E parau aro te ore e tia i te mau Kerisetiano ia tapea huna noa!
“I parau faaite noa vau i te taata atoa; . . . aore roa vau i parau i te vahi moemoe.”—IOANE 18:20.
1, 2. Eaha te auraa o te taˈo Heleni ra my·steʹri·on i roto i te mau Papai?
I ROTO i te Tatararaa a te Ao Apî o te mau Papai Moˈa, e 25 taime te taˈo Heleni ra my·steʹri·on i hurihia ˈi e “parau aro moˈa” e e 3 taime e “miterio.” E mea faufaa roa ïa te hoê parau aro i parauhia e mea moˈa! Te taata e ite noa ˈtu i teie parau aro, e fanaˈo ïa oia i te hoê haamaitairaa teitei, no te mea ua maitihia oia no te tufa i te hoê parau aro e te Atua Mana hope o te ao atoa nei.
2 I roto i ta ˈna titionare (Expository Dictionary of Old and New Testament Words), te haapapu ra o Vine e, i roto i te rahiraa o te mau tupuraa, e mea tano aˈe te huriraa “parau aro moˈa” i te huriraa “miterio.” Te na ô ra teie buka no nia i te taˈo my·steʹri·on e: “I roto i te [mau Papai Heleni Kerisetiano], e tano teie parau, eiaha i te tahi miterio, i te hoê râ mea i hau aˈe i te maramarama taata nei e, o te nehenehe e itehia na roto anaˈe i te faaiteraa a te Atua, e horoahia mai na roto i te ravea e i te taime i faataahia e te Atua, e i te feia anaˈe o tei haamaramaramahia e To ˈna Varua. I roto i to ˈna auraa matau-noa-hia, te miterio, o te hoê ïa ite huna; i roto i te Bibilia, e parau mau ïa i faaitehia mai. No reira te parau [miterio] e apitihia ˈi i te mau parau mai teie, ‘faaitehia,’ ‘hohorahia,’ ‘heheuhia,’ ‘porohia,’ ‘papuhia,’ ‘operehia.’”
3. Eaha te taa-ê-raa i rotopu i te amuiraa kerisetiano o te senekele matamua ra, e vetahi mau pǔpǔ faaroo miterio?
3 Te haapapu ra teie tatararaa i te taa-ê-raa rahi i rotopu i te mau pǔpǔ faaroo miterio i uˈana na i te senekele matamua ra, e te amuiraa kerisetiano haamau-apî-hia. Mea pinepine hoi te feia i fariihia na ei melo no te mau pǔpǔ faaroo huna, i te faahepohia ia euhe ia mamû noa no te paruru i te mau haapiiraa faaroo, area te mau Kerisetiano ra, aita roa ˈtu ratou i tuuhia ˈˈe i raro aˈe i teie huru opaniraa. Parau mau, ua faahiti te aposetolo Paulo i te parau no “te parau paari a te Atua i te parau aro [“moˈa,” MN] ra,” ma te pii i te reira e paari “tei hunahia ra,” oia hoi tei hunahia i “te hui tavana o teie nei ao.” Aita râ i hunahia i te mau Kerisetiano, ia ratou ra te faaiteraahia mai na roto i te varua o te Atua, ia nehenehe ratou e faaite i te reira i te taata.—Korinetia 1, 2:7-12; a faaau e te Maseli 1:20.
Ua itehia te “parau aro moˈa”
4. Ua niuhia te “parau aro moˈa” i nia ia vai, e mea nafea?
4 Ua niuhia te “parau aro moˈa” a Iehova i nia ia Iesu Mesia. Ua papai o Paulo e: “Ua faaite mai [o Iehova] ia tatou i te parau aro [“moˈa,” MN] ra o to ˈna ra hinaaro, to ˈna ra manaˈo hamani maitai i opuahia e ana i roto ia ˈna iho, e ia tae i te tuuraa parau i te hoperaa mau o te mau tau ra, e amui ai oia i te mau mea atoa i te Mesia ra, to te raˈi, e to te ao nei, ei ia ˈna.” (Ephesia 1:9, 10) Ua haapapu roa ˈtu â o Paulo i taua “parau aro moˈa” ra ia ˈna i faaite i te faufaaraa “ia noaa te ite rahi papu roa ra . . . i te parau aro [moˈa] a te Atua Metua [oia hoi] te Mesia ra.”—Kolosa 2:2; MN.
