Mishumo

12 Nga tshenetsho tshifhinga, khosi Herode a mbo ḓi thoma u tovhola vhaṅwe tshivhidzoni. 2 A vhulaha Yakobo mukomana* wa Yohane nga banga. 3 Musi a tshi vhona uri zwo vha zwi tshi khou takadza Vhayuda, a mbo ḓi fara na Petro. (Ho vha hu tshifhinga tsha zwinkwa zwi si na mbiliso.) 4 A mu fara a mu valela dzhele, a mu kumedza zwigwada zwiṋa zwa maswole maṋa uri zwi mu linde nga u tou sielisana, samusi o vha a tshi khou ṱoḓa u mu isa phanḓa ha vhathu nga murahu ha paseka. 5 Nga zwenezwo, Petro o vha o valelwa dzhele; fhedzi tshivhidzo tsho vha tshi tshi mu rabelela vhukuma ha Mudzimu.

6 Vhusikuni ha nga phanḓa ha uri Herode a mu ise vhathuni, Petro o vha o eḓela o vhofhiwa nga ngeḓane mbili e vhukati ha maswole mavhili, nahone muṋangoni wa dzhele ho vha hu na vhalindi. 7 Fhedzi muruṅwa wa Yehova a ima tsini nae, nahone ha vha na tshedza he a vha o valelwa hone. A phaphatha Petro kha lurumbu, a mu karusa a ri: “Vuwa nga u ṱavhanya!” Ngeḓane dza wa zwanḓani zwawe. 8 Muruṅwa a amba nae a ri: “Ḓilugise nahone u vhofhe thovho dzau.” A ita nga u ralo. Mafheleloni muruṅwa a amba nae a ri: “Ambara tshiambaro tshau tsha nga nnḓa u ntevhele.” 9 A bvela nnḓa nae a mu tevhela, fhedzi o vha a sa ḓivhi uri zwe muruṅwa a vha a tshi khou zwi ita zwo vha zwi zwa vhukuma. O vha a tshi humbula u nga u khou vhona bono. 10 Vha fhira maswole a u thoma na a vhuvhili vha swika vothini ḽa tsimbi ḽi dzhenaho muḓini, nahone ḽa mbo ḓi vulea nga ḽoṱhe. Musi vho no bva vha tshimbila vha tshi tsa nga nḓila, nahone nga kathihi fhedzi muruṅwa a mbo ḓi ngala-ngala. 11 Petro a tshi dzivhuluwa a ri: “Ndi a zwi ḓivha zwa vhukuma uri Yehova o ruma muruṅwa wawe a mponyokisa tshanḓani tsha Herode na kha zwoṱhe zwe Vhayuda vha vha vho lavhelela uri zwi ḓo itea.”

12 Musi o no dzivhuluwa a ya nḓuni ya Maria mme a Yohane we a vha a tshi vhidzwa Marko, he ha vha ho kuvhangana vhafunziwa vha si gathi nahone vha tshi khou rabela. 13 Musi a tshi khokhonya muṋangoni, Rode musidzana wa mushumeli a ya muṋangoni u itela u ṱolela, 14 musi a tshi ṱhogomela uri ndi ipfi ḽa Petro, a takala zwihulu lwe a kundwa na u vula muṋango, fhedzi a humela murahu a tshi khou gidima nahone a amba uri Petro o ima muṋangoni. 15 Vha mu fhindula vha ri: “Wo ṱangana ṱhoho.” Fhedzi a ḓi isa phanḓa a tshi khwaṱhisedza uri ndi ene. Vha thoma u amba uri: “Ndi muruṅwa wawe.” 16 Petro a sala o ima henefho a tshi khou khokhonya. Musi vha tshi mu vulela, vha vhona uri ndi ene nahone vha mangala. 17 A vha sumbedza nga tshanḓa uri vha fhumule nahone a vha vhudza nga vhuḓalo nḓila ye Yehova a mu bvisa ngayo dzhele, nahone a ri: “Ni vhudze Yakobo na vhaṅwe vhatendi enea mafhungo.” A mbo ḓi fhirela huṅwe.

18 Musi ḽi tshi tsha, ha vuwa bonyongo vhukati ha maswole ḽa uri ho itea mini nga Petro. 19 Herode a ita vhuḓidini ha u mu ṱoḓa, musi a songo mu wana, a sengisa vhalindi nahone a laedza uri vha pfiswe vhuṱungu; Herode a ṱuwa Yudea a tsela Kesarea a fhedza tshifhinganyana e henengei.

20 A sinyutshela vhathu vha ngei Tiro na vha ngei Sidoni. Vha ḓa vhoṱhe khae musi vho no kwengweledza Blasto, munna we a vha a tshi langa zwa pfamoni ya khosi, vha humbela u pfumelelwa, ngauri shango ḽa havho ḽo vha ḽi tshi wana zwiḽiwa zwi bvaho shangoni ḽa Herode. 21 Fhedzi nga ḽiṅwe ḓuvha Herode a ambara zwiambaro zwa vhuhosi a dzula kha tshidulo tsha khaṱulo a thoma u amba na vhathu. 22 Vhathu vhe vha vha vho kuvhangana vha thoma u huwelela vha ri: “Iḽo ndi ipfi ḽa mudzimu, a si ḽa muthu!” 23 Nga u ṱavhanya ha ḓa muruṅwa wa Yehova a mu rwa, ngauri ho ngo hulisa Mudzimu; nahone a ḽiwa nga mbungu a fa.

24 Fhedzi ipfi ḽa Yehova ḽa bvela phanḓa ḽi tshi phaḓalala.

25 Musi Baranaba na Saulo vho no fhedza u rumela zwifhiwa zwa u thusa ngei Yerusalema, vha humela murahu vha ṱuwa na Yohane ane a vhidzwa Marko.