Samuela 1
TE TAIATA A NA TAMARII A ELI RA, TA ELI AˈORAA ˈTU IA RAUA RA.
2 Ua pure atura Hana, na ô atura, Te oaoa nei tau aau ia Iehova, ua teitei tau tara ia Iehova: ua parau iho nei tau vaha i te aro o tau mau enemi, no te mea, te oaoa nei au i te ora na oe ra. 2 Aore roa o Iehova e faito i te moˈa; aore roa e Atua o oe anaˈe ra; aore te hoê pare e au i to tatou Atua.
3 Atira na te parau faaahaaha faufaa ore noa; eiaha te teoteo ia puroro mai no roto mai i to outou vaha; e Atua ite hoi Iehova, e oia tei faaau i te mau mea e tupu nei.
4 Ua ofatihia te fana o te feia puai, e te feia i paruparu ra, ua tatuahia ïa i te etaeta. 5 O tei îî i te maa ra, ua horoa ia ratou iho ei tarahu maa, e tei pohe i te poia ra, ua ore ïa ua poia. Ua fanau ta te ui na toohitu, e te vahine tamarii rahi ra, ua paruparu ïa.
6 O Iehova tei taparahi, e oia tei faaora; o tei hopoi roa i te apoo ra, e o tei faahoˈi mai.
7 O Iehova tei faaveve, e oia hoi tei faarahi i te taoˈa; oia tei faahaehaa, e oia tei faateitei; 8 oia tei hopoi i tei haehaa i nia mai raro mai i te repo ra; e te taata faufaa ore no nia i te tiria pera ra oia tei faateitei; ia haaparahi oia ia ratou i roto i te feia mana, e ia noaa ia ratou te parahiraa tura ra: na Iehova hoi te tumu o te fenua, e ua tuu oia i te fenua i nia ihora: 9 te haerea o tana feia moˈa ra, na ˈna ïa e tiai, area te feia paieti ore ra, ei roto ïa i te pouri vai mau atu ai. E ore roa ta te taata nei e tupu i to ˈna ihora puai.
10 Na Iehova e haamǎtaˈu mai i to ˈna mau enemi, e huri mai oia i te patiri no nia i te raˈi i nia ia ratou: na Iehova e faautua mai i te fenua e tae noa ˈtu i te hopea: e horoa maira oia i te itoito i ta ˈna ra arii, e faateitei oia i te tara o tei faatahinuhia e ana ra.
11 Haere maira Elikana i Rama, i to ˈna ihora utuafare i reira; area taua tamaiti ra, rave atura ïa i te ohipa a Iehova i mua i te aro o te tahuˈa ra o Eli.
12 E pue taata taiata taua na tamarii a Eli ra; aore raua i haapao ia Iehova. 13 Teie hoi ta te tahuˈa ra peu i te mau taata ra; ua hopoi anaˈe te taata i te tusia ra, tei te amaraa taua tusia ra, ua haere maira te tavini no te tahuˈa ma te patia avaha toru i te rima; 14 ua maoˈa noa i taua patia ra i roto i te farii, e pani ra, o te reira ïa, e auˈa ra, o te reira ïa, e te tahi mea ê ra, o te reira ïa, e o tei mau i taua patia ra, o ta te tahuˈa ïa i rave na ˈna iho. O ta ratou ïa peu i Silo i te mau ati Iseraela atoa i haere mai i reira ra. 15 E aita i tuˈia e ratou te toâhua e tae mai ai te tavini no te tahuˈa ra, e ua parau mai i te taata i hopoi i taua tusia ra e, Ho mai i te tahi vahi e tunu paa na te tahuˈa; e ore hoi oia e rave i ta oe puaa tunu pape, ei mea ota râ. 16 E ia parau noa ˈtu te hoê taata ia ˈna e, E mata na i te toâhua i te tutui e ia pau, mai tei mutaaiho mai â, a rave ai oe i ta oe ra vahi hinaaro; e parau mai oia i reira e, Eiaha; ei tena na oe a hopoi mai ai, e aore ra e haru noa ïa vau. 17 E hara rahi atura ta taua na taata apî ra i mua i te aro o Iehova: no reira hoi i faaino ai te taata i te mau tusia a Iehova ra.
