Mateo

7 “Litshani u haṱula uri na inwi ni sa ḓo haṱulwa, 2 nḓila ine na haṱula ngayo, na inwi ni ḓo haṱulwa ngayo; na muelo une na ela ngawo, na inwi vha ḓo ni elela ngawo. 3 Ndi ngani u tshi sedza lufhanza lu re ḽiṱoni ḽa wahau ngeno iwe u sa vhoni danda ḽi re ḽiṱoni ḽau? 4 U nga amba hani na wahau wa ri, ‘Litsha ndi ṱomole lufhanza ḽiṱoni ḽau,’ ngeno iwe u na danda ḽiṱoni ḽau? 5 Mudzia-muhoyo ndi’we! Thoma u bvise danda ḽi re ḽiṱoni ḽau, ndi hone u tshi ḓo kona u vhona zwavhuḓi musi u tshi bvisa lufhanza lu re ḽiṱoni ḽa wahau.

6 “Ni songo ṋea dzimmbwa zwi re zwikhethwa; vhulungu haṋu ni songo vhu kudza nguluvhe, uri dzi sa ḓo vhu kandekanya nga khwanḓa dzadzo nahone dza ni vutshela dza ni huvhadza.

7 “Dzulani ni tshi humbela, ni ḓo ṋewa; dzulani ni tshi ṱoḓa, ni ḓo wana; dzulani ni tshi khokhonya, ni ḓo vulelwa. 8 Ngauri muṅwe na muṅwe ane a humbela, u a ṋewa, muṅwe na muṅwe ane a ṱoḓa u a wana, na muṅwe na muṅwe ane a khokhonya u ḓo vulelwa. 9 Ndi nnyi kha inwi ane ṅwana wawe a tshi humbela tshinkwa a mu ṋea tombo? 10 Kana a tshi humbela khovhe, naa a nga mu ṋea ṋowa? 11 Arali inwi vhane na vha vhaitazwivhi ni tshi kona u ṋea vhana vhaṋu zwifhiwa zwavhuḓi, hu pfi mini nga Khotsi aṋu wa ṱaḓulu! A zwi timatimisi uri u ḓo ṋea zwithu zwavhuḓi vhane vha mu humbela.

12 “Nga zwenezwo, zwoṱhe zwine na ṱoḓa vhathu vha tshi ni ita, na inwi ni vha ite nga u ralo. Zwenezwi ndi zwine Mulayo na Vhaporofita* vha zwi amba.

13 “Dzhenani nga khoro tsekene, ngauri nḓila i isaho ndozwoni yo aṱama nahone ndi khulwane, huno ndi vhanzhi vha tshimbilaho khayo; 14 khoro i yaho vhutshiloni ndi tsekene na nḓila i yaho hone ndi ṱhukhu, huno vha i wanaho a si vhanzhi.

15 “Thanyelani vhaporofita vha u zwifha vhane vha ḓa kha inwi vho ambara mikumba ya nngu, ngeno nga ngomu vhe phele dzi re na nḓala. 16 Ni ḓo vha ḓivha nga mitshelo yavho. Naa vhathu vha a fula nḓirivhe kha zwiṱaka zwa mipfa, kana u fula mahuyu kha zwikhopha? 17 Nga hu fanaho, muri muṅwe na muṅwe wavhuḓi u aṋwa mitshelo yavhuḓi, fhedzi muri u si wavhuḓi u aṋwa mitshelo i si yavhuḓi. 18 Muri wavhuḓi u nga si aṋwe mitshelo i si yavhuḓi, na muri u si wavhuḓi u nga si aṋwe mitshelo yavhuḓi. 19 Muri muṅwe na muṅwe u sa aṋwiho mitshelo yavhuḓi u a remiwa wa kudzwa muliloni. 20 Vhukuma, vhenevho vhathu ni ḓo vha ḓivha nga mitshelo yavho.

21 “A si muṅwe na muṅwe ane a ri kha nṋe, ‘Murena, Murena,’ ane a ḓo dzhena Muvhusoni wa ṱaḓulu, fhedzi hu ḓo dzhena ane a ita zwi funwaho nga Khotsi anga wa ṱaḓulu. 22 Vhanzhi vha ḓo amba na nṋe nga ḽeneḽo ḓuvha vha ri: ‘Murena, Murena, naa a ro ngo porofita dzinani ḽau, ra pandela madimoni dzinani ḽau, ra ita mishumo ya maanḓa dzinani ḽau?’ 23 Naho zwo ralo, ndi ḓo vha vhudza nda ri: A thi ni ḓivhi! Nṱutsheleni, inwi vhadzia-vhutshinyi!

24 “Nga zwenezwo, muṅwe na muṅwe ane a pfa zwine nda zwi amba a zwi ita, u fana na munna o ṱalifhaho, we a fhaṱa nnḓu yawe nṱha ha tombo. 25 Mvula ya na ha vha na miḓalo nahone maḓumbu a vhudzula iḽa nnḓu, a i kuḓa, i si we, ngauri yo vha yo fhaṱwa nṱha ha tombo. 26 Zwiṅwe hafhu, muṅwe na muṅwe ane a pfa zwine nda zwi amba a si zwi ite, u fana na munna wa tsilu, we a fhaṱa nnḓu yawe muṱavhani. 27 Mvula ya na ha vha na miḓalo nahone maḓumbu a vhudzula iḽa nnḓu, a i kuḓa, iḽa nnḓu ya wa, nahone u wa hayo ha vha huhulu.”

28 Musi Yesu a tshi fhedza u amba mafhungo eneo, gogo ḽa mangadzwa nga nḓila ye a vha a tshi funza ngayo, 29 ngauri o vha a tshi vha funza sa muthu ane a vha na maanḓa, nahone a sa fani na vhamaṅwalo.