5. Eaha tei amuihia i roto i te “parau aro moˈa”?
5 E ere râ te reira anaˈe inaha, te “parau aro moˈa,” e parau moe ïa e rave rau tuhaa to ˈna. E ere noa te iteraa e, o Iesu te Mesia aore ra te Huaai i tǎpǔhia mai; o te ohipa atoa râ i horoahia mai na ˈna i roto i te opuaraa a te Atua. No nia atoa i te hoê faatereraa i nia i te raˈi, te Basileia Mesia a te Atua, mai ta Iesu i haapapu maitai, ia ˈna i parau atu i ta ˈna mau pǐpǐ e: “No te mea ua horoahia ia outou te ite i te parau aroaro [moˈa] i te basileia o te [raˈi] ra, aita râ i horoahia ia ratou.”—Mataio 13:11; MN.
6. (a) No te aha e tano ai ia parau no nia i te “parau aro moˈa” e, ua “hunahia i te mau ui atoa mai tahito mai”? (b) Mea nafea teie parau aro i te faaite-mǎrû-noa-raahia mai?
6 E tau maoro te mairi mai te taime matamua e faahitihia ˈi te opuaraa a te Atua e horoa mai i te niu no te Basileia Mesia, e te taime ‘e tupu faaoti roa ˈi te parau aro [“moˈa,” MN].’ (Apokalupo 10:7; Genese 3:15) E tupu faaoti roa oia ia haamauhia te Basileia, mai te itehia ra ia faaauhia te Apokalupo 10:7 e te 11:15. Inaha, tau 4 000 matahiti tei mairi mai te faahitiraahia te parau tǎpǔ matamua no nia i te Basileia i Edene ra, e tae roa mai i te faraa mai te Arii i maitihia i te matahiti 29 T.T. Tau 1 885 matahiti â tei mairi hou te Basileia i haamauhia ˈi i nia i te raˈi i te matahiti 1914 ra. No reira, ua faaite-mǎrû-noa-hia mai te “parau aro moˈa” i te roaraa fatata e 6 000 matahiti. (A hiˈo i te api 16.) Ua tano roa o Paulo i te faahitiraa i “te heheuraa mai i te parau aro [“moˈa,” MN] i hunahia i te mau ui atoa mai tahito mai, ua faaitehia mai râ i teie nei.”—Roma 16:25-27; Ephesia 3:4-11.
