¿Bin señail ya yakʼ ta ilel te ayotikix ta «slajibal cʼahcʼal»?

Te Biblia ya yal te ay bintik ya xkʼot ta pasel sok ya xchiknaj ta stalel te ants winiketik te ya skoltayotik ta snaʼel te ayotikix ta «slajibal cʼahcʼal». (Mateo 24:3). Te Biblia ya yakʼbey sbiilin «slajibal cʼahcʼal» (2 Timoteo 3:1; Daniel 8:19).

Te Biblia ya yal te bayal bintik jun-nax ya xkʼot ta pasel te ya yakʼ ta ilel te ayotikix ta slajibal kʼajkʼal (Lucas 21:7). Kiltik cheʼoxebuk:

Guerraetik ta bayuk. Te Jesús la yal te «ya xhahch scontrahin sbahic nacionetic, soc ya scontrahin sbahic te jujuchahp banti scuentahinejic» (Mateo 24:7). Te señail te ya yakʼ ta ilel te Apocalipsis 6:4 ta swenta te guerra jaʼ jtul te machʼa kajal ta caballo te akʼbot yip ta slajinel te lamalkʼinal ta Balumilal.

Wiʼnal. Te Jesús la yal te «ya xtal wiʼnal» (Mateo 24:7). Te Apocalipsis jaʼnix jich ya yal te ay yan machʼa kajal ta caballo te ya yakʼ xchiknaj bayal wiʼnal ta swolol Balumilal (Apocalipsis 6:5, 6).

Tulan nijkel. Te Jesús la yal te ya xtal tulan «nihquel ta bayuc», jaʼ-abi ya skʼan ya yal te ya xchiknaj ta swolol Balumilal (Mateo 24:7; Lucas 21:11). Te tulan nijkel ya xkʼaxe bayal ya xjinawan jilel sok bayal machʼatik ya xlaj yuʼun sok maʼyuk jich chiknajem tal ta namey kʼinal.

Tulan chamel. Te Jesús la yal te ya xtal «tulan chamel» (Lucas 21:11).

Ya xpʼol te mulil. Manchukme nameynanix ay-a te utsʼinwanej, te Jesús la yal te ta slajibal kʼajkʼal ya xpʼolxan te bintik ma lek ta pasel (Mateo 24:12).

Yakik ta sjinel te Balumilale. Te Apocalipsis 11:18 ya yal te ay machʼatik yakik ta sjinel te Balumilale. Kʼalal te Biblia ya yalbey skʼoplal te ya sjinik te Balumilal, ma jaʼuknax ya yalbey skʼoplal te ya x-utsʼinwanik sok te ya xloʼlaywanike jaʼnix jich ya skʼan ya yal te yakik ta slajinel te lumkʼinale.

Ya xtoy schopolil te ants winiketike. Te Biblia jich ya yal ta swenta te stalel te ants winiketike: «Ma snaʼic yalel wocol, chopolic, [...] mayuc perdón ta yoʼtanic, jlehawetic ta cʼop, ma scom sbahic, jʼutsʼinwanejetic, ihlaybil yuʼunic te bintic lec, jʼacʼawetic ta cʼabal, ma snaʼic stsahtayel sbahic, stuquel nax mucʼ ya scuy sbahic» (2 Timoteo 3:1-4). Te Biblia ya yal te ya xpʼol te chopolil te jich kʼax chujkultik sba ta sitintayele.

Maba jun ayikix te familiaetike. Te 2 Timoteo 3:2, 3 ya yal: Te ants winiketik «mayuc scʼuxul yoʼtanic» ta stojol te sfamiliaik sok te alnichʼanetik «ya sc’axuntaybeyic smandar sme’static» (2 Timoteo 3:2, 3).

Te ants winiketik maʼyukix skʼuxul yoʼtanik ta stojol te Diose. Te Jesús la yal te «bayel machʼatic ya xpehcʼaj te scʼuxul yoʼtanique», jaʼ-abi ya skʼan ya yal te jteb ma spisil te ants winiketik maba kʼux ya yaʼiyikix ta yoʼtanik te Diose (Mateo 24:12). Jaʼnix jich te 2 Timoteo 3:4 ya yal te «cʼax hich cʼux ta yoʼtanic a te bintic ay ta acʼoltayel ta bahlumilal te bin utʼil cʼux ta yoʼtanic te Diose».

