Luka

10 Nga murahu ha zwenezwo, Murena a nanga vhaṅwe vha fusumbe (70) nahone a vha ruma nga vhavhili nga vhavhili uri vha mu range phanḓa vha ye miḓini yoṱhe na hoṱhe he a vha a tshi ṱoḓa u ya hone. 2 Nga zwenezwo, a amba navho a ri: “Khaṋo ndi khulu, fhedzi vhashumi a si vhanzhi. Ngauralo, humbelani Muṋe wa khaṋo uri a rumele vhashumi khaṋoni yawe. 3 Ndi ni ruma sa nngu dzi yaho vhukati ha dziphele. 4 Ni songo ṱuwa na tshikwama tsha tshelede kana mukhwama wa zwiḽiwa kana thovho, nahone ni songo fhedza tshifhinga ni tshi khou lumelisa muthu nḓilani. 5 Nnḓu iṅwe na iṅwe ine na dzhena khayo ni ambe ni ri: ‘Ngavhe ino nnḓu i tshi vha na mulalo.’ 6 Arali hu na muthu ane a funa mulalo henefho, mulalo waṋu u ḓo vha khae. Fhedzi arali e siho, mulalo u ḓo vhuyelela kha inwi. 7 Dzulani kha yeneyo nnḓu, ni ḽe ni nwe zwine vha ḓo ni ṋea zwone, ngauri mushumi u fanela u ṋewa malamba awe. Ni songo bva nḓuni yeneyo na ya kha iṅwe.

8 “Zwiṅwe hafhu, musi ni tshi dzhena muḓini muṅwe na muṅwe nahone vha ni ṱanganedza, ni ḽe zwine vha ni ṋea zwone, 9 ni fhodze vhalwadze vha re henefho, nahone ni vha vhudze uri: ‘Muvhuso wa Mudzimu u tsini na inwi.’ 10 Arali ni tshi dzhena muḓini muṅwe na muṅwe vhathu vha si ni ṱanganedze, ni bvele nnḓa dzinḓilani ni ri: 11 ‘Na buse ḽi bvaho muḓini waṋu ḽi re kha milenzhe yashu, ri ḽi fhufhurela inwi. Fhedzi ni dzule ni tshi humbula uri, Muvhuso wa Mudzimu u tsini na inwi.’ 12 Ndi a ni vhudza ndi ri zwine zwa ḓo wela wonoyo muḓi nga ḽeneḽo ḓuvha zwi ḓo vha khwine u fhira zwa Sodoma.

13 “Khombo kha iwe Xoratsima! Khombo kha iwe Betsaida! ngauri arali mishumo ya maanḓa yo itwaho kha inwi i vhe yo itwa ngei Tiro na Sidoni, ndi musi vho rembuluwa kale vha ambara madzanganda vha dzula miḽorani. 14 Nga zwenezwo, zwine zwa ḓo wela inwi nga Ḓuvha ḽa Khaṱulo zwi ḓo vha khwine u fhira zwa Tiro na Sidoni. 15 Na iwe Kapernaume, naa u ḓo hudzwa wa swika ṱaḓulu? U ḓo tsela fhasi Vhudzulavhafu!*

16 “Ane a ni thetshelesa, u thetshelesa na nṋe. Hone ane a ni nyadza, u nyadza na nṋe. Zwiṅwe hafhu, ane a nnyadza, u nyadza na o nthumaho.”

17 Nga murahu, vha fusumbe vha vhuya vho takala, vha ri: “Murena, na madimoni a a ri pfa ri tshi shumisa dzina ḽau.” 18 A tshi pfa zwenezwo a amba a ri: “Ndo zwi vhona Sathane a tshi wa vhunga lupenyo lu tshi bva ṱaḓulu. 19 Ndo ni ṋea maanḓa a u kandekanya dziṋowa na dziphame, na u kunda maanḓa oṱhe a swina, nahone a hu na tshine tsha nga ni huvhadza. 20 Naho zwo ralo, ni songo takala ngauri ni khou pandela madimoni, fhedzi takadzwani ngauri madzina aṋu o ṅwalwa ngei ṱaḓulu.” 21 Nga tshenetsho tshifhinga, muya mukhethwa wa mu ita uri a takale nahone a ri: “Ndi a u renda Khotsi, phanḓa ha vhathu vhoṱhe, Iwe Murena wa ḽiṱaḓulu na ḽifhasi, ngauri wo zwi dzumbela vhaṱali na vha ṱhalukanyo nahone wa zwi dzumbululela vhana. Ngauri yeneyo ndi nḓila ine iwe Khotsi wa i takalela. 22 Khotsi anga o nkumedza zwithu zwoṱhe, a hu na ane a ḓivha Murwa arali e si Khotsi, nahone a hu na ane a ḓivha Khotsi nga nnḓa ha Murwa na ane Murwa a takalela u mu dzumbululela.”

