Nya “Nokware Nkwa” Mu Anigye

YEHOWA NYANKOPƆN de nkwa a enni awiei ahyɛ onipa adwene mu. (Ɔsɛnkafo 3:11) Nanso sɛ owu ba a, adesamma ntumi nyɛ ho hwee ɛwom sɛ wɔwɔ ɔpɛ a emu yɛ den sɛ wɔbɛtra ase.

Onyankopɔn Asɛm a efi honhom mu, Kyerɛw Kronkron Bible, ma yenya anidaso kɛse. (2 Timoteo 3:16) Yehowa, a ɔwɔ dɔ no remfa daa nkwa ho akɔnnɔ mmɔ onipa na wama wɔatra ase mfe kakraa bi. Ɛnyɛ Nyankopɔn su sɛ ɔbɛbɔ yɛn na wama yɛahu amane esiane yɛn nneyɛe bi nti. Wɔammɔ yɛn sɛ “mmoa a wonni adwene a wɔn su ne sɛ wɔawo wɔn sɛ wɔnkyere wɔn nsɛe wɔn.”—2 Petro 2:12.

Bere a Yehowa Nyankopɔn de daa nkwa ho akɔnnɔ bɔɔ Adam ne Hawa no, na ‘ɛyɛ papa’; ɔyɛɛ wɔn sɛnea wobetumi atra ase daa. (Genesis 1:31) Nanso awerɛhosɛm ne sɛ, awarefo a wodi kan no amfa wɔn ahofadi no anni dwuma wɔ ɔkwampa so, wɔyɛɛ nea Ɔbɔadeɛ no abara koraa ho asoɔden, na wɔhweree pɛ a na wɔyɛ fi mfiase no. Ne saa nti, wowuwui, bere a na wɔde sintɔ ne owu ama wɔn asefo.—Genesis 2:17; 3:1-24; Romafo 5:12.

Yenni asetra atirimpɔw ne nea owu kyerɛ ho ahintasɛm biara wɔ Bible mu. Ɛka sɛ, “adwuma ne nimdeɛ ne nyansa” nni asamando na awufo “nnim biribiara.” (Ɔsɛnkafo 9:5, 10) Wɔ ɔkwan foforo so no, sɛ obi wu a na wawu. Ɔkra a enwu da ho nkyerɛkyerɛ no nni Bible mu, enti yenni ahintasɛm biara a ɛfa awufo tebea ho na yɛadi ho dwuma.—Genesis 3:19; Dwom 146:4; Ɔsɛnkafo 3:19, 20; Hesekiel 18:4.a

Onyankopɔn wɔ atirimpɔw; wammɔ asase no “hunu.” Ɔyɛe sɛ nnipa a wɔyɛ pɛ ‘ntra so’ wɔ paradise tebea mu, na Onyankopɔn nsakraa n’atirimpɔw. (Yesaia 45:18; Malaki 3:6) Nea ɛbɛma abam no, ɔsomaa ne Ba baa asase so. Yesu Kristo nam nokware a odi kosii owu mu so de nea wɔnam so begye adesamma afi bɔne ne owu mu no mae. Nokwarem no, Yesu kae sɛ: “Sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.”—Yohane 3:16.

Onyankopɔn hyɛɛ bɔ bere tenteenten sɛ, ɔbɛbɔ “ɔsoro foforo ne [asase foforɔ, Asante Twi Bible].” (Yesaia 65:17; 2 Petro 3:13) Na ɛno bɛhwehwɛ sɛ ɔpaw Kristofo anokwafo binom de wɔn kɔ soro. Wɔne Yesu Kristo bom yɛ nniso titiriw bi. Bible frɛ eyi sɛ “ɔsoro ahenni,” anaa “Onyankopɔn ahenni” a ebesiesie ‘asase so nneɛma.’ (Mateo 4:17; 12:28; Efesofo 1:10; Adiyisɛm 5:9, 10; 14:1, 3) Sɛ wogu amumɔyɛsɛm nyinaa ase fi yɛn asase yi so na wɔtew ho a, Onyankopɔn de adesamma abusua foforo a ɛteɛ anaa “asase foforɔ” bɛba. Eyinom bi ne nnipa a Onyankopɔn bɛbɔ wɔn ho ban de wɔn atwa nneɛma nhyehyɛe bɔne yi sɛe a ɛreba no. (Mateo 24:3, 7-14, 21; Adiyisɛm 7:9, 13, 14) Wɔde nnipa a wɔnam owusɔre a wɔahyɛ ho bɔ no so bɛsan aba nkwa mu no bɛka wɔn ho.—Yohane 5:28, 29; Asomafo no Nnwuma 24:15.

