E faaaraara mai te faaroo ia rave tatou i te mau ohipa maitatai
1 Ua turai te faaroo ia Noa, ia Mose e ia Rahaba ia ohipa. Ua hamani o Noa i te araka. Ua faarue o Mose i te mau fanaˈoraa taime poto o te hoê oraraa i te aorai o Pharao. Ua huna o Rahaba i na mânu, e ua faaroo oia i ta raua mau faaueraa ia ora to ˈna utuafare. (Heb. 11:7, 24-26, 31) E turai to tatou faaroo ia tatou ia rave i teihea mau ohipa maitatai i teie mahana?
2 Te pororaa: E turai te faaroo ia tatou ia paraparau no nia i to tatou Atua faahiahia roa e te mau faanahoraa ta ˈna e rave ra no to tatou maitai mure ore. (Kor. 2, 4:13) E nehenehe tatou e taiâ ia poro. Na roto râ i ‘te tuuraa ia Iehova i muâ ia tatou,’ e itoitohia tatou, e e ore to tatou taiâ. (Sal. 16:8) E turai ïa to tatou faaroo ia tatou ia faaite i te parau apî maitai i to tatou fetii, to tatou feia tapiri, to tatou mau hoa ohipa, to tatou mau hoa haapiiraa e i te tahi atu mau taata i te mau taime maitatai atoa.—Roma 1:14-16.
3 Te mau putuputuraa: Te haere-tamau-raa tatou i te mau putuputuraa, o te tahi atu ïa ohipa maitai ta te faaroo e turai ia tatou ia rave. E nafea? E haapapu te reira i to tatou tiaturi papu e tei pihai Iesu, na roto i te varua moˈa o te Atua, ia tatou i te mau putuputuraa Kerisetiano. (Mat. 18:20) E faaite te reira i to tatou hinaaro e ‘faaroo i ta te varua e parau i te mau [amuiraa].’ (Apo. 3:6; MN) E haapao maite tatou i te haapiiraa e horoahia mai no te mea te haroaroa ra tatou ma te mata o te faaroo e na Iehova, to tatou Orometua Rahi roa ˈˈe, e haapii ra ia tatou.—Isa. 30:20.
4 Ta tatou mau maitiraa: No te mea ua papu roa ia tatou te mau tupuraa mau aita e itehia ra, e tuu tatou i te mau mea pae varua i te parahiraa matamua i roto i to tatou oraraa. (Heb. 11:1) E pinepine, e tia ia tatou ia rave i te tahi mau haapaeraa materia. No reira, ua patoi te hoê matahiapo i te hoê tiaraa faahiahia roa, o te faahepo hoi ia ˈna ia mairi i te mau putuputuraa, ia atea ê i to ˈna utuafare e ia vaiiho i ta ˈna taviniraa pionie. Oia atoa, e tuu anaˈe i to tatou tiaturi taatoa ia Iehova o te fafau maira, i roto i te Bibilia, e e haapao oia i te mau hinaaro o te feia ‘e mata i te imi i te basileia e ta ˈna parau-tia.’—Mat. 6:33.
5 E itehia iho â te mana puai o te faaroo i nia i to tatou oraraa. Oia mau, mea matauhia to tatou faaroo i te ao nei. (Roma 1:8) No reira, ia faaite tatou taitahi na roto i ta tatou mau ohipa maitatai e mea ora to tatou faaroo!—Iak. 2:26.