E ora anaˈe ma te auhia e te Atua

1, 2. A faahiti i te tahi mau taata ta Iehova i hiˈo ei hoa rahi no ˈna.

TEIHEA huru taata ta outou e maiti ei hoa? E hinaaro roa paha outou i te auhoaraa o te hoê taata hoê â to outou manaˈo, ta outou mau mea e anaanatae e ta outou mau faufaa. E e hinaaro iho â outou i te hoê hoa e huru maitai roa to ˈna, mai te haavare ore e te aau maitai.

² I te roaraa o te tuatapaparaa, ua maiti te Atua i te tahi mau taata ei hoa rahi no ˈna. Ei hiˈoraa, ua parau Iehova ia Aberahama to ˈna hoa. (A taio i te Isaia 41:8; Iakobo 2:23.) Ua faahiti te Atua ia Davida ei “taata e au i tau aau” no te mea e mea au na Iehova taua huru taata ra. (Ohipa 13:22) E ua hiˈo Iehova i te peropheta Daniela mai tei “here-rahi-hia.”—Daniela 9:23.

3. No te aha Iehova e maiti ai i te tahi mau taata ei hoa no ˈna?

³ No te aha Iehova i hiˈo ai ia Aberahama, ia Davida e ia Daniela ei hoa no ˈna? Teie ta ˈna i parau ia Aberahama: “O oe i faaroo mai i tau reo nei.” (Genese 22:18) No reira e haafatata ˈtu Iehova i te feia o te rave ma te haehaa i ta ˈna e ani ia ratou. “E faaroo mai outou i to ˈu nei reo,” ta ˈna ïa i parau i te mau Iseraela, “e riro ïa vau ei Atua no outou i reira, e riro hoi outou ei taata no ˈu.” (Ieremia 7:23) Ia faaroo outou ia Iehova, e nehenehe outou atoa e riro ei hoa no ˈna!

E FAAETAETA IEHOVA I TO ˈNA MAU HOA

4, 5. E nafea Iehova e horoa ˈi i te etaeta i to ˈna mau taata?

⁴ A feruri na i te auraa o te auhoaraa e te Atua. Te parau ra te Bibilia e te imi nei Iehova i te mau taime maitatai no te “horoa . . . i te etaeta i te feia i tia te aau ia ˈna.” (Paraleipomeno 2, 16:9) E nafea Iehova e horoa ˈi i te etaeta ia outou? Te faataahia ra te hoê ravea i roto i te Salamo 32:8, ta tatou e taio e: “E haapii atu vau [Iehova] ia oe, e faaite au ia oe i ta oe eˈa ia haere ra; e aˈo atu vau ia oe, e ei nia ia oe tau mata vai ai.”

⁵ Auê ïa faaiteraa mahanahana i ta Iehova aupuru! E horoa ˈtu oia i te aratairaa ta outou e hinaaro e na ˈna e tiai ia outou a faaohipa ˈi outou i te reira. Te hinaaro nei te Atua e tauturu ia outou ia faaruru i to outou mau ati e tamataraa. (A taio i te Salamo 55:22.) No reira, mai te peu e e tavini outou ia Iehova ma te aau tia, e nehenehe outou e tiaturi mai te papai salamo tei parau e: “Ua tuu vau ia Iehova ei muâ ia ˈu; tei tau rima atau oia, e ore au e aueue.” (Salamo 16:8; 63:8) Oia, e nehenehe Iehova e tauturu ia outou ia ora ma te auhia e ana. Mai ta outou râ i ite, te vai ra te hoê enemi o te Atua o te hinaaro e tapea ia outou eiaha e na reira.

TA SATANI MÂRÔRAA

6. Eaha ta Satani pariraa no nia i te taata?

⁶ Te faataa ra te pene 11 o teie buka mea nafea to te Diabolo ra o Satani mârôraa i te mana arii o te Atua. Ua pari Satani i te Atua i te haavareraa e ua parau oia e aita Iehova i tano i te oreraa e vaiiho ia Adamu e ia Eva ia faaoti no raua iho eaha te mea maitai e eaha te mea ino. I muri aˈe i to Adamu e to Eva hararaa e to te fenua haamataraa i te î i to raua huaai, ua mârô Satani i te manaˈo turai o te taatoaraa o te taata. ‘Aita te taata e tavini ra i te Atua no to ratou here ia ˈna,’ ta Satani ïa pariraa. ‘A vaiiho na ia ˈu ia tamata, e nehenehe ta ˈu e turai i te taata atoa ia faarue i te Atua.’ Te faaite ra te aamu o te taata ra o Ioba e tera ta Satani i tiaturi. O vai Ioba, e mea nafea oia i taaihia ˈi i te mârôraa a Satani?

