Obo re se Yono Mie Odibo ri “Jesu Guọnọre Na”

 1. Mavọ yen ẹguọnọ rẹ Ọghẹnẹ nẹrhẹ oma ru we?

ỌYINKỌN Jọn siri nẹ “Ọghẹnẹ hẹ ẹguọnọ.” (1 Jọn 4:8) Ota yena karophiyọ avwanre uyota ọvo nẹ: Ọghẹnẹ rọ dia Esiri rẹ arhọ na yen jehẹ Esiri rẹ ẹguọnọ. Jihova vwo ẹguọnọ rẹ avwanre! Ẹguọnọ rọyen nẹrhẹ oma vwerhen avwanre, ọ je nẹrhẹ e vwo ofuvwegbe.

 2. Vwo nene obo rehẹ Matiu 22:37-40, erhọ yen irhi ivẹ re ma rho, kẹ diesorọ ọrivẹ na vwọ bẹn ọkiọvo?

² E ji iji kẹ Inenikristi nẹ ayen dje ẹguọnọ phia. (Se Matiu 22:37-40.) A da nabọ riẹn Jihova, kọ cha lọhọ e vwo ru nene iji rẹsosuọ na. Kidie Jihova pha gbagba, ọ davwerhọ ji dje ẹguọnọ kẹ avwanre. Ẹkẹvuọvo ọ sa bẹn re vwo ru nene iji rivẹ na. Diesorọ? Kidie iniọvo avwanre re dia evo usun rẹ irivẹ avwanre na gbare-e. Ọkievo ayen sa ta eta yẹrẹ ru obo re sa nẹrhẹ e roro nẹ ayen vwo ẹguọnọ avwanre-e. Jihova riẹnre nẹ ọnana cha phia, ọtiọyena o de mu evo usun rẹ ihwo ri si Baibol na vwọ vwẹ uchebro phia kpahen oboresorọ re vwo dje ẹguọnọ kẹ ohwohwo vẹ obo re che djephia wan. Jọn ọyen ọvo usun rẹ ihwo na.—1 Jọn 3:11, 12.

 3. Die yen Jọn ta kpahen ẹguọnọ?

³ Vwẹ ẹbe ro siri, Jọn kanrunumuo nẹ Inenikristi dje ẹguọnọ phia. Vwọrẹ uyota, vwẹ ọbe ri Jọn, ọ ta ota kpahen ẹguọnọ abọ buebun vwọ vrẹ uchabọ rẹ Matiu, Mak kugbe Luk ta ota kpahọn. Jọn hẹ omarẹ ẹgbukpe ujorin ọke ro vwo si ọbe rẹ Jọn kugbe ọbe rẹ Jọn rẹsosuọ, ọrivẹ vẹ ọrerha. Ẹbe ẹne yena djerephia nẹ ẹguọnọ yen ofori nẹ o mu Onenikristi vwo ru kemu kemu. (1 Jọn 4:10, 11) Ẹkẹvuọvo Jọn fobọ yono obo re dje ẹguọnọ phia-a.

 4. Ọkieje yen Jọn vwo dje ẹguọnọ phia kẹ ihwo efa?

⁴ Ọ dia ọkieje yen Jọn vwo dje ẹguọnọ phia ọke rọ vwọ hẹ eghene-e. Kerẹ udje, vwẹ ọke ọvo, Jesu vẹ idibo rọyen wan Sameria kpo Jerusalem. Ihwo rehẹ ọko ri Sameria ọvo rhọnvwe dede aye-en. Die yen Jọn ruru? Ọ da vuẹ Jesu nẹ o jẹ ayen se erhanre nẹ odjuvwu rhe rhe torhẹ ihwo rehẹ ọko na ejobi! (Luk 9:52-56) Vwẹ ọke ọfa, Jọn ji dje ẹguọnọ phia kẹ iyinkọn ri chekọ-ọ. Ọ vẹ oniọvo rọyen Jems vuẹ oni rayen nẹ ọ ra vuẹ Jesu nẹ ọ kẹ ayen ẹdia rọ rhoro vwẹ Uvie na. Iyinkọn ri chekọ vwo nyo kpahen oborẹ Jems vẹ Jọn ruru na, ivun de miovwo ayen gangan! (Mat. 20:20, 21, 24) Dede nẹ Jọn vwo echobọ nana eje, Jesu ji vwo ẹguọnọ rọyen.—Jọn 21:7.

