Carta ta stojol te Hebreoetik

12 Jich yuʼun, te bin-utʼil joytaybilotik ta bayal ta tul testigoetik, akʼa kijkitaytik jilel spisil te bin ya smakotik sok te mulil te oranax ya sbechʼotik, mame jkom jbatik ta animal te banti yakotik ta baele, 2 akʼa jtʼojan jsitik ta stojol te Machʼa yichʼoj yaʼtel sok te Machʼa ya slekubtes te schʼuunel koʼtantik, jaʼ te Jesús. Ta swenta te stseʼelil yoʼtan ya sta ta patil, kujch yuʼun te swokol ta teʼ yuʼun wokolil,* maʼyuk skʼoplal la yil te kʼexlal la sta yuʼune, sok la snajkan sba ta swaʼel kʼab te Diose. 3 Nopilana ta awoʼtanik ta stojol te machʼa kujch yuʼun te la yichʼ bolkʼoptayel yuʼun te jmulawiletik te jaʼnix yakik yutsʼinbel sbaik-ae, swenta maba ya xlujbex sok maba ya xchʼay te yip awoʼtanike.

4 Te jaʼexe mato amaloj achʼichʼelik ta stsalel te mulile. 5 Sok chʼayix ta awoʼtanik ta jkʼaxel te tojobtesel la awichʼik akʼbeyel jich te bin-utʼil alnichʼanetik: «Jnichʼan, mame xa apʼajbey te tojobtesel yuʼun te Jehová* sok mame xlaj yip awoʼtan te kʼalal ya stsitsat,* 6 melel te Jehová* ya stojobtes te machʼatik kʼux ta yoʼtan. Jaʼnix jich ya yakʼbey majel te machʼa ya xkʼot jich bin-utʼil snichʼan».

7 Kujchukme awuʼunik te tojobtesel ya awichʼik akʼbeyele, melel te Dios jich ya yilex te bin-utʼil yal snichʼnab. ¿Aybal jtul nichʼanil te maba ya yichʼ tojobtesel yuʼun te state? 8 Pero, teme maba la awichʼik te tojobtesel ini te jpisiltik ay ta jwentatik yichʼel, maba alnichʼanex yuʼun. 9 Jaʼnix jich la kichʼtik ta wenta te tojobtesel la yakʼbotik te jmeʼ jtatike. ¿Mabal kʼaxemuktoxan ya skʼan ya jchʼuunbeytik smantal te jTatik te ya stojobtes jkuxlejaltik ta swenta te schʼul espíritu* yuʼun jich ya xkuxinotik? 10 Melel te jmeʼ jtatik la stojobtesotik jun chebuk kʼajkʼal jich te bitʼil lek la yilik-euke, yan stukel te Dios ya stojobtesotik ta swenta jlekilaltik yuʼun jich chʼultesbilotik ya xkʼootik jich te bin-utʼil stukele. 11 Melelnix-a te ma jmulantik te kʼalal yakotik ta akʼbeyel tojobtesele, melel kʼux ya kaʼiytik.* Pero, ta patil ya xchiknaj te sit te lamalkʼinal sok te bin stojil ta pasel ta stojol te machʼatik la schʼuunik te tojobtesele.

12 Akʼbeyaik yip te akʼabik te lujbenike sok te sjol awakanik te maʼyuk yipike, 13 pasaik toj beetik yuʼun te awokike, yuʼun jich ma xchaʼpitkʼuj lokʼel te banti koxoix aye sok jich ya xlekub-a. 14 Jaʼme xa aleik te bin-utʼil lamal awoʼtanik sok spisil te ants winiketike sok te chʼultesbiluk ya xkʼoexe, teme maʼuke, maʼyuk machʼa ya xjuʼ ya yil te Kajwaltike. 15 Tsajtayame* abaik, mame ayuk jtulukex te maba ya ataik te slekil yoʼtan Dios te ma snujpʼuk ya kichʼtike sok tsajtayame abaik te manchuk ay bin ya xchʼi tal ta awoʼtanik te ay svenenoil, te ya yakʼbey swokol te yantik sok te bayal machʼatik ya sbolobtesbey skʼoplal; 16 sok tsajtayame* abaik te manchuk ay machʼa ta awolilik baem ta yoʼtan spasel mulwej* sok te maʼyuk skʼoplal ta yoʼtan te bintik chʼultesbile, jich te bin-utʼil te Esaú te la sjel ta jpajchnax weʼelil te bitʼil jaʼ ba-alale. 17 Melel anaʼojik te kʼalal la skʼan la yichʼ te bendicione, la yichʼ pʼajel. Manchukme bayal la yokʼetay sba ta sjeltayel te bin kʼot ta pasele,* maʼyuk bin lokʼix yuʼun-a.

