Yehowa Asɛm Yɛ Nokware!

‘Me [Yehowa] mema m’akoa asɛm gyina.’​—YESAIA 44:24-26.

 1. Daakye bɛn na wɔhyɛɛ ho nkɔm wɔ 1864 mu?

DƐN na ɔkyena de bɛba? Nkurɔfo bɛpɛ sɛ wohu. Nanso hwɛ sɛnea daakye ho nsɛm a wɔka no yɛ nea akomatɔyam nnim! Sɛ nhwɛso no: Wɔ 1864 mu no, ɔbenfo Alfred R. Wallace hyɛɛ ‘daakye’ a onipa na ɔde bɛba ‘ho nkɔm yi maa adesamma abusua no’ sɛ: “Obiara bɛyɛ . . . n’ankasa anigye ho adwuma a ɛfa ne mfɛfo de ho; . . . abrabɔ ho nimdeɛ a ɛkari pɛ remma obiara kwan mma ommu ahofadi koro no ara a afoforo wɔ no so; mmara horow a eye sen biara na ɛbɛkyerɛ obiara kwan; hokwan ahorow ho anisɔ ankasa, ne mmɔborohunu a ɛyɛ pɛ ne nkate ahorow ma wɔn a wɔwɔ ne ho nyinaa.” Ɛdɛn, Wallace ka too hɔ sɛ onipa bɛma yɛn asase yi adan “paradise a anigye wom te sɛ nea nkɔmhyɛfo ne anwensɛm akyerɛwfo aso ho dae pɛn no”!

 2. Onipa nkɔmhyɛ ahorow a adi huammɔ no ma nsemmisa bɛn sɔre?

² Nea ɔkyerɛw saa asɛm no wui akyi asram akron pɛ na adesamma de wɔn ti nuu Wiase Ko I mu. Ɛnde, afei ɛhe na ‘paradise a anigye wom’ a nnipa a wɔwɔ ayamhyehye wom no wɔ? Na nnɛ nso ɛ? Akyinnye biara nni ho sɛ ‘dodow no ara dɔ ano adwo’​—a nkɔmhyɛ ahorow biara a ɛne no bɔ abira mfa ho. (Mateo 24:12) Nanso so eyi nti ɛnsɛ sɛ yegye nkɔmhyɛ biara di? Yehowa Nyankopɔn da ne ho adi sɛ Obi a ‘ɔma anyasafo san nkyirinkyiri, na ɔdan wɔn nimdeɛ nkwaseasɛm; na ɔma n’akoa asɛm gyina.’ (Yesaia 44:24-26) Nanso, ebia ebinom bebisa sɛ: ‘So yebetumi de yɛn ho ato Bible mu nkɔmhyɛ ahorow no so? So Yehowa Asɛm yɛ nokware ampa?’

Amanfõ Ne Kyekye A Wɔsan Kyekyee

 3. Nea ɛne Leviticus 26:27-35 hyia no, dɛn na ɛbaa Yuda ne Yerusalem so wɔ afeha a ɛto so ason A.Y.B. mu?

³ Adanse pii wɔ hɔ a ɛkyerɛ sɛ yebetumi de yɛn ho ato Bible nkɔmhyɛ so ampa. Sɛ nhwɛso no, nkɔmhyɛ ahorow a ɛfa amamfõ ne kyekye a wɔbɛsan akyekye ho baa mu wɔ Onyankopɔn tete nkurɔfo a wɔne Israelfo no so. Bere a wɔsom Yehowa nokwaredi mu no, wodii yiye wɔ ‘asase a ɛsen nufusu ne ɛwo’ a Onyankopɔn de maa wɔn no so. (Leviticus 20:24; 1 Ahene 4:1, 20) Nanso na wɔadi kan abɔ wɔn kɔkɔ sɛ, sɛ wɔyɛ asoɔden a, saa paradise tebea yi bɛdan sare asase a ɛda hɔ ntuw. (Leviticus 26:27-35) Wɔ afe 607 A.Y.B. mu, bɛyɛ mfirihyia 900 bere a Mose kyerɛw Leviticus akyi no, Babilonfo dii Yuda ne Yerusalem so nkonim. Ɛno akyi bere tiaa bi no, Yudafo a wɔkae wɔ asase no so no guan kɔɔ Misraim na ɛmaa amamfõ a wɔhyɛɛ ho nkɔm no baa mu wiei.​—Yeremia 39:8-10; 40:5; 41:2; 43:1-7.

