Daniel​—Nkɔmhyɛ Nhoma A Ɛyɛ Nokware

BIBLE kyerɛwtohɔ no ka kyerɛ yɛn sɛ: “Babel hene Belsasar afe a edi kan mu no, da bi a Daniel da ne mpa so no, ɔsoo dae huu anisoade bi; ɛna ɔkyerɛw ɔdae no kaa nsɛm no mu ade titiriw.”​—Daniel 7:1.

Ɛyɛ afeha a ɛto so asia A.Y.B. no fã a ɛto so abien no mu na Daniel kyerɛw eyi ne adaeso ne anisoadehu foforo a ɛfa yɛn ho nnɛ no. Yɛwɔ anisoadehu ahorow yi ‘mu nsɛm no nyinaa’ wɔ Daniel nkɔmhyɛ nhoma no mu.

Odiyifo Nokwafo

Kristo ankasa dii adanse sɛ na Daniel yɛ odiyifo. Nea ɛyɛ anigye no, Yesu yɛɛ saa wɔ n’ankasa nkɔmhyɛ a ɛfa “ne ba ne wiase awiei” ho sɛnkyerɛnne ho no mu. Ɔnam saa yɛ so kyerɛɛ Daniel nkɔmhyɛ no mmamu mu koraa de besii yɛn bere yi so na yɛrehu sɛnkyerɛnne no afã ahorow te sɛ amanaman ntam akodi, aduankɔm, asasewosow, ne wiase nyinaa awoko yaw.​—Mateo 24:3-8, 15.

Yesu kae sɛ: “Atoro adiyifo bebree bɛsɔre, na wɔabɛdaadaa nnipa bebree; . .. Na wɔbɛka ahenni no ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba. Enti sɛ muhu akyide a ɛbɔ ɔman a odiyifo Daniel kae no sɛ egyina Kronkronbea hɔ a,​—nea ɔkan no, ma ɔnte ase!​—ɛno na wɔn a wɔwɔ Yudea nguan nkɔ mmepɔw so. Nokware mise mo sɛ, awo ntoatoaso yirentwam, gye sɛ eyinom nyinaa aba mu ansa.”​—Mateo 24:11-34.

Nokwasɛm a ɛyɛ sɛ Yesu bɔɔ kɔkɔ sɛ atoro adiyifo bɛba ansa na ɔretwe n’asuafo no adwene asi “odiyifo Daniel” so no kyerɛ sɛ na ogye Daniel tom sɛ ɔyɛ Onyankopɔn diyifo ampa. Yɛahu wɔ asɛm a edi kan no mu sɛ Daniel nkɔmhyɛ a efi honhom mu no bi, te sɛ nea ɛkaa Nebukadnesar bere tiaa mu adammɔ ne Babilon asehwe ho asɛm no, baa mu wɔ Daniel bere so. Nanso Daniel kaa nneɛma afoforo a ebesisi mfehaha pii akyi no ho asɛm too hɔ. Bere tenten mu nkɔmhyɛ ahorow a wɔakyerɛw ato hɔ wɔ Daniel nhoma no mu no bi ne nea ɛwɔ he?

Mesia No Ba Ne Ne Wu

Nkɔmhyɛ a ɛkyerɛ pefee sɛ na Daniel yɛ odiyifo nokwafo no ne nea wɔfrɛ no nkɔmhyɛ adapɛn 70 no. Ne fã bi kenkan sɛ: “Wɔahyɛ adapɛn aduoson, wo man ne wo kurow kronkron no so, sɛ wonwie mmarato na wɔmma bɔne nwie odu, na wɔmpata amumɔyɛ . . . Enti hu na tie sɛ: Efi asɛm a ɛka sɛ wɔnsan nkyekye Yerusalem nsi n’ananmu no fi so kosi obirɛmpɔn a wɔasra no so yɛ adapɛn ason, na adapɛn aduosia abien [ne nyinaa yɛ 69]. . . .Na adapɛn aduosia abien no akyi [kyerɛ sɛ 7+62 anaasɛ dapɛn a ɛto so 69 no akyi] no, wobetwa nea wɔasra no no akyene. . . Na ɔne bebree bɛyɛ apam a emu yɛ den dapɛn biako [nea ɛto so 70 no]; na dapɛn no fã mu, ɔbɛma afɔrebɔ ne ayɛyɛdema agyae.”​—Daniel 9:24-27.

