Levitiko

26 “‘Ni songo ḓiitela midzimu i sa vhuyedzi tshithu,+ ni songo imisa tshifanyiso tsho vhaḓwaho+ kana phuphu khethwa, ni songo imisa matombo o vhaḓwaho+ shangoni ḽaṋu u itela u a gwadamela;+ ngauri ndi nṋe Yehova Mudzimu waṋu. 2 Ni tevhedze savhatha dzanga, ni ṱhonifhe* nnḓu khethwa yanga. Ndi nṋe Yehova.

3 “‘Arali na bvela phanḓa ni tshi tshila nga maitele anga na u tevhedza ndaela dzanga na ita zwe nda amba,+ 4 ndi ḓo ni nisela mvula nga tshifhinga tsho teaho,+ shango ḽa medza zwibveledzwa zwaḽo,+ na miri ya ḓaka i ḓo aṋwa mitshelo. 5 Tshifhinga tshaṋu tsha u fhefhera tshi ḓo engedzea u swika nga tshifhinga tsha u kaṋa nḓirivhe, tshifhinga tsha u kaṋa nḓirivhe tshi ḓo engedzea u swika hu tshi zwalwa mbeu; ni ḓo ḽa vhurotho haṋu u swika ni tshi fura na dzula shangoni ḽaṋu no tsireledzea.+ 6 Ndi ḓo ḓisa mulalo shangoni,+ ni ḓo eḓela hu si na ane a ni tshuwisa;+ ndi ḓo pandela zwivhanda, a hu na ane a ḓo lwa na inwi shangoni ḽaṋu. 7 Ni ḓo kunda maswina aṋu, na a vhulaya nga banga. 8 Vhaṱanu kha inwi vha ḓo pandamedza vha 100, vha 100 vha ḓo pandamedza vha 10 000, maswina aṋu ni ḓo a vhulaya nga banga.+

9 “‘Ndi ḓo ni sumbedza vhuthu, nda ni ita uri ni bebe ni ande,+ a thi nga pfuki mulanga we nda u vhofha na inwi.+ 10 Musi ni tshi kha ḓi ḽa zwa ṅwaha wo fhiraho, ni ḓo tea u zwi laṱa u itela u wana ha u vhea zwiswa. 11 Ndi ḓo vhea dennde ḽanga ḽikhethwa* vhukati haṋu,+ a thi nga ḓo ni laṱa. 12 Ndi ḓo tshimbila vhukati haṋu, nda vha Mudzimu waṋu,+ inwi ni ḓo vha vhathu vhanga.+ 13 Ndi nṋe Yehova Mudzimu waṋu, we a ni bvisa shangoni ḽa Egipita uri ni si tsha vha phuli dzavho, nda vunḓa dzhogo yaṋu nda ita uri ni tshimbile ni tshi ḓihudza.

14 “‘Naho zwo ralo, arali na sa nthetshelesa kana u tevhedza ndaela dzanga,+ 15 arali na sa tevhedza maitele anga,+ arali na nengwa mahaṱulele anga lune na sa tevhedze ndaela dzanga dzoṱhe, na pfuka mulanga wanga,+ 16 ndi ḓo ita zwi tevhelaho kha inwi, ndi ḓo ni pfisa vhuṱungu nga u ni tsikeledza, nga lufhiha na mukhushwane, nda ita uri ni si tsha vhona, ni fhelelwe nga nungo. Ni ḓo zwala mbeu yaṋu ni si vhuyelwe, ngauri maswina aṋu a ḓo i ḽa.+ 17 Ndi ḓo lwa na inwi, ni ḓo kundwa nga maswina aṋu;+ vhane vha ni vhenga vha ḓo ni tsikeledza,+ ni ḓo shavha hu si na ane a khou ni pandamedza.+

18 “‘Arali zwenezwi zwi si ite uri ni nthetshelese, ndi ḓo ni rwa lwa sumbe ndi tshi itela zwivhi zwaṋu. 19 Ndi ḓo fhelisa swili yaṋu, nda ita uri ḽiṱaḓulu ḽaṋu ḽi nge tsimbi+ na ḽifhasi ḽaṋu ḽi nge koporo. 20 Ni ḓo ḓinetisa lwa fhedzi, shango ḽaṋu a ḽi nga bveledzi zwibveledzwa+ na miri ya masimuni a i nga aṋwi mitshelo.

21 “‘Fhedzi arali na bvela phanḓa ni tshi lwa na nṋe, na hana u nthetshelesa, ndi ḓo dovha nda ni rwa lwa sumbe u ya nga zwivhi zwaṋu. 22 Ndi ḓo ruma phukha dza ḓaka vhukati haṋu,+ dzi ḓo vhulaya vhana vhaṋu+ na zwifuwo zwaṋu na fhungudzea, nḓilani dzaṋu ha sala hu si na vhathu.+

23 “‘Arali nga murahu ha zwenezwi ni si tende ndi tshi ni khakhulula+ na bvela phanḓa ni tshi nkhanedza, 24 na nṋe ndi ḓo lwa na inwi, nda ni rwa lwa sumbe ndi tshi itela zwivhi zwaṋu. 25 Ndi ḓo ni ḓisela banga ndi tshi lifhedza zwe na pfuka mulanga wanga.+ Arali na kuvhangana miḓini yaṋu, ndi ḓo rumela vhulwadze vhukati haṋu,+ nda ni kumedzela zwanḓani zwa swina ḽaṋu.+ 26 Musi ndi tshi ita uri ni si tsha wana vhurotho,*+ vhafumakadzi vha fumi vha ḓo kona u ni bakela vhurotho kha honndo nthihi fhedzi,+ nga murahu vha ni kovhela vhurotho haṋu nga muelo; ni ḓo ḽa, fhedzi a ni nga furi.+

