Wubetumi Anya Apam Foforo No So Mfaso

 1. Adwuma a ɛwɔ afã abien bɛn na Yeremia yɛe?

YEHOWA maa Yeremia adwuma a ɛwɔ afã abien. Ná ɔfã biako ne sɛ ‘obetutu na wabubu na wasɛe na wadwiriw agu.’ Ná nea ɛka ho ne sɛ ‘obesi na wadua.’ Odiyifo no yɛɛ adwuma no fã a edi kan no bere a ɔpaa Yudafo a na wɔyɛ ahantan no abɔnefosɛm ho ntama, na ɔkaa Onyankopɔn atemmu a ɔde reba wɔne Babilon so ho asɛm kyerɛɛ wɔn no. Nanso, Yeremia kaa anidaso ho asɛm wɔ nkɔm ahorow a ɔhyɛe no mu. Ɔhyɛɛ nkɔm sɛ obesi nea na Onyankopɔn abɔ ne tirim sɛ obesi no, na wadua nea na Onyankopɔn abɔ ne tirim sɛ obedua no. Sɛ nhwɛso no, na Yeremia reyɛ n’adwuma no fã a ɛto so abien no bere a ɔtwee adwene sii Yudafo a na wɔbɛsan de wɔn aba wɔn asase so so no.—Yer. 1:10; 30:17, 18.

 2. Dɛn nti na Yehowa de atemmu baa ne nkurɔfo so, na ɔtwee wɔn aso koduu he?

² Ka a Yeremia kae sɛ na wɔbɛsan de Yudafo no aba wɔn asase so no nkyerɛ sɛ afei de na Onyankopɔn bɛkorɔkorɔ ne nkurɔfo no anaasɛ ɔremmu atɛntrenee. Ná ɔde atemmu bɛba Yudafo a na wɔn aso yɛ den no so ɔkwan biara so. (Monkenkan Yeremia 16:17, 18.) Wɔ Yeremia bere so no, na nnipa a wɔwɔ Yerusalem no mu kakraa bi na na ‘wɔredi asɛntrenee’ anaa ‘wɔrehwehwɛ nokware,’ na na Yehowa renkɔ so nnya wɔn ho abotare bio. Yehowa kae sɛ: “Afei de, mabrɛ ne mmɔborɔhunu.” (Yer. 5:1; 15:6, 7) Ná saa Yudafo no ‘asan kɔ wɔn agyanom amumɔyɛ mu, tetefo a wɔanni’ Yehowa asɛm so no. Bio nso, wɔkɔɔ so som atoro anyame de hyɛɛ Onyankopɔn abufuw. (Yer. 11:10; 34:18) Ná Yehowa bɛteɛ ne nkurɔfo no so, na mpo watwe wɔn aso “sɛnea ɛfata.” Ɛno nti, na ankorankoro bi ani betumi aba wɔn ho so na wɔasan aba ne nkyɛn.—Yer. 30:11; 46:28.

 3. Dɛn nti na ɛho hia sɛ wususuw apam foforo no ho nkɔm a wɔhyɛe no ho?

³ Onyankopɔn maa Yeremia hyɛɛ biribi a na ɛso mfaso bɛyɛ kɛse na ɛbɛtena hɔ daa ho nkɔm, na ɛno ne apam foforo no. Bere a yɛresusuw nkɔmhyɛ ahorow a ɛwɔ nhoma a Yeremia kyerɛwee mu ho no, yɛwɔ nea enti paa a ɛsɛ sɛ yɛde yɛn adwene si emu asɛm a ɛyɛ anigye a ɛno ne apam foforo no so. Ná saa apam no na ɛbɛba abesi apam a na wɔne Israelfo no ayɛ wɔ wɔn Akwantu no mu a na Mose yɛ ntamgyinafo no ananmu. (Monkenkan Yeremia 31:31, 32.) Bere a Yesu Kristo de Awurade Anwummeduan no resi hɔ no, ɔkaa apam foforo yi ho asɛm, enti akyinnye biara nni ho sɛ, ɛho hia sɛ yesusuw ho. (Luka 22:20) Ɔsomafo Paulo twee adwene sii saa apam yi so bere a na ɔrekyerɛw Hebrifo no. Ɔfaa Yeremia nkɔmhyɛ no mu asɛm kae, na osii mfaso a ɛwɔ apam foforo no so so dua. (Heb. 8:7-9) Nanso, dɛn ankasa ne apam foforo no? Dɛn na ɛmaa ɛho behiae? Henanom na wɔwom, na w’ankasa wobɛyɛ dɛn atumi anya so mfaso? Momma yɛnhwɛ.

