O Iehova—E Atua o te faaite mai i te parau moe

“E Atua tei te raˈi o tei faaite mai ïa i te parau moe.”—DANIELA 2:28.

1, 2. (a) Na te aha e faataa ê nei ia Iehova i to ˈna ra Enemi rahi? (b) Nafea teie taa-ê-raa e ite-atoa-hia ˈi i nia i te mau taata?

O IEHOVA, te Atua mana hope e te here o te ao atoa nei, te Poiete otahi roa, oia te Atua paari e te parau-tia. Aita e faufaa e ia huna oia i to ˈna tiaraa, i ta ˈna mau ohipa, aore ra i ta ˈna mau opuaraa. I te taime i faataahia e ana e i maitihia e ana, e faaite mai oia ia ˈna iho. Na te reira e faataa ê nei ia ˈna i to ˈna Enemi, te Diabolo ra o Satani, o te tamata nei i te huna i to ˈna tiaraa mau e i ta ˈna mau opuaraa.

² E mea taa ê roa o Iehova ia Satani, e mai te reira atoa no te feia e haamori nei ia raua. Te tapao o te feia e apee nei ia Satani, o te haavare ïa e te faahua. Te rave nei ratou e ia manaˈohia e e feia maitatai ratou, area ra, te rave nei ratou i te mau ohipa o te pouri. Ua parauhia na i te mau Kerisetiano no Korinetia e eiaha ia maere i teie huru tupuraa. “E aposetolo haavare hoi te reira, e rave ohipa haavare ïa, i te faahua aposetoloraa na te Mesia ia ratou iho. Eita hoi e maerehia; o Satani hoi tei faahua melahi atoa ia ˈna iho no te maramarama.” (Korinetia 2, 11:13, 14) I to ratou aˈe pae, o te Mesia te Aratai o te mau Kerisetiano. I to ˈna parahiraa mai i nia i te fenua nei, ua faahohoˈa oia ma te tia roa i te huru iho o to ˈna Metua, te Atua ra o Iehova. (Hebera 1:1-3) No reira, na roto i te apeeraa i te Mesia, te pee ra ïa te mau Kerisetiano i te huru o Iehova, te Atua parau mau, te huna ore, e te maramarama. Aita ˈtura e faufaa ia huna ratou i to ratou tiaraa, i ta ratou mau ohipa, aore ra i ta ratou mau opuaraa.—Ephesia 4:17-19; 5:1, 2.

3. Nafea tatou ia pahono i te faahaparaa ra e, ua faahepohia te feia e riro mai nei ei Ite no Iehova, ia faaô i roto i te hoê “pǔpǔ faaroo amaha huna”?

³ I te taime o ta ˈna i ite e tera te taime maitai aˈe, te faaite nei Iehova i te mau haamaramaramaraa no nia i ta ˈna mau opuaraa e no nia i te tau a muri aˈe o tei ore i itehia na mua ˈˈe e te taata nei. I roto i teie auraa oia e riro ai ei Atua o te faaite mai i te parau moe. No reira, te titau-manihini-hia nei te taata e hinaaro nei e tavini ia ˈna—oia mau te faaitoito-ru-hia nei ratou—ia haapii i teie mau haamaramaramaraa i faaitehia mai. Ua faaite te hoê maimiraa i ravehia i te matahiti 1994 ra, i nia hau atu i te 145 000 mau Ite no Iehova i roto i te hoê fenua no Europa e, i roto i te faito au noa, na ratou tataitahi iho i tuatapapa i te mau haapiiraa a te mau Ite no Iehova i roto i te maororaa e toru matahiti hou ratou i maiti ai e riro mai ei Ite. Ua rave ratou i teie opuaraa ma to ratou iho tiamâraa ia maiti, ma te ore ratou i faahepohia. E ua tamau noa ratou i te fanaˈo i te tiamâraa ia maiti e ia ohipa. Ei hiˈoraa, no te mea e aita te tahi pae i farii i te mau ture morare teitei i haamauhia no te mau Kerisetiano, ua faaoti ratou i muri iho e aita ratou e hinaaro faahou ra e riro ei Ite. Te mea anaanatae râ, i roto i na matahiti e pae i mairi aˈenei, e rave rahi o teie mau taata e Ite ratou na mua ˈˈe, o tei rave i te mau taahiraa avae no te amuimui faahou mai e no te ohipa faahou ei mau Ite.