 4. (a) Bere tenten ansa na wɔresɛe Yerusalem wɔ 607 A.Y.B. mu no, ná bɔ bɛn na Yehowa ahyɛ ne nkurɔfo? (b) Ɔkwan bɛn so na bɔhyɛ yi baa mu?

⁴ Nanso, nea ɛboro mfirihyia ɔha ansa na wɔresɛe Yerusalem no na Yehowa ahyɛ bɔ sɛ ɔbɛsan de ne nkurɔfo a wɔasakra wɔn adwene no aba wɔn asase a ayɛ amamfõ no so na wasan ama aba paradise tebea mu bio. (Yesaia 35:1-4) Onyankopɔn kae nso sɛ: “Me, [Yehowa] . . . [ne] nea ɔma n’akoa asɛm gyina, na ɔma n’abɔfo agyinatusɛm ba mu; nea ɔka Yerusalem ho sɛ: Nnipa ntra mu! ne Yuda nkurow ho sɛ: Wɔnkyekye, na mɛma n’akurofõ so agyinagyina.” (Yesaia 44:24-26) Wɔ 539 A.Y.B. mu no, Media ne Persiafo a Kores di wɔn anim dii Babilon so nkonim sɛnea na Yesaia aka ato hɔ no. (Yesaia 44:27-45:6) Mmara a Kores hyɛe a ɛmaa Yudafo no kwan sɛ wɔnsan nkɔ wɔn asase so na wɔnsan nkosi asɔrefi no fii ase dii dwuma wɔ 537 A.Y.B. mu, na ankyɛ na nsakrae ahorow baa Yuda asase no so sɛnea wɔaka ato hɔ no. (Esra 1:1-4; Yesaia 35:5-10; Hesekiel 36:35) Hwɛ sɛnea Yehowa Asɛm yɛ nokware!

Tiro Antumi Ammu Nkɔmhyɛ Animtiaa

 5. Dɛn na na Yehowa nam Hesekiel so aka ato hɔ wɔ Tiro ho?

⁵ Ɔsoro nkɔmhyɛ nyaa mmamu nso wɔ tete kurow Tiro a na wɔfrɛ no “Ɛpo mu Hemmaa” ma ɛfata no so. Ɛdefa Foinikefo po so ahyɛn gyinabea yi ho no, na Yehowa aka sɛ: “Me ne wo anya, Tiro, na mede amanaman bebree mɛba wo so, . . . Hwɛ, mede Babel hene Nebukadnesar . . . mereba Tiro so . . . [na wadwiriw] w’aban atenten . . na wɔatotow w’abo ne wo nnua ne wo dɔte agu nsu mu. . . . Na mɛyɛ wo ɔbotan firefire, wobɛdan asawu hatabea.”​—Hesekiel 26:3-14.

 6. Wɔ nkɔmhyɛ mmamu mu no, dɛn na ɛbaa tete kurow Tiro so?

⁶ Ná ɛte sɛnea asehwe a ɛte sɛɛ rentumi mma. Sɛnea Yudani abakɔsɛm kyerɛwfo Josephus kyerɛ no, Babilonfo nkahyem wɔ Tiro so no dii mfirihyia 18. (Josephus, Against Apion, Nhoma I, Ti 21) Abakɔsɛm nkyerɛ sɛnea na Nebukadnesar mmɔdenbɔ ahorow no mu den te de, nanso nneɛma a ɛsɛee ne nnipa a wowuwui wɔ Tiro no betumi ayɛ nea ɛdɔɔso. Nkɔmhyɛ foforo a wɔde mae akyiri yi denam Sakaria so kyerɛe sɛ Onyankopɔn bɛsɛe kurow no koraa. (Sakaria 9:3, 4) Wɔde nkɔmhyɛ yi mae akyi bɛyɛ mfirihyia 200 ansa na ɛreba mu. Saa bere no mu no wɔn a wɔtete Tiro kurow a ɛwɔ supɔw a ɛbɛn no so no tee nka sɛ wɔwɔ ahotɔ wɔ wɔn afasu a ɛyɛ den no akyi. Nanso, wɔ 332 A.Y.B. mu no, Aleksanda Ɔkɛseɛ no dɔm sɛee saa kurow a ɛwɔ supɔw so no denam Tiro a ɛwɔ asase kesee so no nnua, abo ne afasu a abubu no a wɔde guguu nsu no mu de yɛɛ ɔkwan kɔɔ supɔw no so no so. Efi saa bere no anhwea a nsu no de begu ho no ama saa ɔkwan yi ayɛ kɛse. Bio nso, wɔ mprempren mpoano akuraa yi ase no, wotumi hu apopofo a wɔrehata wɔn asawu​—nkɔmhyɛ mmamu foforo. Ampa, Yehowa Asɛm yɛ nokware!