 4. Dɛn na Mmara apam no yɛe?

⁴ Sɛ yɛbɛte apam foforo no ase a, ɛsɛ sɛ yedi kan hu atirimpɔw nti a wɔyɛɛ nea edi kan a ɛno ne Mmara apam no. Ná Mmara apam no bedi nneɛma atitiriw pii ho dwuma ama ɔman a na ɛretwɛn Aseni a wɔahyɛ no ho bɔ a na wɔnam no so behyira nnipa pii no. (Gen. 22:17, 18) Bere a Israelfo no gyee Mmara apam no toom no, wɔbɛyɛɛ Onyankopɔn ‘agyapade titiriw.’ Wɔ saa apam no ase no, na Lewi abusuakuw no mu na na wɔbɛpaw asɔfo ama ɔman no. Bere a na Yehowa ne Israelfo no reyɛ saa ɔman apam no wɔ Bepɔw Sinai ho no, ɔkaa “asɔfo ahemman ne ɔman kronkron” bi ho asɛm, nanso wankyerɛ bere ne ɔkwan a na wɔbɛfa so ayɛ apam no. (Ex. 19:5-8) Ansa na wɔbɛhyehyɛ saa ahemman ne ɔman kronkron no, saa apam no ma ɛbɛdaa adi sɛ na Israelfo no ntumi nni Mose Mmara no mu nsɛm nyinaa so. Ɛno nti, ɛmaa wɔn bɔne daa adi. Enti, wɔ Mose Mmara no ase no, na ɛsɛ sɛ Israelfo no bɔ afɔre daa de pata wɔn bɔne. Nanso, na ehia sɛ wonya biribi a ɛsen saa, afɔre a ɛyɛ pɛ a ɛno akyi no ɛho renhia sɛ wɔbɔ bio. Nokwarem no, na ɛho hia paa sɛ wonya wɔn bɔne ho fafiri daa.—Gal. 3:19-22.

 5. Dɛn nti na Yehowa hyɛɛ apam foforo no ho nkɔm?

⁵ Ɛno nti, yebetumi ahu nea enti a bere mpo a na Mmara apam no da so ara reyɛ adwuma no, Onyankopɔn maa Yeremia hyɛɛ apam foforo no ho nkɔm. Esiane sɛ Yehowa yɛ ɔdɔ na ne yam ye nti, na ɔpɛ sɛ ɔyɛ biribi a ɛbɛkɔ so aboa aman pii. Onyankopɔn nam Yeremia so kaa wɔn a na wɔbɛba abɛyɛ apam a na wɔbɛhyehyɛ no daakye no mufo ho asɛm sɛ: “Mede wɔn mfomso befiri wɔn, na wɔn bɔne nso, merenkae bio.” (Yer. 31:34) Ɛwom sɛ Yeremia bere so na wɔhyɛɛ saa bɔ no de, nanso ɛma adesamma nyinaa nya anidaso a ɛyɛ anigye. Ɔkwan bɛn so?

6, 7. (a) Ebinom te nka dɛn wɔ wɔn bɔne ho? (b) Dɛn nti na apam foforo no a yɛresusuw ho no betumi ahyɛ wo nkuran?

⁶ Yɛda so ara yɛ nnipa a yɛtɔ sin, na mpɛn pii no, yehu no saa. Onua bi a na ɔrebɔ mmɔden sɛ obedi ne mmerɛwyɛ bi so no ma yehu sɛnea saa asɛm yi yɛ nokware. Ɔkae sɛ: “Sɛ na mesan yɛ bɔne a magyae no bio a, na ɛma meyɛ basaa paa. Minyaa adwene sɛ biribiara nni hɔ a na metumi ayɛ ma wɔde nea mayɛ no akyɛ me. Ná ɛyɛ den ma me sɛ mɛbɔ mpae. Sɛ merebɔ mpae a, na mifi ase sɛ, ‘Yehowa, minnye nni sɛ wubetie mpae a merebɔ yi, nanso . . .’” Ebinom a wɔasan akɔyɛ bɔne bi a wɔagyae anaa wɔn a wɔayɛ bɔne bi no te nka sɛ “omununkum” asiw wɔn mpaebɔ kwan ma ennu Onyankopɔn nkyɛn. (Kwa. 3:44) Afoforo nso kae bɔne a wɔyɛe wɔ mmere bi a atwam no ma ɛhaw wɔn paa. Kristofo a wɔyɛ nhwɛso pa mpo tumi ka nsɛm bi ma akyiri yi wonu wɔn ho.—Yak. 3:5-10.