4. Eaha te mea o te ore e tia ia haafeaa i te mau Kerisetiano haapao maitai, e no te aha?

⁴ Parau mau, aita te mau taata atoa e Ite ratou na mua ˈˈe, e hoˈi pauroa mai nei, e te vai ra i rotopu ia ratou vetahi o tei fanaˈo na i te mau tiaraa tiaau i roto i te amuiraa kerisetiano. E ere i te mea maere inaha, ua taiva atoa te hoê o te mau pǐpǐ piri roa ˈˈe a Iesu, te aposetolo ra o Iuda. (Mataio 26:14-16, 20-25) E tumu anei râ te reira no te feaa no nia i te Kerisetianoraa iho? Te faaore ra anei te reira i te manuïa o te mau Ite no Iehova i roto i ta ratou ohipa haapiiraa i te taata? Aita roa ˈtu, mai ta te ohipa taiva a Iuda Isakariota i ore i tapea i te mau opuaraa a te Atua.

E Atua puai hope, e Atua here atoa râ

5. Nafea tatou e ite ai e te here nei o Iehova e o Iesu i te mau taata, e mea nafea to raua faaiteraa i to raua here?

⁵ E Atua here o Iehova. Te tapitapi nei oia no te taata. (Ioane 1, 4:7-11) Noa ˈtu to ˈna tiaraa teitei, mea oaoa na ˈna ia faariro i te taata ei mau hoa no ˈna. No nia i te hoê o ta ˈna mau tavini no tahito ra, te na ôhia ra e: “Ua faaroo Aberahama i te Atua, e i haapaohia ˈtura ei parau-tia na ˈna: e i parauhia mai hoi oia e, e Taua no te Atua.” (Iakobo 2:23; Paraleipomeno 2, 20:7; Isaia 41:8) Mai ta e piti hoa e tufa i te parau huna, aore ra te parau moe, te na reira atoa nei o Iehova e to ˈna mau hoa. I roto i teie nei tuhaa, ua pee o Iesu i te hiˈoraa o to ˈna Metua, no te mea ua faahoa ˈtu oia e ta ˈna mau pǐpǐ e ua tufa ˈtu oia i te parau moe e o ratou. Ua na ô atu oia e: “Eita ˈtura vau e parau atu ia outou e e tavini; aore hoi te tavini i ite i ta to ˈna ra fatu e rave ra; ua parau râ vau ia outou e e taua; ua faaite atu hoi au ia outou i te mau parau atoa ta ˈu i ite i tau Metua ra.” (Ioane 15:15) Te tahoê nei te mau haamaramaramaraa huna, oia hoi te “parau moe,” e vai nei i rotopu ia Iehova, e ta ˈna Tamaiti, e to raua mau hoa, ia ratou na roto i te hoê taairaa no te here e te ati-maite-raa o te ore roa e motu.—Kolosa 3:14.

6. No te aha aita e faufaa e ia huna o Iehova i ta ˈna mau opuaraa?

⁶ Te faaite ra te auraa o te iˈoa ra o Iehova, oia hoi “Na ˈna e faariro,” i to ˈna aravihi no te riro ei mau mea atoa te tia ia ˈna ia riro ia tupu ta ˈna opuaraa. Taa ê atu i te mau taata, aita e faufaa e ia huna o Iehova i ta ˈna mau opuaraa no te mea e mǎtaˈu oia e ia tapea vetahi pae ia ˈna ia faatupu i ta ˈna i opua. E manuïa hoi oia, no reira oia e faaite tahaa ˈi i roto i ta ˈna Parau, te Bibilia, e rave rahi ohipa o ta ˈna e opua ra e faatupu. Ua tǎpǔ oia e: “[Ta ˈu] parau . . . e ore e hoˈi faufaa ore noa mai ia ˈu nei, e tupu râ tei opuahia e au ra; e noaa hoi te mea i faaue atu ai au ra.”—Isaia 55:11.

7. (a) Eaha ta Iehova i tohu i Edene, e mea nafea to Satani haapapuraa e e parau mau ta te Atua? (b) Nafea te parau i roto i te Korinetia 2, 13:8 ia tano i te mau taime atoa?