Maba smelelil ya yichʼik ta mukʼ te Diose. Ta 2 Timoteo 3:5, te Biblia ya yal te yakik ta schʼuunel Dios yilel te ants winiketik, pero ma jichuk ya chiknaj ta ilel ta swenta te bin ya spasik ta skuxlejalik.

Ya xkʼotxan lek ta oʼtanil te albilkʼopetik yuʼun te Biblia. Te libro yuʼun Daniel ya yal te ya xpʼol te bintik ay ta naʼel ta «yorahil slajibal» kʼajkʼal, jich bitʼil te albilkʼopetik ta swenta te slajibal kʼajkʼal (Daniel 12:4).

Yame yichʼ cholel te skʼop Dios ta swolol Balumilal. Te Jesús jich la yal: «Ya me xpuhc ta halel ta swohlol bahlumilal sc’oblal te lec yachʼil cʼop yuʼun te cuentahinel yuʼun Dios» (Mateo 24:14).

Te ants winiketik ya xlabanwanik sok maʼyuk skʼoplal ta yoʼtanik te bin yak ta kʼoel ta pasel. Te Jesús la yal te jteb ma spisil te ants winiketik ma xyichʼik ta wenta te bintik yak ta kʼoel ta pasel te ya yakʼ ta ilel te ayotikix ta kuxinel ta slajibal kʼajkʼal (Mateo 24:37-39). Ma jaʼuknax-abi, te 2 Pedro 3:3, 4 ya yal te ya xlabanwanik te ants winiketik sok ya yalik te maʼyuk bin ya yakʼ ta ilel te señailetik-abi.

Ya xkʼot ta pasel spisil te albilkʼopetike. Te Jesús la yal te jun-nax ya xkʼot ta pasel spisil te albilkʼopetik ta slajibal kʼajkʼal (Mateo 24:33).

Ay. Ta swenta te bintik yakʼ ta kʼoel ta pasel sok te bin ya yal te Biblia chikan ta ilel te ayotikix ta slajibal kʼajkʼal te jajch tal ta jaʼbil 1914, jaʼ te kʼalal jajch te Primera Guerra Mundial. Ilawil te video sok ilawil bin-utʼil te bintik yak ta kʼoel ta pasel ya yakʼ ta ilel te ayotikix ta kuxinel ta slajibal kʼajkʼal:

Ta 1914, jajch ta aʼtel te Wentainel yuʼun Dios ta chʼulchan, te bin nail la spas jaʼ te la schʼoj koel tal te Satanás sok te pukujetik yuʼune. Jaʼto tal-abi, jaʼnax yakʼoj te ya x-utsʼinwanik liʼ ta Balumilal (Apocalipsis 12:7-12). Ta swenta te chopol stalel te ants winiketike ya yakʼ ta ilel te jaʼ wentainbilik yuʼun te Pukuje, jaʼ yuʼun te slajibal kʼajkʼal kʼax wokol sok tulan ta sitintayel (2 Timoteo 3:1).

Bayal ants winiketik ya smel yoʼtanik yuʼun te bintik yak ta kʼoel ta pasele. Jaʼnix jich bayal machʼatik ya smel yoʼtanik yuʼun te yak ta batsʼejel te bitʼil ay te kuxinele. Jaʼnix jich ya xiʼik teme joʼotiknix ya xjajch jmil jbatike.

Jaʼnix jich ay ants winiketik te manchukme ya smel yoʼtanik yuʼun te bin yak ta kʼoel ta pasel ay bin lek yakik ta smaliyel. Melel snaʼojik te jaʼnax te Wentainel yuʼun te Dios ya xbajt slajin spisil te wokoliletike (Daniel 2:44; Apocalipsis 21:3, 4). Jich te bitʼil yakik ta smaliyel sok slamalil yoʼtanik te ya xkʼot ta pasel te bin jamal yaloj te Diose ya yakʼ smukʼul yoʼtanik ta swenta te bin la yal te Jesús: «Te machʼa ya xcuhch yuʼun cʼalal ta slajibal, ha me ya xcol stuquel» (Mateo 24:13; Miqueas 7:7).