“Mogya Kurow” Sɛe

 7, 8. (a) Dɛn na na Yehowa nam n’adiyifo so aka ato hɔ wɔ Niniwe ho? (b) Dɛn nti na ɛte sɛnea anka ɛrentumi nyɛ yiye sɛ Niniwe bɛyɛ “amamfõ”?

⁷ Onyankopɔn nkɔmhyɛ Asɛm no bɛyɛɛ nokware nso wɔ tete Niniwe a na ɛyɛ Asiria Ahemman a ɛhyɛɛ Yehowa nkurɔfo so no ahenkurow no so. (2 Ahene 17:1-6; 1 Beresosɛm 5:6, 26) Ɛdefa Niniwe ho wɔ bere a na ne tumi no ayɛ kɛse no, Yehowa nam n’adiyifo so kae sɛ: “Momfow dwetɛ, momfow sika! Na ahonyade no nni awiei . . . Wɔma ɛda mpan yɛ hunu yɛ amamfõ; Due, mogya kurow!” (Nahum 2:9, 10; 3:1) “Na wadan Niniwe amamfõ, . . . na mmoakuw abutubutuw mu.”​—Sefania 2:13, 14.

⁸ Ɔkwan bɛn so na na eyi betumi aba? Ná Niniwe yɛ “kurow kɛse.” (Yona 1:2) Sɛnea tete abakɔsɛm kyerɛwfo Diodorus kyerɛ no, na wɔatow anammɔn 100 afasu a ɛso trɛw yɛ nea nteaseɛnam abiɛsa betumi afa so, atwa Niniwe ho ahyia. Wɔ odiyifo Yona nna no mu (afeha a ɛto so akron A.Y.B.) no, na nnipa a wɔn dodow boro 120,000 wɔ kurow no mu. (Yona 4:11) So na eyi nyinaa bɛyɛ “amamfõ”?

 9. Ɔkwan bɛn so na Niniwe ama yɛanya adanse foforo a ɛkyerɛ sɛ Yehowa Asɛm yɛ nokware?

⁹ Wɔ 632 A.Y.B. mu, wɔ Sefania nkɔmhyɛ no akyi mfirihyia 16 anaa nea ɛboro saa no, Babilonfo ne Mediafo bɛkaa Niniwe hyeem. Sɛnea Diodorus (Nhoma II, Ti 27) kyerɛ no, “osu akɛse a ɛtɔ toatoaa so” maa Asubɔnten Tigris yirii ma ebu faa so. “Ebu faa kurow no fã bi na ebubuu afasu no fã kɛse gui.” Wodii Niniwe so nkonim. Tete Babilonian Chronicle no se: “Wɔfaa asade pii fii kurow no mu ne asɔrefi hɔ kɔe na wɔdanee kurow no amanfo ne abo akuwakuw.” Niniwe bɛyɛɛ kurow a ayera mfehaha pii. Sɛe a wɔsɛee no no bɛyɛɛ “asɛmpa” maa Onyankopɔn nkurɔfo a na wɔwɔ ahotoso sɛ “ [Yehowa] ye” na “onim wɔn a woguan kɔdɔ no” no. (Nahum 1:7, 15) Ɛnnɛ, obi a ɔkɔ Niniwe amanfõ so wɔ Iraq betumi ahu nguan a wɔredidi wɔ baabi a ɛbɛn n’amamfõ so te sɛ nea wɔka too hɔ no. Yɛwɔ adanse foforo wɔ eyi mu a ɛkyerɛ sɛ Yehowa Asɛm yɛ nokware.

‘Abɛn A Ɛso’ Bu

10. (a) Nkɔmhyɛ anisoadehu bɛn na wɔakyerɛw wɔ Daniel 8:1-8? (b) Ɔkwan bɛn so na Gabriel kyerɛkyerɛɛ nkɔmhyɛ yi afã horow no mu?