⁷ I muri noa iho i te orureraa i Edene, ua faaite o Iehova i te mau reni rarahi o te hopea o te aimârôraa e tupu noa nei i rotopu ia ˈna e i to ˈna Enemi ra o Satani. E haaparuparuhia te Huaai a te Atua i tǎpǔhia mai ma te mauiui, e ere râ i te haaparuparuraa tamau, area o Satani ra, i te pae hopea e haaparuparuhia oia e a muri noa ˈtu. (Genese 3:15) I te matahiti 33 T.T., ua haaparuparu mau â te Diabolo i te Huaai, te Mesia ra o Iesu, na roto i te raveraa e ia pohe oia. I reira, ua faatupu ïa o Satani i te Papai e i te hoê â taime, ua haapapu oia e e Atua parau mau o Iehova, noa ˈtu e e ere iho â te reira ta Satani i opua. Na to ˈna riri i te parau mau e i te parau-tia, e tae noa ˈtu to ˈna haerea teoteo e te tatarahapa ore, i aratai ia ˈna ia rave i te mea mau ta te Atua i tohu e e rave oia. Oia mau, e tano te parau i muri nei no te feia atoa e patoi i te parau mau, e tae noa ˈtu ia Satani iho: “Aita roa e mea e tia ia matou ei faaore i te parau mau, area ei faatia i te parau mau.”—Korinetia 2, 13:8.

8, 9. (a) Eaha ta Satani i ite, tera râ, e faataupupu anei teie ite to ˈna i te tupuraa o te mau opuaraa a Iehova? (b) Eaha te faaararaa maramarama maitai ta te feia patoi ia Iehova e tâuˈa ore nei, e no te aha?

⁸ Mai te haamauraahia te Basileia o te Atua i nia i te raˈi ma te itea-ore-hia e te mata taata i te matahiti 1914 ra, ua tupu ïa te Apokalupo 12:12: “E teie nei, a oaoa, e te mau raˈi ra e, e o outou atoa hoi o tei parahi i reira ra. E ati ra hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.” Teie râ, no te mea e ua ite oia e e maa taime poto to ˈna e toe nei, eita anei te reira e turai ia Satani ia taui i to ˈna haerea? Ia taui oia, e farii ïa o Satani e e Atua parau mau o Iehova, e oia te Faatere Mana hope, e o ˈna anaˈe te tia ia haamorihia. Teie râ, aita te Diabolo e hinaaro ra e farii e ua pau oia, noa ˈtu e ua ite papu oia i teie mau mea.

⁹ Te faaite nei o Iehova ma te huna ore e eaha te ohipa e tupu ia haere anaˈe mai te Mesia no te haava i te faanahoraa o te ao a Satani. (Mataio 24:29-31; 25:31-46) I roto i teie nei tuhaa, ua tohu mai ta ˈna Parau no nia i te mau faatere o teie nei ao e: “E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi, mai te vahine hapu ia roohia i te mauiui ra.” (Tesalonia 1, 5:3) Aita te feia e apee nei ia Satani e tâuˈa ra i teie faaararaa maramarama maitai. Ua po to ratou mata no to ratou mafatu ino, e na te reira e tapea ra ia ratou ia tatarahapa i to ratou haerea ino e ia taui i ta ratou mau faanahoraa e ta ratou ravea no te tamata i te faataupupu i te mau opuaraa a Iehova.

10. (a) Ua tupu aˈena te Tesalonia 1, 5:3 i roto i teihea faito, tera râ, eaha te huru o te mau tavini a Iehova? (b) No te aha e patoi rahi atu vetahi mau taata faaroo ore i te mau tavini a te Atua i te tau i mua nei?

¹⁰ Mai te matahiti 1986 mai iho â râ, ta te mau Nunaa Amui i haamau ei Matahiti no te Hau na te Ao nei, ua faahiti rahi te ao nei i te parau no te hau e te ino ore. Ua ravehia te tahi mau taahiraa avae papu no te tamata i te haamau i te hau na te ao nei, e e au ra e ua manuïa rii. Te reira anei te tupuraa hopea roa o teie parau tohu, aore ra e tiai anei tatou i te tahi atu faaiteraa maere i mua nei? Na Iehova ïa e haapapu mai i te taime tano. A tiai noa ˈtu râ, e tia ia tatou ia vai ara noa i te pae varua, “i te tiairaa e te ruraa ˈtu ia tae mai taua mahana o te Atua ra.” (Petero 2, 3:12) A mairi noa ˈi te tau e a faahiti-rahi-hia ˈi te parau no te hau e te ino ore, e patoi rahi atu paha vetahi mau taata o tei ite i teie faaararaa, tera râ, o te maiti e ore e tâuˈa, ma te manaˈo e eita o Iehova, aore ra eita ta ˈna e nehenehe, e faatupu i ta ˈna parau. (A faaau e te Koheleta 8:11-13; Petero 2, 3:3, 4.) Ua ite râ te mau Kerisetiano e e faatupu mau â o Iehova i ta ˈna opuaraa!

