Yesu Asetra Ne Ne Som Adwuma

Abodoo ne Mmɔkaw No

NA NNIPADƆM kɛse aba Yesu nkyɛn wɔ Dekapolis. Na wɔn mu pii fi akyirikyiri na wɔbaa ɔmansin a Amanaman mufo na wɔdɔɔso wom no mu sɛ wɔrebetie Yesu na wasa wɔn yare. Wɔde nkɛntɛn akɛseakɛse a wɔtaa de soa nneɛma bere a wɔretu kwan akɔfa mmeae a Amanaman mufo te hɔ no bae.

Nanso, awiei koraa no, Yesu frɛ n’asuafo no na ɔka sɛ: “Nkurɔfokuw yi yɛ me mmɔbɔ, efisɛ wɔatra me nkyɛn atoa so nnansa ni, na wonni biribi a wodi. Na sɛ migya wɔn kwan na wɔde kɔm kɔ fie a, wɔbɛtoto baha ɔkwan mu; efisɛ wɔn mu binom fi akyirikyiri na ɛbae.”

Asuafo no bisa sɛ: “Ɛhefa na obi betumi anya abodoo a eyinom bedi amee wɔ sare so ha?”

Yesu bisa sɛ: “Abodoo ahe na mowɔ?”

Wobua sɛ: “Ason ne mpataa kakraa bi.”

Bere a Yesu ahyɛ nnipa no sɛ wɔntratra fam no, ɔfa abodoo no ne mpataa no, ɔbɔ Onyankopɔn mpae, obubu mu, na ofi ase de ma n’asuafo no. Wɔn nso wɔde ma nnipa no na wɔn nyinaa di mee. Wɔ ɛno akyi bere a wɔtasetasee nnikae no, wonya nkɛntɛn ason, ɛwom sɛ mmarima bɛyɛ 4,000 ne mmea ne mmofra nso na wodii abodoo no de!

Yesu ma nnipadɔm no kɔ, ɔne n’asuafo no tra ɔkorow mu na wotwa kɔ Galilea Po atɔe fam mpoano. Wɔ ha no, Farisifo a nyamesom kuw a ɛne Sadukifo mufo ka wɔn ho no bɔ mmɔden sɛ wɔbɛsɔ Yesu ahwɛ denam bisa a wobisae sɛ ɔma wɔn sɛnkyerɛnne a efi soro no so.

Esiane sɛ Yesu nim mmɔden a wɔbɔ sɛ wɔbɛsɔ no ahwɛ nti, obua sɛ: “Edu anwummere a, moka sɛ: Wim bɛtew, efisɛ ɔsoro abere. Na anɔpa de, moka sɛ: Ahum betu nnɛ, efisɛ ɔsoro abere, na ayɛ kusuu. Munim ɔsoro ani nsɛm mu kyerɛ, na mmere no ho nsɛnkyerɛnnede muntumi nkyerɛ.” Afei Yesu frɛ wɔn abɔnefo ne awaresɛefo na ɔbɔ wɔn kɔkɔ sɛ ɔremfa sɛnkyerɛnne biara mma gye Yona de no, te sɛ nea na wadi kan aka akyerɛ Farisifo no. Ɔrefi hɔ akɔ no, ɔne n’asuafo no kɔtra ɔkorow mu na wɔde wɔn ani kyerɛ Betsaida a ɛwɔ Galilea Po kusuu fam atɔe mpoano. Bere a wɔrekɔ no, asuafo no hu sɛ wɔn werɛ afi sɛ wɔfa abodoo, na na biako pɛ na wɔwɔ.

Esiane sɛ hyia a Yesu ne Farisifo no ne Sadukifo a wɔyɛ Herode akyigyinafo no hyiae no ho asɛm wɔ Yesu adwenem nti, ɔde afotu ma sɛ: “Monhwɛ mo ho yiye Farisifo ne Herode mmɔkaw ho!” Esiane sɛ na asuafo no gye di sɛ Yesu reka abodoo a wɔn werɛ fii sɛ wɔfa no ho asɛm na ɛda adi sɛ mmɔkaw ma abodoo ho asɛm ba wɔn adwenem nti, wofi ase gye akyinnye wɔ asɛm no ho. Esiane sɛ Yesu hui sɛ wɔante asɛm no ase nti, ose: “Adɛn na modwennwene abodoo a munni ho?”

Ɛnkyɛe biara na na Yesu nam anwonwa kwan so ama nnipa mpempem pii abodoo na ebia n’anwonwade a etwa to a ɔyɛe no adi bɛyɛ da koro anaasɛ nnanu. Enti ɛnsɛ sɛ wɔhaw wɔn ho wɔ abodoo ankasa a wonni no ho. Ɔkae wɔn sɛ, “Na monkae? Mibubuu abodoo anum maa mpemnum no, mporoporowa nkyerɛnkyɛ ma ahe na motasee?” Wobua sɛ: “Dumien.”

“Mibubuu ason no memaa mpemnan no, mporoporowa ntekyirekyi ma ahe na motasee?”

Wobua sɛ: “Ason.”

Yesu bisa sɛ: “Ɛnna afei monte ase ara yi?” “Ɛdɛn na munhu sɛ ɛnyɛ abodoo ho asɛm na meka mekyerɛ mo? Monhwɛ mo ho yiye Farisifo ne Sadukifo mmɔkaw ho!”

Awiei koraa no, asuafo no te ase. Na mmɔkaw a ɛma abodoo tu no yɛ asɛmfua a wɔtaa de kyerɛ porɔwee. Enti afei asuafo no te ase sɛ Yesu de sɛnkyerɛnnede redi dwuma, kyerɛ sɛ ɔrebɔ wɔn kɔkɔ sɛ wɔnhwɛ wɔn ho yiye wɔ “Farisifo ne Sadukifo kyerɛ ho,” nkyerɛkyerɛ a etumi ma obi sɛe. Marko 8:1-21; Mateo 15:32​—16:12.

◆ Dɛn nti na ɛsɛ sɛ nkurɔfo fa nkɛntɛn akɛse a wɔde nneɛma gu mu?

◆ Bere a Yesu fi Dekapolis kɔ akyi no, mmeae bɛn na ɔde ɔkorow tu kwan kɔ?

◆ Ntease bɛn na asuafo no annya wɔ Yesu asɛm a ɔkae wɔ mmɔkaw ho no ho?

◆ “Farisifo ne Sadukifo mmɔkaw” a Yesu kaa ho asɛm no kyerɛ dɛn?