Genesi

23 Sara o tshila miṅwaha ya 127.+ 2 Sara o fela Kiriate-ariba,+ hune ha vha Heburoni,+ shangoni ḽa Kanana,+ Abrahamu a ṱungufhalela Sara na u mu lilela. 3 Abrahamu a takuwa a sia tshitumbu tsha mufumakadzi wawe, a ya a amba na vharwa vha Hethe,+ a ri: 4 “Ndi mutsinda o dzulaho vhukati haṋu.+ Nthengiseleni fhethu hune nda ḓo vhulunga hone mufu wanga.” 5 Vharwa vha Hethe vha fhindula Abrahamu vha ri: 6 “Muṋe washu, ri thetshelese. Iwe u murangaphanḓa* o nangwaho nga Mudzimu vhukati hashu.+ U nga nanga fhethu ha khwinesa ha u vhulunga mufu wau. A hu na ane a ḓo u hanela u tshi vhulunga mufu wau vhiḓani.”

7 Ngauralo, Abrahamu a takuwa a khotha phanḓa ha vhathu vha ḽeneḽo shango, vharwa vha Hethe,+ 8 a amba navho a ri: “Arali ni tshi tenda ndi tshi vhulunga mufu wanga, nthetsheleseni ni nkhumbelele kha Efuroni murwa wa Tsohara 9 uri a nthengisele bako ḽawe ḽa Makapela; ḽi re magumoni a tsimu yawe. Kha nthengisele nga mutengo muṅwe na muṅwe+ ni hone uri ndi vhe na fhethu ha u vhulungela hone.”+

10 Huno Efuroni o vha o dzula vhukati ha vharwa vha Hethe. Efuroni wa Muhethe a fhindula Abrahamu musi vharwa vha Hethe vha tshi zwi pfa na phanḓa ha vhoṱhe vhe vha dzhena nga khoro ya muḓi wawe,+ a ri: 11 “Aiwa, muṋe wanga! Nthetshelese. Ndi u ṋea tsimu na bako ḽi re khayo. Ndi khou u ṋea yone phanḓa ha vhana vha vhathu vha hashu. Vhulunga mufu wau.” 12 Abrahamu a khotha phanḓa ha vhathu vha ḽeneḽo shango 13 a amba na Efuroni vhathu vha tshi zwi pfa a ri: “Ndi khou humbela uri ni nthetshelese! Ndi ḓo ni ṋea tshelede iṅwe na iṅwe hu sa londwi uri ndi vhugai ya u renga yeneyo tsimu. I dzhieni uri ndi kone u vhulunga mufu wanga henefho.”

14 Efuroni a fhindula Abrahamu a ri: 15 “Muṋe wanga, nthetshelese. Heyi tsimu i ita shekele* dza siḽiva dza 400, fhedzi mutengo a si wa ndeme vhukati hanga na iwe. Vhulunga mufu wau.” 16 Abrahamu a thetshelesa Efuroni, a vhalela Efuroni siḽiva ye vharwa vha Hethe vha i pfa a tshi i amba, ye ya vha i shekele* dza 400 dza siḽiva u ya nga kuvhalele kune kwa ṱanganedzwa nga vharengisi.+ 17 Nga zwenezwo, tsimu ya Efuroni i re Makapela, ye ya vha i tsini na Mamure, tsimu na bako ḽi re khayo na miri yoṱhe i re tsimuni, zwa vha 18 thundu ye Abrahamu a i renga phanḓa ha vharwa vha Hethe, phanḓa ha vhoṱhe vha dzhenaho khoroni ya muḓi wawe. 19 Ndi hone Abrahamu a tshi vhulunga Sara mufumakadzi wawe bakoni ḽa Makapela tsini na Mamure, hune ha vha Heburoni, shangoni ḽa Kanana. 20 Nga zwenezwo, vharwa vha Hethe vha ṋea Abrahamu tsimu na bako ḽe ḽa vha ḽi khayo sa fhethu hawe ha u vhulungela hone.+