Te faaturaraa ma te au i te mau ravea e faaohipahia nei e Iehova

11. Eaha ta Daniela e ta Iosepha i haapii no nia ia Iehova?

¹¹ I te taime a ite ai te Arii ra o Nebukanesa, faatere o te hau Emepera no Babulonia ra, i te hoê moemoeâ ahoaho i moehia e ana, ua ani atura oia i te tauturu. Aita râ ta ˈna mau tahuˈa, mau taata hiˈohiˈo e mau taata tahutahu, i nehenehe e faaite mai e eaha taua moemoeâ ra e i te tatara atoa mai i to ˈna auraa. Area te tavini a te Atua ra o Daniela, ua manuïa oia, noa ˈtu e ua faˈi oioi noa oia e e ere te faaiteraa i te moemoeâ e i to ˈna auraa, no roto mai i to ˈna iho paari. Ua parau o Daniela e: “E Atua tei te raˈi o tei faaite mai ïa i te parau moe, o te faaite mai ïa i te arii ra ia Nebukanesa, i te mau mea e tupu i te mau mahana hopea ra.” (Daniela 2:1-30) Tau senekele na mua ˈtu, ua ite papu atoa o Iosepha, te tahi atu peropheta a te Atua, e o Iehova te Atua o te faaite mai i te parau moe.—Genese 40:8-22; Amosa 3:7, 8.

12, 13. (a) O vai te peropheta rahi roa ˈˈe a Iehova, e no te aha outou e na reira ˈi i te pahono? (b) O vai tei riro i teie nei tau ei mau “tiaau no te parau moe a te Atua ra,” e nafea tatou ia faariro ia ratou?

¹² O Iesu te peropheta rahi roa ˈˈe a Iehova i tavini i nia i te fenua nei. (Ohipa 3:19-24) Ua faataa o Paulo e: “O te Atua, o tei parau riirii mai i mutaa iho, e rave rahi te huru o te parauraa mai i te feia tupuna i te mau peropheta, o tei parau mai ïa ia tatou i teie nei anotau hopea i te Tamaiti, o tei haapaohia e ana ei Fatu no te mau mea atoa nei, e ua hamani hoi oia i na ao atoa nei ia ˈna.”—Hebera 1:1, 2.

¹³ Ua paraparau o Iehova i te mau Kerisetiano matamua na roto i te arai o ta ˈna ra Tamaiti o Iesu, o tei faaite i te mau parau moe a te Atua ia ratou. Ua parau atu o Iesu ia ratou e: “Tei ia outou te maitai ra i te ite i te parau aro o te basileia o te Atua.” (Luka 8:10) Ua faahiti o Paulo i muri aˈe e “e tavini anaˈe [te mau Kerisetiano faatavaihia] no te Mesia, e e tiaau no te parau moe a te Atua ra.” (Korinetia 1, 4:1) I teie nei tau, te tamau noa nei te mau Kerisetiano faatavaihia i te tavini i nia i teie tiaraa, o ratou hoi te pǔpǔ o te tavini haapao maitai e te paari, e mea na roto i to ratou Tino Aratai ratou e horoa ˈi i te maa pae varua i te taime mau ra. (Mataio 24:45-47) Mai te peu e te faatura rahi nei tatou i te mau peropheta i faauruahia mai a te Atua no mutaa ihora, e i te Tamaiti iho â râ a te Atua, eita atoa anei e tia ia tatou ia faatura i te ravea taata ta Iehova e faaohipa nei i teie mahana no te faaiteraa i te mau haamaramaramaraa Bibilia e hiaai-rahi-hia nei e to ˈna nunaa i teie nei tau ati rahi?—Timoteo 2, 3:1-5, 13.

E ohipa huna ore aore ra e ohipa huna?

14. Afea te mau Kerisetiano e rave ai i ta ratou ohipa ma te huna, e ia na reira ratou, te pee ra ïa ratou i to vai hiˈoraa?

