Забур

107 Яҳовага шукроналар айтинг, чунки У яхшидир+,

Унинг меҳр-садоқати абадий бор бўлади+.

 2 Яҳова қутқарган* кишилар,

Душман қўлидан озод этилганлар Унга шукрона айтсин+.

 3 Шарқу ғарбдан,

Шимолу жанубдан+,

Юртлардан йиғиб олинганлар Унга шукрона келтирсин+.

 4 Улар саҳрода, чўлу биёбонда кезиб юрди,

Бошпана бўладиган шаҳарга йўл тополмай сарсон бўлди.

 5 Улар очлигу ташналикда юрди,

Силласи қуриб, заифлашиб қолди.

 6 Оғир кунларда улар Яҳовага ёлворарди+,

У азоб-уқубатдан уларни халос этарди+.

 7 Улар яшай оладиган шаҳарга олиб бориш учун+,

Тўғри йўлдан етакларди+.

 8 Меҳр-садоқати учун халқ Яҳовага раҳматлар айтсин!+

Инсон ўғиллари ҳаққи қилган ажойиб ишлари учун Унга шукрлар айтсин!+

 9 Чунки У чанқаган жоннинг чанқоғини қондирди,

Оч қолганни нозу неъматлар билан тўйдирди+.

10 Айримлар қуюқ зулматда яшарди,

Кишанбанд этилиб, изтиробга маҳкум эди.

11 Боиси, улар Худонинг сўзларига қарши исён кўтариб,

Тангри Таолонинг ўгитларини назар-писанд қилмас эди+.

12 У қийинчиликлар орқали уларнинг қалбини бўйсундирди+.

Улар қоқилганда, ёрдам берадиган ҳеч ким топилмади.

13 Оғир кунларда Яҳовадан ёрдам сўраб ёлворганда,

У азоб-уқубатдан уларни қутқарди.

14 Қуюқ зулматдан олиб чиқди,

Уларнинг кишанларини синдириб ташлади+.

15 Меҳр-садоқати учун халқ Яҳовага раҳматлар айтсин!+

Инсон ўғиллари ҳаққи қилган ажойиб ишлари учун Унга шукрлар айтсин!

16 Зеро, У мис эшикларни синдириб ташлади,

Темирли сурма зулфинларни бузиб ташлади+.

17 Нодонлар ўз қилмишларию хатолари дастидан+

Бошларига бало орттирди+.

18 Уларнинг овқатга иштаҳаси йўқолди,

Ўлим дарвозалари томон яқинлашиб қолди.

19 Улар оғир кунларда Яҳовадан ёрдам сўраб ёлворарди,

У азоб-уқубатдан уларни қутқарарди.

20 У амр бериб, уларни даволарди+,

Тушган чуқурларидан чиқариб оларди.

21 Меҳр-садоқати учун халқ Яҳовага раҳматлар айтсин!

Инсон ўғиллари ҳаққи қилган ажойиб ишлари учун Унга шукрлар айтсин!

22 Унга шукрона қурбонликларини келтириб+,

Қувонч ҳайқириқлари ила Унинг ишларини эълон этсин.

23 Денгизга кемаларда чиқадиганлар,

Бепоён сувлар бўйлаб савдо-сотиқ қиладиганлар+,

24 Яҳованинг ишларини,

Денгиздаги ажойиботларини кўрди+.

25 Улар Унинг буйруғи билан бўрон турганини+,

Денгиз тўлқинлари кўтарилганини кўрди.

26 Денгизчилар осмонгача кўтарилиб,

Денгиз тубига тушади.

27 Улар худди маст кишидай гандираклаб, чайқалади,

Орттирган тажрибаси фойда бермайди+.

28 Оғир кунларда улар Яҳовага ёлворади+,

У азоб-уқубатдан уларни қутқаради.

29 Бўронни тинчлантиради,

Денгиз тўлқинлари тиниб қолади+.

30 Буни кўриб денгизчилар қувонади,

Кўзлаган бандаргоҳига Худо уларни бошлаб боради.

31 Меҳр-садоқати учун халқ Яҳовага раҳматлар айтсин!

Инсон ўғиллари ҳаққи қилган ажойиб ишлари учун Унга шукрлар айтсин!+

32 Халқ йиғинида Уни улуғласин+,

Оқсоқоллар кенгашида Унга шарафлар келтирсин.

33 У дарёларни саҳрога,

Булоқ сувлари оққан ерларни қақраган ерларга айлантиради+.

34 У ерда яшовчиларнинг ёвузлиги дастидан

Унумдор ерларни шўр ерларга айлантиради+.

35 Чўлни эса қамиш ўсган кўлга,

Қақраган ерни булоқлар оқадиган масканга айлантиради+.

36 Яшашлари учун у ерда шаҳар қурсин дея+,

Ўша ерга оч кишиларни жойлаштиради+.

37 Мўл-кўл ҳосил бериши учун+,

Ерга экинлар экиб, токлар ўтказади+.

38 Тангрининг баракаси ила улар ғоят кўпайиб кетади,

Чорваси камайишига У йўл қўймайди+.

39 Аммо жабр-зулм, фалокату қайғу-алам дастидан

Улар яна камайиб, камситилади.

40 Худо асилзодаларга нафратини сочади,

Сўқмоқсиз даштларда уларни саргардон қилади+.

41 Камбағалларни эса зулмдан ҳимоялаб+,

Уларнинг оиласини қўй-эчкилар сурувидай кўпайтиради.

42 Тўғри инсон буни кўриб севинади+,

Адолатсиз одамлар эса оғзини очолмай қолади+.

43 Ким доно бўлса, бу нарсаларга эътибор беради+,

Яҳованинг меҳр-садоқатга тўла ишлари ҳақида чуқур фикр юритади+.