Te faaohipa ra anei outou i te buka rairai Titau no te haamata i te mau haapiiraa bibilia?
1 Ua ite anei outou e ia paraparau outou no nia i te Bibilia e te hoê taata aau farii, noa ˈtu e maa taime poto, ma te tamau râ e te matauhia, a hiˈopoa ˈi i te mau tumu parau o te hoê o ta tatou mau papai, te faatere ra ïa outou i te hoê haapiiraa bibilia? O te reira iho â, noa ˈtu e e faaterehia te haapiiraa i te pae opani aore ra na roto i te niuniu paraparau. No te aha e ore ai e faaitoito taa ê i te haamata i te hoê haapiiraa maoti te buka rairai Titau i na avaˈe Me e Tiunu?
2 Te faaineineraa, o te taviri ïa o te manuïaraa: Ia pûpû outou i te buka rairai Titau, ia taa maitai ia outou eaha ta outou e hinaaro e paraparau. Ia rave outou i te hoê farerei-faahou-raa, a feruri i ta outou aparauraa i mahemo. A ui ia outou iho e: ‘Eaha te mau paratarafa o te buka rairai ta ˈu e nehenehe e tapao mai no te faahaere i tera aparauraa i mua e faatere atu ai i te hoê haapiiraa bibilia?’ Ia poro outou na te mau fare, a imi i te mau tumu parau ta te hoê taurearea, te hoê taata paari, te hoê tane aore ra te hoê vahine e anaanatae. A hiˈo faahou i te mau manaˈo e faahitihia ra i roto i te buka rairai e a maiti i te mau manaˈo ta te taata e anaanatae. I muri aˈe i te feruriraa e nafea ia haamata i te tumu parau, a faaohipa ˈtu e rave rahi taime. Tera hoê o te mau taviri o te manuïaraa.
3 Te horoa ra te tumu parau hau o Ta tatou taviniraa i te Basileia no Tenuare 2002 e vau “Mau manaˈo tauturu no te pûpû i te buka rairai Titau.” Te faaite ra te tumu parau tarenihia “Te pûpû-roa-raa ˈtu” e nafea ia faaohipa i te buka rairai no te haamata i te mau haapiiraa. E nehenehe outou e rave faahou i te manaˈo tauturu matamua e e faatano mai teie:
◼ “Ua ite anei oe e i roto tau minuti noa, e noaa mai ia oe te pahonoraa i te hoê uiraa bibilia faufaa? Ei hiˈoraa, no te aha e rave rahi haapaoraa e parau ai e e mau Kerisetiano ratou? Ua ui aˈena anei oe i teie uiraa?” A vaiiho i te taata ia pahono, a hiˈo i te haapiiraa 13 e a hiˈopoa i na paratarafa matamua e piti. Mai te peu e e taime to outou, a faahiti hoê aore ra e piti irava e a tauaparau atu. Ia oti, a taio i te uiraa hopea i nia roa i te api e a parau atu e: “Te haamahitihiti ra te toea o te haapiiraa e pae tuhaa taa ê o te haapaoraa mau. E hinaaro vau e hoˈi mai e tauaparau no nia i te reira e o oe.”
4 A tamau maite: A faaohipa i te mau taime maitatai atoa no te faaite e nafea ia haapii i te Bibilia e te buka rairai Titau. A ani i te haamaitairaa a Iehova. (Mat. 21:22) A tamau maite i roto i ta outou mau tutavaraa, e e ite paha outou i te oaoa e tauturu i te hoê taata ia farii i te parau apî maitai.