7. No te aha tatou e tiaturi papu ai i te pǔpǔ o te tavini haapao maitai e te paari?
7 Taa ê atu i te mau taata, e mea poto hoi to ratou oraraa, aita roa ˈtu o Iehova i faahepohia ia faaite oioi noa i ta ˈna mau parau moe no te poto hoi o te taime. Na teie manaˈo e tauturu ia tatou ia ore ia ru noa, mai te peu e eita vetahi mau uiraa Bibilia e nehenehe e tatarahia mai ta tatou e manaˈo ra. No to ratou haehaa, eita te pǔpǔ o te tavini haapao maitai e te paari, tei faatoroahia no te opere i te maa na te utuafare kerisetiano i te taime mau ra, e horo oioi noa ma te faatiatia e ma te horoa i te tahi mau tatararaa papu ore no nia i te mau mea aitâ i maramaramahia ˈtura. Te tutava nei te pǔpǔ o te tavini ia ore oia e horoa i te tahi haapiiraa etaeta roa. Te farii nei oia ma te haehaa e, i teie nei taime, eita ta ˈna e nehenehe e pahono i te mau uiraa atoa, ia au maite hoi i te Maseli 4:18. Teie râ, te oaoa nei tatou i te mea e e tamau noa o Iehova, i te taime e na roto i te ravea i faataahia e ana, i te faaite mai i ta ˈna mau parau moe no nia i ta ˈna mau opuaraa! Eiaha roa ˈtu tatou ia ru noa no nia i te faanahoraa a Iehova, ma te tamata i te na mua ˈtu ma te maamaa hoi, i te Atua o te faaite mai i te parau moe. Auê ïa tamǎrûraa e ia ite e aita te arai ta Iehova e faaohipa nei i teie nei tau e na reira ra! E arai haapao maitai e te paari hoi oia.—Mataio 24:45; Korinetia 1, 4:6.
E tia ia faaite-haere-hia te parau aro i heheuhia!
8. Nafea tatou e ite ai e e tia ia faaitehia te “parau aro moˈa”?
8 Aita o Iehova i heheu i ta ˈna “parau aro moˈa” i te mau Kerisetiano ia tapea huna noa ratou i te reira. E tia râ ia faaitehia, ia au maite i te faaueraa ta Iesu i horoa i ta ˈna mau pǐpǐ atoa—eiaha noa râ i te tahi mau tia ekalesia: “O outou te maramarama o teie nei ao. E oire faatiahia i nia i te mouˈa ra, eita ïa e moe. E ore hoi te taata nei e tutui i te lamepa a tuu ai i raro aˈe i te farii, ei nia râ i te vairaa ra; ia maramarama to te fare atoa ra. Oia atoa to outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.”—Mataio 5:14-16; 28:19, 20.
9. Na te aha e haapapu ra e e ere o Iesu i te taata orure hau, mai ta vetahi e parau ra?
9 Aita roa ˈtu to Iesu e opuaraa orure hau e haamau i te hoê faanahonahoraa pǐpǐ huna no te rave i te tahi mau ohipa huna. I roto i te buka ra Kerisetianoraa matamua e totaiete (Beretane), teie ta Robert M. Grant i papai no nia i te parau paruru i te mau Kerisetiano matamua i vauvauhia e te taata paruru faaroo o te senekele piti ra o Justin Maratiri: “Ahiri e e feia orure hau te mau Kerisetiano, e tapuni noa ïa ratou ia naeahia ia ratou ta ratou tapao.” Tera râ, nafea te mau Kerisetiano ia “tapuni noa” e i te hoê â taime, e riro mai te “oire faatiahia i nia i te mouˈa ra”? Aita hoi i tia ia ratou ia huna i to ratou maramarama i raro aˈe i te vairaa ra! Aita ïa e tumu ia mǎtaˈu te faatereraa i ta ratou ohipa. Ua faataa â teie taata papai e o ratou “te mau turu papu roa ˈˈe o te emepera no te imi i te hau e te nahonaho-maitai-raa.”
10. No te aha eita te mau Kerisetiano e tapea huna i to ratou tiaraa?
10 Aita o Iesu i hinaaro e ia tapea huna noa te mau pǐpǐ i to ratou tiaraa, mai te mea ra e e melo ratou no te tahi pǔpǔ faaroo amaha. (Ohipa 24:14; 28:22) Ia ore tatou ia faaanaana i to tatou maramarama i teie nei tau, e ore roa ïa te Mesia e to ˈna ra Metua, te Atua o te faaite mai i te parau moe, e mauruuru, e e ore atoa ïa tatou e oaoa.
11, 12. (a) No te aha o Iehova e hinaaro ai e ia faaite-haere-hia te Kerisetianoraa? (b) Mea nafea to Iesu horoaraa mai i te hiˈoraa maitai?
