Mishumo

11 Nga tshenetsho tshifhinga, vhaapostola na vhatendi* vhe vha vha vhe Yudea vha pfa uri vhathu vha dzitshaka na vhone vho ṱanganedza ipfi ḽa Mudzimu. 2 Musi Petro a tshi gonya Yerusalema, vhane vha tikedza zwa u fumba vha thoma u hanedzana nae, 3 vha ri o ya nḓuni ya vhanna vha songo fumbaho, nahone a ḽa navho. 4 Ndi hone Petro a tshi vha ṱalutshedza nga vhuḓalo, a ri:

5 “Ndo vha ndi muḓini wa Yope ndi tshi khou rabela, nahone kha bono nda vhona hu tshi tsa tshithu tshi ngaho labi ḽihulwane ḽo farwa nga khuḓa dzaḽo nṋa tshi tshi bva ṱaḓulu, nahone tsha ḓa kha nṋe. 6 Musi ndi tshi lavhelesa, nda vhona hu na zwipuka zwa milenzhe miṋa zwa kha ḽifhasi, na mavhanda, na zwikokovhi, na zwiṋoni zwa ṱaḓulu. 7 Nda dovha nda pfa ipfi ḽi tshi ri, ‘Petro, takuwa u ṱhavhe u ḽe!’ 8 Nṋe nda ri, ‘Na kathihi Murena, ngauri a thi athu vhuya nda ḽa tshithu tshi songo kunaho na tshi re na tshika.’ 9 Ha dovha ha pfala ipfi lwa vhuvhili ḽi bvaho ṱaḓulu ḽi tshi ri, ‘Litsha u amba uri zwithu zwo kunakiswaho nga Mudzimu zwi na tshika.’ 10 Ha dovha ha pfala ipfi lwa vhuraru, nahone zwithu zwoṱhe zwa dovha zwa gonyiselwa nṱha ṱaḓulu. 11 Zwiṅwe hafhu, ho vha ho ima vhanna vhararu nḓuni ye ra vha ri khayo, vhe vha vha vho rumiwa kha nṋe vha tshi bva Kesarea. 12 Ngauralo, muya wa Mudzimu wa mmbudza uri ndi ṱuwe navho, nahone ndi songo timatima na luthihi. Fhedzi vhenevha vhahashu vha rathi na vhone vho ṱuwa na nṋe, nahone ra dzhena nḓuni ya onoyo munna.

13 “O ri vhudza nga ha musi a tshi vhona muruṅwa o ima nḓuni yawe nahone a ri, ‘Ruma vhanna ngei Yope uri vha ye u vhidza Simoni ane a vhidzwa Petro, 14 u ḓo u vhudza zwithu zwine zwa ḓo ita uri iwe na vha muṱa wau woṱhe ni tshidzwe.’ 15 Musi ndi tshi thoma u amba, vha ṱanganedza muya mukhethwa nga nḓila ye ra u ṱanganedza ngayo mathomoni. 16 Zwenezwo zwa ita uri ndi humbule zwe Murena a vha a tshi dzulela u zwi amba musi a tshi ri, ‘Yohane ene o lovhedza nga maḓi, fhedzi inwi ni ḓo lovhedzwa nga muya mukhethwa.’ 17 Nga zwenezwo, arali Mudzimu o vha ṋea tshifhiwa tshi fanaho na tshe a ṋea riṋe musi ri tshi tenda Murena Yesu Kristo, ndi nṋe nnyi we nda vha ndi tshi nga kona u thivhela Mudzimu?”

18 Musi vha tshi pfa zwenezwo, vha si tsha hanedzana na Petro, vha renda Mudzimu vha ri: “Mudzimu o tendela vha dzitshaka uri vha rembuluwe uri vha wane vhutshilo.”

19 Nga zwenezwo, vhe vha balangana tshifhingani tsha u tovholwa nga murahu ha lufu lwa Stefano vha tshimbila vha swika Fenikia, Kipiro na Antiokia, fhedzi vha si vhudze vhaṅwe vhathu Ipfi ḽa Mudzimu nga nnḓa ha Vhayuda. 20 Naho zwo ralo, vhaṅwe vhanna vhukati havho vha bvaho Kipiro na Kirene vhe vha ḓa Antiokia vha thoma u amba na vhathu vha ambaho Lugerika, vha tshi ḓivhadza mafhungo maḓifha a Murena Yesu. 21 Zwiṅwe hafhu, Yehova o vha a tshi khou vha tikedza, vhathu vhanzhi vha vha vhatendi nahone vha rembulutshela kha Murena.

22 Mafhungo avho a pfala tshivhidzoni tshe tsha vha tshi Yerusalema, nahone vha ruma Baranaba uri a ye Antiokia. 23 Musi a tshi swika a vhona uri Mudzimu o itela vhathu vhuthu vhuhulu, a takala nahone a thoma u vha ṱuṱuwedza vhoṱhe uri vha bvele phanḓa Murenani nga u ḓiimisela zwi tshi bva mbiluni; 24 ngauri o vha e muthu muvhuya o ḓalaho muya mukhethwa na lutendo. Vhathu vhanzhi vha tenda Murena. 25 Ngauralo, a ya Tariso u itela u ṱoḓa Saulo. 26 Musi o no mu wana, a mu ḓisa Antiokia. Ngauralo, vha fhedza ṅwaha woṱhe vha tshi ṱanganela navho tshivhidzoni vha tshi funza vhathu vhanzhi, nahone ho vha hu henefha Antiokia he vhafunziwa vha thoma u vhidzwa Vhakriste nga fhasi ha vhulivhisi ha Mudzimu.

27 Nga tshenetsho tshifhinga, vhaporofita vha bvaho Yerusalema vha ḓa Antiokia. 28 Muṅwe wavho we a vha a tshi pfi Agabo a takuwa o ṋewa maanḓa nga muya mukhethwa a amba uri hu ḓo vha na nḓala khulu ḽifhasini ḽoṱhe; nḓala yeneyo yo vha hone misini ya Klaudio. 29 Ngauralo, mufunziwa muṅwe na muṅwe a ḓiimisela nga hune a nga kona ngaho u rumela zwifhiwa u itela u thusa vhatendi vha dzulaho ngei Yudea; 30 nahone vha ita zwenezwo, vha ruma Baranaba na Saulo uri vha zwi ise kha vhahulwane.