7, 8. (a) Na te aha i faariro ia Ioba ei taata faahiahia i rotopu ia vetahi ê i to ˈna ra tau? (b) Mea nafea to Satani mârôraa i te manaˈo turai o Ioba?

⁷ I ora na Ioba fatata e 3 600 matahiti aˈenei. E taata maitai oia, ua parau hoi Iehova e: “Aita . . . o ˈna e faito i nia i te fenua nei, e taata parau-tia e te paieti, e te mǎtaˈuraa i te Atua, e te faarueraa i te ino.” (Ioba 1:8) Ua au te Atua ia Ioba.

⁸ Ua mârô Satani i te manaˈo i turai ia Ioba ia tavini i te Atua. Teie ta te Diabolo i parau ia Iehova: “E ere anei tei auahia [Ioba] e oe, e to ˈna atoa ra fare, e ta ˈna atoa ra mau taoˈa atoa e ati noa ˈˈe? ua haamaitaihia e oe ta ˈna ohipa i rave, e ua rahi ta ˈna taoˈa i te fenua nei. Nanao noa ˈtura râ i to rima a rave atu ai i ta ˈna e ia pau roa; e e faaino oia ia oe i mua i to aro i reira.”—Ioba 1:10, 11.

9. Mea nafea to Iehova pahonoraa i ta Satani mârôraa, e no te aha?

⁹ Ua parau Satani e te tavini ra Ioba i te Atua no te mea noa te haamaitaihia ra o ˈna. Ua parau atoa te Diabolo e mai te peu e e tamatahia Ioba, e faarue oia i te Atua. Mea nafea to Iehova pahonoraa i ta Satani mârôraa? I te mea ua taaihia te tumu parau i te manaˈo turai o Ioba, ua faatia Iehova ia Satani ia tamata ia Ioba. Mea na reira e ite-maitai-hia ˈi e te here ra anei Ioba i te Atua aore ra aita.

UA TAMATAHIA IOBA

10. Eaha te mau ati i tupu i nia ia Ioba, e eaha to ˈna huru?

¹⁰ Aita i maoro, ua tamata Satani ia Ioba na roto e rave rau ravea. Ua eiâhia vetahi o ta Ioba mau animara, e ua haapohehia te tahi atu. Ua taparahi-pohe-hia te rahiraa o ta ˈna mau tavini. Ua fifi atura te faanavairaa faufaa. E ati ê atu tei tupu i te poheraa na tamarii hoê ahuru a Ioba i roto i te hoê mataˈi uˈana. Noa ˈtu râ teie mau ati, “aore Ioba i harahia i taua mau mea atoa nei, e aore hoi i faahapa i te Atua.”—Ioba 1:22.

11. (a) Eaha te piti o te pariraa a Satani ia Ioba, e mea nafea to Iehova pahonoraa ˈtu? (b) Eaha to Ioba huru i mua i to ˈna maˈi mauiui?

¹¹ Aita Satani i faaea. Ua manaˈo paha o ˈna e noa ˈtu e ua faaoromai Ioba i te ereraa i ta ˈna mau animara, tavini e tamarii, e faarue oia i te Atua ia maˈihia oia. Ua vaiiho Iehova ia Satani ia tairi ia Ioba i te hoê maˈi mauiui e te hairiiri. Aita râ teie atoa tamataraa i turai ia Ioba ia faarue i to ˈna faaroo i te Atua. Ua parau papu râ oia e: “E ore â vau e faarue i te parau mau na ˈu ra e pohe noa ˈtu vau.”—Ioba 27:5.

12. Mea nafea to Ioba pahonoraa i te mârôraa a te Diabolo?

¹² Aita Ioba i ite e o Satani te tumu o to ˈna mau ati. No to ˈna ite ore i te mau parau rii atoa o te mârôraa a te Diabolo i te mana arii o Iehova, ua taiâ Ioba e o te Atua te tumu o to ˈna mau fifi. (Ioba 6:4; 16:11-14) Ua tapea râ oia i to ˈna hapa ore ia Iehova. E ua hape te parau a Satani e te tavini ra Ioba i te Atua no te mau tumu miimii, inaha ua tapea Ioba i to ˈna haapao maitai!

13. Eaha tei tupu no to Ioba tapearaa i to ˈna haapao maitai i te Atua?

¹³ Ua horoa te haapao maitai o Ioba i te tahi pahonoraa papu na Iehova i te mârôraa faaino a Satani. E hoa mau â Ioba no Iehova, e ua haamauruuru te Atua ia ˈna no to ˈna haerea haapao maitai.—Ioba 42:12-17.

TE TAAIRAA E O OE

14, 15. No te aha tatou e nehenehe ai e parau e no te taatoaraa o te taata ta Satani mârôraa ia Ioba?