¹⁰ Wɔ nkɔmhyɛ anisoadehu mu no, Daniel huu odwennini bi a ɔwɔ mmɛn abien a ɔpapo bi a ɔwɔ ‘abɛn a ɛso’ kum no. Saa abɛn yi bui na mmɛn anan besii ananmu. (Daniel 8:1-8) Dɛn na na eyi kyerɛ? Ɔbɔfo Gabriel kyerɛkyerɛɛ mu sɛ: “Odwennini a wuhuu no a ɔwɔ mmɛn abien no ne Media ne Persia ahene; na ɔpapo a ɔyɛ kekã no ne Hela hene; na abɛn kɛse a, ɛwɔ n’ani ntam no ne ɔhene a odi kan; na nea ebui a anan fifii sii ananmu no, ahenni anan bɛsɔre ɔman no mu, nso ennu kan de no ahoɔden.”​—Daniel 8:16, 20-22.

11, 12. Ɔkwan bɛn so na Daniel 8:20-22 nyaa mmamu?

¹¹ Ná Medo-Persia a ɛne anisoadehu mu odwennini a ɔwɔ mmɛn abien no adi Babilon a ɛyɛ den no so. Nanso na Onyankopɔn bɔfo no aka ato hɔ sɛ “ɔpapo a ɔyɛ kekã” a ɛne Hela, bekum odwennini no. Eyi ne nea esii pɛpɛɛpɛ wɔ afeha a ɛto so anan A.Y.B. mu, bere a Aleksanda Ɔkɛse no asraafo a wɔka Hela kasa tuu Medo-Persia Ahemman no gui no. Nanso, Aleksanda wui mpofirim ara bere a na wadi mfirihyia 32 wɔ 323 A.Y.B. mu a wannyaw ɔdedifo a ɔfata biara. Bere a Aleksanda wui no, ‘abɛn a ɛso’ no bui. Na ‘mmɛn anan a efifi sii ananmu’ a wɔkaa ho asɛm too hɔ no nso ɛ?

¹² Ná Aleksanda wɔ asafohene pii, nanso wɔn mu baanan na wɔtraa ahengua so dii tumi. Enti nea ɛyɛe a ‘abɛn a ɛso’ no bui na afei ‘mmɛn anan’ anaa “ahenni anan” besii ananmu nen. Ansa na 301 A.Y.B. rebedu no na saa asafohene yi de wɔn ho asisi nhengua so: Ptolemy Lagus (Misraim ne Palestina ) ; Seleucus Nicator (Mesopotamia ne Siria) ; Cassander (Makedonia ne Hela) ; ne Lysimachus (Trake ne Asia Kumaa) .a Bio, yehu sɛ Yehowa Asɛm yɛ nokware.

“Obirɛmpɔn A Wɔasra No” No Pue!

13. Dɛn na Daniel 9:24, 25 ka wɔ Mesia no ba ho?

¹³ Daniel nhoma no de adanse a ɛda nsow titiriw bi nso ma a ɛkyerɛ sɛ Yehowa Asɛm yɛ nokware Mfehaha pii ansa na ɔreba no, honhom kaa Daniel ma ɔkyerɛɛ bere pɔtee a Mesia no bepue wɔ asase so. Nkɔmhyɛ a ɛyɛ anigye yi fã bi kae sɛ: “Wɔahyɛ adapɛn aduɔson, wo man ne wo kurow kronkron no so, sɛ wonwie mmarato na wɔmma bɔne nwie odu, na wɔmpata amumɔyɛ na wɔmfa daa trenee mmra, na wɔnsɔ anisoadehu ne adiyisɛm ano na wɔnsra akronkronne mu adekronkron. Enti hu na tie sɛ: Efi asɛm a ɛka sɛ wɔnsan nkyekye Yerusalem nsi n’ananmu no fi so kosi obirɛmpɔn a wɔasra no so yɛ adapɛn ason, na adapɛn aduosia abien.”​—Daniel 9:24, 25.

14. (a) Kyerɛwsɛm bɛn so na yebetumi agyina aka sɛ wɔ “adapɛn” a ɛwɔ Daniel 9:24, 25 no mu no, da biara gyina hɔ ma afe biako? (b) Afe bɛn mu na wɔde ‘asɛm a ɛka sɛ wɔnsan nkyekye Yerusalem’ no kɔe? (d) Na “adapɛn” 69 no tenten yɛ ahe, na bere bɛn na efii ase, na ɛbaa awiei bere bɛn?

