Nsɛmmisa a Efi Akenkanfo Hɔ

So asɛm a ɛne “wanya honhom no sɛ akyɛde” a ɛwɔ 1 Korintofo 14:37 (New World Translation) no kyerɛ sɛ onipa no anya honhom kronkron a ɛkyerɛ sɛ wɔasra no, anaasɛ wanya anwonwa kwan so akyɛde afi honhom no hɔ?

Nkyekyem yi kenkan wɔ New World Translation of the Holy Scriptures no mu sɛ:’‘Sɛ obi susuw sɛ ɔyɛ odiyifo anaa wanya honhom no sɛ akyɛde a, ma onnye nea merekyerɛw no ntom, efisɛ ɛyɛ Awurade ahyɛde.”​—1 Korintofo 14:37.

Ɔkenkanfo bi betumi ate asɛm “wanya honhom no sɛ akyɛde” no ase sɛ ɛtwe adwene si nokwasɛm a ɛne sɛ wɔde honhom woo afeha a edi kan Kristofo no ma wɔbɛyɛɛ Onyankopɔn honhom mu mma no so. Anaasɛ obetumi ate asɛm no ase sɛ ɛfa obi a wanya honhom kronkron no akyɛde soronko bi ho. Ebetumi ayɛ nkyerɛase a etwa to yi, sɛnea kyerɛwsɛm no boa ma ɛda adi no.

Ɔsomafo Paulo de Hela asɛmfua pneu·ma·ti·kosʹ a asekyerɛ titiriw ne sɛ “ɛfa honhom ho” dii dwuma wɔ ha. Wɔde n’afã horow bi di dwuma wɔ nkyerɛkyerɛmu a ɛne “honhom nipadua,” “honhom mu nhyira,” “honhom mu ntease” ne “honhom mu dan” mu.​—1 Korintofo 15:44; Efesofo 1:3; Kolosefo 1:9; 1 Petro 2:5.

Wɔ saa nsɛm no mu no, Bible no ka nneɛma (nipadua, nhyira, ntease, dan) a “honhom” ka ho asɛm no ho asɛm. Nanso wɔ nsɛm afoforo mu no, ɛsɛ sɛ wohu “honhom” no mu ntease ne ne nkyerɛase a ɛfata no fi nsɛm afoforo a ɛka ho no mu. Sɛ nhwɛso no, 1 Korintofo 2:14, 15 de ɔkra muni su bɔ pneu·ma·ti·kosʹ a ntease mu no, ɛkyerɛ “honhom muni” no su abira.

Korintofo Nhoma a Edi Kan ti 12 kosi 14 de adwene si honhom kronkron no anwonwa kwan so akyɛde horow no so. Onyankopɔn de eyinom maa tete Kristofo no mu binom de kyerɛe sɛ ɔmmfa honam fam Israel nni dwuma bio, na mmom afei de ɔrehyira “Onyankopɔn Israel” Kristofo. (Galatifo 6:16) Paulo kyerɛw akyɛde horow yi ho asɛm sɛ: “Nanso ɔdom akyɛde gu ahorow, na ɛyɛ honhom koro no ara.” (1 Korintofo 12:4) Na nyansa, nimdeɛ ne gyidi soronko ka honhom no akyɛde horow no ho, te sɛ nea na nkɔmhyɛ, kasa foforo, ne kasa foforo nkyerɛase nso ka ho no.​—1 Korintofo 12:8-11.

Ná wɔde Onyakopɔn honhom kronkron asra Korinto Kristofo a Paulo kyerɛw wɔn nhoma no. Paulo kae sɛ: “Na afei wɔaguare mo, na wɔatew mo ho, na wɔabu mo bem Awurade Yesu Kristo din ne yɛn Nyankopɔn honhom mu.” (1 Korintofo 6:11; 12:13) Yiw, na wɔn nyinaa anya “nea ɛbɛba no bi, kyerɛ sɛ, honhom no.” (2 Korintofo 5:5) Nanso, ɛnyɛ wɔn nyinaa na wɔnam honhom kronkron no so nyaa akyɛde soronko bi. Na ɛte sɛ nea wɔn mu pii ani gye ho sɛ wɔbɛka kasa foforo, na wonyaa obu titiriw maa akyɛde yi wɔ ɔkwan a ɛmfata so. Paulo kyerɛw nhoma kosiesiee wɔn nsusuwii, ma ɔdaa no adi sɛ nnipa pii rennya kasa fororo mu mfaso te sɛ nea wobenya wɔ nkɔmhyɛ akyɛde mo mu no. Wɔ ti 12 awiei no, Paulo tuu Korintofo no fo sɛ: “Mommɔ ɔdom akyɛde a eye titiriw no ho mmɔden.”​—1 Korintofo 12:28-31.

Afei, wɔ ti 14 (NW) mfiase no, ɔhyɛe sɛ: “Mompɛ ɔdɔ akyi kwan, nanso momfa nnamyɛ nhwehwɛ [[ta pneu·ma·ti·kaʹ], ne titiriw no sɛ mobɛhyɛ nkɔm.” Wɔnhwehwɛ dɛn? Na ɛnsɛ sɛ saa Kristofo no hwehwɛ sɛ wɔde honhom bɛsra wɔn efisɛ na wɔde asra wɔn dedaw. Wɔ ɔkwan a ntease wom so no, na Paul kyerɛ honhom “akyɛde” a ɔhyɛɛ wɔn nkuran wɔ ti 12 awiei sɛ wɔnhwehwɛ no. Enti New World Translation of the Holy Scriptures no kyerɛ 1 Korintofo 14:1 ase sɛ: “Momfa nnamyɛ nhwehwɛ honhom mu akyɛde horow.” Bible afoforo kyerɛ pneu·ma·ti·kaʹ ase wɔ ha sɛ “honhom mu akyɛde horow” anaasɛ “akyɛde a Honhom no de ma.”

Saa kyerɛwsɛm no nti, yehu sɛ Paulo de nkɔmhyɛ toa pneu·ma·ti·kosʹ so wɔ ɛrekɔ ti 14 awiei no. Sɛnea ɛda adi wɔ nkyekyem 1 no, nsɛm afoforo a ɛka ho no kyerɛ sɛ na ɔkyerɛ honhom akyɛde a wonya. The New Testament in Modern Speech a R. F. Weymouth kyerɛwee no gye nkyerɛase yi tom: “Sɛ obi bu ne ho sɛ ɔyɛ odiyifo anaa obi a ɔwɔ honhom mu akyɛde horow a, ma onhu sɛ ɛyɛ Awurade ahyɛde na mpremprem merekyerɛw mo.”

Yiw, ehia sɛ Kristofo nyinaa, sɛ ebia wɔwɔ nkɔmhyɛ akyɛde, anaa honhom no akyɛde foforo biara no, gye afotu a Paulo kyerɛw faa sɛnea ɛsɛ sɛ wɔyɛ ade wɔ asafo no mu ho no tom na odi akyi.