Afei “Nokware Nkwa No” Ba

Ɔrehyɛ anigyesɛm a ɛfa nkwa wɔ daakye Paradise asase ho no mu den no, Onyankopɔn kae sɛ: ‘Hwɛ, meyɛ ade nyinaa foforo.’ (Adiyisɛm 21:5) Nnipa adwene ntumi nhu anwonwade ahorow a Onyankopɔn bɛyɛ ama adesamma no nyinaa. Onyankopɔn bɛyɛ wiase nyinaa Paradise, a ɛyɛ Eden nsɛso. (Luka 23:43) Sɛnea na ɛte wɔ Eden no, kɔla a ɛyɛ fɛ, nnyigyei a ɛyɛ anika, ne nneɛma a ɛyɛ dɛ bebu so. Ohia befi hɔ na aduan ho nyɛ na bio, efisɛ Bible ka saa bere no ho asɛm sɛ: “Kan nneɛma no atwam.” (Adiyisɛm 21:4; Dwom 72:16) Obiara renka bio sɛ, “meyare,” efisɛ wobeyi ɔyare afi hɔ koraa. (Yesaia 33:24, NW) Yiw, biribiara a ɛma onipa di yaw, a adesamma tamfo a wakyɛ, owu, ka ho no befi hɔ. (1 Korintofo 15:26) Wɔ ‘asase foforɔ,’ adesamma abusua foforo a ɛwɔ Kristo nniso ase no ho anisoadehu mu no, ɔsomafo Yohane tee nne bi sɛ: ‘Onyankopɔn bɛpopa aniwa nyinaa so nusu, na owu nni hɔ bio, na awerɛhow ne osu ne ɛyaw bi nni hɔ bio.’ Sɛ saa Onyankopɔn bɔhyɛ yi mmamu da nkyɛn a, dɛn na ebetumi de awerɛkyekye ne anigye kɛse aba?

Bible no rekyerɛkyerɛ daakye asetra mu no, esii tebea ahorow a ebedi onipa ahiade ho dwuma wɔ abrabɔ fam ne honhom fam so dua titiriw. Adesamma nsa bɛka nneɛma pa a wɔde bere tenten ahaw wɔn ho wɔ ho besi nnɛ no nyinaa. (Mateo 6:10) Nea ɛka eyi ho ne ɔpɛ a yɛwɔ sɛ yɛn nsa bɛka atɛntrenee, a ɛmmae besi nnɛ esiane amane a onipa ahu wɔ nhyɛsofo atirimɔdenfo a wɔadi abrɛfo so nsam nti no. (Ɔsɛnkafo 8:9) Odwontofo no kyerɛw tebea ahorow a ɛwɔ Kristo nniso ase no ho asɛm wɔ nkɔmhyɛ kwan so sɛ: “Adetreneeyɛ bebu so wɔ ne bere so, na asomdwoe pii aba.”—Dwom 72:7, The New Jerusalem Bible.

Bio nso, nnipa pii de wɔn ho abɔ afɔre ahwehwɛ sɛ wobebu nnipa nyinaa pɛ. Wɔ “adebɔ foforo” no mu no, Onyankopɔn beyi nnipa mu nyiyim afi hɔ. (Mateo 19:28) Nidi a nnipa nyinaa benya bɛyɛ pɛ. Ɛnyɛ amammui sodifo katee bi na ɔbɛhyɛ yɛn ama yɛabu nnipa nyinaa pɛ. Nea ɛne no bɔ abira no, wobeyi nea ɛde nnipa mu nyiyim ba no nyinaa afi hɔ, a adifudepɛ ne ahantan a ɛma nnipa hwehwɛ sɛ wobedi afoforo so, anaasɛ wobenya nneɛma pii no ka ho. Yesaia hyɛɛ nkɔm sɛ: “Na wobesisi adan atra mu, na wɔayeyɛ bobe nturo adi mu aba. Wɔrensisi adan mma obi ntra mu, na wɔrennua mma obi nni.”—Yesaia 65:21, 22.