Yudafo, Katolekfo, ne Protestantfo pii a wɔasua Bible no gye tom sɛ “adapɛn” a ɛwɔ nkɔmhyɛ yi mu no yɛ adapɛn a egyina hɔ ma mfe. Revised Standard Version kenkan sɛ: “Adapɛn aduoson a ɛyɛ mfe na wɔahyɛ wo man.” Saa mfe 490 no fii ase wɔ 455 A.Y.B. mu bere a Persia hene Artasasta maa Nehemia kwan sɛ ‘ɔnsan nkyekye Yerusalem nsi n’ananmu no.’ (Nehemia 2:1-8) Adapɛn aduosia akron a ɛyɛ mfe akyi, a ɛyɛ 29 Y.B. mu no, wɔbɔɔ Yesu asu na wɔsraa no ma ɔbɛyɛɛ Kristo, Nea Wɔasra No, Mesia. “Na dapɛn a ɛto so [70] no fã mu” wɔ 33 Y.B. mu no, ‘wotwaa no kyenee.’ N’afɔrebɔ wu no na ɛbɛyɛɛ mpatade maa adesamma bɔne a wɔnam so maa mmoa afɔre a na wɔbɔ wɔ Mose Mmara no ase no ‘gyaee’ no.a

Esiane nkɔmhyɛ a ɛyɛ nokware yi nti, na afeha a edi kan Yudafo no “nim sɛ adapɛn aduoson a ɛyɛ mfe a Daniel hyɛe no rebɛn n’awiei; anyɛ obiara nwonwa sɛ wɔtee sɛ Osuboni Yohane rebɔ dawuru sɛ Onyankopɔn Ahenni no abɛn.”​—Manuel Biblique a Bacuez ne Vigouroux kyerɛwee

Wiase Tumi Horow A Ɛte Sɛ Mmoa

Bere tenten mu nkɔmhyɛ foforo a ɛho hia nnipa a wɔte ase nnɛ kaa wiase tumi ahorow a edidi so a wɔde mmoa a wɔn ho yɛ hu yɛɛwɔn ho sɛnkyerɛnne a ɛsɛ sɛ wɔma Onyankopɔn Ahenni no kwan ho asɛm too hɔ.

Daniel kae sɛ: “Mihuu m’ani so ade anadwo, na hwɛ, . . . Mmoa akɛse anan pue fii ɛpo no mu, ɛsono oyi na ɛsono oyi. Nea odi kan no te sɛ gyata, . . . Na hwɛ, aboa foforo a otia abien te sɛ osisi. . . Na hwɛ, aboa foforo a ɔte sɛ ɔsebɔ. . . eyi akyi no mede hwɛ ara anadwo adehu mu, na hwɛ, aboa a ɔto so anan a ne ho yɛ hu ne nwonwa na ɔyɛ den boro soni, . . mmoa akɛse yi a wosi anan yi yɛ ahene baanan a wobefi asase so asɔre agyina. Na ɔsorosoroni no ahotefo bɛfa ahenni no, na wɔanya ahenni no daa daa mmeresanten.”​—Daniel 7 :2-18.

Sɛ́ ɛyɛ nea saa mmoa yi gyina hɔ ma wiase tumi horow no da adi wɔ anisoadehu foforo a Daniel nyae no mu. Ɔrekyerɛkyerɛ anisoadehu yi mu no, ɔkyerɛwee sɛ: “Odwennini a wuhuu no a ɔwɔ mmɛn abien no ne Media ne Persia ahene; na ɔpapo a ɔyɛ kekã no ne Hela hene.”​—Daniel 8:20-21.