 5. Die yen a cha fuẹrẹn vwẹ uyono nana?

⁵ Vwẹ uyono nana, a cha fuẹrẹn udje ri Jọn kugbe erọnvwọn evo ro si kpahen ẹguọnọ. Ọnana cha chọn avwanre uko vwọ riẹn obo re se vwo dje ẹguọnọ kẹ iniọvo na. E ji che yono kpahen idjerhe ọghanghanre ọvo rẹ ọgbuyovwin orua se vwo djephia nẹ ọyen vwo ẹguọnọ rẹ orua rọyen.

 6. Idjerhe vọ yen Jihova vwo dje ẹguọnọ kẹ avwanre?

⁶ Ọke buebun, avwanre roro nẹ ota esiri yen e vwo dje ẹguọnọ phia. Jẹ e de ghini vwo ẹguọnọ rẹ ohwo, ọ dia ugbunu ọvo yen a cha vwọ vuẹ-ẹ, a je cha vwẹ uruemu djephia. (Ni Jems 2:17, 26.) Kerẹ udje, Jihova vwo ẹguọnọ rẹ avwanre. (1 Jọn 4:19) O dje ẹguọnọ na phia womarẹ eta evwevwerhen re si phiyọ Baibol na. (Une 25:10; Rom 8:38, 39) Jẹ, ọ dia eta ọvo yen o vwo djephia-a, o ji djephia womarẹ obo ro ruẹ. Jọn de si: “Ọnana kọye ẹguọnọ rẹ Ọghẹnẹ vwọ phia vwẹ o hri rẹ avwanre, nẹ Ọghẹnẹ ji Ọmọ rọye Ọvuọvo na rhe akpọ na, rere avwanre vwọ wan oma rọye rhọ.” (1 Jọn 4:9) Jihova vwẹ uphẹn kẹ Ọmọ ọghanghanre rọyen nẹ ọ rioja ji ghwu kẹ avwanre. (Jọn 3:16) Jihova ghini vwo ẹguọnọ avwanre dẹn!

 7. Die yen Jesu ruru vwo dje ẹguọnọ rọyen phia kẹ avwanre?

⁷ Jesu vuẹ idibo rọyen nẹ ọyen vwo ẹguọnọ rayen. (Jọn 13:1; 15:15) Ọ dia ota rẹ unu ọvo yen o vwo dje obo ro vwo ẹguọnọ rayen vẹ avwanre te-e, o ji djephia womarẹ obo ro ruru. Jesu da ta: “Ẹguọnọ rẹ ohwo vwori rọ rhonọ ọnana gbe herọ-ọ, rẹ ohwo da vwẹ arhọ rọye kpahe otọ kẹ igbeyan rọye.” (Jọn 15:13) Die yen ofori nẹ e ru siẹrẹ e de roro kpahen oborẹ Jihova vẹ Jesu ru kẹ avwanre?

 8. Die yen 1 Jọn 3:18 tare nẹ e ru?

⁸ Avwanre djephia nẹ e vwo ẹguọnọ ri Jihova vẹ Jesu siẹrẹ a da kerhọ rayen. (Jọn 14:15; 1 Jọn 5:3) Jesu tobọ ji iji kẹ avwanre nẹ e vwo ẹguọnọ rẹ ohwohwo. (Jọn 13:34, 35) E jẹ a vwẹ unu ọvo vwo dje ẹguọnọ kẹ iniọvo na-a, ofori nẹ a je vwẹ uruemu djephia. (Se 1 Jọn 3:18.) Die yen erọnvwọn evo re se ru vwo djephia nẹ e vwo ẹguọnọ rẹ iniọvo na?

