Apẹndisi

Kerẹ ọmiọvwọn, wọ guọnọ vwẹ ukẹcha kẹ emọ wẹn vwo vwo ẹguọnọ ri Jihova ji vwẹ oma rayen kpahotọ vwọ kẹ. Die wo se ru vwọ chọn ayen uko vwo muegbe rẹ omaebrophiyame? Ọke vọ yen ayen che vwo muegbe vwọ kẹ owọẹjẹ ọghanghanre nana?

Jesu da vuẹ idibo rọyen: “We re gbe idibo rẹ ihworakpọ na ejobi, we bru ayen phiyọ ame.” (Mat. 28:19, NW) Kirobo ra ghwa mrẹ na, orọnvwọn ọvo kiriguo ra guọnọ mie ihwo ri che bromaphiyame, ọyen ọ rẹ ayen vwọ dia idibo, kọyen ohwo ro vwo ẹruọ ji vwo imuẹro kpahen iyono ri Kristi, ọ me rha je yan nene ayen kpẹkpẹkpẹ. Ọnana oborẹ imitete dede se ru.

Phi omamọ udje phiyotọ vwọ kẹ emọ wẹn, wọ me je kọn uyono ri Jihova phiyọ ubiudu rayen. (Urhi 6:6-9) Ọnana churobọ si ra vwọ vwẹ ẹbe re se Die Yen Baibol na Se Yono Avwanre? kugbe Dia Evunrẹ Eguọnọ rẹ Ọghẹnẹ vwo yono ayen uyota ri Baibol na, vẹ oborẹ ayen se vwo roro kpahen odjekẹ ri Baibol na ji yeren akpọ nene ayen. Vwẹ ukẹcha kẹ emọ wẹn rere ayen sa vwọ vwẹ eta robọ rayen vwo dje oborẹ ayen segbuyota na vwọ kẹ ihwo. (1 Pita 3:15) Erianriẹn rẹ ayen vwori vẹ ọbọngan rẹ ayen mrẹre womarẹ ukẹcha wẹn, uyono romobọ, ẹga orua, emẹvwa, kugbe omamọ igbeyan cha chọn ayen uko vwo yerin te omaebrophiyame je tobọ vrẹ ọtiọyen. Jẹ ayen vwo oborẹ ayen vwọ tua vwẹ ẹga ri Jihova.

Isẹ 20:11 da ta: “Tobọ uruemu rẹ omotete ọvo ri dje phia, sẹ obo ro ruẹ shephihọ eyẹ ọ chọre.” Erhọ yen iruemu evo ri che djephia nẹ ọmọ wẹn rhe dia odibo ri Jesu re, o ji muegbe ro vwo bromaphiyame?

Ofori nẹ ọmọ ro muegbe ro vwo bromaphiyame nyupho rẹ ọsẹ vẹ oni rọyen. (Iruo 5:29; Kọl. 3:20) Baibol na vwọ ta ota kpahen Jesu ọke rọ vwọ hẹ ẹgbukpe 12, ọ da ta: “Ọ da vwẹ oma kpotọ kẹ [ọsẹ vẹ oni rọyen].” (Luk 2:51) Vwọrẹ uyota, wo che se rhẹro rọyen nẹ ọmọ wẹn cha dia gbagba-a. Ẹkẹvuọvo, ofori nẹ ohwo rọ guọnọ bromaphiyame davwẹngba vwo nene udje ri Jesu, a me je riẹn phiyọ ohwo rọ vwomakpotọ kẹ ọsẹ vẹ oni rọyen.

O ji che vwo owenvwe ro vwo yono uyota ri Baibol na. (Luk 2:46) Ọmọ wẹn vwo ẹguọnọ rẹ uyono ẹra, o ji vwobọ vwọ? (Une 122:1) O vwo ẹwẹn ro vwo se Baibol na ji ru uyono romobọ kọke kọke?—Mat. 4:4.

