Ohipa

O PAULO RAUA O BARANABA I TE MAITIRAAHIA IA HAERE E HAAPII I TE MAU ETENE.

13 E tau peropheta hoi e te orometua tei taua ekalesia i Anetiohia ra; o Baranaba, e o Simeona o tei parauhia ia Nigere ra, e o Lukio no Kurene, e o Manaena, hoê â o raua haapii-atoa-raahia e te teterareha ra o Heroda, e o Saulo. 2 E te haamori ra ratou i te Fatu ma te haapaeraa maa, ua parau maira te Varua Maitai, A faataa mai na ia Baranaba raua o Saulo, no te ohipa i haapaohia e au na raua ra. 3 Ua haapae ihora ratou i te maa e pure atura, ua tuu aˈera i to ratou rima i nia iho ia raua, e oti aˈera, tono atura ratou ia raua.

4 E o raua hoi i tonohia e te Varua Maitai ra, haere tia ˈtura ïa i Seleukia; e mai reira hoi, fano atura raua i Kupero. 5 E tae atura i Salami, ua parau atura raua i te parau a te Atua i roto i te mau sunago o te ati Iuda ra; e tei ia raua atoa ra hoi Ioane i te amuiraa. 6 E haere noa ˈtura raua na ropu i taua fenua ra e tae atura i Papho, ite atura raua i te hoê peropheta haavare, e tahutahu, e ati Iuda, o Bara-iesu te iˈoa: 7 tei ǒ te tiaau ra oia o Serigio Paulo, e taata paari, o tei tii mai ïa ia Baranaba raua o Saulo, i hinaaro oia i te faaroo i te parau a te Atua. 8 Area taua tahutahu ra o Elima (te auraa ïa i to ˈna iˈoa,) ua mârô maira ïa ia raua, i hinaaro oia i te faafariu ê atu i te tiaau i te parau nei. 9 O Saulo ra, (o tei parau-atoa-hia ia Paulo,) î aˈera ïa i te Varua Maitai, ua tiatonu maite atura tana mata ia ˈna. 10 E ua parau atura, Auê oe i î i te haavare e te ino e, e te fanauˈa a te diabolo e, e enemi oe no te mau parau-tia atoa nei, eita oe e faaea i te haapiˈo i te parau titiaifaro a te Fatu nei? 11 E inaha, tei nia mai nei te rima o te Fatu ia oe, e matapohia oe, eita oe e ite vave i te mahana. Roohia ihora oia i te arehurehu e te poiri i reira ra; perehahu haere atura oia i te maimiraa i te taata ei aratai ia ˈna i te rima. 12 Ite aˈera te tiaau i taua mea ra faaroo atura, maere roa ˈtura hoi i te parau a te Fatu.

13 Fano atura Paulo e te feia i amui atoa ia ˈna ra mai Papho atu, e tae atura ratou i Perege i Pamephulia: area Ioane, faarue atura ia ratou hoˈi maira i Ierusalema. 14 E mai Perege hoi reva ˈtura ratou, e tae atura i Anetiohia i Pisidia, tomo atura i roto i te sunago i te mahana sabati, parahi ihora i raro. 15 E oti aˈera te taioraa i te ture e te mau peropheta ra, ua tono aˈera te mau tavana o te sunago ra i te vea ia ratou, na ô atura, E te mau taeae nei, te hinaaro na outou i te aˈo mai i te taata nei, a parau mai. 16 Ua tia maira Paulo i nia, ua popoi maira i te rima, na ô maira, E te mau taata Iseraela nei, e te feia atoa e mǎtaˈu i te Atua ra, a faaroo mai. 17 Na te Atua o teie nei mau taata Iseraela nei i maiti i to tatou mau hui tupuna, e ua faateitei oia i taua mau taata ra ia ratou i parahi noa i Aiphiti ra, e ua aratai mai oia ia ratou i rapae ma tana rima puai. 18 E ua faaoromai oia i ta ratou parau i te medebara ra, e a maha aˈera ahururaa te matahiti. 19 E pau ihora hoi e hitu fenua ia ˈna i taua fenua i Kanaana ra, ua tufa kelero ihora oia i to ratou fenua no ratou iho. 20 E oti aˈera te reira, a maha ˈtura hanere e pae ahururaa te matahiti i tuu mai ai i te feia haava no ratou e tae aˈera i te peropheta ra ia Samuela. 21 Mai reira hoi ua hinaaro aˈera ratou i te arii, ua horoa maira te Atua ia Saula te tamaiti a Kisa, no te opu o Beniamina taua taata ra, e a maha aˈera ahururaa te matahiti. 22 E tuua-ê-hia aˈera oia e ana, ua faatupu aˈera oia ia Davida e arii no ratou; ta ˈna hoi i parau maira i te na ôraa mai e, Ua itea ia ˈu Davida te tamaiti a Iese, e taata e au i tau aau, e na ˈna e faatupu i tau mau hinaaro atoa. 23 Ua faatupu iho nei te Atua i te Ora no Iseraela ia Iesu, no te huero o teie nei taata, o tei parauhia maira. 24 I parau haere na Ioane i te bapetizo tatarahapa i te taata atoa o Iseraela i haere mai ai oia. 25 Te faatupu ra Ioane i to ˈna tere, e ua na ô aˈera oia, O vai au nei i to outou manaˈoraa? E ere au i te Mesia. A hiˈo na râ, te haere maira te hoê i muri iho ia ˈu, eita vau e au ia tatara noa ˈtu i te tamaa i tana avae.

