Ekisoda

31 Yehova a bvela phanḓa a tshi amba na Mushe a ri: 2 “Ndo nanga* Betsaliele+ murwa wa Uri ane a vha murwa wa Huri wa lushaka lwa Yuda.+ 3 Ndi ḓo mu ḓadza muya wanga,* nda mu ṋea vhuṱali, nda ita uri a pfesese, nda ita uri a ḓivhe mishumo yoṱhe ya zwanḓa, 4 uri a ite dzipulane, a shume nga musuku, siḽiva na koporo, 5 uri a vhaḓe matombo+ na u a tsheṱa na u vhaḓa thanda dza mifuda yoṱhe.+ 6 Zwiṅwe hafhu, ndo nanga Oholiaba+ murwa wa Ahisama wa lushaka lwa Dani uri a mu thuse, ndi ḓo dzhenisa vhuṱali mbiluni dza vhoṱhe vhane vha vha na vhutsila* uri vha ite tshiṅwe na tshiṅwe tshe nda u laedza:+ 7 dennde ḽa muṱangano,+ mbulungelo ya mulanga*+ na mutibo+ u re khayo na zwishumiswa zwoṱhe zwa dennde, 8 ṱafula+ na thundu dzayo, tshiṱomambone tsha musuku vhukuma na thundu+ dzatsho dzoṱhe, aḽeṱare ya zwioro,+ 9 aḽeṱare ya tshifhiwa tsha u fhiswa+ na thundu dzayo dzoṱhe, sambelo na milenzhe yaḽo,+ 10 zwi⁠ambaro zwo lukwaho zwavhuḓi, zwiambaro zwikhethwa zwa tshifhe Aroni na zwiambaro zwa vharwa vhawe uri vha shume sa vhotshifhe,+ 11 mapfura a u ḓodza na zwioro zwi nukhelelaho zwa nnḓu khethwa.+ Vha ḓo ita tshiṅwe na tshiṅwe tshe nda u laedza.”

12 Yehova a dovha a amba na Mushe a ri: 13 “U vhudze Vhaisiraele u ri: ‘Ni humbule savhatha dzanga,+ ngauri ndi tshiga vhukati hanga na inwi kha mirafho yaṋu uri ni ḓivhe zwa uri nṋe Yehova ndi khou ni ita vhakhethwa. 14 Ni tea u tevhedza mulayo wa Savhatha, ngauri ndi ḓuvha ḽikhethwa kha inwi.+ Ane a i nyadza u tea u vhulawa. Arali muthu naho e ufhio a shuma mushumo naho u ufhio nga savhatha onoyo u tea u vhulawa kha lushaka lwa hawe.+ 15 Mushumo u itwe nga maḓuvha a rathi, fhedzi ḓuvha ḽa vhusumbe ndi savhatha ya u awela tshoṱhe.+ Ndi khethwa kha Yehova. Muthu naho e ufhio ane a shuma nga ḓuvha ḽa Savhatha u ḓo vhulawa. 16 Vhaisiraele vha tea u tevhedza mulayo wa Savhatha; vha pembelele Savhatha kha mirafho yavho yoṱhe. Ndi mulanga wa lini na lini. 17 Ndi tshiga tsha nga hu sa fheli vhukati hanga na vhathu vhanga vha Isiraele+ ngauri Yehova o ita ḽiṱaḓulu na ḽifhasi nga maḓuvha a rathi, nga ḓuvha ḽa vhusumbe a litsha u shuma, a awela.’”+

18 Musi a tshi tou fhedza u amba na Mushe ngei Thavhani ya Sinai a mu ṋea mbaba mbili dza Vhuṱanzi,+ mbaba dza matombo dzo ṅwaliwaho nga munwe wa Mudzimu.+