یسوع مسیح گدھی کے بچے پر سوار ہیں اور بڑی شان سے یروشلیم میں داخل ہو رہے ہیں۔‏

مسیح کے بارے میں جو پیش‌گوئیاں کی گئیں، کیا اُن سے یہ ثابت ہوتا ہے کہ یسوع ہی مسیح تھے؟‏

پاک کلام کا جواب

جی ہاں۔ جب یسوع زمین پر تھے تو اُن پر وہ بہت سی پیش‌گوئیاں پوری ہوئیں جو ”‏ممسوح فرمانروا“‏ یعنی مسح کیے ہوئے رہنما کے بارے میں تھیں۔ اِس رہنما نے ”‏دُنیا کا نجات‌دہندہ“‏ بننا تھا۔ (‏دانی‌ایل 9‏:‏25‏؛‏ 1‏-‏یوحنا 4‏:‏14‏)‏ یسوع کے مُردوں میں سے جی اُٹھنے کے بعد بھی اُن پر وہ پیش‌گوئیاں پوری ہوتی رہیں جو مسیح کے بارے میں کی گئی تھیں۔‏

لفظ ”‏مسیح“‏ کا کیا مطلب ہے؟‏

لفظ ”‏مسیح“‏ کے لیے عبرانی اور یونانی زبان میں جو الفاظ اِستعمال ہوئے ہیں، اُن دونوں کا مطلب ہے:‏ ”‏مسح کِیا ہوا۔“‏ لہٰذا ”‏یسوع مسیح“‏ کا مطلب ہے:‏ ”‏یسوع جنہیں مسح کِیا گیا۔“‏

قدیم زمانے میں جب کسی شخص کو کسی خاص عہدے پر مقرر کِیا جاتا تھا تو اکثر اُسے مسح کرنے کے لیے اُس کے سر پر تیل ڈالا جاتا تھا۔ (‏احبار 8‏:‏12‏؛‏ 1‏-‏سموئیل 16‏:‏13‏)‏ خدا نے یسوع کو مسیح کے طور پر مقرر کِیا جو کہ ایک بہت ہی خاص عہدہ تھا۔ (‏اعمال 2‏:‏36‏)‏ البتہ خدا نے یسوع کو تیل سے نہیں بلکہ اپنی پاک روح سے مسح کِیا۔—‏متی 3‏:‏16‏۔‏

مسیح کے بارے میں جو پیش‌گوئیاں کی گئیں، کیا وہ ایک سے زیادہ لوگوں پر پوری ہونی تھیں؟‏

نہیں۔ جس طرح ایک شخص کی اُنگلیوں کے نشان سے صرف اُسی کی پہچان ہوتی ہے اُسی طرح بائبل میں مسیح کے بارے میں جو پیش‌گوئیاں کی گئیں، وہ صرف ایک ہی شخص پر پوری ہونی تھیں۔ لیکن پاک کلام میں اِس بات سے آگاہ کِیا گیا ہے کہ ”‏جھوٹے مسیح اور جھوٹے نبی اُٹھ کھڑے ہوں گے اور بڑے بڑے معجزے اور نشانیاں دِکھا کر چُنے ہوئے لوگوں کو بھی گمراہ کرنے کی کوشش کریں گے۔“‏—‏متی 24‏:‏24‏۔‏

کیا مسیح مستقبل میں ظاہر ہوگا؟‏

نہیں۔ پاک کلام میں پیش‌گوئی کی گئی تھی کہ مسیح بنی‌اِسرائیل کے بادشاہ داؤد کی اولاد سے ہوگا۔ (‏زبور 89‏:‏3‏، 4‏)‏ البتہ یہودی خاندانوں کے نسب‌نامے غالباً اُس وقت تباہ ہو گئے جب رومی فوج نے 70ء میں یروشلیم پر حملہ کِیا۔‏a اُس کے بعد سے کسی بھی شخص کے لیے یہ ثابت کرنا ناممکن ہو گیا کہ آیا اُس کا تعلق داؤد کے شاہی گھرانے سے ہے یا نہیں۔ لیکن یسوع مسیح کے زمانے میں اِن نسب‌ناموں کے ریکارڈ موجود تھے۔ اِسی لیے یسوع کے دُشمن تک اُن کی اِس بات پر اُنگلی نہیں اُٹھا سکتے تھے کہ وہ داؤد کی اولاد سے ہیں۔—‏متی 22‏:‏41‏-‏46‏۔‏