23 Nga zwenezwo, a rembulutshela kha vhafunziwa nahone a amba navho vhe vhoṱhe a ri: “Hu takala vhane vha vhona zwine inwi na zwi vhona. 24 Ndi a ni vhudza ndi ri: Vhaporofita vhanzhi na mahosi vho vha vha tshi tama u vhona zwithu zwine na zwi vhona, fhedzi vha si zwi vhone, nahone vha tshi ṱoḓa u pfa zwine na zwi pfa, fhedzi vha si zwi pfe.”

25 Ha ḓa muḓivhi wa Mulayo, a mu linga a ri: “Mufunzi, ndi fanela uri ndi ite mini uri ndi wane vhutshilo vhu sa fheli?” 26 A amba nae a ri: “Ho ṅwalwa mini Mulayoni? U vhala nga nḓila-ḓe?” 27 A mu fhindula a ri: “‘U tea u funa Yehova Mudzimu wau nga mbilu yau yoṱhe, na nga zwoṱhe zwine wa vha zwone, na nga nungo dzau dzoṱhe, na nga ṱhalukanyo yau yoṱhe,’ nahone, ‘funa wahau vhunga u tshi ḓifuna.’” 28 Yesu a amba nae a ri: “Wo fhindula zwone; ‘bvela phanḓa u tshi ita zwenezwo nahone u ḓo wana vhutshilo.’”

29 A tshi ṱoḓa u ḓiita o lugaho, onoyo munna a vhudzisa Yesu a ri: “Wahashu ndi nnyi?” 30 Yesu a mu fhindula a ri: “Muṅwe munna o vha a tshi khou tsa a tshi bva Yerusalema a tshi ya Yeriko a ṱangana na mavemu, a mu bvula zwiambaro, a mu rwa, a mu sia o dzidzivhala. 31 Zwa sokou itea uri muṅwe tshifhe a vhe a tshi khou tsa nga yeneyo nḓila, musi a tshi mu vhona, a bva nga iṅwe nḓila. 32 Ha ḓa Mulevi nga hu fanaho, musi a tshi khou tsa nga yeneyo nḓila a mu vhona, na ene a bva nga iṅwe nḓila. 33 Fhedzi muṅwe Musamaria we a vha a tshi khou tshimbila nḓilani yeneyo a swika he uyo munna a vha e hone, musi a tshi mu vhona, a mu pfela vhuṱungu. 34 Ngauralo, a ya khae a mu ṱanzwa nga waini a mu ḓodza mapfura a kona u pomba mbonzhe dzawe. A mu ṋamedza mbongola yawe, nga murahu a mu isa nḓuni ya vhaeni a mu ṱhogomela henefho. 35 Nahone nga ḓuvha ḽi tevhelaho a bvisa dinari mbili, a dzi ṋea muṋe wa nnḓu ya vhaeni a ri, ‘U mu ṱhogomele, arali wa shumisa dinari dzi fhiraho dzenedzi, ndi ḓo u lifhela ndi tshi vhuya.’ 36 Iwe u vhona u nga kha vhenevha vhararu, onoyo munna we a ṱangana na mavemu u ḓo ri wa hawe ndi ufhio?” 37 A fhindula a ri: “Ndi uyo we a mu pfela vhuṱungu.” Yesu a amba nae a ri: “Tshimbila u ite zwenezwo.”

38 Musi vha tshi khou tshimbila, vha dzhena kha muṅwe muḓana. Henefho a ṱanganedzwa nga muṅwe mufumakadzi ane a pfi Marita. 39 O vha e na murathu ane a pfi Maria, we a vha o dzula milenzheni ya Murena a tshi khou thetshelesa zwine a khou amba. 40 Marita ene o vha o farakanea nga mishumo minzhi. Ngauralo, a ḓa a amba na Yesu a ri: “Murena, naa u vhona zwi zwone Maria a tshi nndaṱedza nda sala ndi tshi khou shuma ndi ndoṱhe? Amba nae uri a ḓe a nthuse.” 41 Murena a mu fhindula a ri: “Marita, Marita, u khou vhilaedziswa na u ḓidina nga zwithu zwinzhi. 42 Hu ṱoḓea zwi si gathi kana tshithihi fhedzi. Maria o nanga zwithu zwavhuḓi, nahone ha nga dzhielwi zwone.”