Numeri

4 Yehova a amba na Mushe na Aroni a ri: 2 “Hu vhalwe vharwa vha Kehati+ vha re vhukati ha vharwa vha Levi u ya nga miṱa yavho na nga miṱa ya vhokhotsi avho, 3 vhoṱhe vha re na miṅwaha ya 30+ u ya kha ya 50,+ vhoṱhe vha re kha tshigwada tsho nangiwaho uri tshi shume denndeni ḽa muṱangano.+

4 “Hoyu ndi mushumo wa vharwa vha Kehati denndeni ḽa muṱangano.+ Ndi mushumo mukhethwa-khethwa: 5 Musi hu tshi pfuluswa madennde, Aroni na vharwa vhawe vha ḓo dzhena nga ngomu vha bvisa khetheni,+ vha fukedza mbulungelo+ ya mulanga* ngaḽo. 6 Vha ḓo i fukedza nga mukumba wa tshiphu na u i adzela nga labi ḽa muvhala wa lutombo na u dzhenisa thanda+ dza u i hwala.

7 “Vha ḓo dovha vha adzela labi ḽa muvhala wa lutombo kha ṱafula ya vhurotho ha ṱano,+ vha ḓo vhea dzindilo, zwinwelo, midzio, zwigoḓelo, nkho dza u shela tshifhiwa tsha u nwiwa;+ tshifhiwa tsha vhurotho+ tshi dzule tshi khayo tshifhinga tshoṱhe. 8 Vha ḓo zwi fukedza nga labi ḽitswuku na u ḽi fukedza nga mukumba wa tshiphu na u dzhenisa thanda+ dza u i hwala. 9 Vha ḓo dzhia labi ḽa muvhala wa lutombo vha fukedza tshiṱomambone+ tsha u vhonetshela, khathihi na mbone dzatsho,+ zwa u dzima mbone, hune ha ṱomiwa hone mbone+ na midzio yatsho yoṱhe ya mapfura ane vha a shumisa khatsho. 10 Vha ḓo tshi fukedza khathihi na thundu dzatsho dzoṱhe nga mukumba wa tshiphu, vha dzhenisa thanda ya u tshi hwala. 11 Vha ḓo dovha vha adzela labi ḽa muvhala wa lutombo kha aḽeṱare ya musuku,+ vha i fukedza nga mukumba wa tshiphu, vha dzhenisa thanda dza u i hwala.+ 12 Vha ḓo dovha vha dzhia na thundu dzayo dzoṱhe+ dzine vha shuma ngadzo tshifhinga tshoṱhe fhethu hukhethwa vha dzi putela nga labi ḽa muvhala wa lutombo na u dzi fukedza nga mukumba wa tshiphu, vha dzi vhea nṱha ha thanda.

13 “Vha bvise miḽora* kha aḽeṱare+ vha i fukedze nga labi ḽa wuḽu ya phephulu. 14 Vha ḓo vhea thundu dzayo dzoṱhe dzine dza shumiswa musi vha tshi shuma aḽeṱareni, zwa u oka mulilo, forogo, fosholo, zwigoḓelo, thundu dzoṱhe dza aḽeṱare;+ vha i fukedze nga mukumba wa tshiphu na u dzhenisa thanda dza u i hwala.+

15 “Musi Aroni na vharwa vhawe vho no fhedza u fukedza fhethu hukhethwa+ na zwishumiswa zwaho, vha tea u ṱuwa madenndeni. Nga murahu ha zwenezwo, vharwa vha Kehati vha ḓo dzhena vha zwi hwala,+ fhedzi a vho ngo tea u kwama fhethu hukhethwa uri vha sa ḓo fa.+ Vharwa vha Kehati vha na vhuḓifhinduleli* ha zwithu zwa denndeni ḽa muṱangano.

16 “Eliasara+ murwa wa tshifhe Aroni, u na vhuḓifhinduleli ha u ṱhogomela mapfura a u dugisa mbone,+ zwioro zwi nukhelelaho,+ tshifhiwa tsha thoro tsha misi yoṱhe na mapfura a u ḓodza.+ U na vhuḓifhinduleli ha u ṱhogomela dennde ḽikhethwa* na zwoṱhe zwi re khaḽo na fhethu hukhethwa na thundu dzi re henefho.”

17 Yehova a dovha a amba na Mushe na Aroni a ri: 18 “Ni songo tenda lushaka lwa muṱa wa Vhakehati+ lu tshi fheliswa kha Vhalevi. 19 Fhedzi ni ite uri vha dzule vha tshi khou tshila uri vha si fe nga nṱhani ha u sendela tsini na zwithu zwikhethwa-khethwa.+ Aroni na vharwa vhawe vha ḓo dzhena vha ṋea muṅwe na muṅwe mushumo wawe na zwine a fanela u zwi hwala. 20 A vho ngo tea u dzhena vha vhona zwithu zwikhethwa naho lu lwa tshifhinganyana uri vha sa ḓo fa.”+

