HAAPIIRAA 38
A mauruuru i te ô o te ora
Ua î te oraraa i te mau tupuraa faahiahia mau. Noa ˈtu e faaruru tatou i te mau fifi, e nehenehe iho â tatou e oaoa i roto i te tahi mau tuhaa o te oraraa. Nafea tatou e nehenehe ai e faaite i to tatou mauruuru i te ô o te ora? E eaha te tumu faufaa roa ia na reira?
1. No te aha mea tia ia mauruuru tatou i te ora?
Mea tia ia mauruuru tatou i te ora, no te mea e ô te reira no ǒ mai i to tatou Metua here ra o Iehova. “Tei [ia ˈna] ra te ora,” na ˈna i poiete i te mau mea ora atoa. (Salamo 36:9) “Na ˈna hoi e horoa na te taata atoa i te ora e te aho e te mau mea atoa.” (Ohipa 17:25, 28) Te horoa mai ra Iehova i te mea ta tatou e hinaaro ra no te ora. E te rave atoa ra oia i te reira ia nehenehe tatou ia oaoa.—A taio i te Ohipa 14:17.
2. Nafea tatou e faaite ai ia Iehova e te mauruuru ra tatou i te ô o te ora?
Mai te taime i hapu ai to oe mama ia oe, ua aupuru Iehova ia oe. I roto i te hoê pure, ta Iehova i tuu i roto i ta ˈna Parau, ua na ô hoê o ta ˈna tavini ia ˈna: “Ua ite atoa to mata ia ˈu i roto i te opu.” (Salamo 139:16) Mea faufaa roa to oe ora no Iehova. (A taio i te Mataio 10:29-31.) E oto rahi o ˈna mai te peu e opua te hoê taata e haapohe i te tahi atu taata e i te haapohe ia ˈna iho.a (Exodo 20:13) E oto atoa Iehova mai te peu e haafifi faufaa ore noa tatou i to tatou ora aore ra aita tatou i rave i te mau ravea no te paruru i te ora o te tahi atu. Ia haapao tatou i to tatou ora e ia faatura i te ora o vetahi, e faaite tatou i to tatou mauruuru i te ô faahiahia mau o te ora.
A FAAHOHONU ATU Â
A hiˈo i te tahi mau ravea ta oe e nehenehe e rave no te faaite i to oe mauruuru no te ô o te ora.
3. A haapao i to oe ea
No te mea ua euhe tatou ia Iehova i te rave noa i to ˈna hinaaro, e faaohipa tatou i to tatou ora atoa no te tavini ia Iehova. E au ra e te pûpû ra tatou i to tatou tino ei tusia no te Atua. A taio i te Roma 12:1, 2, e a aparau i teie mau uiraa:
Eaha te turai ia oe ia haapao i to oe ea?
Eaha te tahi mau ravea ta oe e nehenehe e rave?
4. A haapao maitai i te mau mea ta oe e rave ra ia ore hoê e pepe aore ra e pohe
Te faaitoito mai ra te Bibilia ia ape i te mau ohipa atâta. A pata i te VIDEO no te haapii i te tahi mau mea ta oe e nehenehe e rave no te paruru ia oe.
A taio i te Maseli 22:3, e a aparau nafea oe e te tahi atu e nehenehe ai e paruru . . .
i roto i to oe fare.
i ta oe vahi raveraa ohipa.
ia hauti oe i te mau tuaro.
ia faahoro oe i te pereoo aore ra na te tahi e faahoro.
5. A faatura i te ora o te hoê tamarii aita i fanauhia ˈtura
Ua faataa Davida e te tâuˈa ra Iehova i te mau mea atoa e tupu ra a rahi mai ai te hoê tamarii i roto i te opu o to ˈna mama. A taio i te Salamo 139:13-17, e a aparau i teie uiraa:
No Iehova, e haamata te ora o te hoê taata i roto i te opu aore ra i te fanauraa?
Ua paruru te mau ture a Iehova i Iseraela i tahito ra, i te mau metua vahine e ta ratou mau tamarii aita i fanauhia ˈtura. A taio i te Exodo 21:22, 23, e a aparau i teie mau uiraa:
Eaha to Iehova manaˈo no te hoê taata tei haapohe i te hoê tamarii aita i fanauhia ˈtura ma te opua ore?
Eaha to ˈna manaˈo mai te peu e opua te hoê taata ia rave i te reira?b
Eaha to oe huru no nia i to te Atua manaˈo?
E manaˈo paha te hoê vahine tei ite i te faufaa o te ora, o te haamaruaraa tamarii te ravea hoê roa no ˈna. A taio i te Isaia 41:10, e a aparau i teie mau uiraa:
Mai te peu te faaruru ra te hoê vahine i te faaheporaa no te haamarua i te tamarii, e ani o ˈna i te tauturu ia vai? No te aha?
TE MANAˈO O VETAHI: “E tiaraa to te hoê vahine e maiti e haamarua i te tamarii, no te mea o ˈna tei hapû.”
Eaha te haapapu ia oe e mea faufaa no Iehova te ora o te metua vahine e ta ˈna aiû aita i fanauhia ˈtura?
HAAPOTORAA
Te haapii mai ra te Bibilia ia here, ia faatura e ia paruru i ta Iehova ô no te ora. Oia hoi, to tatou ora e te ora o vetahi ê.
Haamanaˈoraa
No te aha mea faufaa te ora o te hoê taata no Iehova?
Eaha to Iehova huru ia opua te hoê taata i te haapohe i te tahi atu taata?
No te aha oe e mauruuru rahi ai no te ô o te ora?
HIˈOPOA
Nafea tatou e nehenehe ai e haamauruuru ia Iehova no te ô o te ora?
A imi i te pahonoraa no te uiraa, e faaore anei te Atua i te hara a te hoê vahine tei haamarua i te hoê tamarii?
“Eaha ta te Bibilia e parau ra no nia i te haamaruaraa tamarii?” (Tumu parau natirara)
A haapii nafea te manaˈo o te Atua no te ora e ohipa ˈi i nia i ta tatou faaotiraa no te faaanaanataeraa.
“‘Tuaro atâta’: E tamata anei oe?” (A ara mai na! 8 no Atopa 2000)
Mai te peu e manaˈo te hoê taata e haapohe ia ˈna, a hiˈo nafea te Bibilia e nehenehe ai e tauturu atu.
a Te haapao ra Iehova i te feia e mauiui ra. (Salamo 34:18) Te taa ra ia ˈna i te mau huru aau o te taata e hinaaro ra e pohe e te hinaaro ra Iehova e tauturu atu. No te ite nafea Iehova e nehenehe ai e horoa i te puai i te hoê taata no te ape i te manaˈo haapohe, a taio i te tumu parau “Hinaaro vau e pohe. E nehenehe anei te Bibilia e tauturu mai ia aro i tera mau manaˈo?” tei tapurahia i roto i te tuhaa “Hiˈopoa” o teie haapiiraa.
b Aita te feia o te haamarua i te tamarii e hinaaro ia faahapa-rahi-hia ratou, e nehenehe ta Iehova e faaore i ta ratou hara. No te ite atu â, a hiˈo i te tumu parau “Eaha ta te Bibilia e parau ra no nia i te haamaruaraa tamarii?” tei tapurahia i roto i te tuhaa “Hiˈopoa” o teie haapiiraa.