Saa ara na mmoa anan a wɔwɔ Daniel ti 7 no gyina hɔ ma wiase tumi horow anan a efi Daniel bere so reba besi bere a wɔde Onyankopɔn Ahenni no sii hɔ no. Ná Daniel te ase bere a Babilon Wiase Tumi (gyata no) hwee ase no ne bere a nea ebesii n’ananmu, Medo-Persia (osisi no) fii ase no. Daniel bere tenten mu nkɔmhyɛ no kaa afe a Medo-Persia bɛhwe ase wɔ Hela (ɔsebɔ no) anim a ɔno nso yɛ “aboa a ɔto so anan,” Roma Ahemman no ne nea ebefi mu aba, Anglo-Amerika Wiase Tumi no bɛba abesi n’ananmu no ho asɛm too hɔ.”

Daniel kaa wiase tumi horow a ebedidi so aba ho asɛm too hɔ pɛpɛɛpɛ a wɔn nyinaa ahwie mogya agu te sɛ mmoa a wɔyɛ kekã wɔ wɔn wiase tumi a wɔhwehwɛ mu no. Saa ara nso na ɛrenkyɛ trenee Ahenni a ɔkaa ho asɛm too hɔ no bɛba abesi nnɛyi amammui tumi horow no ananmu. Wɔ anisoadehu bi mu no, Daniel huu “Nea ne nna akyɛ,” Yehowa Nyankopɔn, sɛ ɔde “tumi ne anuonyam ne ahenni” ama “onipa ba,” Mesia Yesu na “aman, nkurɔfo ne ɔkasa horow nyinaa som no.” So eyi de adesamma haw ahorow no ano aduru a ɛtra hɔ daa bɛba? Yiw, efisɛ wɔka Yesu nniso no ho asɛm wɔ ha sɛ “ne tumi yɛ daa tumi a ɛrentwam da, na n’ahenni yɛ nea ɛrensɛe da.”​—Daniel 7:13, 14; fa toto Mateo 16:27, 28; 25:31 ho.

Bere tiaa ne bere tenten mu nkɔmhyɛ ahorow a yɛaka ho asɛm tiawa wɔ nsɛm ahorow abien yi mu no yɛ adaeso, anisoadehu, ne nkɔmhyɛ ahorow a ɛwɔ Daniel nhoma no mu no ho nhwɛso ara kwa. Nhwɛso ahorow yi di adanse sɛ Daniel yɛ nkɔmhyɛ nhoma a ɛyɛ nokware​—abakɔsɛm a wodii kan kyerɛw too hɔ. Nkɔmhyɛ ahorow yi mmamu kɔ so ara de bedu afeha a ɛto so 20 yi mu na ɛma yenya anidaso a ɛyɛ nwonwa, sɛnea nsɛmma nhoma yi ne afoforo a ebedi akyi aba no bɛkyerɛkyerɛ mu no.

[Ase hɔ nsɛm]

Sɛnea ɛbɛyɛ a wubenya nkɔmhyɛ yi mu nkyerɛkyerɛmu pii no, hwɛ Our Incoming World Government​—God’s Kingdom a Ɔwɛn Aban Bible ne Nhomawa Asafo a ɛwɔ New York tintimii no atiri 6 ne 7.

