n’asuafo a wɔn ho adwiriw wɔn no. (Mateo 24:3) Afei dɛn pɔtee na na Yesu de asɛm “awo ntoatoaso” no kyerɛ? Na nsɛm a ebesisi bɛn na na ɛde nneɛma nhyehyɛe no awiei bɛba? Ɔkwan foforo so no, nsɛm bɛn na ɛsɛ sɛ yɛhwɛ kwan nnansa yi ara?

Awo Ntoatoaso Betumi Agye Bere Tenten Bɛn?

The American Legion Magazine daa no adi sɛ U.S. mmarima ne mmea 4,743,826 na wɔde wɔn ho hyɛɛ Wiase Ko I mu. Nanso wɔ 1984 mu no na 272,000 pɛ na wɔte ase, na sɛ wɔkyekyem a akron wu dɔnhwerew biara. Ɛnde, so ɛno kyerɛ sɛ 1914 awo ntoatoaso no afi hɔ dedaw anaa?

Hela asɛmfua ma awo ntoatoaso no ne geneá a Mateo, Marko, ne Luka de dii dwuma wɔ Yesu nsɛm no a wɔkyerɛwee no mu no. Ebetumi anya ntease afoforo sɛnea nsɛm afoforo a ɛka ho no kyerɛ. Nanso, The New International Dictionary of New Testament Theology kyerɛ ase sɛ: “Wɔn a wɔwo wɔn bere koro mu . . . Nea ɛka eyi ho ne ntease a ɛne: Obi bere sofo nyinaa sɛ kuw, bere bi.” A Greek-English Lexicon of the New Testament kyerɛ sɛ: “Wɔn a wɔwo wɔn bere koro mu nkabom, wɔbae mu ma ɛka wɔn a wɔte ase wɔ bere pɔtee bi mu awo ntoatoaso, bere sofo bi nyinaa.” Saa nkyerɛase ahorow yi de wɔn a wɔwoo wɔn wɔ abakɔsɛm mu asɛm bi a esii bere mu ne wɔn na wɔte ase saa bere no mu no ka ho.

J. A. Bendel ka wɔ ne New Testament Word Studies no mu sɛ: “Hebrifo . . . bu mfe aduɔson anum sɛ awo ntoatoaso biako, na asɛm rentwam no kyerɛ sɛ saa awo ntoatoaso no [Yesu bere so de no] fã kɛse ankasa, na mmom ɛnyɛ ne nyinaa, bɛyɛ nea atwam ansa na ne nyinaa anya mmamu.” Eyi bɛyɛɛ nokware wɔ 70 Y.B. mu bere a wɔsɛee Yerusalem no.

Saa ara nso na ɛte nnɛ sɛ 1914 awo ntoatoaso no mufo pii atwam. Nanso, ɔpepem pii da so wɔ asase so a wɔwoo wɔn saa afe no mu anaasɛ ansa na ɛreba. Na ɛwom sɛ wɔn dodow no so rehuan de, nanso Yesu nsɛm no bɛyɛ nokware sɛ, “awo ntoatoaso yi rentwam gye sɛ eyinom nyinaa ayɛ ansa.” Eyi yɛ ntease foforo nso a yɛde gye di sɛ Yehowa da a ɛte sɛ owifo no bɛba ɔkwan biara so. Enti, nsɛm a ebesisi bɛn na ɛsɛ sɛ Kristofo a wɔn ani da wɔn ho so no hwɛ kwan?

“Asomdwoe ne Ahotɔ” Nnansa yi Ara?

“Mo ankasa munim yiye sɛ [Yehowa] da no bɛba sɛ owifo ba anadwo. Na bere a wɔbɛka sɛ: Yɛwɔ asomdwoe ne ahotɔ, no, ɛnde mpofirim na ɔsɛe bɛba wɔn so.”​—1 Tesalonikafo 5:2, 3.

