Ti 19

So Ɛteɛ sɛ Wobɛko?

SO WUNIM mmarimaa anaa mmeawa a wɔhoahoa wɔn ho na wɔyɛ akɛsesɛm?— So w’ani gye ho sɛ wo ne wɔn bɛbɔ? Anaasɛ wobɛpɛ sɛ wo ne obi a ne yam ye na ɔpɛ asomdwoe mmom bɔ?— Ɔkyerɛkyerɛfo Kɛse no kae sɛ: “Nhyira ne apatafo, na wɔn na wɔbɛfrɛ wɔn Onyankopɔn mma.”—Mateo 5:9.

Nanso ɛtɔ mmere bi a nnipa foforo yɛ nneɛma a ɛma yɛn bo fuw. So ɛnyɛ nokware?— Enti ebia yɛbɛte nka sɛ yɛnyɛ bi ntua wɔn so ka. Bere bi, eyi too Yesu asuafo no bere a na wɔne Yesu retu kwan akɔ Yerusalem no. Ma menka ho asɛm nkyerɛ wo.

Bere a wotwaa kwan kakra no, Yesu somaa n’asuafo no mu kakra dii n’anim kɔɔ Samariafo akuraa bi ase sɛ wɔnkɔhwehwɛ baabi a wɔbɛsoɛ. Nanso nkurɔfo a na wɔwɔ hɔ no ampɛ sɛ wɔtra hɔ, efisɛ na ɛsono Samariafo no som. Enti na wɔmpɛ obiara a ɔkɔ Yerusalem kɔsom no asɛm.

Sɛ saa asɛm yi too wo a, dɛn na anka wobɛyɛ? So anka wo bo befuw? So anka wobɛpɛ sɛ woyɛ biribi de tua wɔn so ka?— Ɛno na na asuafo Yakobo ne Yohane pɛ sɛ wɔyɛ. Wɔka kyerɛɛ Yesu sɛ: “Wopɛ sɛ yɛka na ogya fi soro bɛhyew wɔn?” Ɛnyɛ nwonwa sɛ Yesu frɛɛ wɔn Aprannaa Mma! Nanso Yesu ka kyerɛɛ wɔn sɛ ɛnteɛ sɛ wɔne afoforo bedi nsɛm saa kwan no so.—Luka 9:51-56; Marko 3:17.

Ɛyɛ nokware sɛ ɛtɔ mmere bi a, nkurɔfo bɛbɔ yɛn atirimmɔden. Ebia mmofra foforo rempɛ sɛ yɛne wɔn bedi agoru. Wobetumi aka mpo sɛ: “Yɛmpɛ wo wɔ ha.” Sɛ biribi a ɛte saa si a, ebetumi ahaw yɛn, ɛnte saa? Ebia yɛbɛte nka sɛ yɛnyɛ biribi mfa ntua wɔn so ka. Nanso, so ɛsɛ sɛ yɛyɛ saa?—

Dɛn nti na womfa wo Bible? Ma yemmue Mmebusɛm ti 24, nkyekyɛm 29. Ɛhɔ kenkan sɛ: “Nka sɛ: Sɛ ɔyɛɛ me no, saa na mɛyɛ no, metua no nea wayɛ no so ka.”

Wote ase dɛn?— Ɛreka sɛ ɛnsɛ sɛ yɛbɔ mmɔden sɛ yɛbɛyɛ biribi atua obi so ka. Ɛnsɛ sɛ yɛbɔ obi atirimmɔden esiane sɛ ɔbɔɔ yɛn atirimmɔden nti. Nanso sɛ obi bɔ mmɔden sɛ ɔbɛka wo ntɔkwaw nso ɛ? Ebia ɔbɛbɔ mmɔden sɛ ɔbɛhyɛ wo abufuw denam din ahorow a ɔbɛtoto wo so. Ebia ɔbɛserew wo na waka sɛ wusuro. Fa no sɛ ɔfrɛ wo ohufo. Dɛn na ɛsɛ sɛ woyɛ? So ɛsɛ sɛ wo ne no ko?—

Bio, ma yɛnhwɛ nea Bible no ka. Bue Mateo ti 5, nkyekyɛm 39. Yesu ka wɔ hɔ sɛ: “Mo ne ɔbɔne no nnni asi, na nea ɔbɛpae w’aso nifa mu no, dan biako no nso ma no.” Wususuw sɛ dɛn na na Yesu repɛ akyerɛ? So na ɔkyerɛ sɛ sɛ obi bɔ w’asom a, ɛsɛ sɛ wodan ɔfã a aka no nso ma no?—

Dabi, ɛnyɛ saa na na Yesu kyerɛ koraa. Asom a wɔprɛ nte sɛ nea wɔabɔ wo akuturuku. Ɛte sɛ nea wapia wo anaa wasum wo. Ebia obi bɛbɔ yɛn de aka yɛn ntɔkwaw. Ɔpɛ sɛ yɛn bo fuw. Na sɛ yɛn bo fuw na sɛ yɛn nso yepia no bi a, dɛn na ɛbɛba?— Nea ɛbɛba ara ne sɛ yɛbɛko ntɔkwaw.