11 “Aita roa [o Iehova] i hinaaro e ia pohe atu te hoê, ia noaa paatoa râ te tatarahapa.” (Petero 2, 3:9; Ezekiela 18:23; 33:11; Ohipa 17:30) Te niu e faaorehia ˈi te hara a te mau taata tatarahapa, o te faaroo ïa i roto i te tusia no te hoo o Iesu Mesia, o tei pûpû ia ˈna iho ei hoo no te taatoaraa—eiaha râ no te tahi noa feia—“ia ore ia pohe te faaroo ia ˈna ra, ia roaa râ te ora mure ore.” (Ioane 3:16) E mea faufaa roa ia tauturuhia te mau taata ia rave i te mau taahiraa avae titauhia, ia nehenehe ratou e haavahia ei mamoe, eiaha râ ei puaaniho, i te tau haavaraa i mua nei.—Mataio 25:31-46.
12 Eiaha te Kerisetianoraa mau ia hunahia; e tia râ ia faaitehia na roto i te mau ravea atoa e tano. Na Iesu iho i horoa mai i te hiˈoraa maitai. I to te tahuˈa rahi uiuiraa ia ˈna no nia i ta ˈna mau pǐpǐ e ta ˈna haapiiraa, ua na ô atu oia e: “I parau faaite noa vau i te taata atoa; e tiâ vau i roto i te mau sunago ra e i roto i te hiero ra i te haapiiraa, i te vahi e rǔrǔ ai te ati Iuda ra: aore roa vau i parau i te vahi moemoe.” (Ioane 18:19, 20) Ia au i teie hiˈoraa, o vai ïa taata mǎtaˈu i te Atua o te hinaaro e tapea huna noa i te poroi ta te Atua i faaue ia faaitehia i te mau taata atoa? O vai te opua e haatapuni i ‘te taviri o te ite’ e aratai i te ora mure ore? Ia na reira anaˈe oia, e riro ïa oia mai te feia faaroo haavare no te senekele matamua ra.—Luka 11:52; Ioane 17:3.
13. No te aha e tia ˈi ia poro i te mau taime atoa e tano?
13 Eita roa ˈtu te hoê taata e nehenehe e parau e ua tapea huna noa tatou, oia te mau Ite no Iehova, i te poroi o te Basileia o te Atua! Noa ˈtu e e fariihia teie nei poroi aore ra e patoihia mai, e tia i te taata ia ite e ua poro-haere-hia. (A faaau e te Ezekiela 2:5; 33:33.) No reira, e imi anaˈe i te mau ravea atoa e tia ˈi, no te faaite i te poroi parau mau i te mau taata atoa, noa ˈtu eaha te vahi e farerei ai tatou ia ratou.
Te oomoraa i te mǎtau i roto i te taa o Satani
14. No te aha eita e tia ia tatou ia haamarirau i te rave i ta tatou haamoriraa ma te huna ore?
14 I roto e rave rahi vahi, te faahiti-rahi-hia nei te parau o te mau Ite no Iehova na roto i te mau parau apî. Mai te ohipa atoa i tupu i nia i te mau Kerisetiano matamua, te haaparare-pinepine-hia nei te mau parau hape no nia ia ratou e te amuihia nei ratou i roto i taua mau pǔpǔ faaroo iino ra e te mau faanahonahoraa huna. (Ohipa 28:22) E haafifi-rahi-hia ˈtu anei tatou no ta tatou pororaa huna ore? Eita e tano, e eita atoa e tuea e te faaueraa a Iesu, mai te peu e e faaô faufaa ore noa ˈtu tatou i roto i te mau aimârôraa. (Maseli 26:17; Mataio 10:16) Eita atoa râ e tia ia hunahia te ohipa maitai o te pororaa i te Basileia e te tautururaa i te taata ia haamaitai i to ratou oraraa. Te faahanahana ra te reira ia Iehova, ma te faateitei ia ˈna, te hutiraa i te ara-maite-raa i nia ia ˈna e i nia i ta ˈna Basileia i haamauhia. Te farii-maitai-raahia te parau mau Bibilia i Europa Hitia o te râ e i te tahi mau fenua no Afirika, ua noaa mai ïa te reira na roto i te tiamâraa rahi aˈe i fanaˈohia no te poro i te parau mau i taua mau vahi ra i teie nei.