⁷ Ɛnsɛ sɛ yɛn mu biara nya adwene sɛ yɛn de yɛrentumi nyɛ bɔne da. (1 Kor. 10:12) Ɔsomafo Paulo mpo hui sɛ odii mfomso. (Monkenkan Romafo 7:21-25.) Wɔ nsɛm a ɛte saa mu na ɛsɛ sɛ yɛkae apam foforo no. Onyankopɔn hyɛɛ bɔ sɛ, apam foforo no mu ade titiriw biako ne sɛ, ɔrenkae bɔne bio. Mfaso a ɛso bi nni bɛn ara ni! Ɛbɛyɛ sɛ saa apam yi ho nkɔm a Yeremia hyɛe no kaa no paa, na saa ara na ɛsɛ sɛ ɛka yɛn nso ma yesua apam foforo no ho ade na yehu sɛnea yebetumi anya so mfaso.

8, 9. Dɛn na Yehowa de bɔɔ afɔre sɛnea ɛbɛyɛ a obetumi de bɔne afiri?

⁸ Sɛ woba behu Yehowa yiye a, wubehu sɛnea wada ayamye ne mmɔborɔhunu adi akyerɛ nnipa a wɔnyɛ pɛ no yiye. (Dw. 103:13, 14) Bere a Yeremia rehyɛ apam foforo no ho nkɔm no, ɔkae sɛ Yehowa ‘de wɔn mfomso befiri wɔn,’ na ɔrenkae wɔn bɔne bio. (Yer. 31:34) Wubetumi ahu sɛnea ɛbɛyɛ sɛ Yeremia dwinnwen ɔkwan a na Onyankopɔn bɛfa so de bɔne afiri no ho. Anyɛ yiye koraa no, na obetumi ate ase sɛ bere a na Onyankopɔn reka apam foforo ho asɛm no, na nea Onyankopɔn rekyerɛ ne sɛ ɔne nnipa bɛyɛ apam, anaa nhyehyɛe bi. Ɔkwan bi so no, na Yehowa nam saa apam no so bɛyɛ nea ɔde ne honhom kaa Yeremia ma ɔkyerɛw ho asɛm a na bɔne fafiri nso ka ho no. Ná Onyankopɔn bɛda n’atirimpɔw no ho nsɛm pii adi akyiri yi, na na nea Mesia no bɛyɛ ka ho.

⁹ Ebia woahu awofo bi a wɔn mma asɛe esiane sɛ wɔnteɛ wɔn so nti no pɛn. So wohwɛ kwan sɛ Yehowa bɛyɛ saa? Dabida! Eyi da adi wɔ sɛnea apam foforo no fii ase yɛɛ adwuma no mu. Sɛ́ anka Onyankopɔn de bɔne befiri kɛkɛ no, ɔbɔɔ mmɔden sɛ obedi n’ankasa atɛntrenee ho gyinapɛn so pɛpɛɛpɛ ma enti ɔde biribi a obegyina so de bɔne afiri wɔ mmara kwan so mae, na saa a ɔyɛe no ma ɔbɔɔ afɔre kɛse. Asɛm a Paulo kyerɛwee bere a na ɔreka apam foforo no ho asɛm no betumi ama woate saa asɛm yi ase. (Monkenkan Hebrifo 9:15, 22, 28.) Paulo kaa ‘agyede a wɔde agye’ nnipa ho asɛm, na ɔdaa no adi sɛ, “sɛ mogya angu a, fafiri ntumi mma.” Wɔ apam foforo no mu de, na ɛnyɛ anantwinini ne mpapo mogya na wɔde bɛbɔ afɔre sɛnea na wɔyɛ wɔ Mose Mmara no mu no. Yesu mogya na ɛmaa apam foforo no yɛɛ adwuma. Ná Yehowa betumi agyina saa afɔrebɔ a ɛyɛ pɛ no so de ‘mfomso ne bɔne afiri’ daa. (Aso. 2:38; 3:19) Nanso, henanom na na wɔbɛba abɛyɛ apam foforo no mufo na wɔanya saa bɔne fafiri no? Ná ɛnyɛ Yuda man no. Yesu kae sɛ Onyankopɔn bɛpo Yudafo a na wɔde mmoa bɔ afɔre wɔ Mose Mmara no ase no, na ɔde n’adwene asi ɔman foforo so. (Mat. 21:43; Aso. 3:13-15) Saa ɔman foforo no ne “Onyankopɔn Israel” a Kristofo a wɔde honhom kronkron asra wɔn na wɔwom no. Sɛ yɛbɛka paa a, Onyankopɔn ne honam fam Israel na ɛyɛɛ Mmara apam no, na apam foforo no de, Yehowa Nyankopɔn ne honhom fam Israel na ɛyɛe, na Yesu na ɔyɛ Ntamgyinafo.—Gal. 6:16; Rom. 9:6.