 9. Die yen ẹguọnọ mu Jọn vwo ru?

⁹ Jọn rhe se nene ọsẹ rọyen dia rere o muomaphiyọ iruo rẹ iyerin ehwe rẹ orua na. Jẹ ukperẹ o vwo ru ọtiọyen, ọ da ghwọrọ akpeyeren rọyen eje vwo yono ihwo efa kpahen Jihova vẹ Jesu. Ojẹ ri Jọn jẹre na ghwa lọhọ-ọ. Ọ rioja omukpahen, e ji muo kpo ighuvwu fikirẹ iruo aghwoghwo na ọke rọ vwọ ghwore vwẹ oba rẹ ẹgbukpe ujorin rẹsosuọ. (Iruo 3:1; 4:1-3; 5:18; Ẹvwọ. 1:9) Ọke rọ vwọ hẹ ighuvwu na, o ji djephia nẹ ọyen vwo ẹguọnọ rẹ ihwo efa. Kerẹ udje, ọke rọ vwọ hẹ ighuvwu vwẹ otọ rẹ ame riariẹphiyọ re se Patmọs, o si ọbe rẹ Ẹvwọphia vwo rhe ikoko na rere ayen sa vwọ riẹn kpahen “obo re cha phia” kẹrẹkpẹ. (Ẹvwọ. 1:1) O si ọbe ri Jọn ro gbikun rẹ akpeyeren ri Jesu, ọkiọvo vwẹ ọke re vwo siobọno vwẹ Patmọs nu. O ji si ileta erha vwo phiuduphiyọ iniọvo na awọ je bọn ayen gan. Mavọ yen wọ sa vwọ vwẹrokere akpeyeren rẹ omaevwoze ri Jọn?

10. Mavọ wo se vwo djephia nẹ wo vwo ẹguọnọ rẹ ihwo?

¹⁰ Wo se djephia nẹ wo vwẹ ẹguọnọ rẹ ihwo womarẹ obo wo yeren akpọ wẹn wan. Akpọ rẹ Eshu na guọnọre nẹ wọ ghwọrọ ọke vẹ ẹgba wẹn eje kẹ oma wẹn, rere wo se vwo vwo igho ji titi. Ẹkẹvuọvo, ihwo ri ghwoghwo Uvie na vwẹ akpọneje ghwọrọ ọke rayen vwo ghwoghwo iyẹnrẹn esiri kẹ ihwo je chọn ayen uko vwo siẹkẹrẹ Jihova. Evo usun rayen tobọ yono ji ghwoghwo ọkieje.

11. Idjerhe vọ yen Inenikristi buebun vwo djephia nẹ ayen vwo ẹguọnọ ri Jihova kugbe iniọvo rayen?

¹¹ Inenikristi buebun ruiruo rẹ ọkieje rere ayen sa vwọ vwẹrote oma rayen vẹ orua rayen. Dedena, ayen ji biẹcha ukoko ri Jihova vwẹ kidjerhe kidjerhe rẹ ayen se vwo ru ọtiọyen. Kerẹ udje, evo vwomakpahotọ vwọ vwẹ ukẹcha phia ọke rẹ oghwọrọ da phia, efa vwobọ vwẹ iruo ebabọn, ihwo eje ji vwo uphẹn re vwo ruẹ utoro vwo biẹcha iruo rẹ akpọeje. Ayen ruẹ enana kidie ayen vwo ẹguọnọ rẹ Ọghẹnẹ vẹ irivẹ rayen. Avwanre djephia kudughwrẹn kudughwrẹn nẹ e vwo ẹguọnọ rẹ iniọvo avwanre siẹrẹ e de kpo emẹvwa ji vwobọ vwọ. Oma da tobọ ghwọrọ avwanre, a je ra ghene. Dede nẹ oshọ muẹ avwanre, a je kpahanphiyọ enọ. Vwọba, dede nẹ avwanre eje vwo ebẹnbẹn, jẹ e ji phiuduphiyọ ohwohwo awọ tavwen omẹvwa ke tuanphiyọ vẹ ọke ro de kuphiyọ nu. (Hib. 10:24, 25) Avwanre kpẹvwẹ Jihova fikirẹ iruo rẹ iniọvo avwanre ruẹ!

12. Ọrhọ yen idjerhe ọfa rẹ Jọn wan dje ẹguọnọ kẹ iniọvo rọyen?

¹² Ọ dia ujiri ọvo yen Jọn vwo dje ẹguọnọ kẹ iniọvo rọye-en, ọ je vwẹ uchebro vwọ kẹ ayen. Kerẹ udje, vwẹ ileta rọyen, o jiri iniọvo na fikirẹ esegbuyota kugbe iruo esiri rayen, ẹkẹvuọvo ọ je vwẹ uchebro ọgangan kẹ ayen kpahen umwemwu. (1 Jọn 1:8–2:1, 13, 14) O ji fo nẹ avwanre jiri iniọvo avwanre fikirẹ iruo esiri rayen. Jẹ ọ da dianẹ oniọvo ọvo guọnọ dje orharhe uruemu phia, avwanre se dje ẹguọnọ kẹ womarẹ a vwọ vwẹ uchebro ro fori vwọ kẹ. Ọ guọnọ uduefiogbere a ke sa vwẹ uchebro vwọ kẹ ugbeyan, ẹkẹvuọvo Baibol na tare nẹ uvi rẹ ugbeyan kpọ ọrivẹ rọyen viẹ.—Isẹ 27:17.