Ofori nẹ ọmọ ro muegbe ro vwo bromaphiyame davwẹngba vwo phi Uvie na phiyọ ẹdia rẹsosuọ. (Mat. 6:33) Ọ riẹnre nẹ o vwo oghwa ro vwo ghwoghwo ota kẹ ihwo efa. O vwobọ vwẹ ẹdia sansan rẹ iruo aghwoghwo na, ọ vuẹ iyono vẹ emọ isikuru rọyen nẹ ọyen Oseri ri Jihova, oma vuọ-ọ. Ọ vwẹ ẹro ọghanghanre vwo nẹ eta ra ghare kẹ vwẹ Uyono rẹ Akpeyeren vẹ Iruo Ruvie Na.

Ọ cha kẹnoma kẹ erharhe igbeyan o se vwo vwo uruemu ọfuanfon. (Isẹ 13:20; 1 Kọr. 15:33) A cha mrẹ ọnana womarẹ ine ro hworo, ifimu ro nẹ, ividio gemu ro te, ọtiọyen ji te obo rọ reyọ intanẹti vwo ruiruo wan.

Ihwo buebun rhiabọreyọ ukẹcha rẹ esẹ vẹ ini rayen, ayen de ru uyota na phiyọ ọromobọ ji bromaphiyame ọke rẹ ayen vwọ hẹ imitete. E jẹ Jihova bruba kẹ wẹ fikirẹ ukẹcha wọ vwọ kẹ ọmọ wẹn o se vwo yerin te ẹdia ọghanghanre nana vwẹ oyerinkugbe rọyen vẹ Jihova.

Ọyena okpuphẹn ra vwọ dia oghwoghwota vwevunrẹ ukoko na. E jiri uwe vwọ kẹ ẹyan obaro wẹn. Womarẹ uyono rẹ Ota rẹ Ọghẹnẹ wọ da rhe nabọ riẹn ji se ive rọyen gbuyota.—Jọn 17:3; Hib. 11:6.

Wẹ vẹ Iseri ri Jihova ke ton uyono phiyọ, ọ sa dianẹ wo vwo ẹga wọ ra jovwo yẹrẹ wọ tobọ kpo ọvuọvo-o. Ọkiọvo, wo vwobọ vwẹ erọnvwọn rẹ Baibol na rhọnvwephiyọ-ọ. Ẹkẹvuọvo, asaọkiephana wo dje esegbuyota wẹn phia womarẹ okurhẹriẹ, ro mudiaphiyọ nẹ obo wo ruẹ jovwo na da wẹ, wo de kuomarhẹriẹ, kọyen wọ da sen erharhe iruemu ji brorhiẹn wo vwo ru obo ri yovwirin vwẹ ẹro rẹ Ọghẹnẹ.—Iruo 3:19.

Ẹkẹvuọvo, ọ je sa dianẹ wọ riẹn isiesi ọfuanfon na vwo “nẹ ọke emọ” rhe. A vwẹ ukẹcha kẹ wẹ vwọ kẹnoma kẹ iruemu ebrabra. (2 Tim. 3:15) Wo yono obo re se vwo phi ọnyẹ rẹ otu kparobọ, ọtiọyen ji te edavwini wo vwo ru obo re chọre vwẹ ẹro ri Jihova. Wo dje esegbuyota wẹn phia womarẹ wo vwo titi ẹga rẹ uyota, wo ji vwo ghwoghwo esegbuyota wẹn vwọ kẹ ihwo efa. A nabọ yono uwe kpahen iruo aghwoghwo na. Asaọkiẹphana, wo brorhiẹn romobọ wọ vwọ ga kerẹ oghwoghwota ro ji bromaphiyame-e.

Owenẹ wọ riẹn Jihova ọke wọ vwọ ghwanrire yẹrẹ e yono uwe kpahen idjerhe ri Jihova vwo nẹ ọke emọ rhe, enẹna wo roro kpahen owọẹjẹ ivẹ efa—omaevwọkpahotọ vẹ ebrophiyame. Wọ cha vwomakpahotọ kẹ Jihova womarẹ wọ vwọ vuẹ vwẹ ẹrhovwo nẹ ọyen wọ cha ga bẹdẹ. (Mat. 16:24) Wo vwo dje omaẹvwokpahotọ wẹn phia, ku wo che bromaphiyame. (Mat. 28:19, 20) Womarẹ omaevwokpahotọ vẹ omaebrophiyame wẹn, wọ da rhe dia odibo ri Jihova re kuenu kẹ. Ọnana okpuphẹn rode!