Nanso na Yesu mpɛ sɛ n’akyidifo ko ntɔkwaw. Enti ɔkae sɛ sɛ obi pae yɛn asom a, ɛnsɛ sɛ yɛpae ne de bi tua ka. Ɛnsɛ sɛ yɛma yɛn bo fuw na yɛko ntɔkwaw. Sɛ yɛyɛ saa a, yɛda no adi sɛ yɛne nea ofii ntɔkwaw no ase no nyinaa yɛ pɛ.

Sɛ obi fi ase haw wo a, wususuw sɛ dɛn ne ade pa a ɛsɛ sɛ woyɛ?— Nea ɛsɛ sɛ woyɛ are ne sɛ wubefi ne nkyɛn akɔ. Ebia obepiapia wo anaasɛ obesunsum wo nkakrankakra. Nanso ɛno akyi no ɔrentumi nyɛ biribiara bio. Sɛ wufi ne nkyɛn kɔ a, ɛnkyerɛ sɛ w’ani nyɛ den. Ɛkyerɛ sɛ woyɛ den wɔ adetreneeyɛ mu.

Na sɛ wo ne no ko ntɔkwaw na wutumi hwe no nso ɛ? Dɛn na ebetumi asi?— Nea wohwee no no betumi akɔfa ne nnamfo binom asan aba. Wobetumi de abaa kɛse bi aboro wo anaasɛ wɔde sekan awɔ wo. Enti wubetumi ahu nea enti a Yesu mpɛ sɛ yɛko ntɔkwaw no?—

Sɛ yehu sɛ afoforo reko a, dɛn na ɛsɛ sɛ yɛyɛ? So ɛsɛ sɛ yegyina wɔn mu bi afã?— Bible kyerɛ yɛn nea ɛteɛ. Bue Mmebusɛm ti 26 nkyekyɛm 17. Ɛka sɛ: “Nea ɔde ne ho fra asɛm a ɛnyɛ ne de mu te sɛ nea oso ɔkraman a ɔretwam aso mu.”

Sɛ wuso ɔkraman aso mu a, dɛn na ebesi? Ɛbɛyɛ ɔkraman no yaw, na ɔbɛka wo, ɛnte saa? Mpɛn dodow a ɔkraman no pere sɛ obegye ne ho no, dodow no ara na ɛsɛ sɛ wumia wo nsam so ɔkraman no aso yiye, na dodow no ara na ɔkraman no ani bɛbere. Sɛ wugyae no a, ɔbɛka wo apira wo. Nanso so wubetumi agyina hɔ aso n’aso mu akosi daa?—

Wiɛ, sɛ yɛne afoforo ko ntɔkwaw a, ɔhaw a ɛte saa na yebehyia. Ebia na yennim nea ofii ntɔkwaw no ase ne nea enti a wɔreko. Ebia na wɔreyɛ aboro obiako, nanso ebia na wakowia nea ɔne no reko no biribi. Sɛ yɛkɔboa no a, na yɛreboa ɔkorɔmfo. Ɛrenyɛ ade papa, ɛnte saa?

Ɛnde sɛ wuhu sɛ afoforo reko ntɔkwaw a, dɛn na ɛsɛ sɛ woyɛ?— Sɛ ɛyɛ sukuu mu a, wubetumi atu mmirika akɔka akyerɛ ɔkyerɛkyerɛfo bi. Na sɛ ɛnyɛ sukuu mu a, wubetumi afrɛ w’awofo mu biako anaasɛ polisini. Sɛ nnipa foforo pɛ sɛ wɔne yɛn ko ntɔkwaw a, ɛsɛ sɛ yɛhwehwɛ asomdwoe.

Wɔn a wɔyɛ Yesu nokware asuafo no yɛ nea wobetumi biara sɛ wɔnko ntɔkwaw. Saa kwan yi so no, yɛkyerɛ sɛ yɛyɛ den wɔ adetrenee ho. Bible ka sɛ ɛnsɛ Yesu “akoa bi sɛ ɔko, na mmom ɛsɛ sɛ odwo ma nnipa nyinaa.”—2 Timoteo 2:24.

Afei ma yɛnhwɛ afotu a eye a ɛbɛboa yɛn a ɛremma yɛnko ntɔkwaw no bi: Romafo 12:17-21 ne 1 Petro 3:10, 11.

[Mfonini wɔ kratafa 102]

Dɛn na na Yakobo ne Yohane pɛ sɛ wɔyɛ de tua Samariafo no so ka?

[Mfonini wɔ kratafa 104]

Sɛ obi bɔ mmɔden sɛ ɔne yɛn bɛko a, dɛn na ɛsɛ sɛ yɛyɛ?

[Mfonini wɔ kratafa 105]

Ɔkwan bɛn so na nnipa foforo ntɔkwaw mu a yɛde yɛn ho bɛhyɛ no te sɛ nea yɛaso ɔkraman asõ? Wubepira, enti nyɛ saa!

[Mfonini wɔ kratafa 106]

Sɛ wuhu sɛ afoforo reko a, dɛn na ɛsɛ sɛ woyɛ?