¹⁴ E ere to Ioba anaˈe hapa ore i te Atua tei mârôhia e Satani. To oe atoa. Te ite-maitai-hia ra te reira i roto i te Maseli 27:11, te na ô ra hoi te Parau a Iehova e: “E tau tamaiti, ia paari hoi oe, ia oaoa tau aau, ia tia ia ˈu ia patoi atu i tei faaino mai ia ˈu nei.” Ia au i teie mau parau, tei papaihia e rave rahi matahiti i muri aˈe i to Ioba poheraa, te faaino noa ra Satani i te Atua e te pari noa ra i ta ˈNa mau tavini. Ia ora tatou ma te auhia e Iehova, te tauturu mau ra ïa tatou i te pahono i te mau pariraa haavare a Satani, e mea na reira tatou e faaoaoa ˈi i te aau o te Atua. Eaha to oe manaˈo i te reira? E ere anei i te mea faahiahia te tururaa i te pahonoraa i te mau pariraa haavare a te Diabolo, noa ˈtu e e titauhia ia rave i te tahi mau tauiraa i roto i to oe oraraa?

¹⁵ A tapao na i ta Satani i parau: “E riro . . . ta te taata atoa ra ei hoo i to ˈna ora.” (Ioba 2:4) Ma te parau “te taata atoa,” te faataa maitai ra Satani e e ere o Ioba anaˈe ta ˈna e pari ra, o te taatoaraa râ o te taata. E manaˈo faufaa roa teie. Te mârô ra Satani i to oe hapa ore i te Atua. E hinaaro te Diabolo ia faaroo ore oe i te Atua e ia faarue i te hoê haerea parau-tia ia tupu te fifi. E nafea Satani e nehenehe ai e na reira?

16. (a) Na roto i teihea mau ravea e tamata ˈi Satani i te haafariu ê i te taata i te Atua? (b) E nafea te Diabolo e nehenehe ai e faaohipa i teie mau ravea i nia ia oe?

¹⁶ Mai tei faataahia i roto i te pene 10, te faaohipa nei Satani e rave rau ravea no te tamata i te haafariu ê i te taata i te Atua. I te hoê pae, te aro mai nei oia “mai te liona uuru ra, i te imiraa i te taata e pau ia ˈna ra.” (Petero 1, 5:8) No reira, e nehenehe te mana o Satani e itehia ia patoi te mau hoa, te mau fetii, aore ra te tahi atu i ta oe mau tutavaraa i te haapii i te Bibilia e i te faaohipa i ta oe e haapii ra.a (Ioane 15:19, 20) I te tahi aˈe pae, te “faahua melahi” noa ra Satani “ia ˈna iho no te maramarama.” (Korinetia 2, 11:14) E nehenehe te Diabolo e faaohipa i te mau ravea paari no te haavare ia oe e no te faahahi ê ia oe i te oraraa e auhia e te Atua. E nehenehe atoa oia e faaohipa i te toaruaruraa, ma te turai paha ia oe ia manaˈo e e ere oe i te mea navai i te maitai no te faaoaoa i te Atua. (Maseli 24:10) Ia haa Satani mai te hoê “liona uuru” aore ra mai te hoê “melahi . . . no te maramarama,” tera noa ta ˈna mârôraa: Te parau ra oia e ia û oe i te mau ati aore ra faahemaraa, e faaea oe i te tavini i te Atua. E nafea oe e nehenehe ai e pahono i ta ˈna mârôraa e e haapapu i to oe hapa ore i te Atua, mai ia Ioba?

A FAAROO I TA IEHOVA MAU FAAUERAA

17. Eaha te tumu rahi e faaroo ai i ta Iehova parau, aore ra faaueraa?

¹⁷ E nehenehe outou e pahono i ta Satani mârôraa na roto i te oraraa ma te auhia e te Atua. Eaha ïa te auraa? Te pahono ra te Bibilia e: “E hinaaro atu oe i to Atua ia Iehova ma to aau atoa, e ma to varua atoa, e ma to puai atoa.” (Deuteronomi 6:5) A rahi ai to outou hinaaro i te Atua, e hinaaro roa outou e rave i ta ˈna e titau ra ia outou. “Teie . . . te hinaaro i te Atua,” ta te aposetolo Ioane ïa i papai, “o te haapao i ta ˈna ra parau.” Ia hinaaro outou ia Iehova ma to outou aau atoa, e ite ïa outou e “e ere . . . ta ˈna parau i te mea teimaha.”—Ioane 1, 5:3.

18, 19. (a) Eaha vetahi mau faaueraa a Iehova? (A hiˈo i te tumu parau tarenihia “A ape i ta Iehova e ore e au.”) (b) Mea nafea to tatou iteraa e aita te Atua e titau rahi roa maira ia tatou?