10. (a) Hena ne Dawid “duforo” no? (b) Ɔkwan bɛn so na nnipa betumi anya “duforo” no so mfaso?

¹⁰ Yeremia kaa Mesia no a na ɔreba no ho asɛm sɛ Dawid “duforo.” Ɛfata sɛ ɔkaa ne ho asɛm saa. Wotwaa dua a na egyina hɔ ma Dawid ahene abusua no kyenee bere mpo a na Yeremia resom sɛ odiyifo no. Nanso, dunsin no anwu. Bere bi akyi no, wɔwoo Yesu wɔ Ɔhene Dawid abusua no mu. Ná wobetumi afrɛ Yesu sɛ “Yehowa Ne Yɛn Trenee,” a nea ɛkyerɛ ne sɛ, saa su no ho hia Onyankopɔn paa. (Monkenkan Yeremia 23:5, 6.) Yehowa maa kwan ma ne Ba a ɔwoo no koro no behuu amane wɔ asase so na owui. Afei nea ɛne Yehowa atɛntrenee hyia no, na obetumi agyina Dawid “duforo” no agyede afɔre no bo so de bɔne afiri. (Yer. 33:15) Eyi buee kwan ma wobuu nnipa binom ‘bem maa nkwa,’ na wɔde honhom kronkron sraa wɔn ma wɔbɛyɛɛ apam foforo no mufo. Adanse foforo a ɛkyerɛ sɛ trenee ho hia Onyankopɔn ne sɛ, ɔma afoforo a wɔnka apam foforo no ho tẽẽ no tumi nya so mfaso, sɛnea yebehu akyiri yi no.—Rom. 5:18.

11. (a) Ɛhe na wɔakyerɛw apam foforo no mu mmara no agu? (b) Dɛn nti na mmara a ɛwɔ apam foforo no mu no ho hia “nguan foforo” no?

¹¹ So wopɛ sɛ wuhu nneɛma foforo a ɛda nsow wɔ apam foforo no ho? Ade titiriw biako a ɛma apam foforo no yɛ soronko wɔ Mose Mmara apam no ho ne baabi a wɔkyerɛw emu biara gui no. (Monkenkan Yeremia 31:33.) Wɔkyerɛw Mmara Nsɛm Du a na ɛwɔ Mmara apam no mu no guu abopon a awiei koraa ɛyerae no so. Nanso, Yeremia hyɛɛ nkɔm sɛ wɔbɛkyerɛw mmara a ɛwɔ apam foforo no mu no agu nnipa koma mu, na ɛbɛtena hɔ daa. Wɔn a wɔwɔ apam foforo no mu no yɛ Kristofo a wɔasra wɔn, na wɔn ani sɔ mmara a ɛwom no paa. Na wɔn a wɔnka apam foforo no ho tẽẽ a wɔne “nguan foforo” no a wɔwɔ anidaso sɛ wɔbɛtena asase so daa no nso ɛ? (Yoh. 10:16) Wɔn nso ani gye Onyankopɔn mmara ho. Ɔkwan bi so no, wɔte sɛ ahɔho a na wɔwɔ Israel a wogyee Mose Mmara no toom na wonyaa so mfaso no.—Lev. 24:22; Num. 15:15.

12, 13. (a) Dɛn ne apam foforo no mmara no? (b) Wɔ “Kristo mmara no” ase no, dɛn nti na worente nka sɛ wɔrehyɛ wo sɛ som Onyankopɔn?

¹² Sɛ obi bisa wo sɛ, ‘Dɛn ne mmara a wɔkyerɛw gu Kristofo a wɔasra wɔn no koma mu’ no a, mmuae bɛn na wode bɛma no? Wɔsan frɛ saa mmara no “Kristo mmara.” Wodii kan de Kristo mmara no maa honhom fam Israelfo, wɔn a wɔwɔ apam foforo no mu no. (Gal. 6:2; Rom. 2:28, 29) Wubetumi de asɛmfua biako abɔ “Kristo mmara no” mua, ɛno ne ɔdɔ. (Mat. 22:36-39) Dɛn na wɔn a wɔasra wɔn no yɛ a ɛma wɔkyerɛw saa mmara yi gu wɔn koma mu? Nneɛma atitiriw abien a wɔyɛ ne sɛ, wosua Onyankopɔn Asɛm no, na wɔbɔ Yehowa mpae. Ne saa nti, ɛsɛ sɛ nokware Kristofo nyinaa yɛ saa nneɛma abien a yɛyɛ wɔ nokware som mu no bere nyinaa wɔ wɔn asetena mu, na wɔn a wonni apam foforo no mu mpo nanso wɔpɛ sɛ wonya so mfaso no nso ka ho.

