Esera

4 Musi maswina a Yuda na a Benyamini+ a tshi pfa uri mathubwa+ a khou fhaṱela Yehova Mudzimu wa Isiraele thembele, 2 a ṱavhanya a ḓa ha Serubabele na ha vharangaphanḓa vha miṱa ya vhokhotsi a amba navho a ri: “Ri tendeleni ri fhaṱe na inwi; ngauri na riṋe ri gwadamela Mudzimu waṋu,+ ndi kale ri tshi khou mu itela zwiṱhavhelo u bva misini ya Khosi Esarahadoni+ wa Asuri we a ri ḓisa fhano.”+ 3 Naho zwo ralo, Serubabele na Yeshua na vharangaphanḓa vhoṱhe vha miṱa ya vhokhotsi ya Isiraele vha ri: “A ri ṱoḓi ni tshi fhaṱa na riṋe nnḓu ya Mudzimu washu,+ riṋe ri ḓo fhaṱela Yehova Mudzimu wa Isiraele nnḓu, sa zwe Korese khosi ya Peresia a ri laya.”+

4 Nga zwenezwo, vhathu vha ḽeneḽo shango vha bvela phanḓa vha tshi ita uri vhathu vha Yuda vha kulee nungo vha litshe u fhaṱa.+ 5 Vha thola vhaeletshedzi uri vha khakhise maano avho+ misini yoṱhe ya Korese khosi ya Peresia u swika hu tshi vhusa Dario+ khosi ya Peresia. 6 Mathomoni a musi hu tshi khou vhusa Ahasiverosi, vha ṅwala vhurifhi ha u pomoka vhadzulapo vha Yuda na vha Yerusalema. 7 Misini ya Arithasasitha khosi ya Peresia, Bisilamu, Mithiridatha, Tabiele na vhaṅwe vhane vha shumisana nae vha ṅwalela khosi Arithasasitha; vha ṱalutshedzela honoho vhurifhi nga Tshiaramiki,+ vha vhu ṅwala nga kuṅwalele kwa Tshiaramiki.*

8 * Rehumu muvhusi muhulwane na Shimishai muṅwali vha ṅwalela Khosi Arithasasitha vhurifhi ha u pomoka Yerusalema vha ri: 9 (Ho vha vhu tshi khou bva kha Rehumu muvhusi muhulwane na kha Shimishai muṅwali na vhane vha shumisana navho, vhahaṱuli na vhavhusi vhaṱuku, vhaṅwaleli, vhathu vha Ereke,+ Vhababele, vhadzulapo vha Susani,+ vhane vha vha Vhaelamu,+ 10 na tshaka dzoṱhe dze Asinapara muhulwane na a ṱhonifheaho, a dzi isa vhuthubwani a dzi dzudza miḓini ya Samaria,+ dziṅwe a dzi isa dzinguni ḽa Seli ha Mulambo,* 11 zwino vhurifhi he vha mu rumela khovhu.)

“Ha Khosi Arithasasitha, vhu tshi bva ha vhashumeli vhau, vhanna vha bvaho dzinguni ḽa Seli ha Mulambo: 12 Zwino khosi i tea u zwi ḓivha uri Vhayuda vhe vha ḓa kha riṋe vha tshi bva ha iwe vho swika Yerusalema. Vha khou fhaṱulula muḓi wa vhushandukwa na wa vhuvhi, vha khou fhedza u fhaṱa mbondo+ na u lugisa mitheo. 13 Zwino khosi i tea u zwi ḓivha uri arali hoyu muḓi wa fhaṱululwa, mbondo dzawo dza fhela u fhaṱiwa, a vha nga bvisi muthelo, nduvho+ kana muthelo wa u tendelwa u fhira, zwenezwo zwi ḓo ita uri hu si tsha vha na tshithu mbulungeloni dza mahosi. 14 Samusi muholo washu u tshi bva pfamoni,* a zwo ngo tea u vhona zwithu zwa khosi zwi tshi tshinyadzwa, ndi ngazwo ro rumela vhathu uri vha ḓivhadze khosi zwenezwi, 15 uri hu itwe ṱhoḓisiso nga ha bugu dza mafhungo a vhomakhulukuku wau.+ Kha yeneyo bugu ya mafhungo u ḓo wana uri wonoyo muḓi ndi wa mashandukwa, u dina mahosi na mavundu,* wonoyo muḓi wo vha u na vhathu vhane vha vusa khakhathi u bva zwifhingani zwa kale. Ndi ngazwo wonoyo muḓi wo fheliswa.+ 16 Ri khou ḓivhadza khosi uri arali wonoyu muḓi wa fhaṱululwa, vha fhedza u fhaṱa mbondo dzawo, a u tsha ḓo langa dzingu ḽa Seli ha Mulambo.”+

17 Khosi ya rumela mulaedza ha Rehumu muvhusi muhulwane na Shimishai muṅwali na vhane vha shumisana navho vha dzulaho Samaria na kha maṅwe madzingu a Seli ha Mulambo:

“Ri a vusa! Zwino 18 vhurifhi he wa ri rumela hone ndo vhu vhalelwa* zwavhuḓi. 19 Ndo laedza uri hu itwe ṱhoḓisiso, ha wanala uri u bva kale muḓi wo vha u tshi khou vutshela mahosi, henefho fhethu ho vha hu na vhushandukwa na khakhathi.+ 20 Ho vha hu na mahosi a re na maanḓa Yerusalema e a vha a tshi vhusa dzingu ḽoṱhe ḽa Seli ha Mulambo, muthelo, nduvho na muthelo wa u tendelwa u fhira zwo vha zwi tshi bviselwa vhone. 21 Zwino ṋea vhenevha vhanna ndaela ya uri vha litshe u shuma, uri muḓi u si tsha fhaṱululwa u swika ndi tshi ṋea ndaela. 22 Ni ṱhogomele uri ni si litshelele kha zwenezwi uri zwithu zwa khosi zwi si dovhe zwa tshinyadzwa.”+

23 Musi vhurifhi ha Khosi Arithasasitha ho no vhalwa phanḓa ha Rehumu, Shimishai muṅwali na vhane vha shumisana navho, vha ṱavhanya vha ya Yerusalema kha Vhayuda, vha vha kombetshedza uri vha litshe u fhaṱa. 24 Ndi nga tshenetsho tshifhinga he mushumo wa u fhaṱa nnḓu ya Mudzimu, ye ya vha i ngei Yerusalema u tshi ima; wa ima u swika nga ṅwaha wa vhuvhili hu tshi khou vhusa Dario khosi ya Peresia.+