Муқаддас Китобда «халос этилиш» ибораси тўлов эвазига озод қилиниш ёки оқланишни билдиради. Ҳаворий Бутрус буни қуйидагича ифодалаган: «Ўзларингиз биласизлар-ку, ота-боболарингиздан қолган мазмунсиз ҳаёт тарзидан кумуш ёки олтинга ўхшаш ўткинчи нарсалар эвазига халос этилмагансизлар. Аммо бенуқсон, беғубор қўзи сингари бўлган Масиҳнинг қимматбаҳо қони эвазига халос этилгансизлар». (1 Бутр. 1:18, 19) Тўлов қурбонлиги туфайли кўпгина азоб-уқубатларга сабаб бўлаётган гуноҳ ва ўлим исканжасидан озод бўла оламиз. (Рим. 5:21) Шубҳасизки, Яҳова ҳамда Исодан жудаям миннатдормиз. Чунки Исо қимматбаҳо қонини тўкиб бизни озод қилди. w25.02 5-саҳ., 15-, 16-хб.

Қай йўсин ўзимизни нотўғри иш қилишдан ҳимоялай оламиз? Ҳикматлар 7-бобда тилга олинган йигитнинг мисолидан нимани ўрганишимиз мумкинлигига диққат қаратайлик. У хулқ-атвори бузуқ аёл билан жинсий ахлоқсизлик қилган. 22-оятдан шуни кўряпмизки, ўша йигит унга «дарҳол» эргашган. Бироқ бундан олдин келтирилган оятлардан у аста-секин гуноҳга етаклаган бир нечта қадам қўйганини кўрсак бўлади. Хўш, нима уни гуноҳга етаклаган? Аввалига, йигит оқшом пайти бузуқ аёл «турадиган кўчанинг бурилишидан ўт»ган. Кейин эса унинг уйи томон йўл олган. (Ҳик. 7:8, 9) Сўнг у аёлни кўриб ҳам йўлидан қайтмаган. Аксинча, аёл уни ўпишига ва тинчлик қурбонлигини келтирмоқчи экани ҳақидаги гапларни айтишига йўл қўйган. Балки аёл ўзини яхши кўрсатиш учун бу гапларни айтгандир. (Ҳик. 7:13, 14, 21) Ўша йигит бундай аҳмоқликларни қилмаганида, нотўғри йўл тутиш васвасасидан қочган бўларди ва гуноҳга қўл урмасди. w24.07 16-саҳ., 8-, 9-хб.; 19-саҳ., 19-хб.

Яҳова жиддий гуноҳга қўл урган кишилар Унинг хизматчилари орасида бўлишига йўл қўймайди. Баъзилар «Яҳова раҳм-шафқатли бўлгани учун одам тавба қилмаса ҳам у жамоатда қолишига йўл қўяди» деб ўйлаши мумкин. Бироқ бу янглиш фикр. Яҳова раҳм-шафқатли, лекин гуноҳга кўз юммайди ва меъёрларининг аҳамиятини пасайтирмайди. (Яҳд. 4) Агар Яҳова тавба қилмаган кишиларга жамоатда қолишига йўл қўйганда, бу раҳм-шафқатдан бўлмасди. Сабаби бу жамоатга салбий таъсир кўрсатарди. (Ҳик. 13:20; 1 Кор. 15:33) Шунга қарамай, Яҳова ҳеч кимнинг ҳалок бўлишини истамаслигини билиб олдик. У имкон борича барча одамлар омон қолишини хоҳлайди. Худо қалб ҳолатини ўзгартирган ва У билан муносабатларини тиклашни истаган одамларга раҳм-шафқат кўрсатади. (Ҳиз. 33:11; 2 Бутр. 3:9) Шундай қилиб Коринфдаги киши тавба қилиб гуноҳли ишларидан воз кечганида, Яҳова ҳаворий Павлус орқали жамоатдагиларга ўша кишини кечириш ва қабул қилиш кераклигини тушунтирган. w24.08 17-саҳ., 7-хб.; 18–19-саҳ., 14-, 15-хб.