26 E te mau taeae nei, e te tamarii o te fetii o Aberahama, e te feia atoa e mǎtaˈu i te Atua i roto ia outou na, i haponohia mai teie nei parau ora ia outou nei. 27 Te feia hoi i parahi i Ierusalema, e to ratou hui raatira atoa, no te mea aore ratou i ite ia ˈna, e te parau a te mau peropheta i taiohia i te mau mahana sabati atoa ra, ua faatupu iho nei ratou i taua mau parau ra i te faahaparaa ˈtu ia ˈna ra. 28 Aore â hoi a ˈna hara i itea e ratou e pohe ai, ua ani atura ratou ia Pilato ia taparahihia oia. 29 E hope aˈera i te faatupuhia e ratou te mau parau atoa no ˈna i papaihia ra, ua tuu maira ratou ia ˈna i raro mai nia mai i taua raau ra, e vaiiho atura ia ˈna i roto i te menema ra. 30 Ua faatia mai râ te Atua ia ˈna mai te pohe maira 31 i itea mai hoi oia e rave rahi te mahana i te feia i haere atoa mai, e oia atoa i Ierusalema mai Galilea maira, o ratou to ˈna ite i te mau taata atoa ra. 32 E parau maitai ta matou i hopoi mai ia outou nei, te parau i parauhia mai i to tatou hui tupuna ra; 33 ua faatupu iho nei te Atua i taua parau ra ia tatou nei i ta ratou tamarii, oia i faatia faahou ia Iesu i nia, oia hoi tei papaihia i roto i te Salamo piti ra, Tau Tamaiti oe, i nauanei oe i fanauhia ˈi e au. 34 I faatia mai oia ia ˈna mai te pohe maira, eiaha oia e hoˈi faahou i te apoo, oia i na ô mai e, E horoa vau ia outou i te mau maitai i faaitehia ia Davida ra i te mea haavare ore ra. 35 I parau mai ai hoi oia i roto i te tahi Salamo ra, Eita oe e tuu i to Mea Moˈa ia tahuti noa na. 36 Area Davida, rave atura oia i te hinaaro o te Atua i to ˈna ra ui mairi atura to ˈna taoto, e amuihia ˈtura oia i to ˈna hui metua, e tahuti atura. 37 Area oia, o ta te Atua i faatia i nia ra, aore ïa i tahuti.

38 E teie nei, ia ite outou, e te mau taeae nei, no teie nei taata i parauhia ˈtu ai ia outou na e, e matara te hara. 39 E te mau mea atoa eita outou e tiahia mai i te ture a Mose ra, e tiahia mai ïa ia ˈna te feia atoa i faaroo ra. 40 E teie nei, e haapao maitai, oi roohia mai outou e tei parauhia mai e te mau peropheta ra; 41 a hiˈo na outou, e te feia e vahavaha, a maere atu, e a pohe atu; e ohipa hoi au i te hoê ohipa i to outou na anotau, e ohipa ra, parau noa ˈtu te taata ia outou na, e ore roa outou e faaroo.

42 E tei te haerea te ati Iuda i rapae au i taua sunago ra, ua ani atura te Etene ia parauhia mai taua mau parau ra ia ratou ia tae i te sabati ra. 43 E purara ˈtura taua sunago ra, ua pee maira to te ati Iuda e te mau pǐpǐ pure Atua ra e rave rahi ia Paulo raua o Baranaba; o tei parau atu ïa ia ratou, e aˈo atura, ia mau maite â i te aroha mau o te Atua.

44 E tae aˈera i te sabati, ua haaputuputu maira to taua oire atoa ra e faaroo i te parau a te Atua, aore rea i toe. 45 Ia hiˈo mai râ te ati Iuda i taua feia rahi ra, î aˈera ratou i te feii, e ua mârô maira i taua mau parau i parauhia e Paulo ra, ma te faaore e te faaino hoi. 46 Itoito atura Paulo raua o Baranaba, e na ô atura, E mata ïa outou i te parau atu i te parau a te Atua e tia ˈi, o outou râ i tute ê atu i tana parau nei, e te parau na outou eita outou e au i te ora mure ore, inaha, te fariu nei matou i te Etene. 47 O ta te Fatu hoi ïa i poroi mai ia matou nei ra, Ua haapaohia oe e au ei tiarǎmǎ no te Etene, ia riro oe ei ora e tae noa ˈtu i te hopea o te fenua ra. 48 E ia faaroo maira te Etene i taua parau ra, oaoa ˈtura ratou, e haamaitai atura hoi i te parau a te Fatu; e te feia i haapaohia no te ora mure ore ra, ua faaroo anaˈe ïa. 49 Parare atura te parau a te Fatu e ati noa ˈˈe taua fenua ra. 50 Ua tiarepu ihora te ati Iuda i te mau vahine mana pure Atua ra, e te feia haava i taua oire ra, faatupu atura hoi i te hamani ino ia Paulo e Baranaba, tiahi ê atura ratou ia raua e mairi maira to ratou ra fenua. 51 Ueue atura râ raua i te repo i to raua avae ia ratou, e tae atura hoi i Ikonio. 52 Î aˈera te mau pǐpǐ i te oaoa e i te Varua Maitai.