پاک کلام میں مسیح کے بارے میں کتنی پیش‌گوئیاں کی گئی ہیں؟‏

یہ بات ٹھیک طور سے نہیں کہی جا سکتی کہ پاک کلام میں مسیح کے بارے میں کُل کتنی پیش‌گوئیاں کی گئی ہیں۔ اِس کی ایک وجہ یہ ہے کہ بائبل میں مسیح کے حوالے سے جو پیش‌گوئیاں کی گئی ہیں، اُنہیں گننے کا طریقہ فرق فرق ہے۔ مثال کے طور پر یسعیاہ 53‏:‏2‏-‏7 میں مسیح کے بارے میں مختلف باتیں بتائی گئی ہیں۔ کچھ اِسے ایک پیش‌گوئی خیال کرتے ہیں جبکہ کچھ اِسے الگ الگ پیش‌گوئیوں کے طور پر گنتے ہیں۔‏

مسیح کے بارے میں کی گئی کچھ پیش‌گوئیاں جو یسوع پر پوری ہوئیں

پیش‌گوئی	یہاں لکھی ہے	تکمیل
وہ ابراہام کی نسل سے آئے گا	پیدایش 22‏:‏17‏، 18	متی 1‏:‏1
وہ ابراہام کے بیٹے اِضحاق کی اولاد سے ہوگا	پیدایش 17‏:‏19	متی 1‏:‏2
وہ اِسرائیل کے قبیلے یہوداہ سے ہوگا	پیدایش 49‏:‏10	متی 1‏:‏1‏،‏ 3
اُس کا تعلق بادشاہ داؤد کے شاہی گھرانے سے ہوگا	یسعیاہ 9‏:‏7	متی 1‏:‏1
وہ ایک کنواری لڑکی سے پیدا ہوگا	یسعیاہ 7‏:‏14	متی 1‏:‏18‏،‏ 22‏، 23
اُس کی پیدائش بیت‌لحم میں ہوگی	میکاہ 5‏:‏2	متی 2‏:‏1‏،‏ 5‏، 6
اُس کا نام عمانوئیل رکھا جائے گاb	یسعیاہ 7‏:‏14	متی 1‏:‏21‏-‏23
غریب گھرانے میں پرورش	یسعیاہ 53‏:‏2	لُوقا 2‏:‏7
اُس کی پیدائش کے بعد چھوٹے لڑکوں کو قتل کر دیا جائے گا	یرمیاہ 31‏:‏15	متی 2‏:‏16‏-‏18
اُسے مصر سے بلا‌یا جائے گا	ہوسیع 11‏:‏1	متی 2‏:‏13‏-‏15
وہ ناصری کہلائے گاc	یسعیاہ 11‏:‏1	متی 2‏:‏23
ایک شخص اُس کے لیے راہ تیار کرے گا	ملاکی 3‏:‏1	متی 11‏:‏7‏-‏10
وہ 29ء میں مسیح کے طور پر مسح کِیا جائے گاd	دانی‌ایل 9‏:‏25	متی 3‏:‏13‏-‏17
خدا اُسے اپنا بیٹا کہے گا	زبور 2‏:‏7	اعمال 13‏:‏33‏، 34
اُس کے دل میں خدا کے گھر کے لیے جوش بھڑک اُٹھے گا	زبور 69‏:‏9	یوحنا 2‏:‏13‏-‏17
وہ دوسروں کو خوشی کی خبر دے گا	یسعیاہ 61‏:‏1	لُوقا 4‏:‏16‏-‏21
اُس کے مُنادی کرنے کی وجہ سے گلیل کے لوگوں پر بڑی روشنی چمکے گی	یسعیاہ 9‏:‏1‏، 2	متی 4‏:‏13‏-‏16
وہ موسیٰ کی طرح معجزے کرے گا	اِستثنا 18‏:‏15	اعمال 2‏:‏22
وہ موسیٰ کی طرح لوگوں کو خدا کی باتیں بتائے گا	اِستثنا 18‏:‏18‏، 19	یوحنا 12‏:‏49
وہ بہت سے بیماروں کو شفا دے گا	یسعیاہ 53‏:‏4	متی 8‏:‏16‏، 17
وہ اپنی بڑائی نہیں کرے گا	یسعیاہ 42‏:‏2	متی 12‏:‏17‏،‏ 19
وہ تکلیف میں مبتلا لوگوں کے لیے ہمدردی ظاہر کرے گا	یسعیاہ 42‏:‏3	متی 12‏:‏9‏-‏20‏؛‏ مرقس 6‏:‏34
وہ خدا کے اِنصاف کو ظاہر کرے گا	یسعیاہ 42‏:‏1‏،‏ 4	متی 12‏:‏17‏-‏20
وہ لوگوں کو بہترین مشورے دے گا	یسعیاہ 9‏:‏6‏، 7	یوحنا 6‏:‏68
وہ خدا کا نام ظاہر کرے گا	زبور 22‏:‏22	یوحنا 17‏:‏6
وہ مثالوں کے ذریعے تعلیم دے گا	زبور 78‏:‏2	متی 13‏:‏34‏، 35
وہ رہنما ہوگا	دانی‌ایل 9‏:‏25	متی 23‏:‏10
