Luka

TE MAU APOSETOLO A TE MESIA I TE TONORAAHIA E TE MESIA RA.

9 Ua haaputuputu maira Iesu i te mau pǐpǐ tino ahuru ma piti ra, ua tuu atura i te puai e te mana no ratou ia rave i te mau demoni atoa, e ia faaora i te mau maˈi. 2 Ua tono atura oia ia ratou e poro haere i te basileia o te Atua, e e faaora hoi i te feia maˈi. 3 Ua parau atura oia ia ratou, Eiaha ei taoˈa e hopoihia i to outou tere, eiaha ia taipiti raau, eiaha ei pute, eiaha ei pane, eiaha ei moni, eiaha ia taipiti ahu fafao i te taata hoê. 4 E te fare e farii mai ia outou, ei reira parahi ai, e reva noa ˈtu outou. 5 E te vahi e ore e ite mai ia outou, e ueue atu i te repo o to outou avae ei faaite atu ia ratou, a haere ê ai outou i taua oire ra. 6 Haere atura ratou na roto i te mau oire rii i te poro haerea i te parau maitai, e te faaoraraa i te maˈi, aore e vahi toe.

7 Faaroo aˈera te teterareha o Heroda i te roo i te mau mea atoa i ravehia e Iesu ra, ahoaho aˈera oia, no te mea te parau ra te tahi pae, Ua tia faahou mai Ioane mai te pohe mai; 8 i na ô hoi e tahi pae, Ua itea mai Elia; e ta te tahi pae, Ua tia faahou mai te hoê i te mau peropheta tahito ra. 9 Ua na ô aˈera Heroda, Ua tâpûhia e au te upoo o Ioane, o vai râ teie no ˈna teie nei parau ta ˈu e faaroo nei? Te hinaaro ra oia ia ite ia ˈna.

10 E hoˈi maira te mau aposetolo, ua faaite maira ia Iesu i te mau mea atoa ta ratou i rave ra: ua rave aˈera oia opai huna ˈtura oia e ratou atoa, i te medebara i taua oire i Betesaida ra. 11 E ite aˈera te rahi o te taata atoa ra, ua pee maira ratou ia ˈna; e ua farii atura oia ia ratou, e ua parau atura i te parau o te basileia o te Atua, e faaora ˈtura i te feia maˈi. 12 E tapetape roa ˈtura te mahana, ua parau maira te tino ahuru ma piti ra ia ˈna, na ô maira, E tuu atu i te mau taata nei, ia haere na i te mau oire rii, e te mau fare fatata nei, ia noaa te maa na ratou, e te taotoraa: e medebara hoi teie ta tatou e parahi nei. 13 Ua parau atura oia ia ratou, Na outou e hopoi atu i te maa na ratou. Ua parau maira ratou, E pae roa a tatou pane, e piti hoi iˈa tirara; area e haere matou e hoo i te maa na teie nei feia rahi. 14 E pae hoi tausani o te taata. Ua parau atura oia i tana mau pǐpǐ, A faataoto pǔpǔ na ia ratou i raro, ia taipae ahuru i te pǔpǔ hoê. 15 Ua na reira ˈtura ratou, faataoto atura ia ratou atoa i raro. 16 Ua rave ihora oia i na pane e pae e na iˈa e piti ra, hiˈo aˈera i nia i te raˈi, haamaitai atura i te Atua i taua maa ra, vavahi ihora, tuu atura i te mau pǐpǐ e tuu i mua i te aro o taua feia rahi ra. 17 Amu anaˈe ihora ratou, e paia aˈera; ohihia ihora te toea maa, e î aˈera na ete rarahi hoê ahuru ma piti.