15, 16. (a) Eaha te mau tapao e naeahia nei na roto i to tatou raveraa i ta tatou ohipa ma te huna ore e to tatou ruperupe i te pae varua, e tia anei râ ia tatou ia mǎtaˈu? (b) No te aha o Iehova e oomo ai i te mǎtau i roto i te taa o Satani?
15 Parau mau, te ite nei te taata i te pororaa huna ore a te mau Ite no Iehova, te paradaiso pae varua o ta ratou e fanaˈo nei, e to ratou ruperupe—i te pae o te rahiraa taata e i te pae materia. E huti mai teie mau tuhaa i te feia mafatu tia, area te feia patoi ra, eita ïa ratou e farii. (Korinetia 2, 2:14-17) Inaha, e nehenehe hoi teie ruperupe e aratai i te mau nuu a Satani ia aro mai i te nunaa a te Atua.
16 E tia anei ia tatou ia mǎtaˈu? Eita, ia au i te parau tohu a Iehova i roto i te pene 38 a Ezekiela. Ua tohuhia mai e e aratai o Goga no Magoga, e faataipe ra i te Diabolo ra o Satani mai to ˈna huriraahia mai i raro i te fenua nei i muri aˈe i te haamauraahia te Basileia i te matahiti 1914 ra, i te hoê aroraa i nia i te nunaa a te Atua. (Apokalupo 12:7-9) Te parau ra o Iehova ia Goga e: “E na oe e parau e, E haere au i te fenua oire rii aua-ore-hia ra; e haere au i te feia parahi hau noa ra, o tei parahi ma te ora, o tei parahi ma te patu ore, aore e teˈa e aore e opani, ia noaa te taoˈa pau, ia tufa i te taoˈa; e ia fariu i to rima i te mau vahi ano ia taatahia ra, e te mau taata i haaputuhia mai mai roto i te mau fenua ra, ma te puaa e te taoˈa atoa i te noaaraa, e te parahiraa i ropu i te fenua ra.” (Ezekiela 38:11, 12) Te faaite ra te irava 4 e, eiaha te nunaa a te Atua ia mǎtaˈu i teie aroraa, no te mea na Iehova iho i opua. No te aha râ te Atua e faatia ˈi—oia mau, e faatupu ai—i te hoê aroraa rahi i nia i to ˈna nunaa? Te horoa ra te irava 23 i te pahonoraa a Iehova: “E na reira vau i te faarahi ia ˈu iho, e te haamaitai ia ˈu iho; e itehia hoi au e te mau fenua atoa e rave rahi; e ite hoi ratou e, o vau o Iehova.”
17. Nafea tatou ia hiˈo i te aroraa a Goga e fatata maira?
17 No reira, eiaha te nunaa a Iehova ia riaria i te aroraa a Goga, e tia râ ia ˈna ia tiai ru i teie tupuraa o te parau tohu a te Bibilia. Auê te oaoa ia ite e, na roto i te faaruperuperaa e te haamaitairaa i ta ˈna faanahonahoraa ite-mata-hia, te oomo nei Iehova i te mǎtau i roto i te taa o Satani e te aratai nei oia ia ˈna e i to ˈna nuu puai i to ratou pau!—Ezekiela 38:4.
Ua hau atu te faaiteraa i to mutaa ihora!
18. (a) Eaha ta te taata e rave rahi e taa ra i teie nei, e no te aha? (b) Mea nafea te huru o te taata i mua i te pororaa i te Basileia, ia riro ei tumu puai o te turai ia tatou?