Hwɛ sɛnea onipa ahu amane esiane ankorankoro ne akodi mu mogyahwiegu nti! Eyi akɔ so fi bere a obi kum Habel de abedu ɛnnɛyi akodi so. Hwɛ bere tenten a nnipa de wɔn ani ato asomdwoe so na wɔatwɛn, nanso ɛte sɛ nea ayɛ ɔkwa! Wɔ Paradise a wɔasan de aba no mu no, nnipa nyinaa bɛyɛ wɔn a wɔpɛ asomdwoe na wodwo; ‘wobegye wɔn ani asomdwoe bebree mu.’—Dwom 37:11.

Yesaia 11:9 ka sɛ: “Na [Yehowa ho nimdeɛ, NW] bɛyɛ asase ma, sɛ nsu kata po so no.” Esiane sintɔ a yenya fii awo mu nti, wɔ nsɛm bi mu no, ebia ɛbɛyɛ den ama yɛn sɛ yɛbɛte nea saa nsɛm no kyerɛ ase nnɛ. Sɛnea Onyankopɔn ho nimdeɛ a ɛyɛ pɛ bɛka yɛn abata ne ho ne sɛnea ɛno bɛma yɛn ani agye akosi ase de, ebia akyiri yi na yebehu. Nanso esiane sɛ Kyerɛwnsɛm no ka kyerɛ yɛn sɛ Yehowa yɛ Onyankopɔn a ne tumi, ne nyansa, n’atɛntrenee, ne ne dɔ yɛ nwonwa nti, yebetumi agye atom sɛ obetie mpae a ‘asase foforɔ’ no sofo bɔ no nyinaa.

“Nokware Nkwa No” Bɛba Ankasa—Gye Tom!

Wɔ nnipa pii fam no, daa nkwa wɔ wiase a eye mu no te sɛ adaeso anaa nnaadaasɛm bi. Nanso, wɔ wɔn a wogye Bible bɔhyɛ ahorow di ankasa fam no, saa anidaso yi yɛ nea ɛbɛba ankasa. Ɛte sɛ sɛkyɛ wɔ wɔn asetra mu. (Hebrifo 6:19) Sɛnea sɛkyɛ so ɛhyɛn mu gyina pintinn na ɛmma ɛnwosow no, saa ara na daa nkwa ho anidaso ma nkurɔfo gyina pintinn na wonya awerɛhyem, na ɛboa wɔn ma wogyina asetra mu nsɛnnennen a anibere wom ano na wodi so nkonim mpo.

Yebetumi anya ahotoso sɛ Onyankopɔn bɛma ne bɔhyɛ ahorow abam. Ɔnam ntamka so ahyɛ bɔ, atirimsɛm a ɛnsakra. Ɔsomafo Paulo kyerɛwee sɛ: “Ɛno nti na Onyankopɔn pɛ sɛ oyi n’atirimsɛm a ɛnsakra kyerɛ bɔhyɛ no difo pefee no, ɔde ntam gyinaa mu, na yɛafa ade abien a ɛnsakra a Onyankopɔn ntumi nni mu atoro so . . . sɛ yebeso anidaso a ɛda yɛn anim no mu.” (Hebrifo 6:17, 18) “Ade abien a ɛnsakra” a Onyankopɔn ntumi nni mu atoro no yɛ ne bɔhyɛ ne ne ntam a waka, a ɛso na yɛde yɛn anidaso gyina no.

Onyankopɔn bɔhyɛ ahorow mu gyidi ma yenya awerɛkyekye kɛse ne honhom mu ahoɔden. Yosua, Israelfo kannifo no, nyaa gyidi a ɛte saa. Bere a Yosua kaa ne nsɛm a etwa to kyerɛɛ Israelfo no, na wabɔ akora, na na onim sɛ ɛnkyɛ obewu. Nanso, ɔdaa nokwaredi a emu yɛ den, a efi ahotoso korakora a ɔwɔ wɔ Onyankopɔn bɔhyɛ ahorow mu adi. Bere a Yosua kae sɛ ɔrekɔ “asase sofo nyinaa kwan,” ɔkwan a adesamma nyinaa fa so kɔ owu mu akyi no, ɔkae sɛ: “Na munhu mo koma nyinaa mu ne mo kra nyinaa mu sɛ, asɛm biako pɛ ntɔɔ fam, nsɛmpa a [Yehowa, NW] mo Nyankopɔn kae wɔ mo ho no nyinaa mu: ne nyinaa aba mu ama mo, emu asɛm biako pɛ antɔ fam.” Yiw, Yosua kaa no mprɛnsa sɛ, Onyankopɔn di ne bɔhyɛ nyinaa so.—Yosua 23:14.

