Baasakoro No​—Wɔkyerɛkyerɛ wɔ Bible no Mu?

“Katolekfo Gyidi ne sɛ yɛsom Baasakoro Nyankopɔn biako, ne Baasakoro a wɔyɛ pɛ. . . .Enti Agya no yɛ Onyankopɔn, Ɔba no yɛ Onyankopɔn, na Honhom Kronkron no yɛ Onyankopɔn. Nanso wɔnyɛ Nyankopɔn baasa, na mmom Onyankopɔn Biako.”

Saa nsɛm yi na Athanasia Gyidikasɛm no de ka Kristoman ɔkyerɛkyerɛ titiriw​—Baasakoro no ho asɛm.a Sɛ woyɛ Katolek anaa Protestant asɔre no muni a, ebia wɔbɛka akyerɛ wo sɛ eyi ne ɔkyerɛkyerɛ titiriw a ɛsɛ sɛ wugye di. Nanso so wubetumi akyerɛkyerɛ ɔkyerɛkyerɛ no mu? Kristoman mu adenimfo akɛse binom aka sɛ wɔnte Baasakoro no ase.

Ɛnde, dɛn nti na wogye di? So Bible no kyerɛkyerɛ saa ɔkyerɛkyerɛ no nti na wɔyɛ saa? Anglikanfo sɔfo panyin, John Robinson, a waka baabi no de asɛm yi ho mmuae a ɛkanyan adwene mae wɔ ne nhoma Honest to God a wɔtɔɔ bebree no mu. Ɔkyerɛwee sɛ:

“Asɛmpaka ne ɔkyerɛkyerɛ a agye din no de honhom fam adwene a ɛfa Kristo ho a wontumi mfa Apam Foforo no nsi so dua ba. Ɛka no tiawa sɛ na Yesu yɛ Onyankopɔn wɔ ɔkwan a ɛma wotumi de asɛmfua ‘Kristo’ gyina hɔ ma ‘Onyankopɔn’ na wɔde Onyankopɔn gyina hɔ ma Kristo so. Nanso Bible no mfa nni dwuma saa wɔ baabiara. Apam Foforo no ka sɛ na Yesu yɛ Onyankopɔn Ba; nanso ɛnka no tiawa sɛ Yesu ne Onyankopɔn.” Ná John Robinson yɛ Anglikan Asɔre no muni a ɔpɛ akyinnyegye. Nanso, so ɔkaa nokware bere a ɔkae sɛ “Apam Foforo” no nka wɔ baabiara “tiawa sɛ Yesu ne Onyankopɔn” no?

Nea Bible no Ka

Ebinom bebua saa asemmisa no denam Yohane Asɛmpa no nkyekyem a edi kan a wɔbɛfa aka asɛm no so: “Mfiase no na Asɛm no wɔ hɔ, na Asɛm no ne Nyankopɔn na ɛwɔ hɔ, na Asɛm no yɛ Onyankopɔn.” (Yohane 1:1) So ɛno mmɔ asɛm a Anglikan sɔfo panyin no kae no abira? Dabi. Sɛnea na John Robinson nim pefee no, nnɛyi nsɛm asekyerɛfo bi nnye sɛnea King James Version kyerɛ saa kyerɛwsɛm no ase no ntom. Dɛn ntia? Efisɛ asɛm a ɛne “na Asɛm no yɛ Onyankopɔn” a ɛwɔ mfitiase Hela kasa mu no, ná adekyerɛsɛm “no” nka asɛmfua “Onyankopɔn” no ho. Wɔ asɛm a edi kan a ɛne “Asɛm no ne Onyankopɔn na ɛwɔ hɔ” no mu no, asɛmfua a wɔde gyina hɔ ma “Onyankopɔn” no kyerɛ biribi pɔtee, kyerɛ sɛ, adekyerɛsɛm no ka ho. Eyi ma ɛda adi sɛ nsɛmfua abien no nkyerɛ ade koro.