18 I te mau tau apî, ua faaite te mau Ite no Iehova ma te huna ore i to ratou mau tiaturiraa niuhia i nia i te Bibilia, noa ˈtu e aita i auhia e te taata. E rave rahi ahuru matahiti to ratou faaara-noa-raa e mea atâta ia puhipuhi i te avaava e ia rave i te raau taero, e eita te faatia-noa-raa i te tamarii e manuïa, e mau faahopearaa iino to te mau peu faaanaanataeraa taiata e te haavî uˈana, e mea atâta te mau pâmuraa toto. Ua faaite atoa ratou i te mau vahi hape o te haapiiraa e mea tupu noa mai te mau mea. Te rahi noa ˈtura te taata e parau nei e, “Ua tano te mau Ite no Iehova.” Ahiri e ua huna tatou i ta tatou mau tiaturiraa i mua i te taata, eita ïa ratou e na reira i te parau. Eiaha atoa ia moehia e, ia na reira anaˈe ratou i te parau, fatata atoa ïa ratou i te parau e, “E haavare oe e Satani; ua tano iho â o Iehova.” Auê ïa tumu puai e turai ia tatou ia tamau noa i te pee i te hiˈoraa o Iesu, ma te faaite i te parau mau i mua i te taata!—Maseli 27:11.
19, 20. (a) Eaha te opuaraa papu ta te nunaa a Iehova i faaite na i te matahiti 1922 ra, e e tano noâ anei teie mau parau i teie nei tau? (b) Nafea tatou ia hiˈo i te “parau aro moˈa” a Iehova?
19 Mea maoro to te nunaa a Iehova iteraa i ta ratou hopoia i roto i teie nei tuhaa. I te hoê tairururaa faufaa roa i tupu i te matahiti 1922 ra, ua haaputapû roa o J. F. Rutherford, oia te peretiteni o te Taiete Watch Tower i taua tau ra, i te feia i faaroo ia ˈna na roto i te parauraa e: re-th p. 171 ch. 26 par. 4“A faaite i te hoê huru au noa, a ara, a faaitoito, e ia vai puai noa outou! Ia riro outou ei mau ite mau e te haapao maitai no te Fatu ra. A haere i mua i roto i te aroraa e ia ano roa o Babulonia. A faaite i te poroi i te mau vahi atoa. Ia ite te ao nei e o Iehova te Atua e o Iesu Mesia te Arii o te mau arii e te Fatu o te mau fatu. Teie te mahana hoê roa i rotopu i te mau mahana atoa. Inaha, te arii ra te Arii! E mau vea outou na ˈna. No reira ïa: A faaite, a faaite, a faaite i te Arii e to ˈna ra basileia!”
20 E faufaa rahi to taua mau parau nei i te matahiti 1922 ra, e mea faufaa roa ˈtu â i teie nei, e 75 matahiti i muri iho inaha, ua fatata roa mai te faaiteraa o te Mesia ei Haava e ei Taata tahoo! Te poroi no te Basileia o Iehova i haamauhia e no te paradaiso pae varua e fanaˈohia ra e te nunaa a te Atua, e “parau aro moˈa” faahiahia roa ïa te ore e tia ia tapea-huna-hia. Mai ta Iesu iho i faaite papu, e tia i ta ˈna mau pǐpǐ, ma te tauturu a te varua moˈa, ia riro ei mau ite “e tae noa ˈtu i te hopea o te fenua ra” no to ˈna tiaraa faufaa i roto i te opuaraa mure ore a Iehova. (Ohipa 1:8; Ephesia 3:8-12) Oia mau, ei mau tavini no Iehova, te Atua o te faaite mai i te parau moe, eita e tia ia tatou ia tapea i teie parau aro na tatou anaˈe!
Nafea outou ia pahono?
◻ Eaha te “parau aro moˈa”?
◻ Nafea tatou ia ite e e tia ia faaite-haere-hia?