¹⁴ So na “adapɛn” yi yɛ adapɛn ankasa? Dabi, efisɛ nneɛma a wɔhyɛɛ ho nkɔm wɔ ha a ɛfa Mesia no ho no nyinaa amma wɔ adapɛn 70, anaa nea ennu afe biako ne fã ntam. Eyi bɛyɛɛ “adapɛn” a wɔkan da biara a ɛwom sɛ afe. (Fa toto Numeri 14:33, 34 ho.) Wɔde “asɛm a ɛka sɛ wɔnsan nkyekye Yerusalem nsi n’ananmu” no kɔe wɔ Persia Hene Artaxerxes (Longimanus) afe a ɛto so 20 mu. (Nehemia 2:1-18) Esiane sɛ ofii ase dii hene wɔ 474 A.Y.B. mu nti, na n’afe a ɛto so 20 no yɛ 455 A.Y.B. Enti, adapɛn 69 a ɛyɛ mfe a efi ‘asɛm a ɛka sɛ wɔnsan nkyekye Yerusalem no so kosi Obirɛmpɔn a Wɔasra no no so’ no dodow yɛ mfe 483 (7 x 69) na ekosi 29 Y.B. mu.

15. Wɔ 29 Y.B. mu no, na dɛn na Yudafo no rehwɛ kwan?

¹⁵ Saa afe no mu no na Osuboni Yohane ani abere ‘reka adwensakra asubɔ a ɛde kɔ bɔne fafiri mu’ ho asɛm. Na Yudafo no nso ɛ? “Na . . . ɔman no hwɛ kwan, na wɔn nyinaa susuw wɔn komam sɛ ebia Yohane ne Kristo no.” (Luka 3:3-6, 15) Ɛdefa akwanhwɛ yi ho no, Yudani nhomanimfo Abba Hillel Silver kae sɛ: “Nanso, afeha a edi kan no, titiriw awo ntoatoaso a na ɛwɔ hɔ ansa na [Yerusalem] ɔsɛe no reba no, huu Mesia ho nkate ahorow a ɛmu yɛ den a ɛsɔree. Ɛnyɛ nea ɛmaa eyi baa saa ne yɛ a na Romafo ɔtaa no mu ayɛ den no na mmom gyidi a abu so a saa da no ho mmerebu a agye din ma wonyae . . . Ná wɔrehwɛ Mesia no kwan wɔ ɛrekɔ afeha a edi kan Y.B. no mfinimfini mu hɔ.” Ná “mmerebu a agye din” no yɛ nea egyina Daniel nhoma no so.

16. (a) Dɛn nti na na Tiberio Kaesare afe a ɛto so 15 no kyerɛ biribi? (b) Bere a wɔbɔɔ Yesu asu no, dɛn na esii?

¹⁶ Ná Daniel nkɔmhyɛ no akyerɛ sɛ adapɛn 69 a ɛyɛ mfepɛn no bɛkɔ akosi 29 Y.B. mu. So Mesia no bae wɔ ne bere mu wɔ saa afe no mu? Ɔbae! Osuboni Yohane fii n’asɛnka ne asubɔ adwuma no ase wɔ “Kaesare Tiberio ahenni afe a ɛto so dunnum so.” (Luka 3:13) Esiane sɛ Tiberio bɛyɛɛ Roma ɔhempɔn wɔ August 17, 14 Y.B. (Gregorian kalenda) mu nti, Yohane adwuma no fii ase wɔ ɛno akyi afe a ɛto so 15, anaa 29 Y.B. fefɛw bere mu. Saa afe no twabere mu na Yohane bɔɔ Yesu a ofi Nasaret no asu, na honhom kronkron sian fii soro bɛsraa Yesu sɛ Kristo, anaa Mesia no. (Luka 3:21, 22) Mesia ho nkɔmhyɛ no anya mmamu.b Asan ada adi bio sɛ Yehowa Asɛm yɛ nokware.

