Ohipa

TO PAULO RAUA O BARANABA HAMANI-INO-RAAHIA I IKONIO RA.

14 Haere atoa ˈtura raua i roto i te sunago a te ati Iuda i Ikonio ra, e ua parau atura, e feia rahi hoi to te ati Iuda e te Heleni i faaroo. 2 To te ati Iuda râ aore i faaroo ra, tiarepu atura ïa i te aau o te Etene, e faaî atura hoi i to ratou aau i te riri i te mau taeae ra. 3 E parahiraa maoro to raua i reira i te parauraa i te parau a te Fatu ma te mǎtaˈu ore, e faatia maira oia i te parau hamani maitai na ˈna ra, e ua tuu maira i te tapao e te semeio na to raua rima e rave. 4 Ua afâ ihora taua feia rahi o te oire ra, no te ati Iuda e tahi pae no te aposetolo e tahi pae. 5 Ia tamata râ te Etene e te ati Iuda atoa, e to ratou hui tavana, i te hamani ino mai, e te pehi mai ia raua i te ofai, 6 ite aˈera raua, maue atura i Lusetera e i Derebe, i na oire i Lukaonia ra, e i te mau fenua atoa i reira iho. 7 E ua parau atura raua i te evanelia i reira.

8 Te parahi maira te hoê taata i Lusetera ra, e avae paruparu to ˈna, e pirioi mai te opu mai â o tana metua vahine, aita oia i haere: 9 o te faaroo maira taua taata ra ia Paulo i te parauraa, ua tiatonu maite atura Paulo ia ˈna, ite aˈera oia e, e faaroo to ˈna e tia ia faaora ˈtu. 10 Ua parau hua ˈtura to ˈna reo, A tia hua mai to avae i nia. Ua ouˈa noa maira oia i nia hahaere ihora. 11 Ite aˈera taua nahoa rahi ra i ta Paulo i rave ra, ua faateitei aˈera i to ratou reo i te parau Lukaonia, na ô aˈera, Ua pou mai te mau atua i raro i ǒ tatou nei mai te taata ra te huru. 12 E mairi aˈera ratou ia Baranaba ia Dia, e o Paulo ra Hereme ïa, no te mea oia te taata e parau. 13 Ua putô maira te tahuˈa o Dia, tei mua to ˈna hiero i to ratou oire ra, i te puaatoro ma te hei atoa i te uputa ra, hinaaro aˈera e, e faatusia, oia e te taata atoa. 14 Ite aˈera râ na aposetolo ra o Baranaba e Paulo; hahae atura raua i to raua ahu, hohoro atura i roto i taua mau taata ra tiaoro atura, 15 na ô atura, E homa e, eaha outou i na reira mai ai? e taata mau â hoi mâua, mai ia outou atoa na te huru, e te parau atu nei hoi i te evanelia ia outou, ia fariu ê atu outou i taua mau mea maamaa nei i te Atua ora ra, o tei hamani i te raˈi, e te fenua, e te tai, e te mau mea atoa i roto ra. 16 O tei vaiiho noa i te mau fenua atoa i mutaa iho, ia haapao noa na ratou i ta ratou iho parau. 17 Aita râ oia i ere i te faaite ia ˈna iho, oia i hamani maitai mai, e te horoaraa mai i te ûa no nia i te raˈi ra, e te anotau auhune, e te faaîraa mai i to tatou aau i te maa e te oaoa. 18 E aore â i morohi rea ia raua taua feia rahi ra i taua parau ra, i te afai mai i te tusia ia raua ra.

19 Ua haere maira te ati Iuda mai Anetiohia mai e Ikonio, taparu atura i taua feia rahi ra, tuia ihora Paulo i te ofai, e arato atura ratou ia ˈna i rapae au i taua oire ra, parau aˈera ua pohe roa. 20 Ia putuputu maira te mau pǐpǐ i pihai iho ia ˈna ra, ua tia noa maira oia i nia ua haere maira i roto i te oire; e ao aˈera, rereva ˈtura raua o Baranaba i Derebe. 21 E ia parau raua i te evanelia i te reira oire, e rave rahi hoi i tei faarirohia ei pǐpǐ, hohoˈi faahou maira raua i Lusetera, e Ikonio, e i Anetiohia; 22 i te faaitoitoraa i te aau o te mau pǐpǐ, e te aˈoraa ˈtu ia ratou ia mau papu maite â ratou i te parau; e te na ôraa ˈtu e, E na roto tatou i te pohe rahi e ô atu ai i te basileia o te Atua ra. 23 E ia haapaohia e raua te peresibutero no ratou i te mau ekalesia atoa ma te pure e te haapaeraa maa, ua pûpû atura raua ia ratou i te Fatu, i ta ratou i faaroo ra. 24 E mairi maira Pisidia ia raua, tae atura raua i Pamephulia. 25 E ia parau raua i te parau i Perege, haere atura raua i Atalia. 26 E mai reira hoi fano maira raua i Anetiohia, i te vahi i pûpûhia ˈtu ai raua i te ite o te Atua, i te ohipa i oti ia raua ra. 27 E tae maira raua i reira, ua haaputuputu maira raua i te ekalesia, e ua faaite atura i ta te Atua i rave ia raua ra, e ua iriti oia i te uputa faarooraa no te Etene. 28 E parahiraa maoro to raua i reira e te mau pǐpǐ atoa ra.