◻ Na te aha e faatupu i te aroraa a Goga i nia i te nunaa o Iehova, e nafea tatou ia hiˈo i te reira?
◻ Eaha te tia ia tatou tataitahi ia opua papu e rave?
[Tumu parau tarenihia i te api 16]
Te hoê “parau aro moˈa” i faaite-mǎrû-noa-hia mai
◻ I muri aˈe i te matahiti 4026 H.T.T.: Ua tǎpǔ te Atua e faatia mai i te hoê Huaai no te haamou ia Satani.—Genese 3:15
◻ 1943 H.T.T.: Ua haamanahia te faufaa a Aberahama, ma te tǎpǔ e e na roto mai te Huaai ia Aberahama.—Genese 12:1-7
◻ 1918 H.T.T.: Fanauraa o Isaaka, oia te tamaiti aiˈa o te faufaa.—Genese 17:19; 21:1-5
◻ Area matahiti 1761 H.T.T.: Ua haapapu o Iehova e e na roto mai te Huaai i te tamaiti a Isaaka ra ia Iakoba.—Genese 28:10-15
◻ 1711 H.T.T.: Ua faaite o Iakoba e e na roto mai te Huaai i ta ˈna ra tamaiti ia Iuda.—Genese 49:10
◻ 1070-1038 H.T.T.: Ua itea mai i te Arii ra o Davida e e na roto mai te Huaai ia ˈna, e e arii oia e a muri noa ˈtu.—Samuela 2, 7:13-16; Salamo 89:35, 36
◻ 29-33 T.T.: Ua haapapuhia e o Iesu te Huaai, te Mesia, te haava a muri aˈe, e te Arii i maitihia.—Ioane 1:17; 4:25, 26; Ohipa 10:42, 43; Korinetia 2, 1:20; Timoteo 1, 3:16
◻ Ua faaite o Iesu e e mau arii e e mau haava te apiti mai ia ˈna, e e vai atoa mai te mau tavini a te Basileia o te raˈi i nia i te fenua nei, e e riro ta ˈna mau pǐpǐ atoa ei feia poro i te Basileia.—Mataio 5:3-5; 6:10; 28:19, 20; Luka 10:1-9; 12:32; 22:29, 30; Ioane 10:16; 14:2, 3
◻ Ua faaite o Iesu e e haamauhia te Basileia i te hoê tau papu maitai, mai tei haapapuhia mai e te mau tupuraa na te ao nei.—Mataio 24:3-22; Luka 21:24
◻ 36 T.T.: Ua itea mai ia Petero e e riro atoa te feia e ere i te ati Iuda ei feia aiˈa no te Basileia.—Ohipa 10:30-48
◻ 55 T.T.: Ua faataa o Paulo e e faatiahia mai te feia aiˈa o te Basileia ei feia pohe ore e te tahuti ore i te tau o te vairaa mai o te Mesia.—Korinetia 1, 15:51-54
◻ 96 T.T.: Ua faaite o Iesu, tei faatere aˈena i nia i ta ˈna mau pǐpǐ faatavaihia e, to ratou numera hopea, 144 000 ïa.—Ephesia 5:32; Kolosa 1:13-20; Apokalupo 1:1; 14:1-3
◻ 1879 T.T.: Ua faaite Te Pare Tiairaa no Ziona e e matahiti faufaa roa te matahiti 1914 i roto i te tupuraa o te “parau aro moˈa” a te Atua
◻ 1925 T.T.: Ua faataa Te Pare Tiairaa e ua haamauhia te Basileia i te matahiti 1914; e tia ia poro-haere-hia te “parau aro moˈa” no nia i te Basileia.—Apokalupo 12:1-5, 10, 17
[Hohoˈa i te api 15]
Mai to ratou Aratai ra o Iesu, te faaite nei te mau Ite no Iehova i te Basileia o Iehova i te mau taata atoa