Genesi

27 Musi Isaka o no kalaha, maṱo awe a si tsha vhona, a vhidza Esau+ murwa wawe muhulwane a ri: “Ṅwananga!” Esau a fhindula a ri: “Ndi fhano!” 2 A amba nae a ri: “Ndo no kalaha. A thi ḓivhi ḓuvha ḽine nda ḓo fa ngaḽo. 3 Zwino ndi khou humbela uri u dzhie zwiṱhavhane zwau, misevhe na vhura, u ye ḓakani u nzwimele phukha.+ 4 U mbikele zwiḽiwa zwa u ḓifha zwine nda zwi funesa, u nḓisele zwone. Ndi ḓo zwi ḽa nda kona u u fhaṱutshedza ndi sa athu u fa.”

5 Naho zwo ralo, Rebeka o vha o thetshelesa musi Isaka a tshi khou amba na Esau murwa wawe. Esau a ya ḓakani u zwima phukha uri a vhuye nayo.+ 6 Rebeka a amba na Yakobo murwa wawe+ a ri: “Ndo pfa khotsi au a tshi khou amba na Esau mukomana wau, a tshi ri: 7 ‘Nḓisele ṋamanyana ya phukha, u mbikele zwiḽiwa zwa u ḓifha. Ndi ḽe uri ndi kone u u fhaṱutshedza phanḓa ha Yehova ndi sa athu u fa.’+ 8 Zwino iwe murwa wanga thetshelesa nga vhuronwane, u ite zwine nda ḓo u vhudza zwone.+ 9 Ndi khou humbela uri u ye sambini u nḓele na zwibudzana zwivhili zwavhuḓi, uri ndi bikele khotsi au zwiḽiwa zwi ḓifhaho zwine a zwi funesa. 10 U ise ha khotsi au a ḽe u itela uri a u fhaṱutshedze musi a sa athu u fa.”

11 Naho zwo ralo, Yakobo a amba na Rebeka mme awe a ri: “Esau mukomana wanga ndi munna a re na mahaha,+ fhedzi nṋe a thi na mahaha. 12 Zwino arali khotsi anga a mphuphuledza?+ Zwi ḓo nga ndi khou mu itela vhukwila, nda vho semiwa nṱhani ha u fhaṱutshedzwa.” 13 Mme awe a amba nae a ri: “Nga hu semiwe nṋe murwa wanga. Ita zwe nda u vhudza, u ye u ndzhiele zwibudzana.”+ 14 A ya a zwi dzhia a zwi ḓisa ha mme awe, huno mme awe a bika zwiḽiwa zwa u ḓifha zwine khotsi awe a zwi funesa. 15 Nga murahu ha zwenezwo, Rebeka a dzhia zwiambaro zwavhuḓi zwa Esau murwa wawe muhulwane zwe zwa vha zwi nḓuni, a zwi ambadza Yakobo murwa wawe muṱuku.+ 16 A dovha a mu ambadza mikumba ya zwibudzana zwanḓani na kha mutsinga.+ 17 A ṋekedza Yakobo murwa wawe zwiḽiwa zwa u ḓifha na vhurotho he a vhu baka.+

18 A ya kha khotsi awe a ri: “Baba!” Khotsi awe a ri: “Ndi fhano ṅwananga! Ndi iwe nnyi?” 19 Yakobo a fhindula khotsi awe a ri: “Ndi nṋe Esau tanzhe ḽau.+ Ndo ita zwe wa mmbudza. Ndi khou humbela uri u vuwe u ḽe ṋama ya phukha, u kone u mphaṱhutshedza.”+ 20 Isaka a amba na murwa wawe a ri: “Khezwi wo ṱavhanya wa i wana murwa wanga?” A fhindula a ri: “Ndi ngauri Yehova Mudzimu wau o tou i ḓisa kha nṋe.” 21 Isaka a amba na Yakobo a ri: “Ndi khou humbela uri u sendele tsini hanga ṅwananga, uri ndi u phuphuledze ndi ḓivhe arali zwa vhukuma u murwa wanga Esau kana hu si ene.”+ 22 Yakobo a sendela tsini na Isaka khotsi awe, a mu phuphuledza, a ri: “Ipfi ndi ḽa Yakobo, fhedzi zwanḓa ndi zwa Esau.”+ 23 Ho ngo mu ḓivha ngauri zwanḓa zwawe zwo vha zwi na mahaha u fana na zwa Esau mukomana wawe. Nga zwenezwo, a mu fhaṱutshedza.+

24 A ri: “Naa u Esau murwa wanga zwa vhukuma?” Yakobo a ri: “Ee.” 25 Ndi hone a tshi ri: “Ḓisa ṋama ya phukha ndi ḽe murwa wanga, ndi kone u u fhaṱutshedza.” Ngauralo, a mu ṋea a ḽa, a mu ṋea na waini a nwa. 26 Isaka khotsi awe a amba nae a ri: “Ndi khou humbela uri u sendele tsini u nkhise murwa wanga.”+ 27 A sendela a mu khisa, Isaka a pfa munukho wa zwiambaro zwawe.+ Ngauralo, a mu fhaṱutshedza a ri:

“Murwa wanga u nukhelela sa ḓaka, ḽe Yehova a ḽi fhaṱutshedza. 28 Ngavhe Mudzimu wa ngoho a tshi u nisela ṅwando wa ḽiṱaḓulu,+ a u ṋee mavu o nonaho ḽifhasini+ na muḓalo wa thoro na waini ntswa.+ 29 Vhathu kha vha u shumele na tshaka dzi u loshe. U vhuse vhana vha khotsi au, vharwa vha mme au vha u loshe.+ Ane a u sema u ḓo semiwa, ane a u fhaṱutshedza u ḓo fhaṱutshedzwa.”+

30 Musi Isaka o no fhedza u fhaṱutshedza Yakobo, Yakobo o no takuwa phanḓa ha khotsi awe Isaka, ha swika Esau mukomana wawe a tshi bva u zwima.+ 31 Na ene a lugisa zwiḽiwa zwa u ḓifha, a zwi ḓisa ha khotsi awe. A amba na khotsi awe a ri: “Vuwa u ḽe ṋamanyana ya phukha, uri u kone u mphaṱhutshedza.” 32 Isaka khotsi awe a mu vhudzisa a ri: “Ndi iwe nnyi?” Ene a fhindula a ri: “Ndi nṋe murwa wau, tanzhe ḽau, Esau.”+ 33 Isaka a thoma u tetemela zwihulu, a ri: “Zwino ndi nnyi we a zwima phukha, a i ḓisa kha nṋe? Ndo ḽa u sa athu u swika, ndo mu fhaṱutshedza, onoyo muthu u ḓo fhaṱutshedzwa zwa vhukuma!”

34 Musi Esau a tshi pfa zwe khotsi awe a zwi amba, a vusa tshililo tshihulu lwa u tou ṱungufhadza, a amba na khotsi awe a ri: “Khotsi anga, na nṋe mphaṱhutshedze!”+ 35 Fhedzi khotsi awe a ri: “Murathu wau o ḓa nga vhufhura a dzhia phaṱhutshedzo dzau.” 36 Esau a ri: “Ndi ngazwo a tshi pfi Yakobo,* zwino ndi lwa vhuvhili a tshi mphura.+ O no ḓi ndzhiela vhutanzhe,+ zwino o ndzhiela phaṱhutshedzo dzanga!”+ A dovha a ri: “Naa a wo ngo ntsiela phaṱhutshedzo?” 37 Fhedzi Isaka a fhindula Esau a ri: “Ndo mu vhea uri a u vhuse,+ ndo mu ṋea vharathu vhawe vhoṱhe uri vha vhe vhashumeli vhawe, ndo mu ṋea thoro na waini ntswa.+ Ho sala mini zwine nda nga kha ḓi u ṋea zwone, murwa wanga?”

38 Esau a amba na khotsi awe a ri: “Khotsi anga, naa wo vha u tshi tou vha na phaṱhutshedzo nthihi fhedzi? Na nṋe mphaṱhutshedze.” Esau a lila.+ 39 Khotsi awe Isaka a mu fhindula a ri:

“Iwe u ḓo dzula kule ha mavu o nonaho a ḽifhasi, wa vha kule na ṅwando wa ḽiṱaḓulu.+ 40 U ḓo tshila nga banga ḽau,+ u ḓo shumela murathu wau.+ Fhedzi musi u tshi neta, iwe u ḓo vunḓa dzhogo yawe i re kha mutsinga wau.”+

41 Naho zwo ralo, Esau a fara Yakobo nga mbilu nga nṱhani ha uri khotsi awe o fhaṱutshedza Yakobo,+ Esau o vha a tshi dzulela u amba nga mbilu a ri: “Khotsi anga u tsini na u fa.+ Musi o no fa ndi ḓo vhulaya Yakobo murathu wanga.” 42 Musi Rebeka a tshi vhudzwa zwe Esau murwa wawe muhulwane a zwi amba, a ṱavhanya a vhidza Yakobo murwa wawe muṱuku, a amba nae a ri: “Mukomana wau Esau u khou ṱoḓa u lifhedza nga u vhamba maano a u u vhulaya.* 43 Zwino iwe murwa wanga, ita zwine nda u vhudza, shavhela ha Labani khaladzi anga ngei Harani.+ 44 U dzule nae lwa tshifhinganyana u swika mbiti dza mukomana wau dzi tshi dzika, 45 musi mukomana wau a songo tsha u sinyutshela, o no hangwa zwe wa mu ita zwone. Ndi ḓo u vhidza u henengei. Ndi ngani ndi tshi nga felwa nga vhuvhili haṋu nga ḓuvha ḽithihi?”

46 Rebeka o vha a tshi dzulela u amba na Isaka a tshi ri: “Ndo netiswa nga vhutshilo nga nṱhani ha vhananyana vha Hethe.+ Arali na Yakobo a vhuya a vhinga mufumakadzi wa ḽino shango a bvaho kha vhananyana vha Hethe vhane vha nga havha, ndi ḓo vha ndi si tshee na tshine nda tshilela tshone.”+