¹⁴ I te mea e te faaite nei o Iehova i te mau mea ma te huna ore, te auraa anei e e tia i te mau Kerisetiano i te mau taime atoa e i roto i te mau huru tupuraa atoa, ia faaite i te mau mea atoa o ta ratou i ite? Te pee nei te mau Kerisetiano i te faaueraa ta Iesu i horoa i ta ˈna mau aposetolo oia hoi “ia paari outou mai te ophi ra, e te hapa ore mai te uuairao ra.” (Mataio 10:16) Mai te peu e e parauhia mai ratou e eita ta ratou e nehenehe e haamori i te Atua mai ta to ratou haava manaˈo e faaue maira ia ratou, e tamau noa te mau Kerisetiano i te ‘faaroo i te Atua,’ no te mea ua taa ia ratou e aita to te tahi ravea taata nei e mana no te opani i te haamoriraa a Iehova. (Ohipa 5:29) Ua faaite o Iesu iho i te tanoraa o te reira. Te na ôhia ra e: “E muri aˈera hahaere noa ihora Iesu i Galilea, aita aˈera oia i parahi i Iudea; no te mea te haapǎpâ ra te ati Iuda e taparahi ia ˈna. Te fatata ra te oroa patiaraa tiahapa a te ati Iuda ra. Ua parau atura Iesu ia ratou [to ˈna mau taeae i te pae tino o tei ore i faaroo], . . . A haere outou i taua oroa ra, e ore au e haere vave atu i reira, aore â hoi i tae i to ˈu ra hora mau. E oti aˈera taua parau nei, parahi ihora oia i Galilea. Ia reva râ tana mau taeae ra, haere atoa ˈtura oia i taua oroa ra, aore râ i haere faaite, i haere huna noa.”—Ioane 7:1, 2, 6, 8-10.

E faaite anei aore ra eita?

15. Mea nafea to Iosepha faaiteraa e, i te tahi mau taime, e ohipa aroha ia tapea huna noa i te hoê parau moe?

¹⁵ I roto i te tahi mau tupuraa, e riro te oreraa e faaite i te hoê parau moe, ei ohipa paari e te aroha atoa. Ei hiˈoraa, eaha ta Iosepha, te metua faaamu o Iesu, i rave i to ˈna iteraa e ua hapû o Maria, te vahine i momoˈahia ia ˈna? Te na ôhia ra e: “E taata parau-tia ra tana tane o Iosepha, aore i hinaaro i te faaite hua ia ˈna, manaˈo aˈera râ e haapae huna noa ia ˈna.” (Mataio 1:18, 19) Auê ïa ohipa aroha ore ahiri e ua faahaama oia ia Maria i mua i te taata!

16. Eaha te hopoia a te mau matahiapo, e a te mau melo atoa o te amuiraa, no nia i te mau parau huna?

¹⁶ Eita e tia ia faaite i te mau parau huna o te nehenehe e faatupu i te peapea aore ra i te mauiui, i te mau taata eita e tia ia ratou ia ite. E haamanaˈo noa te mau matahiapo kerisetiano i te reira ia titau-anaˈe-hia ratou ia horoa i te tahi manaˈo tauturu aore ra i te tahi parau tamahanahanaraa na te tahi mau Kerisetiano, aore ra ia titauhia ratou ia aˈo ia ratou no te tahi hara ino i mua ia Iehova. E mea faufaa roa ia faatitiaifarohia teie mau ohipa ia au i te mau Papai; aita e faufaa ia faaite i te mau parau huna i te feia eita e tia ia ratou ia ite, e ohipa aroha ore atoa. Oia mau, eita te mau melo o te amuiraa kerisetiano e tamata i te faahepo i te mau matahiapo ia faaite mai i te tahi mau parau huna, tera râ e faatura ratou i te hopoia a te mau matahiapo e tapea huna noa i te parau moe. Te na ô ra te Maseli 25:9 e: “E parau noa ˈtu oe i ta oe parau i to taata tupu ra, eiaha râ e faˈihia e oe ta ˈna ra parau moe.”

17. No te aha te mau Kerisetiano e tapea ˈi i te mau parau huna i te rahiraa o te mau tupuraa, teie râ, no te aha eita ta ratou e nehenehe e na reira i te mau taime atoa?

