Bugu Ya Vhuvhili Ya Dzikhosi

10 Ahaba+ o vha e na vharwa vha 70 ngei Samaria. Ngauralo, Yehu a ṅwala marifhi a a rumela ngei Samaria, kha vhakololo vha Yeseriele, vhahulwane+ na vhaṱhogomeli vha vharwa vha Ahaba,* a ri: 2 “Musi uvhu vhurifhi vhu tshi swika kha inwi, ni ḓo vha ni na vharwa vha muṋe waṋu, ni na gariki dza nndwa, bere, muḓi wo tsireledzwaho nga mbondo na zwiṱhavhane. 3 Ni nange muṅwe wa khwine kha vhatukana vha muṋe waṋu na o teaho,* ni mu vhee kha khuluṋoni ya khotsi awe. Ni lwele vha muṱa wa muṋe waṋu.”

4 Fhedzi vha tshuwa vha ri: “Arali mahosi mavhili a songo kona u mu kunda,+ riṋe ri nga mu kunda hani?” 5 Mulavhelesi wa pfamo,* vhavhusi vha muḓi, vhahulwane na vhaṱhogomeli vha rumela mulaedza kha Yehu vha ri: “Ri vhashumeli vhau, ri ḓo ita zwoṱhe zwine wa ḓo ri vhudza zwone. A ri nga ḓo vhea naho e nnyi uri a vhe khosi. Ita zwine wa vhona zwo luga.”

6 A vha ṅwalela vhurifhi ha vhuvhili a ri: “Arali ni tshi ima na nṋe, no ḓiimisela u nthetshelesa, ni nḓisele ṱhoho dza vharwa vha muṋe waṋu ngei Yeseriele matshelo nga tshenetshi tshifhinga.”

Vharwa vha khosi vha 70 vho vha vhe na vhanna vha vhaḓivhalea vha wonoyo muḓi vha tshi khou vha alusa. 7 Musi vhurifhi vhu tshi tou swika khavho, vha dzhia vharwa vha khosi vha 70 vha vha vhulaya,+ vha dzhenisa ṱhoho dzavho kha mimanngi vha dzi isa khae ngei Yeseriele. 8 Muḓinḓa a dzhena a mu vhudza u ri: “Vho ḓisa ṱhoho dza vharwa vha khosi.” Ene a ri: “Dzi vheeni nga zwiṱhopho zwivhili muṋangoni wa khoro ya muḓi ḽi vhuye ḽi tshe.” 9 Musi a tshi bva nga matsheloni, a ima phanḓa ha vhathu vhoṱhe a ri: “Inwi a ni na mulandu.* Ndo itela muṋe wanga tshimbevha nda mu vhulaya,+ fhedzi ndi nnyi o vhulayaho avha vhathu vhoṱhe? 10 Zwino ḓivhani uri a hu na ipfi na ḽithihi ḽa Yehova, ḽe Yehova a ḽi amba nga ha vha nnḓu ya Ahaba ḽine ḽa sa ḓo itea,*+ Yehova o ita zwe a zwi amba a tshi shumisa mushumeli wawe Elia.”+ 11 Zwiṅwe hafhu, Yehu a vhulaya vhoṱhe vho salaho vha nnḓu ya Ahaba ngei Yeseriele, u katela na vhanna vhawe vhoṱhe vha vhaḓivhalea, khonani dzawe na vhotshifhe vhawe,+ a si sie na muthu na muthihi.+

12 Yehu a ya Samaria. Nnḓu ya u vhofhela* ye vhalisa vha vha vha tshi vheulela khayo nngu yo vha i henefho nḓilani. 13 Henefho Yehu a ṱangana na mashaka a Ahasia khosi+ ya Yuda, a vha vhudzisa a ri: “Inwi ni vhonnyi?” Vha fhindula vha ri: “Ri mashaka a Ahasia, ri nḓilani ya u ya u vhudzisa arali vhana vha khosi na vharwa vha mme a khosi vha tshi kha ḓi vha vho takala.” 14 Nga u ṱavhanya a ri: “Vha fareni!” Vha vha fara vha tshi kha ḓi tshila, vha vha vhulayela tshisimani tsha tsini na nnḓu ye vhalisa vha vha vha tshi vheulela khayo nngu, vho vha vhe vhanna vha 42. Ho ngo tendela na muthihi wavho a tshi ponyoka.+

15 Musi a tshi ṱuwa henefho, a ṱangana na Yohanadaba+ murwa wa Rekhaba,+ we a vha a tshi khou ḓa u mu ṱanganedza. Musi a tshi mu lumelisa,* a amba nae a ri: “Naa mbilu yau i ima na yanga, samusi mbilu yanga i tshi ima na yau?”

Yohanadaba a fhindula a ri: “I ima na yau.”

“Arali zwo ralo, mpfare tshanḓa.”