Enti, ntease pa da adi wɔ nkyerɛase ahorow bi mu. Sɛ nhwɛso no, ebinom kyerɛ asɛm no ase sɛ “na Asɛm no yɛ ɔsoroni.” (An American Translation, Schonfield) Moffatt kyerɛ ase sɛ “na Logos no yɛ ɔsoroni.” Nanso, John Robinson ne Britaniani kyerɛwsɛm no ho ɔkasatiafo Sir Frederick Kenyon baanu nyinaa daa no adi sɛ sɛ́ na ɛno na Yohane pɛ sɛ osi so dua a, anka ɔde Hela asɛmfua theiʹos a egyina hɔ ma “ɔsoroni” no bedi dwuma. Esiane sɛ New World Translation bu asɛmfua “Onyankopɔn” sɛ ɛnkyerɛ obi pɔtee ma ɛteɛ, na ɛda ntease pa a ɛwom no adi sɛnea Hela kyerɛ no nti, ɛde Engiresi asɛm a ɛnkyerɛ obi pɔtee na edii dwuma: “Na Asɛm no yɛ onyame.”

Ɔbenfo C. H. Dodd, New English Bible dwumadi no panyin ka eyi ho asɛm sɛɛ se: “Nkyerɛase no . . . betumi ayɛ, ‘Na Asɛm no yɛ onyame.’ Mfomso nni nsɛmfua a wɔkyerɛɛ ase sɛnea ɛte ankasa no mu.” Nanso, The New English Bible nkyerɛ nkyekyem no ase saa. Mmom no, wɔ saa nkyerɛase no mu no, Yohane 1:1 kenkan sɛ: “Bere a nneɛma nyinaa fii ase no, na Asɛm no wɔ hɔ dedaw. Asɛm no ne Onyankopɔn na ɛtrae, na na Asɛm no te sɛ nea Onyankopɔn te.” Dɛn nti na nkyerɛase boayikuw no ampaw nkyerɛase a asete yɛ mmerɛw? Ɔbenfo Dodd bua sɛ: “Nea enti a wonnye ntom ne sɛ ɛne Yohane adwene ne nokwarem no, Kristofo nyinaa nso de bɔ abira.”​—Technical Papers for the Bible Translator, Po 28, January 1977.

Kyerɛwsɛm no mu Ntease a Wɔmfraa Mu

So yɛbɛka sɛ adwene a ɛne sɛ na Yesu yɛ onyame na mmom ɛnyɛ ɔno ne Onyankopɔn Ɔbɔadeɛ no ne Johannine (kyerɛ sɛ, ɔsomafo Yohane) adwene ne Kristofo nyinaa nso de bɔ abira? Ma yenhwehwɛ Bible kyerɛw nsɛm bi a ɛka Yesu ne Onyankopɔn ho asɛm mu, na yebehu nea nkyerɛkyerɛmufo binom a wɔtraa ase ansa na wɔreyɛ Athanasia Gyidikasɛm susuw wɔ saa kyerɛw nsɛm no ho.

“Me ne agya no yɛ baako.”​—YOHANE 10:30.

Novatian (bɛyɛ afeha 200-258 Y.B.) kae sɛ: “Na esiane sɛ Ɔkaa ade ‘biako’,[b] nti, ma ɔsom mu awaefo nte ase sɛ Wanka sɛ onipa ‘biako.’ Efisɛ biako a ɛnkyerɛ ɔbarima anaa ɔbea no kyerɛ asetram biakoyɛ, na ɛnyɛ nipadua mu biakoyɛ. . . . Afei nso, biako a Ɔka no kyerɛ adwene a ehyia, ne atemmu ko, ne abusuabɔ a ɔdɔ wom ankasa, te sɛ nea Agya ne Ɔba no wɔ adwenkoro, wɔyɛ biako wɔ ɔdɔ mu wɔ ɔkwan a ntease wom so no.”​—Treatise Concerning the Trinity, ti 27.