Efi bere a Wiase Ko II baa awiei wɔ 1945 mu no, adesamma rehim so wɔ ɔko pon ano bere a tumi abien a wɔsɔre tia wɔn ho, United States ne Rusia, ne wɔn ho wɔn ho di asi no. Ná 1962 mu Cuba bɛmma ho asɛnnennen no yɛ ntawntawdi tee a ɛyɛ hu. Nanso Rusia san de ne bɛmma fii Cuba kɔe, na United States yii ne bɛmma fii Turkey komm. Ná eyi yɛ nea ɛkyerɛ sɛ Ɔko Nwininwini no rekɔ so no mu biako pɛ.

Akode a wobegyae yɛ yɛ asɛmti a wɔagye ho akyinnye mfe du du pii na mpɛn pii no akowie nea aman abien no mu biara gyina so keka ne nsɛm mu. Mprempren, wɔ Ɔmampanyin Reagan adedi asram a ɛresa ne Ɔkyerɛwfo Gorbachev glasnost (nsɛm so a wommuamua) amammui tebea a wogow nsɛm mu no mu no, ɛte sɛ nea wɔreka nuklea akode tebea no a wɔbɛma emu ayɛ mmerɛw no ho asɛm anibere so. Sɛ́ eyi yɛ nnianim a ɛde wiase nyinaa asomdwoe ne ahotɔ a wɔkyerɛ no bɛba no de, yɛrentumi nhu nsie. Nanso nea Bible nkɔmhyɛ ka no nti, ɛno ne nea Kristofo rehwɛ kwan. Sɛ enya ba a, ɛnde dɛn?

Bible asuafo a wɔhwɛ ade yiye remma “bere a wɔbɛka sɛ: Yɛwɔ asomdwoe ne ahotɔ” no nnaadaa wɔn​—sɛ ɛyɛ nea efi Amanaman Nkabom no hɔ anaasɛ efi tumi akɛse no ankasa hɔ no. Bible no kyerɛ pefee sɛ nokware asomdwoe ne ahotɔ nam trenee nniso, Onyankopɔn Ahenni nniso a ɛnam Kristo so no nkutoo so na ebetumi aba.

Ne saa nti daakye asase so nyinaa amanneɛbɔ titiriw bi a ɛfa asomdwoe ne ahotɔ ho a wiase akannifo de bɛba no bɛyɛ sɛnkyerɛnne a Onyankopɔn de bɛyɛ ade, “sɛnea owifo ba anadwo” no na abefi wiase a ennye nni no mpaase. Yiw, ‘mpofirim ɔsɛe’ bɛba asɔfo ne amammui tumi horow a wɔpow Yehowa ne n’adansefo no so saa bere no. Yɛyɛ dɛn hu eyi?

Ɔpɔnkɔ Fitaa no Sotefo no Dwumadi a Wɔde hu Ano

Sɛ yɛsan kɔ Adiyisɛm mu apɔnkɔ sotefo baanan no so bio a, biako wɔ hɔ a yɛmmɔɔ ne din​—nea odi kan a ɔte ɔpɔnkɔ fitaa so no. Bible kyerɛwfo no ka ne ho asɛm sɛ: “Mihui, na hwɛ, ɔpɔnkɔ fitaa bi ni, na nea ɔte ne so no kura ta. Na wɔmaa no abotiri, na ofii adi a ɔrekodi nkonim na wakodi nkonim.” Oyi ara na wɔka ne ho asɛm wɔ Adiyisɛm ti 19 no: “Hwɛ, ɔpɔnkɔ fitaa bi ni, na nea ɔte ne so no wɔfrɛ no nea ɔsɛ gyidi ne ɔnokwafo, na obu atɛn na otu sa trenee mu. . . . Na afoa namnam bi fi n’anom a ɔde bɛbobɔ amanaman, na ɔde dade poma bɛyɛn wɔn.” Na hena ne oyi? Asɛm koro no ara kyerɛ yɛn sɛ ɔwɔ din a wɔakyerɛw no “ahene mu Hene ne awuranom mu Awurade.” Ɛyɛ Onyankopɔn Ba Kristo Yesu a wɔanyan no afi awufo mu no.​—Adiyisɛm 6:2; 19:11-16.

