Evangeli Ya Mateo

7 “Litshani u haṱula+ uri ni si haṱulwe, 2 nḓila ine na haṱula ngayo, na inwi ni ḓo haṱulwa ngayo;+ na nḓila ine na fara ngayo vhaṅwe na inwi ni ḓo farwa ngayo.*+ 3 Ndi ngani ni tshi sedza lufhanza lu re ḽiṱoni ḽa wahaṋu, ngeno inwi ni sa vhoni danda ḽi re ḽiṱoni ḽaṋu?+ 4 Ni nga amba hani na wahaṋu na ri, ‘Irani ndi ṱomole lufhanza ḽiṱoni ḽaṋu,’ ngeno inwi ni na danda ḽiṱoni ḽaṋu? 5 Inwi ni re na muhoyo, thomani ni bvise danda ḽi re ḽiṱoni ḽaṋu, ndi hone ni tshi ḓo kona u vhona zwavhuḓi na bvisa lufhanza lu re ḽiṱoni ḽa wahaṋu.

6 “Ni songo ṋea dzimmbwa zwi re zwikhethwa kana na posa vhulungu haṋu kha nguluvhe,+ uri dzi sa ḓo vhu kandekanya nga khwanḓa dzadzo, dza ni vutshela dza ni huvhadza.

7 “Dzulani ni tshi humbela, ni ḓo ṋewa;+ dzulani ni tshi ṱoḓa, ni ḓo wana; dzulani ni tshi khokhonya, ni ḓo vulelwa;+ 8 ngauri ane a humbela u ḓo ṋewa,+ ane a ṱoḓa u ḓo wana, na ane a khokhonya u ḓo vulelwa. 9 Ndi nnyi kha inwi ane musi ṅwana wawe a tshi humbela zwiḽiwa* a mu ṋea tombo? 10 Kana musi a tshi humbela khovhe, naa a nga mu ṋea ṋowa? 11 Arali inwi ni re vhavhi ni tshi kona u ṋea vhana vhaṋu zwifhiwa zwavhuḓi, naa Khotsi aṋu wa ṱaḓulu a nga si ṋee zwithu zwavhuḓi+ vhane vha mu humbela?+ Ngangoho u ḓo vha ṋea.

12 “Zwoṱhe zwine na funa vhathu vha tshi ni ita, na inwi ni vha ite zwenezwo.+ Zwenezwi ndi zwine Mulayo na Vhaporofita* vha zwi amba.+

13 “Dzhenani nga khoro tsekene,+ ngauri khoro i yaho lufuni yo aṱama na nḓila i yaho hone ndi khulwane, fhedzi ndi vhanzhi vha tshimbilaho khayo; 14 khoro i yaho vhutshiloni ndi tsekene na nḓila i yaho hone ndi ṱhukhu, huno vha i wanaho a si vhanzhi.+

15 “Thanyelani vhaporofita vha u zwifha+ vhane vha ḓa kha inwi vho ambara mikumba ya nngu,+ ngeno nga ngomu vhe maṱarelwa* a re na nḓala.+ 16 Ni ḓo vha ḓivha nga mitshelo yavho. Naa vhathu vha a fula nḓirivhe kana mahuyu kha zwiṱaka zwa mipfa?+ 17 Miri yoṱhe yavhuḓi i aṋwa mitshelo yavhuḓi, fhedzi muri u si wavhuḓi u aṋwa mitshelo i si yavhuḓi.+ 18 Muri wavhuḓi u nga si aṋwe mitshelo i si yavhuḓi, na muri u si wavhuḓi u nga si aṋwe mitshelo yavhuḓi.+ 19 Miri yoṱhe i sa aṋwiho mitshelo yavhuḓi i a remiwa ya poswa muliloni.+ 20 Ndi ngazwo na vhenevho vhathu ni tshi ḓo vha ḓivha nga mitshelo yavho.+

21 “A si vhoṱhe vhane vha amba na nṋe vha ri, ‘Murena, Murena,’ vhane vha ḓo dzhena Muvhusoni wa ṱaḓulu, fhedzi hu ḓo dzhena vhane vha ita zwi funwaho nga Khotsi anga wa ṱaḓulu.+ 22 Vhanzhi vha ḓo amba na nṋe nga ḽeneḽo ḓuvha vha ri: ‘Murena, Murena,+ naa a ro ngo porofita dzinani ḽau, ra pandela madimoni dzinani ḽau na u ita mishumo ya maanḓa dzinani ḽau?’+ 23 Ndi hone ndi tshi ḓo amba navho nda ri: ‘A thi ni ḓivhi! Nṱutsheleni, inwi ni re vhatshinyi!’+

24 “Ane a pfa zwine nda zwi amba a zwi ita, u fana na muthu o ṱalifhaho, we a fhaṱa nnḓu yawe nṱha ha tombo.+ 25 Mvula ya na, ha vha na miḓalo na maḓumbu a vhudzula iḽa nnḓu, i si we, ngauri yo vha yo fhaṱwa nṱha ha tombo. 26 Zwiṅwe hafhu, ane a pfa zwine nda zwi amba a si zwi ite, u fana na munna wa tsilu, we a fhaṱa nnḓu yawe muṱavhani.+ 27 Mvula ya na, ha vha na miḓalo na maḓumbu a vhudzula iḽa nnḓu+ ya wa, ya kwashekana.”

28 Musi Yesu a tshi fhedza u amba mafhungo eneo, gogo ḽa mangadzwa nga nḓila ye a vha a tshi funza ngayo,+ 29 ngauri musi a tshi vha funza zwo vha zwi tshi pfala uri o ṋewa maanḓa,+ o vha a sa fani na vhamaṅwalo.