“Agya no yɛ kɛse sen me.”​—YOHANE 14:28.

Irenaeus (bɛyɛ 130-200 Y.B. ): “Yebetumi afa [Kristo] so ahu sɛ Agya no korɔn kyɛn ade nyinaa. Efisɛ [Kristo] ka sɛ, ‘Agya no yɛ kɛse sen me.’ Enti, yɛn Awurade akyerɛ sɛ Agya no korɔn wɔ nimdeɛ mu.”​—Against Heresies, Nhoma a etia II, ti 28.8.

“Na ɛyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.”​—YOHANE 17:3.

Clement a ofi Alexandria (bɛyɛ afeha 150- 215 Y.B.): “Sɛ́ wobehu Onyankopɔn a ɔte hɔ daa no, nea ɔde nea ɛtra hɔ daa ma, na wɔnam nimdeɛ ne ntease so anya Onyankopɔn, nea odi kan, na ɔkorɔn sen obiara, ɔyɛ biako, na oye no. . . . Enti wɔhyɛ nea ɔbɛtra ase ankasa sɛ onni kan nhu Nea ‘obiara nnim no no, gye Ɔba no yi (No) adi kyerɛ.’ (Mat. 11:27) Nea odi hɔ a ɛsɛ sɛ wohu ne Agyenkwa a odi n’Akyi no kɛseye.”​—Who Is the Rich Man That Shall Be Saved? VII, VIII.

“Onyankopɔn ne Agya biako a odi yɛn nyinaa so na ɔfa yɛn nyinaa mu.” ​—EFESOFO 4:6.

Irenaeus: “Enti wɔka Agya Nyankopɔn biako a ɔkorɔn sen obiara, na ɔfa yɛn nyinaa mu, na ɔte yɛn nyinaa mu ho asɛm. Nokwarem no, Agya no korɔn sen yɛn nyinaa, na Ɔno ne Kristo Ti.”​—Against Heresies, Nhoma a Etia V, ti 18.2.

Ɛda adi pefee sɛ tete nhoma akyerɛwfo yi tee nkyekyem ahorow yi ase sɛ ɛka sɛ Agya no korɔn sen ade nyinaa ne obiara a Yesu Kristo ka ho. Nsɛm a wɔkae no nka hwee a ɛkyerɛ sɛ na wogye Baasakoro no di. So wodii mfomso?

Honhom Kronkron no Da Nokware Nyinaa Adi

Yesu hyɛɛ n’asuafo bɔ sɛ wɔ ne wu ne ne wusɔre akyi no, wɔde honhom kronkron no bɛma wɔn sɛ wɔn okyigyinafo. Ɔhyɛɛ bɔ sɛ: “Na sɛ ɔno, nokware honhom no nya ba a, ɔbɛkyerɛ mo kwan akɔ nokware no nyinaa mu. . . . na ɔbɛkyerɛ mo nneɛma a ɛreba.”​—Yohane 14:16, 17; 15:26; 16:13.

Bɔhyɛ yi baam wɔ Yesu wu akyi. Bible no ka sɛnea wɔnam honhom kronkron no mmoa so daa nkyerɛkyerɛ afoforo adi anaasɛ wɔkyerɛkyerɛɛ mu kyerɛɛ Kristofo asafo no ho asɛm. Wɔkyerɛw nkyerɛkyerɛ afoforo yi wɔ nhoma a akyiri yi ɛbɛyɛɛ Bible no fã a ɛto so abien, Kristofo Hela Kyerɛwnsɛm, anaa “Apam Foforo” no mu. So wɔada biribi adi pɛn wɔ saa ntease foforo yi mu a ɛkyerɛ sɛ Baasakoro bi wɔ hɔ? Dabi. Honhom Kronkron no da biribi soronko koraa adi wɔ Onyankopɔn ne Yesu ho.