27 “‘Arali nga murahu ha zwenezwi na si nthetshelese na bvela phanḓa ni tshi nkhanedza, 28 ndi ḓo bvela phanḓa ndi tshi lwa na inwi,+ ndi ḓo dovha nda ni rwa lwa sumbe ndi tshi itela zwivhi zwaṋu. 29 Ni ḓo ḽa ṋama ya vharwa vhaṋu na dovha na ḽa na ṋama ya vhananyana vhaṋu.+ 30 Ndi ḓo thutha fhethu haṋu hukhethwa ha vhurabeli,+ nda wisa hune na ṱoma hone zwioro, nda ṱhopha zwitumbu nṱha ha zwitumbu zwa midzimu yaṋu ya zwifanyiso i nengisaho,*+ ndi ḓo ni nengwa.+ 31 Ndi ḓo ḓisa banga miḓini yaṋu,+ nda ita uri nnḓu dzaṋu khethwa dzi sale dzi si na muthu, a thi tsha ḓo pfa u nukhelela ha zwiṱhavhelo zwaṋu. 32 Ndi ḓo ita uri hu si tsha vha na muthu shangoni,+ maswina aṋu ane a dzula khaḽo a ḓo lavhelesa o mangadzwa nga zwenezwo.+ 33 Ndi ḓo ni balanganya kha dzitshaka,+ ndi ḓo bvisa banga nda ni pandamedza;+ shango ḽaṋu ḽi ḓo sala ḽi si na muthu,+ miḓi yaṋu ya sala i mashubi.

34 “‘Nga tshenetsho tshifhinga musi shango ḽi si na muthu, musi ni shangoni ḽa maswina aṋu, shango ḽi ḓo lifha dzisavhatha. Nga tshenetsho tshifhinga shango ḽi ḓo awela,* samusi ḽi tshi tea u lifha savhatha dzaḽo.+ 35 Maḓuvha oṱhe ane ḽa ḓo vha ḽi si na muthu ḽi ḓo awela, ngauri a ḽo ngo awela nga dzisavhatha musi ni tshi khou dzula khaḽo.

36 “‘Kha vhane vha ḓo ponyoka,+ ndi ḓo ita uri vha ofhe musi vhe mashangoni a maswina avho; vha ḓo shavha musi vha tshi pfa ṱari ḽi tshi vhudzulwa nga muya, vha ḓo shavha sa vhane vha khou pandamedzwa nga banga, vha ḓo wa hu si na ane a khou vha pandamedza.+ 37 Vha ḓo piringedzana u fana na vhane vha khou shavha banga, ngeno hu si na ane a khou vha pandamedza. A ni nga ḓo kona u shavha maswina aṋu.+ 38 Ni ḓo fa vhukati ha dzitshaka,+ shango ḽa maswina aṋu ḽi ḓo ni fhedza. 39 Vhaṅwe vhaṋu vho salaho vha ḓo sinela shangoni ḽa maswina+ avho nga nṱhani ha vhukhakhi havho. Vha ḓo sina nga nṱhani ha vhukhakhi ha vhokhotsi avho.+ 40 Vha ḓo tenda vhukhakhi+ havho na u sa fhulufhedzea ha vhokhotsi avho, vha ḓo tenda uri a vho ngo fhulufhedzea nge vha nkhanedza.+ 41 Ngauralo, ndo dovha nda vha hanedza,+ nga u vha isa shangoni ḽa maswina avho.+

“‘Khamusi mbilu dzavho dzo rindilaho dzi ḓo ṱukufhadzwa,+ vha ḓo lifha vhukhakhi havho. 42 Ndi ḓo humbula mulanga wanga we nda u vhofha na Yakobo+ na mulanga wanga we nda vhofha na Isaka,+ ndi ḓo humbula mulanga wanga we nda u vhofha na Abrahamu,+ nda humbula shango. 43 Musi vho ṱutshela shango, ḽo vha ḽi tshi khou lifha dzisavhatha+ ḽi si na muthu, na vhone vha tshi khou lifha vhukhakhi havho ngauri vho hana mahaṱulele anga, vha nengwa maitele anga.+ 44 Fhedzi nga nnḓa ha zwenezwi zwoṱhe, musi vhe shangoni ḽa maswina avho, a thi nga ḓo vha laṱa lwa tshoṱhe+ lune nda nga fhedzisela ndo vha vhulaya, zwine zwa nga tshinya mulanga+ we nda u vhofha navho, ngauri ndi nṋe Yehova Mudzimu wavho. 45 Ndi ḓo humbula mulanga we nda u vhofha na vhomakhulukuku wavho+ vhe nda vha bvisa shangoni ḽa Egipita musi tshaka+ dzo lavhelesa, u itela u sumbedza uri ndi Mudzimu wavho. Ndi nṋe Yehova.’”

46 Eneo ndi maitele na mahaṱulele e Yehova a a vhea vhukati hawe na Vhaisiraele ngei Thavhani ya Sinai a tshi shumisa Mushe.+