¹⁸ Eaha te mau faaueraa a Iehova? Te vai ra no nia i te mau haerea e titauhia ia ape tatou. A hiˈo na i te tumu parau tarenihia “A ape i ta Iehova e ore e au.” E ite atu outou i te mau haerea ta te Bibilia e faahapa maitai ra. I te hiˈoraa matamua, e ere paha te tahi mau peu i faahitihia i te mea ino roa. I muri aˈe râ i te feruriruriraa i te mau irava i faahitihia, e ite outou i te paari o te mau ture a Iehova. E nehenehe te raveraa i te tahi mau tauiraa i roto i to outou haerea e riro ei fifi rahi roa ˈˈe aita outou i farerei aˈenei. E horoa mai râ te oraraa ma te auhia e te Atua i te mauruuru e te oaoa rahi. (Isaia 48:17, 18) E ohipa teie ta outou e nehenehe e rave. Mea nafea to tatou iteraa i te reira?

¹⁹ Eita roa ˈtu Iehova e titau mai hau aˈe i tei maraa ia tatou. (A taio i te Deuteronomi 30:11-14.) Mea ite aˈe o ˈna ia tatou nei i to tatou mau aravihi e to tatou mau taotiaraa. (Salamo 103:14) Hau atu â, e nehenehe Iehova e horoa mai i te etaeta ia faaroo tatou ia ˈna. Ua papai te aposetolo Paulo e: “E parau mau ta te Atua e ore oia e vaiiho noa ia outou ia ati, maori râ o te tia ia outou ia faaoromai ra; e faatupu atoa oia i te haapuraa i taua ati ra, ia tia ia outou ia faaoromai.” (Korinetia 1, 10:13) No te tauturu ia outou ia faaoromai, e nehenehe Iehova e horoa atoa ˈtu i “te mana rahi maitai.” (Korinetia 2, 4:7) I muri aˈe i to ˈna faarururaa e rave rahi ati, ua nehenehe Paulo e parau e: “E tia ia ˈu te mau mea atoa nei i . . . tei tauturu mai ia ˈu ra.”—Philipi 4:13.

A ATUATU I TE MAU HURU MAITATAI TA TE ATUA E AU

20. Eaha te mau huru maitatai ta te Atua e au e mea maitai ia faahotu outou, e no te aha te reira e mea faufaa ˈi?

²⁰ Parau mau e no te faaoaoa ia Iehova, eita e navai noa ia ape i te mau mea ta ˈna e ore e au. E mea tia atoa ia au outou i ta ˈna e au. (Roma 12:9) Eita anei outou e maiti ei hoa i te feia hoê â to outou manaˈo, ta outou mau mea e anaanatae e ta outou mau faufaa? E na reira atoa Iehova. No reira, a haapii i te au i te mau mea ta Iehova e au. Te faataahia ra vetahi o te reira i roto i te Salamo 15, o te faahiti ra i te feia ta te Atua e faariro ei hoa no ˈna. (A taio i te Salamo 15:1-5.) E faahotu te mau hoa o Iehova i ta te Bibilia e parau ra “ta te [v]arua e faatupu,” te mau huru maitatai mai “te hinaaro,” “te oaoa, te hau, te faaoromai, te mǎrû, te maitai, te faaroo,” “te mamahu, te hitahita ore.”—Galatia 5:22, 23.

21. Eaha te tauturu ia outou ia faahotu i te mau huru maitatai ta te Atua e au?

²¹ E tauturu te taioraa e te haapii-tamau-raa i te Bibilia ia outou ia faahotu i te mau huru maitatai ta te Atua e au. E e tauturu te iteraa eaha ta te Atua e titau ra ia outou ia faaau i to outou mau manaˈo i nia i to te Atua. (Isaia 30:20, 21) E rahi noa ˈtu â to outou here ia Iehova, e puai noa ˈtu â to outou hinaaro e ora ma te auhia e te Atua.

22. Eaha ta outou e faatupu ia ora outou ma te auhia e te Atua?

²² E titauhia te tutavaraa no te ora ma te auhia e Iehova. Te faaau ra te Bibilia i te tauiraa i to outou oraraa i te tatararaa i to outou huru taata tahito e te ahuraa i te huru taata apî. (Kolosa 3:9, 10) No nia râ i te mau faaueraa a Iehova, teie ta te fatu salamo i papai: “Tei te haapao i te reira te utua rahi.” (Salamo 19:11) E ite outou atoa e mea hoona roa ia ora ma te auhia e te Atua. Ia na reira outou, e horoa ïa outou i te tahi pahonoraa i te mârôraa a Satani e e faaoaoa outou i te aau o Iehova!