13. Die yen ofori nẹ a kẹnoma kẹ?

¹³ Ọkievo, e dje ẹguọnọ kẹ iniọvo na womarẹ obo ra kpairoro vrẹ. Kerẹ udje, a cha fobọ muophu fikirẹ oborẹ ayen tare-e. Roro kpahen obo re phiare vwẹ oba rẹ akpeyeren ri Jesu vwẹ otọrakpọ na. Ọ vuẹ idibo rọyen nẹ ayen cha re uvwo je da ọbara rọyen tavwen ayen ki se vwo arhọ. (Jọn 6:53-57) Ota na ghẹnghẹn idibo rọyen erhọ, buebun rayen de siomauko, ayen gbi nene-e, ẹkẹvuọvo idibo ri Jesu re fuevun kerẹ Jọn nene aye-en. Ayen vwo ẹruọ rẹ ota rẹ Jesu na-a, ọkiọvo ọ je ghẹnghẹn ayen orhọ. Ẹkẹvuọvo, idibo nana re fuevun na rorori nẹ oborẹ Jesu tare na chọre rẹ ivun de miovwo aye-en. Ukperẹ ọtiọyen, ayen vwẹrosuọ, kidie ayen riẹnre nẹ obo rọ tare na uyota. (Jọn 6:60, 66-69) Ofori nẹ ophu fobọ mu avwanre fikirẹ oborẹ igbeyan avwanre tare-e! Ukperẹ ọtiọyen, avwanre kẹ ayen uphẹn ayen vwo dje oborẹ ayen tare na fiotọ.—Isẹ 18:13; Aghwo. 7:9.

14. Diesorọ a vwọ kẹnoma kẹ utuoma?

¹⁴ Jọn ji jiro kẹ avwanre nẹ e vwo utuoma kpahan iniọvo avwanre-e. E rhe nene uchebro yena-a, kọyen a vwẹ uphẹn kẹ Eshu nẹ ọ reyọ avwanre vwo ruiruo. (1 Jọn 2:11; 3:15) Ọnana phia kẹ ihwo evo vwẹ oba rẹ ẹgbukpe ujorin rẹsosuọ. Vwẹ ọke yena, Eshu davwẹngba rọ vwọ nẹrhẹ ihwo rẹ Ọghẹnẹ vwo utuoma kpahen ohwohwo je hẹriẹ ayen. Ọke rẹ Jọn vwo si ileta rọyen, jẹ otu ri vwo oka rẹ ẹwẹn ro rhe Eshu bẹbẹ ro ukoko na re. Kerẹ udje, Diotrifis so ohra rode vwẹ ukoko ọvo vwẹ ọke yena. (3 Jọn 9, 10) O muọghọ kẹ iniruo ri kiẹn rẹ ẹko rọvwẹrote na ji bru ayen ra-a. Ọ tobọ guọnọ djẹ ihwo ri dede erhorha ro vwo utuoma kpahen nẹ ukoko na. Uruemu yena brare mamọ! Eshu je guọnọ so ohra phiyọ ohri rẹ ihwo rẹ Ọghẹnẹ nonẹna. E jẹ a vwẹ uphẹn kẹ utuoma rere ọ so ohra phiyọ ohri avwanre-e.

15. Die yen ofori nẹ ọgbuyovwin orua karophiyọ?

¹⁵ Idjerhe ọghanghanre ọvo rẹ ọgbuyovwin orua vwo djephia nẹ ọyen vwo ẹguọnọ rẹ orua rọyen yen ọ vwọ vwẹrote ọdavwẹ rẹ ugboma rayen. (1 Tim. 5:8) Jẹ ofori nẹ ọ karophiyọ nẹ obo re ma ghanre yen ọ vwọ vwẹ ukẹcha kẹ orua rọyen vwo vwo uvi oyerinkugbe vẹ Jihova. (Mat. 5:3) Roro kpahen omamọ rẹ udje rẹ Jesu phi phiyotọ vwọ kẹ igbuyovwin orua. Kirobo rẹ Jọn niyẹnrẹn rọyen, ọke rẹ Jesu vwo ghwẹ vwẹ enu rẹ urhe oja na, jẹ o ji roro kpahen orua rọyen. Jọn mudia kẹrẹ Meri rọ dia oni ri Jesu vwẹ asan ra da kanre Jesu mu urhe na. Dede nẹ Jesu rhiẹromrẹ odjadja vwẹ ọke yena, o ji ru ọrhuẹrẹphiyotọ rẹ Jọn vwọ vwẹrote oni rọyen. (Jọn 19:26, 27) Jesu vwo iniọvo re cha vwẹrote ọdavwẹ rẹ ugboma ri Meri, ẹkẹvuọvo ọhọhọre nẹ ọvuọvo usun rayen je rhe dia idibo rọyen ọke yena-a. Ọtiọyena, Jesu guọnọ ohwo rọ cha vwẹrote Meri ji phiuduphiyọ awọ vwẹ ẹga ri Jihova.

