So Onyankopɔn Hwehwɛ Mmuadadi?

ONYANKOPƆN Mmara a ɔnam Mose so de mae no hwehwɛe sɛ wodi mmuada wɔ bere biako pɛ mu—afe afe Mpata Da no. Mmara no hyɛe sɛ saa da no ɛsɛ sɛ Israelfo no ‘brɛ wɔn kra ase,’ a yɛte ase sɛ ɛkyerɛ sɛ wodii mmuada. (Leviticus 16:29-31; 23:27; Dwom 35:13) Nanso, na saa mmuadadi yi nyɛ adeyɛ bi kɛkɛ. Mpata Da a na wodi no maa Israelfo no huu wɔn bɔne ne hia a na wohia ogye no yiye. Wodii mmuada saa da no nso de daa wɔn bɔne ho awerɛhow a na wodi ne wɔn ahonu adi wɔ Onyankopɔn anim.

Ɛwom sɛ eyi nkutoo ne mmuada a wɔhyɛe sɛ wonni wɔ Mose Mmara no mu de, nanso Israelfo no dii mmuada mmere foforo nso. (Exodus 34:28; 1 Samuel 7:6; 2 Beresosɛm 20:3; Esra 8:21; Ester 4:3, 16) Ebi ne mmuada a na wofi wɔn pɛ mu di de kyerɛ ahonu. Yehowa hyɛɛ Yudafo a na wɔafom no nkuran sɛ: “Monsan mmra me nkyɛn, mo koma nyinaa ne abuadadi ne osũ ne adwotwa mu.” Ná ɛnsɛ sɛ eyi yɛ nnipa ani so adeyɛ, efisɛ Onyankopɔn toa so ka sɛ: “Munsunsuane mo koma, na ɛnyɛ mo ntade mu.”—Yoel 2:12-15.

Bere kɔɔ so no, nnipa pii dii mmuada sɛ nnipa ani so adeyɛ. Ná Yehowa kyi mmuada a ɛte saa a emfi komam no ma enti obisaa Israelfo nyaatwomfo no sɛ: “So sɛ mmuada a mepɛ, ɛda a onipa brɛ ne kra ase no te ni? Sɛ obi si ne ti ase sɛ mmɛw na ɔsɛw atweaatam ne nsõ da so a, so eyi na wofrɛ no abuadadi ne da a ɛsɔ Awurade ani?” (Yesaia 58:5) Sɛ́ anka asobrakyefo yi bedi nnipa ani so mmuada no, wɔkyerɛɛ wɔn sɛ wɔnyɛ nnwuma a ɛkyerɛ adwensakra.

Onyankopɔn ani ansɔ mmuada bi a Yudafo no dii no fi mfiase pɛɛ. Sɛ nhwɛso no, bere bi na Yudafo no di mmuada mpɛn anan afe biara de kae amanehunu a Yerusalem a wotwaa ho hyiae ne ne sɛe de bae wɔ afeha a ɛto so ason A.Y.B. mu no. (2 Ahene 25:1-4, 8, 9, 22-26; Sakaria 8:19) Bere a wogyaee Yudafo fii nnommumfa mu wɔ Babilon akyi no, Yehowa nam odiyifo Sakaria so kae sɛ: “Mudii mmuada . . . mfe aduɔson yi no, mmuadadi yi, mudi maa me anaa?” Onyankopɔn ani ansɔ saa mmuadadi yi efisɛ na Yudafo no redi mmuada resu wɔ atemmu a efi Yehowa ankasa hɔ no ho. Ná wɔredi mmuada esiane amane a ɛtoo wɔn no nti, na ɛnyɛ wɔn ankasa bɔne a ɛma ɛbaa saa no nti. Bere a wɔsan de wɔn baa wɔn asase so no, na ɛyɛ bere a ɛsɛ sɛ wɔma wɔn ani gye sen sɛ wobedi bere a atwam no ho awerɛhow.—Sakaria 7:5.

Ɛsɛ sɛ Kristofo Di Mmuada?