Sɛ nhwɛso no, wɔ Pentecoste 33 Y.B., bere a honhom kronkron baa asuafo a na wɔahyiam wɔ Yerusalem so no, ɔsomafo Petro dii Kristo ho adanse kyerɛɛ nnipakuw a na wogyina afikyiri no. So ɔkaa Baasakoro ho asɛm? Susuw nsɛm a ɔkae no bi ho, na w’ankasa si gyinae: “Yesu . . . ɔbarima a Onyankopɔn de ahoɔdenne ne anwonwade ne nsɛnkyerɛnne a ɔno Nyankopɔn no ara nam no so yɛe mo mu.” “Yesu yi ara ara na Onyankopɔn anyan no; ɛho adansefo na yɛn nyinaa yɛ.” “Onyankopɔn de Yesu yi ara a mosɛn no no ayɛ Awurade ne Kristo.” (Asomafo no Nnwuma 2:22, 32, 36) Nsɛm a Petro a honhom ahyɛ no ma kae yi ankyerɛkyerɛ Baasakoro koraa, na mmom esii so dua sɛ Yesu hyɛ n’Agya ase, na ɔyɛ adwinnade a ɔma Onyankopɔn apɛde nya mmamu.

Ɛno akyi pɛɛ no, Kristoni nokwafo foforo bi kaa Yesu ho asɛm.Wɔde Stefano kɔɔ Sanhedrin anim sɛ ommeyi ne ho ano wɔ sobo a wɔbɔɔ no ho. Nanso, Stefano mmom bɔɔ n’ano totofo no sobo, na ɔnkae sɛ wɔte sɛ wɔn agyanom atuatewfo no ara pɛ. awiei koraa no, kyerɛwtohɔ no ka sɛ: “Ɔno de, na honhom kronkron ayɛ no ma, na ɔhwɛɛ ɔsoro dinn huu Onyankopɔn anuonyam ne Yesu sɛ ogyina Onyankopɔn nifa, na ɔkae sɛ: Hwɛ, mihu soro sɛ abue, na onipa Ba no gyina Onyankopɔn nifa.” (Asomafo no Nnwuma 7:55, 56) Dɛn nti na honhom kronkron no daa Yesu adi ara kwa sɛ “onipa Ba” a ogyina Onyankopɔn nifa na ɛnyɛ onyamesu bi fã a ɔne n’Agya yɛ pɛ? Ɛda adi pefee sɛ na Stefano nni Baasakoro ho adwene biara.

Bere a Petro de Yesu ho asɛmpa no kɔɔ Kornelio nkyɛn no, onyaa hokwan foforo bio a na ɔde bɛda Baasakoro nkyerɛkyerɛ no adi. Dɛn na esii? Petro kyerɛkyerɛɛ mu sɛ Yesu ne “nnipa nyinaa wura.” Nanso ɔkɔɔ so kyerɛkyerɛɛ mu sɛ onyaa wuradi yi fi obi a ɔkorɔn sen no no hɔ. Ná Yesu ne “ateasefo ne awufo temmufo a Onyankopɔn ayi no asi hɔ.” Yesu wusɔre akyi no, n’Agya ‘ma oyii ne ho pefee kyerɛɛ’ n’akyidifo. Na honhom kronkron no nso ɛ?

Ɛda adi wɔ nkɔmmɔbɔ yi mu nanso ɛnna adi sɛ Baasakoro mu onipa a ɔto so abiɛsa. Mmom no, “Onyankopɔn de ne honhom kronkron ne tumi sraa [Yesu].” Enti, esiane sɛ honhom kronkron no nyɛ onipa koraa nti, wɔda no adi sɛ biribi a enni nipasu, te sɛ “tumi” a wɔabɔ din wɔ saa nkyekyem no mu nso no. (Asomafo no Nnwuma 10:36, 38, 40, 42) Hwehwɛ Bible no mu yiye, na wubehu adanse foforo a ɛkyerɛ sɛ honhom kronkron no nni nipasu na mmom ɛyɛ adeyɛ tumi a etumi hyɛ nnipa ma, ɛkanyan wɔn, ɛma wɔn ani gye, na wohwie gu wɔn so.