[Kratafa 6 adaka]

“AKYIRI Yl BERE” NKYERƐKYERƐ NO

BIBLE no ka sɛ odiyifo a ne din da Daniel nhoma no so no na ɔkyerɛwee, a ɛkyerɛ sɛ ɔkyerɛw nhoma yi wɔ afeha a ɛto so asia A.Y.B. mu no mu. (Daniel 7:1) Nanso nkɔmhyɛ ahorow a ɛwom no yɛ nwonwa araa ma ɛma nnipa pii adwenem yɛ wɔn naa sɛ ɛyɛ nea wɔkyerɛwee ansa na nsɛm a wɔaka ho asɛm wom no resisi. Ebinom a wɔnyɛ Kristofo ne Bible nkyerɛkyerɛmufo pii a wɔfrɛ wɔn ho Kristofo mpo adwenem yɛ wɔn naa wɔ nokware a Daniel nhoma no yɛ ho. Wɔpɛ nea wɔfrɛ no akyiri yi bere, anaasɛ Makabeefo bere nkyerɛkyerɛ a mfiase no nyansapɛfo a ɔsɔre tia Kristosom a wɔfrɛ no Porphyry a ɔtraa ase wɔ afeha a ɛto so abiɛsa Y.B. mu no de bae no mmom. Dɛn na wɔka de gyina nkyerɛkyerɛ yi akyi, na ɛsom bo dɛn?

Esiane adwene a Porphyry wɔ sɛ nkɔmhyɛ nyinaa rentumi nyɛ yiye no nti, ɔkae sɛ nhoma a Daniel din da so no yɛ nea Yudani bi a wonnim no na ɔkyerɛwee wɔ Makabeefo no bere so wɔ afeha a ɛto so abien A.Y.B. mu a ɛkyerɛ sɛ ɛyɛ bere a asɛm a wɔka too hɔ wɔ Daniel no mu pii asisi akyi. Ɔkae sɛ onii a ɔkyerɛw Daniel din no yɛɛ saa sɛnea ɛbɛyɛ a ɛbɛhyɛ Yudafo no den wɔ bere a Makabeefo tew atua tiaa Selesidfo wɔ afeha a ɛto so abien A.Y.B. mu no. Nanso so ɛyɛ nea wobetumi aka sɛ Daniel abrabɔ a nidi wom na basabasayɛ biara nnim ne ne nnamfo Hebrifo baasa a wɔwɔ Babilon no yɛɛ nea ebetumi akanyan nkurɔfo ma wɔatew atua? Dabida. (Daniel 1:8; 2:49; 3:16-18, 30) Ba a “Ɔbirɛmpɔn a Wɔasra No” no bae bere ano pɛpɛɛpɛ wɔ 29 Y.B. mu, wɔ “adapɛn” 69 a ɛyɛ mfe a wɔka ho asɛm wɔ Daniel 9:25 no awiei no nso ma afeha a ɛto so abien A.Y.B. a Porphyry ka ho asɛm no yɛ nea nyansa nnim.

Sɛnea Yudani abakɔsɛm kyerɛwfo Josephus kyerɛ no, Hebri Kyerɛwnsɛm a ɛyɛ nokware a Daniel nso ka ho no kyerɛw baa awiei wɔ Esra bere so wɔ afeha a ɛto so anum A.Y.B. mu. Ɛnde dɛn nti na wobetumi aka sɛ “akyiri yi bere” a ɛyɛ afeha a ɛto so abien A.Y.B. mu no akyi ansa na wɔrekyerɛw Daniel nhoma no? Bio nso, Po a Awu Nhoma Mmobɔwee no da no adi sɛ na Daniel nhoma no yɛ nea wogye tom kɛse sɛ Kyerɛwnsɛm no fã wɔ Yudafo no mu wɔ afeha a ɛto so abien A.Y.B. mu. Sɛ ɛyɛ wɔn bere so nhoma ara kwa a, so anka eyi bɛba saa?