Ɛwom sɛ Yesu Kristo anhyɛ n’asuafo no da sɛ wonni mmuada de, nanso ɔne n’akyidifo no dii mmuada wɔ Mpata Da no efisɛ na wɔwɔ Mose Mmara no ase. Bio nso, n’asuafo no bi fi wɔn pɛ mu dii mmuada mmere foforo esiane sɛ Yesu ankyerɛ wɔn sɛ wɔnkwati adeyɛ no koraa nti. (Asomafo no Nnwuma 13:2, 3; 14:23) Nanso, na ɛnsɛ sɛ “wonyinnyan wɔn anim sɛnea nnipa behu sɛ wɔredi mmuada.” (Mateo 6:16) Ná yɛ a wɔbɛyɛ wɔn ho akronkronfo wɔ nnipa ani so no betumi ama afoforo ani agye wɔn ho ma wɔn ani asɔ wɔn. Nanso, Onyankopɔn ani nsɔ ani so adeyɛ a ɛte saa no.—Mateo 6:17, 18.

Yesu kaa mmuada a na n’akyidifo bedi bere a wawu no nso ho asɛm. Ná ɛnyɛ sɛ ɔde mmuadadi ho amanne bi resi hɔ. Mmom no, na ɔrekyerɛ ade a wɔbɛyɛ wɔ awerɛhow a wobedi kɛse no ho. Sɛ wonyan no fi awufo mu a, na ɔbɛsan aba wɔn nkyɛn, na na ɛho renhia bio sɛ wodi mmuada.—Luka 5:34, 35.

Mose Mmara no baa awiei bere a ‘wɔde Kristo bɔɔ afɔre prɛko sɛ ɔnsoa nnipa bebree bɔne no.’ (Hebrifo 9:24-28) Na bere a Mmara no baa awiei no, ahyɛde a na ɛne sɛ wonni mmuada Mpata Da no baa awiei. Enti, woyii ahyɛde koro pɛ a wɔde mae sɛ wonni mmuada a wɔbɔ din wɔ Bible mu no fii hɔ.

Lent Nso Ɛ?

Ɛnde, dɛn na Kristoman gyina so di mmuada wɔ bere a wɔfrɛ no Lent no mu? Katolek ne Protestant asɔre ahorow no nyinaa gye Lent tom, ɛwom sɛ ɛsono sɛnea asɔre biara di no de. Ebinom didi pɛnkoro pɛ da biara wɔ nnafua 40 a edi Easter anim no nyinaa mu. Ebinom di mmuada wesee wɔ Nsõ Wukuda ne Owu Da no. Wɔ ebinom fam no, Lent hwehwɛ sɛ wɔtwe wɔn ho fi mogyanam, mpataa, nkesua, ne nneɛma a wɔde nufusu yɛ ho.

Wɔkyerɛ sɛ nnafua 40 mmuada a Yesu dii wɔ n’asubɔ akyi no nti na wodi Lent. So na ɔde amanne bi resi hɔ saa bere no a wobedi akyi afe biara? Dabida. Yetumi hu eyi fi nokwasɛm a ɛyɛ sɛ Bible no nyɛ adeyɛ a ɛte saa wɔ tete Kristofo no mu ho kyerɛwtohɔ mu. Kristo akyi afeha a ɛto so anan no mu na wodii kan dii Lent no. Te sɛ Kristoman nkyerɛkyerɛ pii a aka no, wonya fii abosonsom mu.

Sɛ wodi Lent de suasua mmuada a Yesu dii wɔ sare so wɔ n’asubɔ akyi no a, dɛn nti na wodi no adapɛn a edi Easter anim no mu—a wɔkyerɛ sɛ ɛno ne bere a wonyan no fii awufo mu no? Yesu anni mmuada wɔ nna a edi ne wu anim no mu. Asɛmpa no ho kyerɛwtohɔ no kyerɛ sɛ ɔne n’asuafo no kɔɔ afie mu kodidii wɔ Betania nna kakraa bi ansa na ɔrewu no. Na odii Twam aduan no anadwo ansa na ɔrewu no.—Mateo 26:6, 7; Luka 22:15; Yohane 12:2.

Biribi wɔ hɔ a ɛsɛ sɛ yesua fi mmuada a Yesu dii wɔ n’asubɔ akyi no mu. Ná ɔrebefi adwuma titiriw bi ase. Na Yehowa tumidi a obebu no bem ne adesamma abusua no nyinaa daakye ho asɛm wom. Ná eyi ne bere a ɛsɛ sɛ odwennwen nneɛma ho yiye na ɔde mpaebɔ kɔ Yehowa nkyɛn kɔhwehwɛ mmoa ne akwankyerɛ. Saa bere yi mu no, Yesu dii mmuada ma ɛfatae. Eyi kyerɛ sɛ mmuadadi betumi ayɛ nea mfaso wɔ so bere a wɔde adwempa yɛ no bere a ɛfata mu no.—Fa toto Kolosefo 2:20-23 ho.