16. Eghwa vọ yen Jọn muru?

¹⁶ Jọn vwo eghwa buebun ro muru. Kerẹ ọvo usun rẹ iyinkọn na, ọ kobaro rẹ iruo aghwoghwo na. Ọ sa dianẹ ọ je rọvwọn, kọyen ọ vwẹrote ọdavwẹ rẹ ugboma rẹ orua rọyen kugbe oyerinkugbe rayen vẹ Jihova. (1 Kọr. 9:5) Die yen igbuyovwin orua se yono mie?

17. Diesorọ ọgbuyovwin orua vwo ru oyerinkugbe rẹ orua rọyen vẹ Jihova ganphiyọ?

¹⁷ Oniọvo ọshare rọ dia ọgbuyovwin orua se vwo eghwa buebun ro muẹ. Kerẹ udje, ọ cha nabọ muomaphiyọ iruo rọyen ji gbẹrophiyotọ rere uruemu rọyen sa vwọ ghwa urinrin rhe Jihova. (Ẹfe. 6:5, 6; Taitọs 2:9, 10) O ji se vwo owian vwẹ ukoko na, kerẹ ọ vwọ vwẹrote ji phiuduphiyọ awọ rẹ iniọvo na kugbe ọ vwọ kobaro rẹ iruo aghwoghwo na. Vwẹ ọke vuọvo na, ọ je pha ghanghanre rọ vẹ aye kugbe emọ rọyen vwo yono Baibol na kugbe ọkieje. Ayen cha kpẹvwẹ fikirẹ emu eje ro ruru rere ayen se vwo vwo omakpokpọ, omavwerhovwẹn, je ga Jihova.—Ẹfe. 5:28, 29; 6:4.

18. Die yen Jọn vwo imuẹro rọyen?

¹⁸ Jọn tọnre mamọ, o ji rhiẹromrẹ erọnvwọn buebun. O hirharoku koka koka rẹ egbabọse re sa nẹrhẹ esegbuyota rọyen dogho. Ẹkẹvuọvo, ọ davwẹngba vwo ru nene iji ri Jesu rọ tare nẹ e vwo ẹguọnọ rẹ ohwohwo. Ọnana nẹrhẹ Jọn vwo imuẹro nẹ Jihova vẹ Jesu vwo ẹguọnọ rọyen, nẹ ayen je cha kẹ ẹgba rọ guọnọre ro vwo chirakon rẹ kebẹnbẹn kebẹnbẹn. (Jọn 14:15-17; 15:10; 1 Jọn 4:16) Jọn dje ẹguọnọ kẹ iniọvo rọyen womarẹ ota vẹ uruemu, Eshu vẹ akpọ rọyen sa dobọ rọyen ji-i.

19. Die yen 1 Jọn 4:7 jiri kẹ avwanre, kẹ diesorọ?

¹⁹ Kerẹ Jọn, avwanre yerẹn vwẹ akpọ rẹ Eshu rọ dia ọghẹnẹ rẹ eyeren nana suẹn. (1 Jọn 3:1, 10) Dede nẹ ọ guọnọ dobọ avwanre ji e vwo jẹ ẹguọnọ e dje kẹ iniọvo avwanre, jẹ o che se ru ọtiọye-en, jokpanẹ kẹ avwanre rhọnvwe kẹ. E jẹ e brorhiẹn re vwo vwo ẹguọnọ rẹ iniọvo avwanre, je vwẹ unu vẹ uruemu vwo djephia. E de ru ọtiọyen, oma cha vwerhen avwanre nẹ avwanre hẹ ukoko ri Jihova, e ji che vwo aghọghọ vwẹ akpeyeren.—Se 1 Jọn 4:7.