Wo nso wubetumi anya gyidi a ɛte saa wɔ Onyankopɔn bɔhyɛ a ɛfa wiase foforo a ɛrenkyɛ ɛbɛba no ho no mu. Sɛ wufi koma nyinaa mu sua Bible no a, wubehu onii ko a Yehowa yɛ ne nea enti a ɛsɛ sɛ wode wo ho to ne so koraa. (Adiyisɛm 4:11) Abraham, Sara, Isak, Yakob, ne anokwafo afoforo a wɔtraa ase tete mmere mu no nyaa gyidi a emu yɛ den, a egyina nokware Nyankopɔn, Yehowa no ho nimdeɛ ankasa a wonyae so. Wɔn anidaso mu kɔɔ so yɛɛ den, ɛmfa ho nokwasɛm a ɛyɛ sɛ “wɔn nsa anka bɔhyɛ ahorow no” bere a na wɔte ase no. Nanso, “wohui akyirikyiri nko gye dii na wɔyɛɛ no atuu.”—Hebrifo 11:13.

Bere a yɛate Bible nkɔmhyɛ ahorow ase no, afei yɛahu sɛ yɛabɛn “ade nyinaa so tumfoɔ Nyankopɔn no da kɛse no,” a emu na wobeyi abɔnefosɛm nyinaa afi asase so no. (Adiyisɛm 16:14, 16) Te sɛ anokwafo a wɔtraa ase tete no, ɛsɛ sɛ yɛma gyidi ne ɔdɔ a yɛwɔ ma Onyankopɔn ne “nokware nkwa no” kanyan yɛn ma yɛkɔ so kura yɛn ahotoso a yɛwɔ wɔ daakye nsɛm ho no mu. Bɛn a wiase foforo no abɛn no ma wɔn a wɔwɔ Yehowa mu gyidi na wɔdɔ no no nya ahoɔden a emu yɛ den. Ɛho hia sɛ yenya Gyidi ne ɔdɔ a ɛte saa na ama yɛanya Onyankopɔn anim dom ne ahobammɔ wɔ ne da kɛse a ɛreba no mu.—Sefania 2:3; 2 Tesalonikafo 1:3; Hebrifo 10:37-39.

Ɛnde, so wopɛ nkwa? Na wopɛ “nokware nkwa no” ankasa—nkwa sɛ Onyankopɔn somfo a woanya n’anim dom, a wohwɛ kwan sɛ wobenya daakye a anigye wom, yiw, wɔ daa nkwa mu anaa? Sɛ saa na wohwehwɛ a, ɛnde tie ɔsomafo Paulo afotu yi, nea ɔkyerɛwee sɛ, ‘yɛmmfa yɛn ani nnto ahonyade a enni hɔ daa so, na mmom Onyankopɔn so.’ Paulo toaa so sɛ: “Monyɛ yiye, nnya mo ho nnwuma pa fam,” nhyɛ Onyankopɔn anuonyam, na ‘moaso nokware nkwa no mu.’—1 Timoteo 6:17-19.

Sɛ woma hokwan ma Yehowa Adansefo ne wo sua Bible no a, wubetumi anya nimdeɛ a ɛbɛma woanya “daa nkwa” no. (Yohane 17:3) Bible mu kyerɛwtohɔ a efi ɔdɔ mu de nsato a agya bi de ma yi frɛ obiara sɛ: “Me ba, mma wo werɛ mmfi me mmara, na ma wo koma nni me mmara nsɛm so; efisɛ onyinkyɛ ne nkwa mfe ne asomdwoe na ɛde ɛbɛka wo ho.”—Mmebusɛm 3:1, 2.

[Ase hɔ asɛm]