¹³ Wɔfrɛ “Kristo mmara no” sɛ “ahofadi mmara a ɛyɛ pɛ” ne “adehye mmara.” (Yak. 1:25; 2:12) Wɔwoo nnipa pii hyɛɛ Mose Mmara no ase, nanso obiara nni hɔ a wɔwo no to apam foforo no mu anaa wɔwo no hyɛ Kristo mmara no ase. Obiara nni hɔ a odi Kristo mmara no so a wɔhyɛ no sɛ ɔnsom Onyankopɔn. Mmom no, ɛyɛ wɔn anigye sɛ wɔahu sɛ wotumi kyerɛw Onyankopɔn mmara no wɔ koma mu, na nnipa a wɔwɔ hɔ nnɛ betumi anya apam a Yeremia hyɛɛ ho nkɔm no so mfaso a enni awiei.

14. Henanom na ɛda adi pefee sɛ wonya apam foforo no so mfaso?

¹⁴ Bere a ebinom behui sɛ 144,000 na wɔwɔ apam foforo no mu no, ebia wonyaa adwene sɛ saafo no nkutoo na wonya so mfaso. Ebia nea enti a wonyaa saa adwene no ne sɛ wɔn a wɔasra wɔn no nkutoo na wodi Kristo wu Nkaedi paanoo no na wɔnom bobesa a egyina hɔ ma “mogya a wɔde yɛ apam no” bi afe biara. (Mar. 14:24) Nanso, kae sɛ wɔn a wɔwɔ apam foforo no mu no bɛka Yesu ho sɛ Abraham ‘aseni’ a wɔnam wɔn so behyira aman nyinaa. (Gal. 3:8, 9, 29; Gen. 12:3) Yebetumi aka sɛ Yehowa nam apam foforo no so bedi ne bɔhyɛ a ɛne sɛ ɔnam Abraham ‘aseni’ no so behyira adesamma nyinaa no so.

15. Dwuma bɛn na wɔhyɛɛ ho nkɔm sɛ wɔn a wɔasra wɔn no bedi?

¹⁵ Yesu Kristo a ɔyɛ Abraham aseni no mu otitiriw no som sɛ Ɔsɔfo Panyin, na ɔno na ɔbɔɔ afɔre a ɛyɛ pɛ a ɛma wotumi de mfomso ne bɔne firi no. (Monkenkan Hebrifo 2:17, 18.) Nanso, na Onyankopɔn aka “asɔfo ahemman ne ɔman kronkron” bi ho asɛm ato hɔ bere tenten bi a atwam. (Ex. 19:6) Wɔ honam fam Israelfo mu no, na wɔpaw asɔfo fi abusuakuw biako mu, na na wɔpaw ahemfo nso fi abusuakuw foforo mu. Sɛ ɛte saa a, ɛnde na ɔkwan bɛn so na wɔbɛhyehyɛ ɔman a emufo yɛ ahene ne asɔfo sɛnea wɔhyɛɛ ho bɔ no? Ɔsomafo Petro kyerɛw ne krataa a edi kan no kɔmaa wɔn a na wɔde honhom no atew wɔn ho no. (1 Pet. 1:1, 2) Ɔkaa nnipa a wɔte saa no ho asɛm sɛ wɔyɛ “adehye asɔfokuw, ɔman kronkron, nnipa a wɔde wɔn ayɛ agyapade soronko.” (1 Pet. 2:9) Enti Kristofo a wɔasra wɔn a wɔwɔ apam foforo no mu no bɛsom sɛ asɔfo a wɔhyɛ Kristo ase. Wo de, susuw nea ɛno kyerɛ no ho hwɛ! Yɛne bɔne di asi da biara da, na bɔne da so ara ‘di hene.’ Na wɔn a wɔresom sɛ asɔfo wɔ Kristo ase no nso betumi afa tebea a ɛte saa ara mu bi. (Rom. 5:21) Wobehu sɛnea sɛ obi di mfomso a ɔte nka na odi ho yaw no. Enti wɔne Kristo betumi ate yɛn ase bere a yɛrebɔ mmɔden sɛ yebedi yɛn mmerɛwyɛ ahorow a ɛma yɛyɛ bɔne so no.