21 Yehova a amba na Mushe a ri: 22 “Hu vhalwe vharwa vha Gerisoni+ u ya nga miṱa ya vhokhotsi avho na miṱa yavho. 23 U ṅwalise vha re miṅwahani ya vhu 30 u ya kha ya vhu 50, vhoṱhe vha re kha tshigwada tshe tsha ṋewa mushumo wa u shuma denndeni ḽa muṱangano. 24 Miṱa ya Vhagerisoni yo ṋewa mushumo wa u ṱhogomela na u hwala hezwi:+ 25 Vha ḓo hwala malabi a dennde ḽikhethwa+ ḽa muṱangano, ṱhanga yaḽo na mikumba ya tshiphu ine ya ḽi fukedza,+ labi* ḽa u vala muṋango wa dennde ḽa muṱangano,+ 26 makhetheni a nembeledzwaho muṱani,+ labi* ḽa muṋangoni wa muṱa+ ḽine ḽa mona na dennde ḽikhethwa na aḽeṱare, tsimbi dza dennde na thundu dzaḽo dzoṱhe dzine dza shumiswa henefho. Hoyu ndi wone mushumo wavho. 27 Mishumo yoṱhe na mihwalo ya vha Gerisoni+ i fanela u ṱhogomelwa nga Aroni na vharwa vhawe; u vha ṋee yeneyi mihwalo yoṱhe sa vhuḓifhinduleli havho. 28 Heyi ndi mishumo ine miṱa ya vha Gerisoni ya fanela u ita denndeni ḽa muṱangano,+ kha mishumo yavho vha ḓo rangwa phanḓa nga Ithamara+ murwa wa tshifhe Aroni.

29 “U ṅwalise vharwa vha Merari+ u ya nga muṱa wavho na nga nnḓu ya vhokhotsi avho. 30 U ṅwalise vha u bva kha miṅwaha ya 30 u swika kha ya 50, vhoṱhe vha re kha tshigwada tsho ṋewaho mushumo wa denndeni ḽa muṱangano. 31 Zwine vha vha na vhuḓifhinduleli ha u zwi hwala+ kha mushumo wavho wa dennde ḽikhethwa ḽa muṱangano ndi hezwi: fureme dzaḽo,+ mbalelo dzaḽo,+ phuphu dzaḽo,+ thikho dzaḽo,+ 32 phuphu+ dzo tangaho muṱa, tsimbi dza u ṱoma dennde,+ thambo dza dennde+ na zwishumiswa zwaḽo zwoṱhe na mishumo yoṱhe i tshimbidzanaho na zwenezwo. U vha ṋee zwishumiswa zwine vha fanela u zwi hwala u ya nga madzina avho. 33 Heyi ndi yone nḓila ine vharwa vha Merari+ vha ḓo shuma ngayo denndeni ḽa muṱangano, vha ḓo rangwa phanḓa nga Ithamara murwa wa tshifhe Aroni.”+

34 Mushe na Aroni na vharangaphanḓa+ vha tshitshavha vha ṅwalisa vharwa vha Vhakehati+ u ya nga miṱa yavho na nga nnḓu ya vhokhotsi avho, 35 vhoṱhe u bva kha vha miṅwaha ya 30 u swika kha ya 50 vho vha vhe kha tshigwada tsho ṋewaho mushumo wa u shuma denndeni ḽa muṱangano.+ 36 Tshivhalo tsha vho ṅwaliswaho u ya nga miṱa yavho tsho vha tshi 2 750.+ 37 Havha ndi vho ṅwaliswaho vha bvaho kha miṱa ya Vhakehati, vhoṱhe vha shumaho denndeni ḽa muṱangano. Mushe na Aroni vho vha ṅwalisa vho laedzwa nga Yehova a tshi shumisa Mushe.+

38 Vharwa vha Gerisoni+ vho ṅwaliswa u ya nga miṱa yavho na nga nnḓu ya vhokhotsi avho, 39 vhoṱhe vha miṅwaha ya u bva kha ya 30 u swika kha ya 50 vhane vha vha kha tshigwada tsho ṋewaho mushumo wa u shuma denndeni ḽa muṱangano. 40 Tshivhalo tsha vho ṅwaliswaho u ya nga miṱa yavho na nga nnḓu ya vhokhotsi avho tsho vha tshi 2 630.+ 41 Tshenetshi ndi tshivhalo tsha miṱa ya vharwa vha Gerisoni, vhoṱhe vhe vha shuma denndeni ḽa muṱangano. Mushe na Aroni vho vha ṅwalisa u ya nga he Yehova a laedza ngaho.+

42 Vharwa vha Merari vho vha vho ṅwaliswa u ya nga miṱa yavho na nga nnḓu ya vhokhotsi avho, 43 vhoṱhe vha miṅwaha ya u bva kha ya 30 u swika kha ya 50 vhane vha vha kha tshigwada tsho ṋewaho mushumo wa u shuma denndeni ḽa muṱangano.+ 44 Tshivhalo tsha vho ṅwaliswaho u ya nga miṱa yavho tsho vha tshi 3 200.+ 45 Havha ndi vho ṅwaliswaho vha bvaho kha miṱa ya vharwa vha Merari, vhe Mushe na Aroni vha vha ṅwalisa vho laedzwa nga Yehova a tshi shumisa Mushe.+

46 Mushe na Aroni na vharangaphanḓa vha Isiraele vha ṅwalisa vhenevha Vhalevi vhoṱhe u ya nga miṱa yavho na nga vha nnḓu ya vhokhotsi avho; 47 vho vha vhe vha miṅwaha ya 30 u swika kha ya 50, vhoṱhe vho ṋewa mushumo wa u hwala mihwalo denndeni ḽa muṱangano.+ 48 Tshivhalo tsha vho ṅwaliswaho tsho vha tshi 8 580.+ 49 Vho ṅwaliswa hu tshi tevhelwa ndaela ye Yehova a i ṋea Mushe, u ya nga mushumo we muṅwe na muṅwe a ṋewa wone na muhwalo wawe; vho ṅwaliswa sa zwe Yehova a laedza Mushe.