Esiane Sɛ Ɔbɔɔ Mpae Nti

ƆSOMAFO Paulo kae wɔ 1 Tesalonikafo 5:17, 18 sɛ: “Munnnyae mpaebɔ da! Monna ase ade nyinaa mu, na eyi ne nea Onyankopɔn pɛ, Kristo Yesu mu wɔ mo ho.” Nanso, sɛ ɛtɔ da a, so wuhu sɛ wotwentwɛn wo nan ase sɛ wobɛda ase bere a wudidi wɔ baguam, te sɛ adidibea bi? Esiane kɔkɔbɔ a Yesu de mae wɔ mpaebɔ mu ahokyere ho no nti, ntease wom sɛ ebia obi bɛpɛ sɛ ɔkwati adwene a ɔbɛtwe aba ne ho so sɛnea ɛmfata. (Mateo 6:5, 6) Nanso, adepa betumi afi mpae a wɔde anifere bɔ no mu aba.

Eyi ne osuahu a ɔsomfo kumaa bi a ɔsom wɔ Brooklyn Betel, Yehowa Adansefo wiase nyinaa dwumadibea ti no nyae. Na ɔredi anɔpaduan wɔ adidibea bi, a na wayɛ nhyehyɛe sɛ ɔrekɔ asafo a ɔwɔ mu no mu akohyia kuw bi a wɔde wɔn ho bɛhyɛ Ahenni asɛnka dwumadi no mu. Bere a wɔde n’anɔpa aduan no bae no, ɔbɔɔ mpae sɛnea ɔtaa yɛ no. Obuee n’ani no, ɔmaa ne ti so hui sɛ adidibea hɔ abeawa ɔsomfo bi gyina hɔ rehwɛ no haa.

Obisaa no sɛ: “Worebɔ mpae, ɛnte saa?” Bere a obuae sɛ yiw no, ɔkae sɛ: “Ɛbɛyɛ sɛ woyɛ Yehowa Adansefo mu biako. M’awofo nso yɛ bi. Memfaa me ho nhyɛɛ wɔn som no mu ankasa da, nanso minim sɛ ɛsɛ sɛ meyɛ saa. Ebia ɛsɛ sɛ mekra Ɔwɛn-Aban ne Nyan! So wubetumi akra bi ama me?”

Onua aberantewaa no se: “Anka m’aduan no reyɛ atwiw me.” Nanso, otumi ma ɔkraa nsɛmma nhoma abien na ɔde nsɛmma nhoma foforo a aba abien maa no na ɔyɛɛ nhyehyɛe sɛ ɔbɛsan akɔsra no​—ne nyinaa fi mpae a ɔbɔe nti.