16. Nkuranhyɛ bɛn na “nnipakuw kɛse” no betumi anya afi asɛm a ɛwɔ Adiyisɛm 7:9, 14 no mu?

¹⁶ Wɔ Adiyisɛm 7:9, 14 no, wohui sɛ “nnipakuw kɛse” no “hyehyɛ ntade tenten fitafitaa,” a nea ɛkyerɛ ne sɛ, wɔanya gyinabea pa wɔ Onyankopɔn anim. Nea ɛbɛyɛ na saa nnipakuw kɛse no anya wɔn ti adidi mu wɔ “ahohiahia kɛse no” mu no, wɔreboaboa wɔn ano seesei. Enti, ɛnnɛ mpo saa nkurɔfo no nya gyinabea pa wɔ Onyankopɔn anim wɔ ɔkwan bi so. Wobu wɔn bem sɛ Yehowa nnamfo. (Rom. 4:2, 3; Yak. 2:23) Hwɛ mfaso ara a ɛno ma yenya! Sɛ woka nnipakuw kɛse no ho a, wubetumi anya awerɛhyem sɛ Onyankopɔn pɛ sɛ ɔne wo yɛ adwuma bere a wobɔ mmɔden sɛ wobɛkɔ so ama wo ho atew wɔ n’anim no.

17. Sɛ wɔka sɛ Yehowa ‘renkae’ bɔne bio a, ɛkyerɛ dɛn?

¹⁷ Dɛn na Onyankopɔn bɛyɛ wɔ wɔn a wonya n’anim dom no bɔne ho? Sɛnea yedii kan hui no, Yehowa nam Yeremia so kae sɛ: “Mede wɔn mfomso befiri wɔn, na wɔn bɔne nso, merenkae bio.” (Yer. 31:34) Yesu afɔrebɔ no so na Onyankopɔn gyina de wɔn a wɔasra wɔn no bɔne firi wɔn. Saa ara na Onyankopɔn betumi agyina “mogya a wɔde yɛ apam no” ara so de nnipakuw kɛse no nso bɔne afiri wɔn. Ka a Yeremia kae sɛ Onyankopɔn ‘renkae’ bɔne bio no nkyerɛ sɛ Onyankopɔn werɛ befi bɔne a nkurɔfo ayɛ ma enti ɔrentumi nkae bio. Mmom no, nea ɛkyerɛ ne sɛ, sɛ Yehowa nya de nteɛso biara a ɛfata ma obi wie na ɔde ɔbɔnefo a wanu ne ho no bɔne firi no a, Onyankopɔn tow bɔne a onii no yɛe bere bi a atwam no to n’akyi. Wo de, susuw bɔne a Ɔhene Dawid yɛ tiaa Bat-Seba ne Uria no ho hwɛ. Wɔteɛɛ Dawid so, na otwaa bɔne a ɔyɛe no so aba. (2 Sam. 11:4, 15, 27; 12:9-14; Yes. 38:17) Nanso, Onyankopɔn ankɔ so ammu saa bɔne a Dawid yɛe no antia no. (Monkenkan 2 Beresosɛm 7:17, 18.) Sɛnea wɔada no adi wɔ apam foforo no mu no, sɛ Yehowa nya gyina Yesu afɔrebɔ no so de bɔne firi a, ɔnkae bɔne no bio.—Hes. 18:21, 22.

18, 19. Bɔne fafiri ho asuade bɛn na ɛwɔ apam foforo no mu?

¹⁸ Enti, asɛm bi a ɛyɛ anigye wɔ apam foforo no mu a ɛfa sɛnea Yehowa ne nnipa abɔnefo di, wɔn a wɔasra wɔn a wɔwɔ apam foforo no mu ne wɔn a wɔwɔ anidaso sɛ wɔbɛtena asase so no ho. Wubetumi anya ahotoso sɛ sɛ Yehowa nya de wo bɔne firi wo a, ɔrensan nkɔfa ho asɛm mma bio. Enti, yɛn mu biara betumi asua biribi afi Onyankopɔn bɔhyɛ a ɛfa apam foforo no ho mu. Bisa wo ho sɛ, ‘Sɛ afoforo yɛ me bɔne na meka sɛ mede akyɛ wɔn a, so misuasua Yehowa ma enti menka ho asɛm bio?’ (Mat. 6:14, 15) Eyi fa mfomso nketenkete ne bɔne a emu yɛ duru te sɛ bere a Kristoni bi hokafo asɛe aware ho. Sɛ nea ne ho nni asɛm no pene so sɛ ɔde ne hokafo a wasɛe aware no bɔne akyɛ no a, so ɛnyɛ papa sɛ ‘ɔrenkae bɔne no bio’? Nokwarem no, ebetumi ayɛ den sɛ yɛbɛtow mfomso agu yɛn akyi, nanso ɛyɛ ɔkwan biako a yebetumi afa so asuasua Yehowa.a