بہت سے لوگ اُس پر ایمان نہیں لائیں گے	یسعیاہ 53‏:‏1	یوحنا 12‏:‏37‏، 38
بہت سے لوگ اُس سے ٹھوکر کھائیں گے	یسعیاہ 8‏:‏14‏، 15	متی 21‏:‏42‏-‏44
لوگ اُسے قبول نہیں کریں گے	زبور 118‏:‏22‏، 23	اعمال 4‏:‏10‏، 11
اُس سے بِلاوجہ نفرت کی جائے گی	زبور 69‏:‏4	یوحنا 15‏:‏24‏، 25
وہ گدھی کے بچے پر سوار ہو کر بڑی شان سے یروشلیم میں داخل ہوگا	زکریاہ 9‏:‏9	متی 21‏:‏4‏-‏9
بچے اُس کی بڑائی کریں گے	زبور 8‏:‏2	متی 21‏:‏15‏، 16
وہ یہوواہ کے نام سے آئے گا	زبور 118‏:‏26	یوحنا 12‏:‏12‏، 13
اُس کا ایک بھروسے‌مند دوست اُسے دھوکا دے گا	زبور 41‏:‏9	یوحنا 13‏:‏18
اُسے 30 سِکوں کے لیے دُشمنوں کے ہاتھ بیچا جائے گاe	زکریاہ 11‏:‏12‏، 13	متی 26‏:‏14‏-‏16‏؛‏ 27‏:‏3‏-‏10
اُس کے دوست اُسے چھوڑ کر بھاگ جائیں گے	زکریاہ 13‏:‏7	متی 26‏:‏31‏،‏ 56
جھوٹے گواہ اُس کے خلاف گواہی دیں گے	زبور 35‏:‏11	متی 26‏:‏59‏-‏61
وہ اپنے مخالفوں کے اِلزامات کا کوئی جواب نہیں دے گا	یسعیاہ 53‏:‏7	متی 27‏:‏12‏-‏14
اُس پر تھوکا جائے گا	یسعیاہ 50‏:‏6	متی 26‏:‏67‏؛‏ 27‏:‏27‏،‏ 30
اُس کے سر پر مارا جائے گا	میکاہ 5‏:‏1	مرقس 15‏:‏19
اُسے کوڑے لگوائے جائیں گے	یسعیاہ 50‏:‏6	یوحنا 19‏:‏1
وہ اپنے دُشمنوں کی مار کا جواب نہیں دے گا	یسعیاہ 50‏:‏6	یوحنا 18‏:‏22‏، 23
حکمران اُس کے خلاف سازش کریں گے	زبور 2‏:‏2	لُوقا 23‏:‏10‏-‏12
اُس کے ہاتھوں اور پیروں میں کیل ٹھونک کر اُسے سُولی دی جائے گی	زبور 22‏:‏16	متی 27‏:‏35‏؛‏ یوحنا 20‏:‏25
لوگ اُس کے کپڑوں پر قُرعہ ڈالیں گے	زبور 22‏:‏18	یوحنا 19‏:‏23‏، 24
اُسے گُناہ‌گاروں میں شمار کِیا جائے گا	یسعیاہ 53‏:‏12	متی 27‏:‏38
اُس کی بے‌عزتی کی جائے گی	زبور 22‏:‏7‏، 8	متی 27‏:‏39‏-‏43
وہ گُناہ‌گار اِنسانوں کے لیے تکلیف سہے گا	یسعیاہ 53‏:‏5‏، 6	1‏-‏پطرس 2‏:‏23‏-‏25
موت کی گھڑی میں خدا اُسے اُس کے حال پر چھوڑ دے گا	زبور 22‏:‏1	مرقس 15‏:‏34
اُسے سرکہ اور کڑوی مے دی جائے گی	زبور 69‏:‏21	متی 27‏:‏34
مرنے سے پہلے اُسے پیاس محسوس ہوگی	زبور 22‏:‏15	یوحنا 19‏:‏28‏، 29
وہ اپنا دم خدا کے سپرد کر دے گا	زبور 31‏:‏5	لُوقا 23‏:‏46
وہ اپنی جان دے دے گا	یسعیاہ 53‏:‏12	مرقس 15‏:‏37
وہ گُناہوں کو مٹانے کے لیے فدیہ ادا کرے گا	یسعیاہ 53‏:‏12	متی 20‏:‏28
اُس کی ایک بھی ہڈی توڑی نہیں جائے گی	زبور 34‏:‏20	یوحنا 19‏:‏31‏-‏33‏،‏ 36
اُس کے جسم کو چھیدا جائے گا	زکریاہ 12‏:‏10	یوحنا 19‏:‏33‏-‏35‏،‏ 37
اُس کی قبر دولت‌مند لوگوں کی قبروں میں ہوگی	یسعیاہ 53‏:‏9	متی 27‏:‏57‏-‏60
خدا اُسے مُردوں میں سے زندہ کرے گا	زبور 16‏:‏10	اعمال 2‏:‏29‏-‏31
غدار رسول کی جگہ کسی اَور کو رسول بنایا جائے گا	زبور 109‏:‏8	اعمال 1‏:‏15‏-‏20
وہ خدا کے دہنے ہاتھ بیٹھے گا	زبور 110‏:‏1	اعمال 2‏:‏34‏-‏36