18 Area te tamaiti iti ra o Samuela, te rave noa ra oia i te ohipa i mua i te aro o Iehova, ma te tiputa vavai i te ahuraa. 19 Ua au hoi tana metua vahine i te tahi ahu oomo iti no ˈna i te mau matahiti atoa ra, e ua hopoi hoi ia ˈna ra, ia haere oia i nia e tana tane atoa e hopoi i te tusia matahiti ra. 20 Ua faaora maira Eli ia Elikana, e ta ˈna vahine, na ô maira, Ia horoa mai Iehova i te tamarii na oe i teie nei vahine, no ta ˈna i horoa mai no Iehova ra. Ua haere anaˈe ihora ratou i to ratou ra utuafare. 21 Ua hamani maitai maira Iehova ia Hana, e ua tô ihora oia, e fanau aˈera a ˈna pue tamarii tamaroa tootoru, e na tamahine hoi toopiti: tupu aˈera hoi taua tamaiti ra o Samuela i mua i te aro o Iehova ra.
22 Ua ruhiruhia roa Eli, e ua ite oia i te mau mea atoa i ravehia e a ˈna pue tamarii ia Iseraela atoa ra; e ta raua raveraa i te mau vahine i rave i te ohipa i te uputa o te tiahapa amuiraa ra. 23 E ua parau atura oia, Eaha orua i na reira ˈi? ua faˈihia mai au e te taata atoa nei i ta orua na parau iino: 24 eiaha, e au pue tamarii; e ere i te parau maitai ta ˈu e faaroo nei, te hara nei te mau taata o Iehova ia orua na: 25 ia hara te hoê taata i te tahi, e tia te mau haava ia faatiatia i te reira, area ia hara te taata ia Iehova ra, o vai te tia ia ˈna i reira? Aita aˈera râ raua i faaroo i te reo o to raua ra metua; no te mea, ua opua Iehova e taparahi ia raua. 26 Tupu atura taua tamaiti ra o Samuela, e i herehia mai e Iehova e te taata atoa.
27 Ua haere maira te hoê taata no te Atua ia Eli ra, e ua na ô maira ia ˈna, Te na ô maira Iehova, Ua faaite hua vau ia ˈu iho i te utuafare o to metua na, ia ratou i Aiphiti ra, i te utuafare o Pharao ra; 28 e ua haapao vau ia ˈna no roto atoa i te mau opu o Iseraela atoa ra ei tahuˈa na ˈu, ei hopoi i te tusia i nia i tau fata, ei tutui i te mea noˈanoˈa, e ei ahu i te tiputa i mua ia ˈu nei, e ua horoa vau i te mau tusia taauahi atoa a te tamarii a Iseraela i te utuafare o to metua ra; 29 eaha outou i vahavaha faefaea noa ˈi i tau tusia e tau ô, i faauehia e au i roto i to ˈu nei fare? E rahi aˈe hoi to oe faatura i to na tamarii ia ˈu nei, haapori noa ˈi outou i te mau ô maitatai atoa a to ˈu ra mau taata a Iseraela nei. 30 E teie nei, te na ô maira te Atua o Iseraela ra o Iehova, I parau â hoi au e, na to oe utuafare e te utuafare o to metua e rave i te toroa i mua ia ˈu e a muri noa ˈtu; e teie nei, te parau maira Iehova e, Eiaha roa ïa, o tei faatura mai ia ˈu ra o ta ˈu ïa e faatura ˈtu, area tei vahavaha mai ia ˈu ra, e vahavahahia ïa ratou iho. 31 Inaha, te fatata maira te tau e atohia ˈi oe e au, e te utuafare o to metua na, e e ore roa te hoê taata e ruhiruhia i roto i to oe ra utuafare. 32 E ite hoi oe i te ati rahi i roto i to ˈu ra fare i te mau mea atoa e maitai ai Iseraela nei, e e ore roa te hoê taata o to oe a utuafare e tae i te ruhiruhiaraa ra. 33 E to oe ra taata e toe i te tâpû-ê-hia e au i tau fata ra, e toe ïa ei faaorui i to mata, e ei haamauiui i to aau: e hope roa hoi to oe utuafare atoa i te pohe i to ratou apîraa ra. 34 E te mea e roohia tia mai ai o pue tamarii ra o Hophini raua o Phinehasa ra, o ta oe ïa tapao, e pohe atoa raua i te mahana hoê ra. 35 E faatupu vau i te hoê tahuˈa haapao maitai na ˈu ra; e e rave oia i tei au i to ˈu nei aau, e to ˈu nei manaˈo; e e faatia vau i to ˈna ra utuafare e ia mau maite; e e tia oia i te haereraa i mua i te aro o tei faatavaihia e au ra e a muri noa ˈtu. 36 E o tei toe i to oe ra utuafare, e haere faaoriorio anaˈe mai ïa i mua ia ˈna ra, i te maa ario e te maa maa, a na ô mai ai e, E tuu aˈe na oe ia ˈu i te tahi toroa a te autahuˈa na, ia amu vau i te tahi maa maa iti na ˈu.