17. Mesia ho nkɔmhyɛ a enyaa mmamu wɔ Yesu Kristo so no bi ne nea ɛwɔ he?

¹⁷ Hebri Kyerɛwsɛm no mu nkɔmhyɛ afoforo pii nyaa mmamu wɔ Yesu Kristo ho. Sɛ nhwɛso no, ɔbaabun na ɔwoo Yesu wɔ Betlehem. (Yesaia 7:14; Mika 5:2; Mateo 1:18-23; 2:3-6) Wokunkum nkokoaa wɔ n’awo akyi. (Yeremia 31:15; Mateo 2:16-18) Obi nne teɛɛm dii n’anim. (Yesaia 40:3; Mateo 3:1-3) Yesu soaa yɛn nyarewa. (Yesaia 53:4; Mateo 8:16, 17) Ɔtraa afurum so kɔɔ Yerusalem. (Sakaria 9:9; Yohane 12:12-15) Ɔsomafo biako yii no mae de gyee nnwetɛbona 30. (Dwom 41:9; Sakaria 11:12; Mateo 26:14-16, 46-56; Yohane 13:18) Wɔbɔɔ Yesu asɛndua mu akyi no, asraafo kyɛɛ ne ntama mu fae na wɔbɔɔ n’atade so ntonto. (Dwom 22:18; Yohane 19:23, 24) Wɔammubu ne nnompe mu na mmom wɔde peaw wɔɔ no. (Dwom 34:20; Sakaria 12:10; Yohane 19:33-37) Bɛyɛ nnansa wɔ ɔdamoa mu akyi no, wonyanee no. (Yona 1:17; 2:10; Mateo 12:39, 40; Marko 9:31; Asomafo no Nnwuma 10:40) Eyinom yɛ nhwɛso horow a ɛkyerɛ sɛnea Mesia ho nkɔmhyɛ ahorow nyaa mmamu wɔ Yesu ho. Na, ɛkyerɛ nso sɛ Yehowa Asɛm yɛ nokware.

Wubetumi Ahu Nea Ɛbɛba Daakye

18, 19. (a) Dɛn nti na ɛnyɛ nea mfaso nni so sɛ wobebisa nea ɛbɛba ɔkyena? (b) Nsemmisa afoforo bɛn na ɛsɔre?

¹⁸ Yesu a ɔyɛ Mesia no ankasa hyɛɛ nkɔm a ɛma wonya anidaso. Sɛ nhwɛso no, ɔkaa ‘ba a ɔbɛsan aba’ daakye ho asɛm too hɔ. (Mateo 24:3-14) Nokwarem no, Bible akyerɛwfo pii kyerɛw nkɔmhyɛ ahorow a ɛkanyan koma a ɛfa afeha a ɛto so 20 yi ho too hɔ. Enti ɛnyɛ nea mfaso nni so sɛ wobebisa sɛ, ‘Dɛn na ɛbɛba ɔkyena?’ Yebetumi ahu!

¹⁹ Ɛde besi ha no, yɛasusuw Kyerɛwsɛm mu nkɔmhyɛ ahorow binom a enyaa mmamu wɔ mmere a atwam no mu ho. Na yɛn bere yi mu nso ɛ? So yɛwɔ adanse foforo a ɛyɛ anigye a ɛkyerɛ sɛ Yehowa Asɛm yɛ nokware?

[Ase hɔ nsɛm]

So Wutumi Kae?

□ Sɛnea wɔka too hɔ no, dɛn na ɛbaa tete kurow Tiro so?

□ Ɔkwan bɛn so na Niniwe ama yɛanya adanse a ɛkyerɛ sɛ Yehowa Asɛm yɛ nokware?

□ Dɛn na esii a ɛmaa Daniel 8:20-22 nyaa mmamu?

□ Ná “adapɛn” 69 no tenten yɛ ahe, na efii ase bere bɛn, na ɛbaa awiei bere bɛn?

□ Mesia ho nkɔmhyɛ ahorow a enyaa mmamu wɔ Yesu ho no bi ne nea ɛwɔ he?

[Kratafa 8 adaka]

“Sɛ wofunu kɔ asaman a, me nsa bɛfa wɔn afi hɔ aba, na sɛ wɔforo kɔ soro a, mede wɔn mefi hɔ masian; na sɛ wɔkɔbɔ Karmel atifi nkokora a, mɛtwee wɔn makɔfa wɔn mafi hɔ; na sɛ wofi m’anim kohintaw ɛpo ase a, ɛhɔ na mɛhyɛ ɔwɔ na wakeka wɔn; na sɛ wɔkɔ nnommumfa mu, wɔn atamfo anim a, ɛhɔ na mɛhyɛ afoa na akunkum wɔn, na mede m’ani mɛhwɛ wɔn mama bɔne na ɛnyɛ papa.”​—Amos 9:2-4.