Evangeli Ya Mateo

14 Nga tshenetsho tshifhinga, Herode muvhusi wa tshiṱiriki, a pfa nga ha Yesu+ 2 a amba na vhalanda vhawe a ri: “Hoyu ndi Yohane Mulovhedzi. O vuswa vhafuni, ndi ngazwo a tshi ita yeneyi mishumo ya maanḓa.”+ 3 Herode* o vha o fara Yohane, a mu valela dzhele a tshi itiswa nga Herodia, mufumakadzi wa Filipo mukomana wawe.+ 4 Ngauri Yohane o vha a tshi dzula a tshi mu vhudza uri: “A wo ngo tendelwa u mu vhinga.”+ 5 Naho o vha a tshi ṱoḓa u mu vhulaya, o vha a tshi ofha vhathu, ngauri vho vha vha tshi ri ndi muporofita.+ 6 Musi hu tshi khou pembelelwa ḓuvha ḽa mabebo ḽa Herode,+ ṅwananyana wa Herodia a tshina henefho tshimimani a takadza Herode vhukuma+ 7 lwe Herode a mu anela uri u ḓo mu ṋea tshine a humbela. 8 Onoyo ṅwananyana a amba zwe a vha o vhudzwa nga mme awe, a ri: “Mphe ṱhoho ya Yohane Mulovhedzi i kha ndilo.”+ 9 Naho Herode o ṱungufhadzwa nga zwenezwo, a humbula zwe a zwi ana phanḓa ha vhathu vhe a vha o dzula navho, a amba uri onoyo ṅwananyana a ṋewe yone. 10 Ngauralo, a laedza uri Yohane a tumulwe ṱhoho ngei dzhele. 11 Ṱhoho ya Yohane ya ḓiswa i kha ndilo ya ṋewa onoyo ṅwananyana, a i isa ha mme awe. 12 Vhafunziwa vha Yohane vha ḓa vha dzhia tshitumbu tshawe vha tshi vhulunga; vha ya vha vhudza Yesu. 13 Yesu a tshi pfa zwenezwi a dzhena tshikepeni a ya fhethu hu re kule na miḓi uri a kone u vha e eṱhe, fhedzi musi vhathu vha tshi zwi pfa, vha mu tevhela nga milenzhe vha tshi bva miḓini.+

14 Musi a tshi swika henefho a vhona gogo ḽihulu, a ḽi pfela vhuṱungu,+ a fhodza vhalwadze vha re henefho.+ 15 Musi ḽi tshi vho kovhela, vhafunziwa vhawe vha ḓa vha amba nae vha ri: “Hafha fhethu ndi kule na miḓi, ḽi khou kovhela; vha litshe vha ṱuwe uri vha kone u ya miḓanani u renga zwiḽiwa.”+ 16 Yesu a amba na vhafunziwa vhawe a ri: “A vho ngo tea u ṱuwa. Inwi vha ṋeeni zwiḽiwa.” 17 Vha amba nae vha ri: “Ri tou vha na ḽofo ṱhanu na khovhe mbili.” 18 A ri: “Zwi ḓiseni ngeno.” 19 A vhudza gogo uri ḽi dzule hatsini. A dzhia dziḽa ḽofo ṱhanu na khovhe mbili a lavhelesa ṱaḓulu, a zwi fhaṱutshedza,+ a ṅwatekanya dziḽa ḽofo, a dzi ṋea vhafunziwa vhawe uri vha ṋee gogo. 20 Vhoṱhe vha ḽa vha fura, vha kuvhanganya matshakatshaka o salaho, a ḓadza mimanngi ya 12.+ 21 Vho ḽaho ndi vhanna vha 5 000, hu sa vhalwi vhafumakadzi na vhana.+ 22 A ṱavhanya a vhudza vhafunziwa vhawe uri vha ṋamele tshikepe vha mu range phanḓa vha wele seli, ene a vhudza gogo uri ḽi ṱuwe.+

23 Musi vhathu vho no ṱuwa, a gonya thavha e eṱhe u itela u rabela.+ Ḽa kovhela e henefho. 24 Tshikepe tsho vha tsho no vha kule na khunzi-khunzi nga mithara dza maḓana, tshi tshi khou kumbiwa nga magabelo ngauri ho vha hu na ḓumbu. 25 A ya khavho nga maḓautsha* a tshi khou tshimbila nṱha ha maḓi lwanzheni. 26 Musi vhafunziwa vhawe vha tshi mu vhona a tshi khou tshimbila nṱha ha maḓi, vha tshuwa vha ri: “Ndi bono!” Vha ṱavha mukosi ngauri vho vha vha tshi khou ofha. 27 Yesu a amba navho nga u ṱavhanya a ri: “Ni songo ofha, ndi nṋe.”+ 28 Petro a mu fhindula a ri: “Murena, arali hu iwe, mmbidze ndi ḓe kha iwe ndi tshi khou tshimbila nṱha ha maḓi.” 29 A ri: “Iḓa!” Petro a bva tshikepeni, a tshimbila nṱha ha maḓi a ya kha Yesu. 30 A tshi vhona ḓumbu, a ofha. A tshi vho mbwandamela, a ṱavha mukosi a ri: “Murena, ntshidze!” 31 Yesu a ṱavhanya a mu fara, a amba nae a ri: “Iwe a re na lutendo luṱuku, ndi ngani wo timatima?”+ 32 Musi vho no vha tshikepeni, ḓumbu ḽa dzika. 33 Vhoṱhe vha re tshikepeni vha mu losha,* vha ri: “Ngangoho u Murwa wa Mudzimu.” 34 Vha wela seli vha swika shangoni ḽa Genetsareta.+

35 Musi vhanna vha henefho vha tshi mu vhona, vha ḓivhadza vhathu vha mashango a re nga tsini, vhenevho vhathu vha ḓisa vhalwadze vhoṱhe. 36 Vha mu humbela uri vha tou kwama zwavho lupendelo lwa tshiambaro tshawe, vhoṱhe vho lu kwamaho vha fhola.+