Ҳикматлар

12 Таълим-тарбияни яхши кўрган билимни яхши кўради+,

Танбеҳдан нафратланган эса ақлсиздир+.

 2 Яхши одам Яҳованинг розилигини олади,

Ёвуз ниятлиларни эса У ҳукм қилади+.

 3 Ёвузлик қилган ҳеч бир кимса хавфдан холи бўлмайди+,

Одилнинг томири эса асло юлиб ташланмайди.

 4 Яхши хотин — эрининг тожи+,

Беадаб хотин эса эрининг суякларига тушган чирикдир+.

 5 Одилнинг фикрлари тўғридир,

Ёвузнинг маслаҳати эса алдамчидир.

 6 Ёвузнинг сўзлари — хатарли пистирма+,

Тўғрининг тили эса унга нажотдир+.

 7 Ёвузлар йўқ қилинади,

Одилнинг уйи эса мустаҳкам туради+.

 8 Ақл билан сўзлаган одамни мақташади+,

Қалби бузуқ кишидан эса ҳазар қилишади+.

 9 Нонга зор бўлиб, ўзини мақтагандан кўра,

Хизматкори бор бўлган камсуқум одам яхшироқдир+.

10 Одил киши ўз ҳайвонига ғамхўрлик қилади+,

Ёвузнинг меҳрибончилиги ҳам золимликдир.

11 Ерига ишлов берганнинг қорни овқатга тўяди+,

Бефойда нарсалар ортидан қувган эса фаросатсиздир.

12 Ёвуз одам ёвузнинг ўлжасига кўз тикади,

Одиллар эса мева берадиган дарахт кабидир.

13 Ёвузнинг бузуқ тили уни тузоққа туширади+,

Одил эса дарддан халос бўлади.

14 Инсон яхши сўзлари туфайли яхшиликка эришади+,

Қилган меҳнатининг мукофотини олади.

15 Аҳмоқнинг йўли унинг назарида тўғридир+,

Доно эса маслаҳатни қабул қилади+.

16 Аҳмоқ дарҳол жаҳлини тўкиб сочади+,

Заковатли эса ҳақоратга аҳамият бермайди.

17 Ишончли гувоҳ ҳақиқатни гапиради,

Сохта гувоҳ эса ёлғон сўзлайди.

18 Ўйламай айтилган гап қиличдай жароҳатлайди,

Дононинг тили эса шифо беради+.

19 Ростгўйнинг сўзи мангу туради+,

Ёлғончининг гапи эса бир лаҳзаликдир+.

20 Ёмон ниятли одамларнинг қалби маккор бўлади,

Тинчликпарварлар қалби эса шодликка тўлади+.

21 Одил инсонга ҳеч қандай зарар етмайди+,

Ёвузларнинг ҳаёти эса мусибатга тўла бўлади+.

22 Ёлғончи тил Яҳова учун жирканчдир+,

Садоқат ила йўл тутган эса Уни мамнун этади.

23 Заковатли одам билимини яширади,

Аҳмоқ эса ўз нодонлигини ошкор этади+.

24 Меҳнаткашлар ҳукм суради+,

Ялқовлар эса қул бўлади+.

25 Ғам-ташвиш одамнинг қалбини эзади+,

Яхши сўз эса кўнглини кўтаради+.

26 Одил киши ўзига яйлов қидиради,

Ёвузнинг тутган йўли эса уни сарсон-саргардон қилади.

27 Дангаса олдидаги ўлжани овлашга эринади+,

Тиришқоқлик эса инсоннинг қимматбаҳо хазинасидир.

28 Одиллик сўқмоғи ҳаётга етаклайди+,

Бу йўлда ўлим йўқдир.