Ɛnde, dɛn na ɛma “ahene mu Hene” yi di dwuma no? “Kusuu fam hene” (wɔn a wɔmpɛ kapitalism amammui) ne “kesee fam hene” (kapitalism aman a wɔhyɛ United States ase no) a wɔka wɔn ho nsɛm pii wɔ Daniel ti 11 mu no kodu baabi a wɔpem. (Sɛnea Daniel 11:40 ka siei no, “kusuu fam hene” no atrɛw ne tumi mu adu nsase pii so dedaw, titiriw no fi 1945 mu.)a

Enti, dɛn bio na ɛsɛ sɛ ɛba ansa na Onyankopɔn de ne ho agye mu koraa de mprempren nneɛma nhyehyɛe yi aba awiei?

Bible nkɔmhyɛ kyerɛ sɛ sɛ edu baabi a amammuifo anuɔdenfo a wɔwɔ Amanaman Nkabom no mu no bɛsɔre atia wiase nyamesom a ɛde ne ho hyehyɛ amammuisɛm mu no na wɔapa wɔn ho ntama, asɛe wɔn tumi ne nkɛntɛnso a wɔwɔ wɔ nnipa a wɔpɛ gyidi hunu so no.​—Adiyisɛm 17:16, 17.b

Akyinnye biara nni ho sɛ wiase atoro nyamesomfo yi a wɔsɛe wɔn no bɛma wɔasɔre atia Yehowa Adansefo. Eyi nso bɛma Yehowa Ɔhene, ɔpɔnkɔ fitaa no Sotefo no asɔre akotua. (Hesekiel 38:10-12, 21-23) Na dɛn na Daniel 2:44 ka wɔ nea ebefi mu aba no ho? “Na ahene no [mprempren amammui tumi horow] nna no mu no, ɔsoro Nyankopɔn bɛma ahenni a wɔrensɛe no da . . . so, na ebebubu ahenni horow no nyinaa ma asa, na ɛno de, ebegyina daa.” Yiw, Onyankopɔn Harmagedon ɔko a etia Satan amammuifo a aniwa hu wɔn wɔ asase so no de nkonim koraa bɛbrɛ Yehowa ne n’ahene mu Hene no.​—Adiyisɛm 16:14-16; 19:17-21.

Dɛn na ebedi akyi? Ɛdɛn, Kristofo a wosuro Onyankopɔn na wɔdɔ asomdwoe no ade a wɔpɛ a akyɛ no​—Onyankopɔn Ahenni nniso no mfirihyia apem adedi wɔ adesamma asoɔmmerɛwfo so no! Ɛno na bɔhyɛ fɛfɛ a ɛwɔ Adiyisɛm 21:3, 4 no benya mmamu: “Hwɛ, Onyankopɔn ntamadan wɔ nnipa mu, na ɔbɛtra mu wɔ wɔn mu, na wɔayɛ ne man, na Onyankopɔn ankasa ne wɔn bɛtra. Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”

Sɛ wobɛpɛ sɛ wunya Bible nkɔmhyɛ ahorow a ɛyɛ nwonwa yi ne nea ɛkyerɛ ma yɛn sɛ ankorankoro no ho nsɛm pii a, yɛsrɛ wo wone Yehowa Adansefo a wɔwɔ mo mpɔtam hɔ no nkasa anaasɛ kyerɛw nsɛmma nhoma yi akyerɛwfo a wɔwɔ wo man mu no.

[Ase hɔ nsɛm]

[Asɛm a wɔafa aka wɔ kratafa 14]

Awo Ntoatoaso​—“Wɔn a wɔwo wɔn bere koro mu nkabom, wɔbae mu ma ɛka wɔn a wɔte ase wɔ bere pɔtee bi mu awo ntoatoaso, bere sofo bi nyinaa.”​—“A Greek-English Lexicon of the New Testament”

[Asɛm a wɔafa aka wɔ kratafa 16]

Bible nkɔmhyɛ da no adi sɛ ammamuifo anuɔdenfo a wɔwɔ Amanaman Nkabom no mu no bɛsɔre atia wiase nyamesom a ɛde ne ho hyehyɛ amammuisɛm mu no

[Kratafa 15 mfoni]

Wɔ Harmagedon akyi wɔ Onyankopɔn asomdwoe ne trenee wiase foforo no mu no, ‘saa nneɛma yi bɛyɛ nea atwam.’​—Adiyisɛm 21:3, 4