¹⁹ Yebetumi de asuade a ɛwɔ apam foforo yi mu no adi dwuma wɔ obi mpo a wotuu no bere bi nanso wasakra ma enti wɔasan agye no ho. Na sɛ saa onipa no ma wohweree biribi, anaasɛ ɔkwan bi so no, ɔsɛee wo din nso ɛ? Seesei de, wɔasan agye no aba asafo no mu. Ɔkwan bɛn so na asɛm a yɛkenkan wɔ Yeremia 31:34 no bɛka yɛn nsusuwii ne sɛnea yɛyɛ yɛn ade wɔ ne ho? So yɛde bɔne a ɔyɛ tiaa yɛn no bɛkyɛ no a yɛrensan nkɔfa ho asɛm mma bio? (2 Kor. 2:6-8) Nokwarem no, ɛno ne ade a ɛsɛ sɛ obiara a n’ani sɔ apam foforo no bɔ mmɔden sɛ ɔde bɛyɛ adwuma wɔ n’asetena mu daa.

20. Ɔkwan bɛn so na wo nneyɛe yɛ soronko wɔ nnipa pii a na wɔwɔ Yeremia bere so no de ho?

²⁰ Wɔ Yeremia bere so no, na nea Yudafo no pii reka ne sɛ: “Yehowa renyɛ papa, na ɔrenyɛ bɔne.” (Sef. 1:12) Ɛwom sɛ na wɔwɔ Yehowa ho nimdeɛ, na na wonim sɛnea ɔte de, nanso na wosusuw sɛ ɔrenyɛ biribiara; saa ara nso na ɔrenhwɛ kwan sɛ wɔde ne mmara bɛbɔ wɔn bra. Nanso, wo de, wunim sɛ biribiara nni hɔ a Onyankopɔn ntumi nhu. Wusuro Onyankopɔn na wubu no ma enti akyinnye biara nni ho sɛ wompɛ sɛ woyɛ bɔne. (Yer. 16:17) Bere koro no ara nso, wunim sɛ Yehowa yɛ Agya a ne yam ye. Ohu nneɛma pa a yɛyɛ no, sɛ́ ebia afoforo hu anaasɛ wonhu no.—2 Be. 16:9.

21, 22. Dɛn nti na ɛho nhia bio sɛ wɔka kyerɛ wo sɛ: ‘Hu Yehowa’?

²¹ Asɛntitiriw bi a ɛwɔ apam foforo no mu ni: “Mede me mmara bɛhyɛ wɔn mu na makyerɛw wɔ wɔn komam. Na mɛyɛ wɔn Nyankopɔn . . . Na obi renkyerɛ ne yɔnko ne ne nua bio sɛ, ‘Munhu Yehowa!’ Efisɛ wɔn nyinaa behu me.” (Yer. 31:33, 34) Wɔn a wɔasra wɔn a wɔwɔ asase so nnɛ no ada no adi sɛ wɔakyerɛw Onyankopɔn mmara no wɔ wɔn mu. Wɔn ani gye nokware a ɛwɔ apam foforo no mu ho sen sɛ wɔde wɔn ho bɛto onipa biara nkyerɛkyerɛ so. Wɔde anigye aka nimdeɛ a wɔanya afi Bible mu no ho asɛm akyerɛ wɔn a wɔreboaboa wɔn ano ma wɔabɛyɛ nnipakuw kɛse no mufo no. Enti, wɔn a wɔwɔ asase so anidaso no nso abehu Yehowa na wɔdɔ no. Wofi wɔn pɛ mu di n’akwankyerɛ so na wonya ne bɔhyɛ ahorow mu ahotoso. Ebia wo nso woka nnipa a wɔte saa no ho. Woabehu Yehowa yiye na wo ne no anya abusuabɔ. Mfaso bɛn ara ni!

²² Dɛn na woayɛ a ama woatumi ahyɛ wo ne Yehowa abusuabɔ mu den? Akyinnye biara nni ho sɛ wokae bere bi a wotee nka sɛ wɔatie wo mpaebɔ no. Osuahu ahorow a ɛte saa no ma wubehuu Onyankopɔn yiye paa. Ebia wuhuu sɛnea ɔboaa wo bere a wokaee kyerɛwsɛm bi a ɛma wutumi gyinaa ɔhaw bi ano no. Ma w’ani nsɔ osuahu ahorow a ɛte saa no. Sɛ wokɔ so sua n’Asɛm no a, wobɛkɔ so anya ne ho nimdeɛ pii—eyi yɛ mfaso a wubenya bere nyinaa.