Awiei koraa no, ɔsomafo Paulo nyaa hokwan a ɛfata a ɔde bɛkyerɛkyerɛ Baasakoro no mu​—sɛ ɛyɛ nokware nkyerɛkyerɛ a​—bere a na ɔreka asɛm akyerɛ Atenefo no. Wɔ ne kasa no mu no, ɔtwee adwene sii afɔremuka a ɛyɛ “Onyame a wonnim no dea” no so na ɔkae sɛ: “Enti nea munnim na mosɔre no no, ɔno na meka ne ho asɛm mekyerɛ mo yi.” So ɔbɔɔ Baasakoro bi ho dawuru? Dabi. Ɔkaa “Onyankopɔn a ɔyɛɛ wiase ne nea ɛwɔ mu nyinaa, ɔno ara a ɔyɛ ɔsoro ne asase wura no” ho asɛm. Na Yesu nso ɛ? ‘Onyankopɔn ayi da bi ato hɔ a ɔnam ɔbarima bi a wayi no asi hɔ so bebu wiase ntɛn trenee mu.’ (Asomafo no Nnwuma 17:23, 24, 31) Wanka Baasakoro ho asɛm biara wɔ hɔ!

Nokwarem, Paulo kyerɛkyerɛɛ Onyankopɔn atirimpɔw ahorow ho biribi a ɛmma entumi nyɛ yiye sɛ Yesu ne n’Agya bɛyɛ Baasakoro bi mufo a wɔyɛ pɛ no mu. Ɔkyerɛwee sɛ: “[Onyankopɔn] de ade nyinaa agu [Yesu] nan ase. Na sɛ ɔka sɛ ɔde ade nyinaa agu ne nan ase a, na emu da hɔ pefee sɛ nea ɔde ade nyinaa guu ne nan ase no mfra mu bi. Na sɛ onya de nneɛma nyinaa gu ne nan ase a, ɛno na ɔba no ankasa nso de ne ho bɛhyɛ nea ɔde nneɛma nyinaa guu ne nan ase no ase, na Onyankopɔn ayɛ ade nyinaa mu ade nyinaa.” (1 Korintofo 15:27, 28) Enti, Onyankopɔn bɛkɔ so akorɔn asen obiara a Yesu nso ka ho.

Ɛnde, so wɔkyerɛkyerɛ Baasakoro wɔ Bible mu? Dabi. John Robinson kaa nokware. Enni Bible no mu, na ɛnyɛ “Kristofo nsusuwii” fã nso. So wubu eyi sɛ ɛho hia ma wo som? Ɛsɛ sɛ wubu no saa. Yesu kae sɛ: “Na eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.” (Yohane 17:3) Sɛ yɛfa ɔsom a yɛde ma Onyankopɔn no aniberesɛm a, ɛho hia sɛ yehu no sɛnea ɔte ankasa, sɛnea wada ne ho adi akyerɛ yɛn no. Ɛno nkutoo ansa na yebetumi aka no nokwarem sɛ yɛka “nokware asɔrefo” a ‘wɔsɔre Agya no honhom mu ne nokware mu’ no ho.​—Yohane 4:23.

[Ase hɔ nsɛm]

[Asɛm a wɔafa aka wɔ 28]

Nokware a ɛwɔ Bible no mu da no adi pefee sɛ Yesu ne n’Agya nyɛ onipa koro

[Asɛm a wɔafa aka wɔ 29]

Dɛn nti na honhom kronkron no anna no adi sɛ Yesu ne Onyankopɔn wɔ Pentekoste 33 Y.B. akyi?