¹⁷ E tano atoa teie faaueraa i roto i te utuafare aore ra i rotopu i te mau hoa piri roa. E mea faufaa roa ia tapea i te tahi mau parau huna ia ore te tahi mau peapea ia tupu aore ra ia ore te mau taairaa ia haafifihia. “Mai te mataˈi ra e faapiti, e tupu ai te ûa ra, oia atoa te arero [e faaite i te] parau [moe] ra, e tupu ai te mata riri ra.” (Maseli 25:23; MN) Parau mau, no to tatou taiva ore ia Iehova e i ta ˈna mau faaueraa tumu tia, e tae noa ˈtu no to tatou here i te feia i hapa ra, peneiaˈe e titauhia tatou i te tahi mau taime ia faaite roa ˈtu i te mau metua, i te mau matahiapo kerisetiano, aore ra i te tahi atu feia e mana to ratou, i te tahi parau huna.a Tera râ, i te rahiraa o te mau tupuraa, e tapea huna noa te mau Kerisetiano i te mau parau moe a vetahi ê, ma te paruru i te reira mai te mea e parau moe no nia ia ratou iho.

18. Eaha na huru kerisetiano e toru o te tauturu ia tatou ia faaoti e eaha te parau o ta tatou e faaite aore ra e ore e faaite?

¹⁸ Ei haapotoraa, te pee nei te hoê Kerisetiano i te hiˈoraa o Iehova na roto i te tapea-huna-raa i te tahi mau parau moe mai te peu e e titauhia, ma te faaite atu râ mai te peu e e tia ia faaite. No te faaoti e eaha te parau o ta ˈna e faaite aore ra e ore e faaite, na te haehaa, te faaroo, e te here e aratai ia ˈna. Inaha, na te haehaa e tapea ia ˈna ia faarahi roa ia ˈna iho, ma te tamata i te huti i te ara-maite-raa o vetahi ê i nia ia ˈna, na roto anei i te faaiteraa ˈtu ia ratou i te mau mea atoa o ta ˈna i ite, aore ra na roto i te faatianianiraa ˈtu ia ratou i te tahi mau parau moe o te ore e tia ia ˈna ia faaite. Na te faaroo i roto i te Parau a Iehova e i te amuiraa kerisetiano, e turai ia ˈna ia poro i te mau parau Bibilia i horoahia mai e te Atua, area ra, e haapao maitai oia eiaha e faaite i te mau parau o te nehenehe e haamauiui ia vetahi ê. E, na te here e turai ia ˈna ia faaite ma te huna ore i te mau mea o te faahanahana i te Atua e ta te mau taata e hiaai nei i te ite ia noaa ia ratou te ora. I te tahi aˈe pae, e tapea oia i te mau parau huna inaha, ua ite oia e, i roto i te rahiraa o te mau tupuraa, e riro te faaiteraa i te reira, ei ohipa aroha ore roa.

19. Eaha te haerea o te tauturu ia ite e o vai te mau Kerisetiano mau, e eaha te faahopearaa?

¹⁹ Na teie haerea aifaito e tauturu ia ite e o vai te mau Kerisetiano mau. Eita ratou e huna i te tiaraa o te Atua na roto i te tumâraa i to ˈna iˈoa aore ra i te fariiraa i te haapiiraa miterio e te taa-ore-hia o te Toru Tahi. No roto te mau atua itea ore i te haapaoraa hape, eiaha i te haapaoraa mau. (A hiˈo i te Ohipa 17:22, 23.) Te haafaufaa mau nei te mau Ite faatavaihia a Iehova i te hopoia taa ê e riro ei mau “tiaau no te parau moe a te Atua ra.” Na roto i te faaiteraa i teie mau parau moe ia vetahi ê ma te huna ore, te tauturu nei ratou i te feia mafatu tia ia imi i te auhoaraa e o Iehova.—Korinetia 1, 4:1; 14:22-25; Zekaria 8:23; Malaki 3:18.

[Nota i raro i te api]

Nafea outou ia pahono?

◻ No te aha aita e faufaa e ia huna o Iehova i ta ˈna mau opuaraa?

◻ Te faaite nei o Iehova i ta ˈna mau parau moe ia vai?

◻ Eaha te hopoia a te mau Kerisetiano no nia i te mau parau huna?

◻ Eaha na huru e toru o te tauturu i te mau Kerisetiano ia faaoti e eaha ta ratou e faaite aore ra e ore e faaite?

[Hohoˈa i te api 8, 9]

Te faaite mai nei o Iehova i te parau moe na roto i ta ˈna Parau