23. Ɔkwan bɛn so na Yehowa a wubehu no no betumi aboa wo na woannwinnwen nsɛm bi ho anhaw wo ho?

²³ Na mfaso foforo nso wɔ hɔ a yebetumi anya afi apam foforo no mu seesei. Hu a yɛabehu sɛ Yehowa ne obi a ogyina apam foforo no so de bɔne firi no betumi aboa yɛn na yɛn ahonim ankɔ so ammu yɛn fɔ. Sɛ nhwɛso no, ebinom a wotuu nyinsɛn gui ansa na wɔrebehu Onyankopɔn adwene wɔ ho no ahonim betumi abu wɔn fɔ ma wɔadi awerɛhow, efisɛ wɔhyɛɛ da na wotwaa abofra a na ɔhyɛ yafunum no nkwa so. Afoforo nso te nka saa ara efisɛ wokunkum afoforo wɔ bere a wɔde wɔn ho hyɛɛ akodi mu no. Yesu agyede afɔre no—ade titiriw a ɛwɔ apam foforo no mu—ma abɔnefo a wɔanu wɔn ho wɔ wɔn komam no nya bɔne fafiri. Sɛ saa na ɛte a, so ɛnsɛ sɛ yenya ahotoso sɛ sɛ Yehowa de yɛn bɔne firi yɛn a, ɔfa no sɛ asɛm no to atwa? Ɛnsɛ sɛ yɛkɔ so dwinnwen bɔne a Yehowa de afiri yɛn koraa no ho.

24. Nkuranhyɛ bɛn na wubetumi anya afi asɛm a ɛwɔ Yeremia 31:20 no mu?

²⁴ Yehu Onyankopɔn bɔne fafiri ho adanse pefee wɔ Yeremia 31:20. (Monkenkan.) Mfe pii ansa na Yeremia reba no, Yehowa twee Israel mmusuakuw du ahemman a ɛwɔ atifi fam (a na wɔde Efraim a ɛyɛ abusuakuw titiriw no gyina hɔ ma wɔn) no aso esiane sɛ wɔsom abosom nti. Wɔde wɔn kɔɔ nkoasom mu. Nanso, na Onyankopɔn koma wɔ saa ɔman no mu nnipa no ho, na ɔdaa ɔdɔ adi kyerɛɛ wɔn. Ná ɔda so ara dɔ wɔn sɛ ‘ɔba a wɔpɛ n’asɛm yiye.’ Sɛ na ɔkae wɔn a, na ne nsono mu “twitwa” no, a nea ɛkyerɛ ne sɛ, na ne yam hyehye no ma wɔn paa. Saa asɛm yi a wɔde abata apam foforo no ho no ma yehu sɛnea Yehowa fi ayamye mu de wɔn a wɔsakra fi bɔne a wɔayɛ wɔ bere bi a atwam ho no bɔne kyɛ wɔn.

25. Dɛn nti na wubetumi ada Yehowa ase wɔ apam foforo no ho?

²⁵ Ɛbɔ a Yehowa ahyɛ sɛ ɔnam apam foforo no so de bɔne befiri no bɛyɛ adwuma koraa bere a Kristo Mfirihyia Apem Nniso no aba awiei no. Ebedu saa bere no, na Yesu Kristo ne asɔfo 144,000 a wɔhyɛ n’ase no de nnipa anokwafo asan aba pɛyɛ mu. Adesamma bɛba abɛka Yehowa abusua a n’asomfo a wɔwɔ amansan yi mu nyinaa wom no ho koraa wɔ sɔhwɛ a etwa to no awiei. (Monkenkan Romafo 8:19-22.) Bɔne ama adesamma nyinaa akɔ so asi apini mfehaha pii. Nanso, ebedu saa bere no na Yehowa abɔde a wɔyɛ nnipa anya “Onyankopɔn mma anuonyam ahofadi,” ná wɔanya ahofadi afi bɔne ne owu ho. Ne saa nti, nya ahotoso sɛ wonam apam foforo a wofi ɔdɔ mu ayɛ ho nhyehyɛe no so betumi anya mfaso pii. Wubetumi afa Dawid “duforo” no so anya mfaso nnɛ de akosi daa, na woanya “adetrenee asase no so.”—Yer. 33:15.