A mu fara tshanḓa, Yehu a mu kokodzela nga ngomu ha gariki. 16 A ri: “Kha ri ṱuwe roṱhe, u vhone uri a thi takaleli vhane vha hanedza Yehova.”+ Vha ita uri a ṋamele nae garikini yawe ya nndwa. 17 A swika Samaria, a vhulaya vhoṱhe vha muṱa wa Ahaba vho salaho ngei Samaria u swika a tshi vha fhelisa,+ sa zwe Yehova a vhudza Elia.+

18 Yehu a dovha a kuvhanganya vhathu vhoṱhe, a amba navho a ri: “Ahaba o vha a tshi gwadamela Baali zwiṱuku,+ fhedzi Yehu u ḓo mu gwadamela zwihulu. 19 Vhidzani vhaporofita vhoṱhe vha Baali,+ vhagwadameli vhawe vhoṱhe na vhotshifhe vhawe+ vhoṱhe. Hu songo sala na muthihi, ngauri ndo itela Baali tshiṱhavhelo tshihulu. Ane a sa ḓo ḓa u ḓo fa.” Fhedzi Yehu o vha a tshi khou vha itela tshimbevha uri a fhelise vhagwadameli vha Baali.

20 Yehu a bvela phanḓa a ri: “Ḓivhadzani uri hu vhe na muṱangano mukhethwa wa Baali.” Vha ḓivhadza. 21 Nga murahu ha zwenezwo Yehu a ḓivhadza kha ḽa Isiraele ḽoṱhe, vhagwadameli vhoṱhe vha Baali vha ḓa. A hu na na muthihi we a si ḓe. Vha dzhena nḓuni* ya Baali,+ ya ḓala lwa u ḓala. 22 A amba na muṅwe we a vha a tshi ṱhogomela kamara ya u vhea zwi⁠ambaro a ri: “Ḓisani zwiambaro ni zwi ṋee vhagwadameli vhoṱhe vha Baali.” Ngauralo, a vha ḓisela zwiambaro. 23 Yehu na Yohanadaba+ murwa wa Rekhaba vha dzhena nḓuni ya Baali. A amba na vhagwadameli vha Baali a ri: “Itani vhungoho ha uri a hu na mugwadameli wa Yehova fhano, hu fanela u vha vhagwadameli vha Baali fhedzi.” 24 Mafheleloni vha dzhena uri vha ṋekedze zwiṱhavhelo na zwifhiwa zwa u fhiswa. Yehu o vha o vhea vhanna vha 80 nga nnḓa, a ri: “Arali muṅwe wa vhanna vhane nda khou vha kumedzela zwanḓani zwaṋu a ponyoka, hu ḓo fa inwi.”

25 Musi a tshi tou fhedza u ṋekedza tshifhiwa tsha u fhiswa, Yehu a amba na vhalindi* na vhalangammbi a ri: “Dzhenani ni vha vhulaye! Hu songo ponyoka na muthu na muthihi!”+ Ngauralo, vhalindi na vhalangammbi vha vha vhulaya nga banga vha vha posela nnḓa, vha dzhena ngomu nḓuni khethwa* ya nnḓu ya Baali. 26 Vha bvisela nnḓa phuphu khethwa+ dza nḓuni ya Baali vha dzi fhisa dzoṱhe.+ 27 Vha thutha phuphu khethwa+ ya Baali, vha thutha nnḓu ya Baali vha i ita mabunga,+ u swika na ṋamusi.

28 Yehu a fhelisa vhurabeli ha Baali kha ḽa Isiraele. 29 Naho zwo ralo, Yehu ho ngo litsha tshoṱhe zwivhi zwa Yerobeamu murwa wa Nebatha we a ita uri Isiraele ḽi ite tshivhi nga u gwadamela ṋamana dza musuku dze dza vha dzi ngei Bethele na ngei Dani.+ 30 Yehova a amba na Yehu a ri: “Ngauri wo ita zwavhuḓi na zwo lugaho phanḓa hanga nga u ita zwoṱhe zwe nda vha ndi tshi ṱoḓa u zwi ita nnḓu ya Ahaba,+ vhaḓuhulu vhau vha ḓo dzula kha khuluṋoni ya Isiraele+ u vhuya u swika kha murafho wa vhuṋa.” 31 Fhedzi Yehu ho ngo zwi dzhiela nṱha uri a tevhedze Mulayo wa Yehova Mudzimu wa Isiraele nga mbilu yawe yoṱhe.+ Ho ngo litsha zwivhi zwe zwa itwa nga Yerobeamu, we a ita uri Isiraele ḽi ite tshivhi.+

32 Misini yeneyo, Yehova a thoma u fhungudza shango nga zwiṱuku nga zwiṱuku. Hasaele a bvela phanḓa a tshi vha vutshela shangoni ḽoṱhe ḽa Isiraele,+ 33 u bva vhubvaḓuvha ha Yorodane, shango ḽoṱhe ḽa Giḽiada, ḽa Vhagada, Vharubeni na Vhamanase,+ u bva Aroere, hune ha vha tsini na Govha ḽa Arinoni,* u swika Giḽiada na Bashani.+

34 Mafhungo oṱhe a Yehu na zwoṱhe zwe a ita na mishumo yawe i sumbedzaho u vha na maanḓa, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele? 35 Yehu o vhulungwa na vhomakhulukuku wawe ngei Samaria; murwa wawe Yoahasi+ a vha khosi vhudzuloni hawe. 36 Tshifhinga tshe Yehu a tshi fhedza a tshi khou vhusa kha ḽa Isiraele e ngei Samaria ndi miṅwaha ya 28.