Asɛm foforo a Porphyry ne akyinnyegyefo akɛse pii ka ne sɛ abakɔsɛm mu nsɛm ahorow wɔ Daniel nhoma no mu a ɛnyɛ nokware. Nea wɔkyerɛkyerɛ ne sɛ wɔkyerɛw Daniel nhoma no wɔ afeha a ɛto so abien A.Y.B. mu. Nanso wɔ saa bere no mu no na Yudafo a wɔwɔ nhumu repow Makabeefo nhoma a edi kan no sɛ ɛmfata sɛ wɔde bɛka Kyerɛwnsɛm a ɛyɛ nokware no ho, ɛwom sɛ wobuu no sɛ ɛyɛ abakɔsɛm mu asɛm a ɛyɛ nokware de. Yudafo nhomanimfo a wɔwɔ wiase abakɔsɛm akyerɛwfo te sɛ Herodotus nhoma ahorow no bɛpow Daniel nhoma no, sɛ ɛyɛ nea abakɔsɛm mu mfomso ahorow wom a. Bio nso, nneɛma ahorow a wɔatutu fam akohu asi wɔ a na Belsasar wɔ hɔ ne Daniel nhoma no mu nsɛm afoforo a Porphyry ne akyinnyegyefo akɛse pii ka sɛ ɛnyɛ nokware no so dua.

Ɛdefa ka a Porphyry ka sɛ wɔkyerɛw Daniel nkɔmhyɛ ahorow no bere a nsɛm a wɔka too hɔ no asisi no akyi no ho no Philip R. Davies a ɔwɔ Sheffield, England, Sukuupɔn no fã a ɛhwɛ Bible mu nhwehwɛmu ho nsɛm so no kyerɛwee sɛ: “Eyi yɛ asɛm a ɛyɛ yaw a wɔka fa Daniel nhoma no ho a ne fã kɛse no ara yɛ nnaadaasɛm a wɔhyɛ da de daadaa atiefo a wɔn adwenem mmuei na ama wɔafa nnaadaa kwan so anya anuonyam a wɔhwehwɛ . . . Ɛyɛ den ma me sɛ mɛka sɛ nnaadaasɛm a ɛte sɛɛ fi wɔn a wodi kan a wɔkenkan nhoma no. Sɛ atoro bi w ɔ eyi mu a, ebia na efi wɔn a wɔkasa tia kɛse no titiriw.”​—Journal for the Study of the Old Testament, nea ɛto so 17, 1980.

Ɛnyɛ nwonwa sɛ nyansapɛfo a ogye Pluto nkyerɛkyerɛ di a ɔwɔ hɔ nnɛ gye kyim sɛ ɛnyɛ Onyankopɔn honhom na ɛkaa Bible ɔkyerɛwfo no ma ɔhyehyɛɛ nsɛm a ebesisi daakye ho nkɔm no. Nanso Bible asekyerɛfo a wɔkyerɛ sɛ wɔyɛ Kristofo a wɔbɔ mmɔden sɛ wɔbɛsɛe ahotoso a nkurɔfo wɔ wɔ Kyerɛwnsɛm no mu nkɔmhyɛ nhoma a ɛho hia yi mu no yɛ awerɛhow. Ɛkyerɛ sɛ wonni gyidi wɔ Nea ɔkaa eyi no mu: “Me a mifi mfiase meka awiei asɛm, na mifi tete mmere no meka nea wɔnyɛe no.”​—Yesaia 46:10.

[Kratafa 5 mfoni]

(Wopɛ nsɛm a wɔahyehyɛ no nyinaa a, hwɛ nhoma no mu)

Adapɛn 70(mfe 490)

Adapɛn 69(mfe 483) dapɛn 1(mfe 7)

455 A.Y.B 29 Y.B. 33 Y.B. 36 Y.B.

[Asɛm a wɔafa aka wɔ kratafa 7]

Na ɔno na wɔde tumi ne anuonyam ne ahenni maa no ma aman, nkurɔfo ne ɔkasa horow nyinaa som no; ne tumi yɛ daa tumi a ɛrentwam da, na n’ahenni yɛ nea ɛrensɛe da”​—Daniel 7:13,14.

[Kratafa 7 mfoni]

Babilon

Medo-Persia

Hela

Roma​—Britania ne U.S.A