Kirobo re yono uwe, wo che rhiẹromrẹ egbabọse sansan. Karophiyọ nẹ o ghwe vwo bromaphiyame nu, ẹwẹn ọfuanfon na “de sun Jesu kpo evun rẹ aghwa rere Idẹbono vwọ davwọ ni.” (Mat. 4:1) Wo de bromaphiyame kerẹ odibo ri Jesu nu, gba riẹn nẹ edavwini efa che te we oma. (Jọn 15:20) Dohwo doka rayen. Ihwo rẹ orua wẹn dede sa vwọso owẹ. (Mat. 10:36) Emọ isikuru, ihwo wọ vẹ ayen gbe ruiruo yẹrẹ igbeyan wẹn ri jovwo sa reyọ owẹ vwọ jehwẹ. Wọ me vwẹ ọkieje vwọ karophiyọ eta ri Jesu rọhẹ Mak 10:29, 30: “Uyota me ta kẹ ovwan, o vwo ohwo ọvuọvo re jẹn uwevwi rọye vwo, eyẹ iniọvo re eshare, eyẹ e rẹ eya, eyẹ ọsẹ, eyẹ oni, eyẹ aye, eyẹ emọ, eyẹ otọ, vwi fiki mẹ, kugbe iyẹnrẹ esiri na, rẹ ọvuọvo je vwo ujori kpahe ujori vwẹ asakiephana iwevwi, eyẹ iniọvo rẹ eshare vẹ eya, kugbe ini, kugbe emọ, kugbe etọ, vẹ imu, kugbe arhọ ri bẹdẹ vwẹ akpọ rọ cha.” Ọtiọyena, gba davwẹngba wẹn ọkieje vwo sikẹrẹ Jihova je yọnrọn irhi rọyen.

Wo de vwo ẹwẹn wo vwo bromaphiyame, gba vuẹ ọrọvwẹrote iruo rẹ ekpako na kpahọn. Enọ re vwọ kpahen ovuẹ nana yen ekpako na cha vwọ fuẹrẹn owẹ, ayen sa vwọ riẹn sẹ wo muwan rẹ omaebrophiyame. Vwẹ ọke romobọ wẹn, wọ sa fuẹrẹn enọ nana ọke wo de ru uyono romobọ.

Wo de muegbe hẹrhẹ ẹfuẹrẹn na, davwẹngba wo se ẹkpo ri Baibol na, wo mi ji roro kpahen ayen. Wo se si eta evo phiyọ ọbe nana yẹrẹ asan ọfa. Wọ sa yọnrọn ọbe wo si eta phiyọ na vẹ ọbe nana ọke rẹ ekpako na che vwo nene uwe chidia na. Wo rhe vwo ẹruọ rẹ ọvo usun rẹ enọ nana-a, gba guọnọ ukẹcha mie ohwo ro yono uwe yẹrẹ ekpako na.

Wẹ vẹ ekpako na de chidia, wo roro nẹ ẹkpahọnphiyọ igrongron yẹrẹ egangan yen a guọnọ mie we-e. Ẹkpahọnphiyọ rọ pha lọlọhọ rọ je dia kprẹn phiọngun ọyen a guọnọ mie we. Vwọ kẹ enọ buebun, o che yovwin wọ da rionbọ kpo ẹkpo ri Baibol ọvo yẹrẹ ivẹ ro vwo djephia nẹ wo mu ẹkpahọnphiyọ na kpahen Baibol na.

Ọ da dianẹ erianriẹn wẹn kpahen iyono ri Baibol na ji kodo te-e, ekpako na che vwo ọrhuẹrẹphiyotọ rẹ ayen vwọ chọn wẹ uko rere wọ sa vwọ vwẹ eta robọ wẹn vwo dje obo wo vwo ẹruọ rẹ Isiẹsi ọfuanfon na te, wo se vwo muwan rẹ omaebrophiyame vwẹ ọke ọfa.

[Oborẹ ekpako na che niso: Odjekẹ rẹ obo ra cha fuẹrẹn ihwo re guọnọ bromaphiyame wan hẹ aruẹbe 208-212.]