Apocalipsis

12 Chiknaj mukʼul señail ta chʼulchan: jtul ants skʼuʼinoj te kʼajkʼale, ay ta yeʼtal yok te ue, ay jun corona ta sjol te yichʼoj 12 ekʼetik. 2 Yikʼoj yal ta schʼujt, sok tulan yak ta aw yuʼun te skʼuxul ta skaj te ya x-ayin* te yale.

3 Chiknaj yan señail ta chʼulchan: chiknaj mukʼul dragón te jich sbonil te bin-utʼil kʼajkʼ te ay jukeb sjol sok lajunchʼix xulub, sok yichʼoj jujun corona ta jujun sjol; 4 la smes koel tal ta sne jun ta yox-xejtʼel te ekʼetik ta chʼulchan, sok la schʼoj koel tal ta balumilal. Te dragón la stejkʼan sba ta stojol te ants te ya x-ayinix* te yale, chapalix yuʼun ya sbikʼbey te yal te ya x-ayine.

5 Ayin* skerem-al te antse, jaʼ te machʼa ya spas ta mantal spisil te nacionetik sok sbaston takʼin. Te skerem-al te antse ikʼot moel ta stojol Dios sok ta stojol te smukʼul naktajib. 6 Te ants an bael ta jochol takin kʼinal te banti chajpanbil yawil yuʼun te Diose sok te banti ya yichʼ makʼlinel 1,260 kʼajkʼal.

7 Sok jajch guerra ta chʼulchan. Te Miguel* sok te chʼul-abatetik yuʼun la yakʼbeyik guerra te dragón. Te dragón sok te j-abatetik yuʼun jaʼnix jich la yakʼbeyik guerra-euk, 8 pero maba juʼ yuʼunik tsalaw,* jich maʼyukix jilel slugarik ta chʼulchan. 9 Jaʼ yuʼun la yichʼ chʼojel koel tal te mukʼul dragón, jaʼ te antiguo chan te Pukuj* sok Satanás sbiil te yak ta sloʼlayel spisil te ants winiketik ta balumilal. La yichʼ chʼojel koel tal ta balumilal sok te j-abatetik yuʼune. 10 Sok la kaʼiy te ay machʼa tulan kʼopoj ta chʼulchan te jich yak ta yalele:

«¡Te Dios kuʼuntik la yakʼix kolel ta stojol te ants winiketik, chiknajix ta ilel te yuʼel, jajchix ta aʼtel te Wentainel* yuʼun sok jajchix ta mantalteswanej te Cristo yuʼune! Melel la yichʼix chʼojel koel tal te machʼa ya slebey smul te kermanotaktik, jaʼ te kʼajkʼal ajkʼabal yak ta slebeyel smulik ta stojol te Dios kuʼuntike. 11 La stsalik ta swenta te schʼichʼel te Jkolel* Tuminchij sok ta swenta te bin la yalbeyik skʼoplale, la slokʼes sba ta yoʼtanik sok maba la xiʼik te lajele. 12 Jaʼ yuʼun, ¡tseʼelukme awoʼtan chʼulchan sok te machʼatik nainemex tey-ae! Pero ¡ayme swokolik te machʼatik nainemik ta balumilal sok ta mar! Melel koix tal te Pukuj* ta atojolik sok bayal yilinba, yuʼun snaʼoj te maʼyukix bayal tiempo yuʼune».

13 Te kʼalal la yil te dragón te la yichʼix chʼojel koel tal ta balumilale, jajch snuts te ants te ayin* jtul skerem-ale. 14 Pero, te ants la yichʼ akʼbeyel xikʼin te schebal xikʼ te mukʼul águila yuʼun ya xwil bael ta jochol takin kʼinal, teynix ta yawil, te banti ya yichʼ makʼlinel oxeb jaʼbil sok olil* te banti namal* ay ta stojol te chane.

15 Te chan la smal lokʼel jaʼ ta ye jich te bin-utʼil mukʼul jaʼ te banti bajt te antse, yuʼun jich ya sjikʼ* jaʼ-a. 16 Pero, te lumkʼinal tal skoltay te antse. La sjam sba te lumkʼinal sok la yuchʼ te mukʼul jaʼ te la smal lokʼel ta ye te dragone. 17 Jich yuʼun, te dragón bayal ilin ta stojol te antse sok bajt yakʼbey guerra te jayebxan jilem stsʼumbal te antse. Jaʼik te machʼatik ya schʼuunbeyik smantal te Diose sok te yichʼoj yaʼtelik ta yalbeyel skʼoplal te Jesuse.