Genesi

8 Mudzimu a humbula Noaxe na phukha dzoṱhe na zwifuwo zwoṱhe zwe a vha e nazwo gungwani,+ Mudzimu a ita uri muya u vhudzule kha ḽifhasi, maḓi a thoma u xa. 2 Zwisima zwa mativha na khoro dza ṱaḓulu zwa valea, na mvula ya tsha.*+ 3 Maḓi a thoma u xa kha ḽifhasi nga zwiṱuku nga zwiṱuku. Musi ho no fhela maḓuvha a 150, maḓi o vha o no fhungudzea. 4 Nga ṅwedzi wa vhusumbe, nga ḓuvha ḽa vhu 17 ḽa ṅwedzi, gungwa ḽa ima thavhani dzi re Ararati. 5 Maḓi o vha a tshi khou fhungudzea nga zwiṱuku nga zwiṱuku u swika nga ṅwedzi wa vhufumi. Nga ḓuvha ḽa u thoma ḽa wonoyo ṅwedzi, ha thoma u vhonala ṱhodzi dza thavha.+

6 Musi ho no fhela maḓuvha a 40, Noaxe a vula fasiṱere+ ḽe a vha o ḽi ita kha gungwa, 7 a fhufhisa funguvhu; ḽa fhufhela nnḓa ḽi tshi dovha ḽi tshi vhuya, u swika maḓi a tshi xa kha ḽifhasi.

8 Nga murahu a fhufhisa ḽiivha u itela u vhona arali maḓi o no xa. 9 Ḽiivha ḽi si wane fhethu hune ḽa nga kavha hone,* ḽa humela khae gungwani ngauri maḓi o vha a tshi kha ḓi vha o tibedza ḽifhasi.+ Noaxe a bvisela nnḓa tshanḓa tshawe a ḽi dzhenisa nga ngomu gungwani. 10 A lindela maṅwe maḓuvha a sumbe, a dovha a fhufhisela ḽiivha nnḓa ha gungwa. 11 Musi ḽiivha ḽi tshi humela khae ḽi tshi vho kovhela, a vhona ḽo fara ṱari ḽiṋu ḽa muṱwari nga mulomo waḽo. Noaxe a ḓivha uri maḓi o no fhungudzea kha ḽifhasi.+ 12 A lindela maṅwe maḓuvha a sumbe. A fhufhisa ḽiivha, fhedzi ḽi si tsha dovha ḽa vhuya khae.

13 Nga ṅwaha wa vhu 601,+ nga ṅwedzi wa u thoma, nga ḓuvha ḽa u thoma ḽa ṅwedzi, maḓi o vha o no xa kha ḽifhasi; Noaxe a bvisa tshiṅwe tshipiḓa tsha ṱhanga ya gungwa, a vhona uri mavu o vha a tshi vho thoma u oma. 14 Nga ṅwedzi wa vhuvhili, nga ḓuvha ḽa vhu 27 ḽa ṅwedzi, ḽifhasi ḽo vha ḽo no oma.

15 Mudzimu a amba na Noaxe a ri: 16 “Ibva gungwani na mufumakadzi wau, vharwa vhau na vhafumakadzi vha vharwa vhau.+ 17 Bvisa zwipuka zwoṱhe+ zwe wa vha u nazwo, zwifuwo, zwivhanda, zwikokovhi na zwi fhufhaho, uri zwi bebe zwi ande zwi ḓadze ḽifhasi.”+

18 Noaxe a bvela nnḓa na vharwa vhawe+ na mufumakadzi wawe na vhafumakadzi vha vharwa vhawe. 19 Zwipuka zwoṱhe zwa bva gungwani nga mifuda yazwo, zwikokovhi, zwi fhufhaho na zwi tshatshamaho.+ 20 Ngauralo, Noaxe a fhaṱela Yehova aḽeṱare,+ a dzhia zwiṅwe zwa zwipuka zwo kunaho na zwiṅwe zwa zwiṋoni zwo kunaho,+ a zwi ṋekedza sa zwifhiwa zwa u fhiswa kha aḽeṱare.+ 21 Yehova a pfa zwi tshi khou nukhelela. Nga zwenezwo, Yehova a amba mbiluni yawe a ri: “A thi tsha ḓo dovha nda sema mavu+ nga nṱhani ha muthu ngauri mahumbulele a muthu o sendamela kha vhuvhi u bva vhuṱukuni;+ a thi tsha ḓo dovha nda vhulaya zwithu zwoṱhe sa zwe nda ita.+ 22 U bva zwino kha ḽifhasi hu ḓo dzula hu tshi zwalwa mbeu na u kaṋiwa, hu tshi rothola na u fhisa, hu na tshilimo na vhuria, hu na masiari na vhusiku.”+