18 E muri aˈera, opai ê aˈera oia i taua feia rahi ra e pure, oia e ta ˈna mau pǐpǐ atoa, ua ui atura oia ia ratou, na ô atura, O vai au nei i ta te taata nei parauraa? 19 Ua parau maira ratou, na ô maira, O Ioane Bapetizo; te parau nei râ vetahi, O Elia; e te tahi pae, Ua tia faahou mai te hoê i te mau peropheta tahito ra. 20 Ua parau atura oia ia ratou, O vai râ vau i ta outou na parauraa? Ua parau maira Petero, na ô maira, O te Mesia a te Atua ra. 21 Ua aˈo hua ˈtura oia ia ratou, parau atura eiaha roa ratou e faaite noa ˈtu i te taata i te reira parau; 22 e ua na ô atura, E pohe rahi to te Tamaiti a te taata nei, e faaruehia e te feia paari, e te mau tahuˈa rarahi, e te mau papai parau, e e taparahi-pohe-roa-hia, e e tia faahou ia tae i te rui toru. 23 Ua parau atura oia i te taata atoa, Ia hinaaro te taata i te pee mai ia ˈu ra, e faarue oia ia ˈna iho, a rave ai i tana satauro i te mau mahana atoa, a pee mai ai ia ˈu. 24 O tei hinaaro i te tapea i to ˈna ora, ua ere ïa i te ora: e o tei tia ia ˈna i te tuu i to ˈna ora ia ˈu nei, e ora ïa to ˈna. 25 Eaha hoi ta te taata nei faufaa ia roaa noa ˈtu ia ˈna te mau mea atoa o teie nei aˈo, ia pohe oia iho, e ia ere i te ora? 26 O te taata hoi e haama ia ˈu e ta ˈu nei parau, e haama atoa te Tamaiti a te taata nei ia ˈna, ia haere mai oia ma to ˈna iho hanahana, e ma te hanahana atoa o te Metua, e no te mau melahi moˈa ra. 27 E faaite atu râ vau ia outou, Eita mau te tahi pae i teie nei feia e tia noa mai i ǒ nei nei e roohia e te pohe, e ite ai ratou i te basileia o te Atua.

28 E fatata aˈera te rui varu i muri aˈe i teie nei parauraa, ua aratai atura oia ia Petero, e ia Ioane, e ia Iakobo, haere atura i nia i te hoê mouˈa e pure. 29 Te pure ra oia, huru ê atura to ˈna mata, teatea ˈtura to ˈna ahu mai te uira ra. 30 E inaha, te paraparau maira ia ˈna e toopiti pue taata, o Mose e o Elia: 31 i fa mai raua i roto i te anaana, e ua parau ihora i te poheraa no ˈna, oia i fatata i te pohe i Ierusalema ra. 32 Area Petero ma, ua varea ïa i te taoto: e ara aˈera ratou, ite atura ratou i to ˈna hanahana e na taata toopiti i tia atoa i pihai ihora ia ˈna. 33 E tei te reva-ê-raa raua ia vaiiho ia Iesu ra, ua parau atura Petero ia ˈna, E te orometua, e mea maitai ia parahi tatou i ǒ nei; e faatia matou i te fare autâ e toru aˈe, no oe e tahi, no Mose e tahi, e no Elia e tahi: aita râ oia i ite i ta ˈna i parau ra. 34 Tei te na reiraraa ˈtu oia, te ata maira i te tapoˈiraa mai ia ratou, mǎtaˈu aˈera ratou i to ratou ôraa ˈtu i roto i taua ata ra. 35 E te hoê reo maira no roto i taua ata ra, i te na ôraa mai, O tau Tamaiti here teie, a faaroo ia ˈna. 36 E mure aˈera taua reo ra, o Iesu anaˈe ihora te toe. Huna ihora ratou, aore roa i faaite noa ˈtu i te taata i te reira anotau i te hoê i taua mau mea ta ratou i ite ra.