a میکلن‌ٹاک اور سٹرانگ کا ”‏سائیکلوپیڈیا“‏ میں لکھا ہے:‏ ”‏اِس بات میں کوئی شک نہیں کہ یہودی قبیلوں اور خاندانوں کے ریکارڈ یروشلیم کی تباہی کے وقت تباہ ہوئے تھے نہ کہ اِس سے پہلے۔“‏

b عبرانی نام ”‏عمانوئیل“‏ کا مطلب ہے:‏ ”‏خدا ہمارے ساتھ ہے“‏ جو کہ مسیح کے طور پر یسوع کے کردار پر پورا اُترا۔ یسوع نے زمین پر جو کام کیے، اُن سے یہ ثابت ہوا کہ خدا اپنے بندوں کے ساتھ ہے۔—‏لُوقا 2‏:‏27‏-‏32‏؛‏ 7‏:‏12‏-‏16‏۔‏

c لفظ ”‏ناصری“‏ شاید اُس عبرانی لفظ سے آیا ہے جس کا مطلب ہے:‏ ”‏شاخ۔“‏

d اِس بارے میں مزید جاننے کے لیے کہ بائبل میں یہ کیسے ظاہر کِیا گیا ہے کہ مسیح 29ء میں آئے گا، مضمون ”‏مسیحا کے آنے کے بارے میں دانی‌ایل نبی کی پیشینگوئی‏“‏ کو دیکھیں۔‏

e یہ پیش‌گوئی زکریاہ کی کتاب میں ملتی ہے۔ لیکن متی نے اپنی اِنجیل میں کہا کہ ’‏یرمیاہ نبی کی بات پوری ہوئی۔‘‏ (‏متی 27‏:‏9‏)‏ لگتا ہے کہ یرمیاہ کی کتاب کو کبھی کبھی بائبل کے اُس حصے میں پہلے گنا جاتا تھا جسے ”‏نبیوں کی صحیفے“‏ کہا جاتا تھا۔ (‏لُوقا 24‏:‏44‏)‏ لہٰذا متی نے جب ”‏یرمیاہ“‏ کا حوالہ دیا تو لگتا ہے کہ وہ نبیوں کی تمام کتابوں کا ذکر کر رہے تھے جن میں زکریاہ کی کتاب بھی شامل تھی۔‏