Bere a Mmuadadi Betumi Ayɛ Nea Mfaso Wɔ So

Ma yensusuw mmere bi a Onyankopɔn somfo bi betumi adi mmuada nnɛ ho. Ebia obi a wayɛ bɔne kɔn rennɔ sɛ obedidi bere bi. Ɛnyɛ sɛ ɔreyɛ eyi de anya afoforo so nkɛntɛnso anaasɛ ɔde reda abufuw adi wɔ nteɛso a wɔde ama no ho. Na nokwarem no, mmuadadi ankasa rensiesie nsɛm wɔ Onyankopɔn anim. Nanso, obi a wanu ne ho nokwarem no bedi awerɛhow kɛse wɔ haw a wahaw Yehowa ne ebia nnamfo ne abusuafo no ho. Ebia ɛyaw ne anibere a ɔde bɔ fafiri ho mpae no remma ne kɔn nnɔ aduan.

Israel Hene Dawid nyaa osuahu a ɛte saa ara. Bere a na onim sɛ ɔbɛhwere ne babarima a ɔne Batseba woo no no, ɔde ne bere nyinaa bɔɔ Yehowa mpae sɛ onhu abofra no mmɔbɔ. Bere a ɔde ne ho nyinaa hyɛɛ mpaebɔ mu no, odii mmuada. Saa ara na aduan a ebia wobedi remfata wɔ ɔhaw tebea bi mu nnɛ.—2 Samuel 12:15-17.

Mmere bi nso wɔ hɔ a ebia obi a osuro Nyankopɔn pɛ sɛ ɔde n’adwene si honhom fam nneɛma so kɛse. Ebia na ɛho behia sɛ ɔyɛ Bible ne Kristofo nhoma ahorow mu nhwehwɛmu. Ebia obehia bere bi de adwennwen nneɛma ho. Wɔ bere a ɛte saa a wɔde resua ade yi mu no, obi betumi apaw sɛ ɔremma aduan ntwetwe n’adwene.—Fa toto Yeremia 36:8-10 ho.

Kyerɛwnsɛm mu nhwɛso a ɛfa mmuada a Onyankopɔn asomfo dii bere a na ɛsɛ sɛ wosi gyinae a emu yɛ den bi ho no wɔ hɔ. Wɔ Nehemia bere so no, wɔhyɛɛ Yehowa bɔ bi a na sɛ Yudafo no bu so a, wɔbɛdome wɔn. Ná ɛsɛ sɛ wɔhyɛ bɔ sɛ wobegyaa wɔn yerenom ananafo na wɔatwe wɔn ho afi aman a atwa wɔn ho ahyia no ho. Ansa na wɔrehyɛ saa bɔ yi ne bere a na wɔreka wɔn bɔne akyerɛ no, asafo no nyinaa dii mmuada. (Nehemia 9:1, 38; 10:29, 30) Enti sɛ ɛsɛ sɛ Kristoni bi si gyinae a emu yɛ den a, obetumi adi mmuada bere tiaa bi.

Ɛtɔ mmere bi a, na mpanyimfo akuw a wɔwɔ tete Kristofo asafo no mu no di mmuada ansa na wɔasi gyinae. Ɛnnɛ, asafo mu mpanyimfo a wɔresi gyinae bi a emu yɛ den, a ebia ɛfa asɛnni bi ho no rennidi bere a wɔresusuw asɛm no ho no.

Sɛ obi bɛpaw sɛ obedi mmuada wɔ tebea ahorow bi mu no yɛ ankorankoro gyinaesi. Ɛnsɛ sɛ obi kasa tia obi wɔ eyi ho. Yɛrempɛ sɛ yɛbɛyɛ yɛn ho “nnipa trenee nnipa anim”; saa ara na yɛremma aduan ho nhia pii mma entwitware asɛyɛde a anibere wom ho dwumadi mu. (Mateo 23:28; Luka 12:22, 23) Na Bible no kyerɛ sɛ Onyankopɔn nhwehwɛ sɛ yebedi mmuada, saa ara na onsiw yɛn mmuadadi ho kwan.

[Kratafa 7 mfonini]

Wunim nea enti a Yesu dii mmuada nnafua 40 wɔ n’asubɔ akyi no?