Samuela 1
TE FAAITE MAIRA IEHOVA I TA ˈNA PARAU IA SAMUELA RA.
3 Te rave ra taua tamaiti ra o Samuela i te ohipa a Iehova i mua i te aro o Eli. Te iti ra te parau a Iehova i te reira anotau, aita hoi e orama pinepine i reira. 2 I taua anotau te taoto noa ra Eli i to ˈna ra roi mau, ua mohimohi to ˈna mata aita oia i ite ia hiˈo ra, 3 e aita i pohe te lamepa a te Atua i te nao o Iehova i vaiihohia ˈi te afata a te Atua ra, ua taoto atoa ihora Samuela: 4 ua tiaoro maira Iehova ia Samuela: e ua parau atura oia, Teie au. 5 Ua horo atura oia ia Eli ra, e ua na ô atura, Teie au; ta oe hoi i tiaoro mai ia ˈu nei. Ua parau maira oia, Aore au i tiaoro atu ia oe, a haere a taoto. Ua haere maira oia ua taoto. 6 Ua tiaoro faahou maira Iehova ia Samuela. Ua tia aˈera Samuela i nia, haere atura ia Eli ra, e ua na ô atura, Teie au, ua tiaoro mai hoi oe ia ˈu. Ua parau maira oia, Aita vau i tiaoro atu ia oe, e tau tamaiti, e haere â e taoto. 7 Aitâ hoi Samuela i ite ia Iehova; aore â hoi te parau a Iehova i faaitehia mai ia ˈna ra. 8 Ua tiaoro faahou maira Iehova ia Samuela, o te toru ïa o te tiaororaa mai. Ua tia aˈera oia i nia, haere atura ia Eli ra, na ô atura, Teie au ua tiaoro mai â oe ia ˈu. Ite aˈera Eli e, o Iehova tei tiaoro mai i taua tamaiti ra. 9 E ua na ô maira Eli ia Samuela, A haere a taoto, e ia tiaorohia mai oe ra, e parau atu oe i reira e, E parau mai oe, e Iehova e, te faaroo nei hoi to tavini. Ua haere maira Samuela ua taoto i nia i tana roi. 10 Ua haere maira Iehova, ua tia noa maira, e ua tiaoro, mai tei mutaaihora, E Samuela, e Samuela! Ua parau atura Samuela, E parau mai, te faaroo nei hoi to tavini.
11 Ua parau maira Iehova ia Samuela, Inaha, e faatupu vau i te hoê mea i Iseraela nei, e riro na tariˈa o te feia atoa e faaroo ra i te turi. 12 E ia tae i taua tau ra, e faatupu ai au i te parau ia Eli ra, i te mau parau atoa i parauhia e au i to ˈna ra utuafare; ua haamata anaˈe au, na ˈu atoa ïa e faaoti. 13 Ua parau hoi au ia ˈna e, e tahoo atu vau i to ˈna ra utuafare e a muri noa ˈtu, no te mea, ite noâ oia i te hara a na tamarii no ˈna ra, o tei faariro ia raua iho ei mea faufau ra, aitâ oia i faaore i ta raua parau. 14 E tei nei, ua tǎpǔ vau i te utuafare o Eli ra e, e ore roa te hara a te utuafare o Eli e mâ i te tusia e te ô e a muri noa ˈtu.
15 Taoto noa ihora Samuela e ao noa ˈˈe ra, e ua iriti aˈera oia i te mau opani o te fare o Iehova. Mǎtaˈu aˈera Samuela ia faaite atu ia Eli i taua orama ra. 16 Ua pii maira râ Eli ia Samuela, na ô maira, E tau tamaiti, e Samuela, Ua parau atura oia, Teie au. 17 Ua na ô maira oia, Eaha ta Iehova parau i parau mai ia oe ra? Teie ta ˈu parau ia oe, eiaha oe e huna i taua parau ra ia ˈu; ia na reira mai te Atua ia oe, e ia rahi noa ˈtu â, ia huna noa ˈtu oe i te hoê parau ia ˈu i te mau parau atoa ta ˈna i parau mai ia oe ra. 18 Ua faaite atura Samuela ia ˈna i te mau parau atoa ra, aore roa e parau i hunahia. Ua na ô maira oia, O Iehova ïa, e rave oia i tei au ia ˈna ihora. 19 Tupu atura Samuela, e ua ati maira Iehova ia ˈna, e aore roa te hoê parau a ˈna i ore i te tupu ia ˈna. 20 Ite aˈera Iseraela atoa, mai Dana mai e tae noa ˈtura i Bere-seba, e ua riro mau Samuela ei peropheta na Iehova. 21 E ua itea faahou maira Iehova i Silo; i Silo hoi to Iehova faaiteraahia mai ia Samuela i te parau a Iehova ra.