37 E aˈo aˈera, ia pou mai ratou mai nia mai i taua mouˈa ra, e tiaa rahi tei farerei mai ia ˈna ra. 38 E inaha, ua pii maira te hoê taata no taua tiaa rahi ra, na ô maira, E te orometua, e aroha mai oe i tau tamaiti nei, oia anaˈe nei hoi ta ˈu tamaiti. 39 E inaha, te haruhia nei oia e te hoê varua ino, e pii hua ihora i reira ra, ua rave uˈana maira taua varua ino ra ia ˈna e hauti ihora oia, e haaehia ihora, e ia rahi to ˈna paruparu e ore â e faarue rea mai ia ˈna. 40 E ua parau atu hoi au i to mau pǐpǐ nei e tiavaru i te demoni i rapae; aita râ i tia ia ratou. 41 Ua parau atura Iesu, na ô atura, Auê ïa ui faaroo ore e te mârô e! mai te aha to ˈu maoro i ǒ outou nei, e te faaoromairaa ˈtu ia outou? A aratai mai i to tamaiti i ǒ nei. 42 E tei te haerea mai oia ra, ua taora taue noa ˈtura te demoni ia ˈna i raro i te repo, ua rave uˈana ihora ia ˈna, ua avau atura Iesu i taua varua faufau ra, faaora ˈtura i taua tamaiti ra, e tuu atura i te metua tane ra. 43 Ua maere anaˈe ihora ratou i te mana rahi o te Atua ra. E te maere anaˈe râ ratou atoa i te mau mea a Iesu i rave ra, ua parau atura oia i ta ˈna mau pǐpǐ, 44 A haapao maitai mai na i teie nei parau; ua fatata te Tamaiti a te taata nei i te tuuhia i te rima taata. 45 Aita râ ratou i ite i taua parau ra, ua tapoˈihia ïa ia ore ratou ia ite; i mǎtaˈu hoi ratou ia ui ia ˈna i taua parau ra.

46 Ua tupu ihora te mârô ia ratou iho, i to ratou e hau i te mana. 47 Area Iesu, tei ite i te manaˈo i to ratou aau, rave atura ïa i te hoê tamaiti iti; tuu maira i pihai iho ia ˈna; 48 ua parau atura oia ia ratou, O tei ite mai i teie nei tamaiti iti, no to ˈu nei iˈoa, ua ite ïa ia ˈu; e o tei ite mai ia ˈu ra, ua ite ïa i tei tono mai ia ˈu nei; o tei iti roa hoi i roto ia outou na, o te hau ïa.

49 Ua parau maira Ioane, na ô maira, E te orometua, hiˈo atura matou i te hoê taata i te tiavaruraa i te demoni i to oe na iˈoa, e faaorehia ˈtura e matou, no te mea, aore oia i amui mai ia tatou nei. 50 Ua parau atura Iesu ia ˈna, Eiaha te reira e faaorehia, o tei ore i na ǒ nei maira, no tatou ïa.

51 E fatata aˈera te mau mahana i te hope e reva ˈi oia i nia, ua opua maite ihora oia e haere i Ierusalema; 52 e ua tono atura i te vea na mua ia ˈna, e tomo atura ratou i roto i te hoê oire rii o to Samaria e faanehenehe i te hoê tapaeraa no ˈna. 53 Aita aˈera râ ratou i farii mai ia ˈna, no te mea te haere tia ra oia i Ierusalema. 54 Ite aˈera na pǐpǐ na ˈna ra, o Iakobo raua o Ioane i te reira, ua na ô maira raua, E te Fatu, e tia anei ia oe ia parau mâua i te auahi ia mairi mai no nia i te raˈi, ia pau atu ratou, mai ta Elia ra? 55 Ua fariu atura râ oia, avau atura ia raua, na ô atura, Aore orua i ite i te huru o to orua aau. 56 Aore hoi te Tamaiti a te taata nei i haere mai e taparahi i te taata, i haere mai râ e faaora. Haere atura ratou i te tahi oire iti.

57 E te haere noa ra ratou na te eˈatia, ua parau maira te hoê taata ia ˈna, E te Fatu, e pee atu vau ia oe i to oe mau haerea atoa. 58 Ua parau atura Iesu ia ˈna, E ana to te alope, e tauraa to te manu o te reva; area te Tamaiti a te taata nei, aita o ˈna tuâroi. 59 Ua parau atura oia i te hoê, A pee mai ia ˈu, Ua na ô maira oia, E te Fatu, a tuu aˈe na ia ˈu e haere au e tanu i tau metua tane. 60 Ua parau atura Iesu ia ˈna, E vaiiho atu na i tei pohe e tanu i to ratou i pohe ra: e haere râ oe e poro haere i te basileia o te Atua. 61 Ua parau atoa maira hoi e tahi, E te Fatu, e pee atu vau ia oe; e tuu na râ oe ia ˈu, e poroi na vau i to ˈu ra fetii. 62 Ua parau atura Iesu ia ˈna, O te taata e tuu i te rima i nia i te arote a hiˈo ai i muri, e ore ïa e au i te basileia o te Atua.