18 Melel te jaʼexe maba noptsajemex* ta stojol te bin ya xjuʼ ta pikel sok te ya xjuʼ ya xkʼajkʼe, ni jaʼuk ta ijkʼal tokal ni jaʼuk ta mero ijkʼal kʼinal sok ta tulan yikʼal jaʼal 19 ni jaʼuk ta skʼop jun trompeta ni jaʼuk te machʼa ya xkʼopoj. Kʼalal te lum la yaʼiybey skʼop te machʼa kʼopoje, la skʼanik wokol te manchuk ya xkʼoponotikxane. 20 Melel maba kujch yuʼunik te kʼalal la yaʼiyik te mantalil ini: «Manchukme jkojt chambalam ya stekʼ te witse, yame skʼan ya yichʼ chʼojel ta ton». 21 Kʼax xiʼbantik sba te bin la yil te Moisés te jich la yal: «Yakon ta nijkel yuʼun xiwel». 22 Pero, te jaʼexe noptsajemex* ta wits Sion sok ta jpam mukʼul lum yuʼun te kuxul Dios —jaʼ te Jerusalén te ay ta chʼulchan— ta stojol bayal ta mil chʼul-abatetik 23 te stsoboj sbaik ta spisilik ta mukʼul tsoblej ta stojol te congregación yuʼun te ba-alnichʼanetik te tsʼibaybil sbiilik ta chʼulchan ta stojol te Dios —te Juez kuʼuntik ta jpisiltik—, ta stojol te machʼatik yakik ta kuxinel jich te bin-utʼil ya skʼan te chʼul espíritu* te yichʼojik lekubtesele, 24 ta stojol te Jesús te tejkʼanbil ta kʼop ta swenta te yachʼil chapbilkʼope sok ta stojol te chʼichʼ te la yichʼ tsijtsinel, te jaʼ kʼax lekxan-a te bin-utʼil te schʼichʼel te Abel.

25 Tsajtayame* abaik te manchuk ya amak achikinik ta yaʼiybeyel skʼop te machʼa yak ta kʼope. Melel teme maba kolik te machʼatik maba la skʼan la yaʼiybeyik skʼop te machʼa la yakʼ ta naʼel te tojobtesel yuʼun te Dios liʼ ta balumilal, ¿jaʼuktobal ya xkolotikix-a teme maba ya kaʼiybeytik skʼop te machʼa yak ta kʼop kʼalalto ta chʼulchan? 26 Ta yorail-abi la syukʼ sba te balumilal ta swenta te skʼope, pero ta ora ini jich jamal yaloj: «Ta junxan buelta ma jaʼuknax ya jyukʼ te balumilale, jaʼnix jich ya jyukʼ-euk te chʼulchane». 27 Te bin ya skʼan ya yal te kʼopil «ta junxan buelta» jaʼ te ya yichʼ lajinel te bintik ya syukʼ sba —jaʼ te bintik pastiklanbile— yuʼun jaʼnax ya xjil te bintik ma syukʼ sbae. 28 Jich te bitʼil ya kichʼtik jun Wentainel* te maba ya syukʼ sbae, akʼame kichʼtikxan te slekil yoʼtan Dios te ma snujpʼuk ya kichʼtike, yuʼun jich ya jpastik te chʼul aʼtelil yuʼun te Dios jich te bin-utʼil ya smulan stukele, sok ta swenta xiʼel* te Dios sok te spisiluk koʼtantik ya kichʼtik ta mukʼe. 29 Melel te Dios kuʼuntik jich kʼoem te bin-utʼil kʼajkʼ te ya xlajinwane.