Kha Vhafilipi

4 Vhahashu vhane nda vha funa, ndo ni ṱuvha, ni a ntakadza, kha nṋe ni nga khare.+ Imani no khwaṱha+ ni na vhuthihi na Murena.

2 Ndi ṱuṱuwedza Yudia na Sintixe uri vha humbule zwi fanaho musi vha tshi shumela Murena.+ 3 Ndi humbela uri na inwi vhashumisani na nṋe vha fhulufhedzeaho, ni dzule ni tshi thusa vhenevho vhafumakadzi vhe vha shuma vhukuma na nṋe, Klementhe na vhaṅwe u huwelela mafhungo maḓifha. Vhenevho vhoṱhe madzina avho o ṅwaliwa buguni ya vhutshilo.+

4 Ni takale ni tshi ita mushumo wa Murena.* Ndi dovha nda ri, Ni takale!+ 5 Itani uri vhathu vhoṱhe vha zwi vhone uri a ni ṱoḓi hu tshi itiwa zwaṋu fhedzi.+ Ni si hangwe uri Murena u tsini. 6 Ni songo vhilaedziswa nga tshithu,+ fhedzi zwoṱhe zwine zwa ni vhilaedzisa ni vhudze Mudzimu nga thabelo, nga u humbela zwi tshi bva mbiluni ni tshi mu livhuwa;+ 7 Mudzimu a tshi shumisa Kristo Yesu u ḓo ni ṋea mulalo+ une vhathu vha si kone u u pfesesa, wa tsireledza mbilu dzaṋu+ na mihumbulo yaṋu.

8 Tsha u fhedza, vhahashu, dzulani ni tshi humbula* zwithu zwoṱhe zwa ngoho, zwa ndeme, zwo lugaho, zwo kunaho, zwi funeaho, zwi ṱhonifheaho, zwivhuya na zwi khoḓwaho.+ 9 Dzulani ni tshi ita zwe nda ni funza, na zwe na zwi ṱanganedza zwi tshi bva kha nṋe, na zwe na zwi pfa nga nṋe na zwe na zwi vhona ndi tshi khou zwi ita,+ ndi hone Mudzimu wa mulalo a tshi ḓo vha na inwi.

10 Ngauri ndi na vhuthihi na Murena, ndo takala zwihulu ngauri no dovha na nkhumbula.+ Naho no nkhumbula, a no ngo kona u wana nḓila ya u nthusa. 11 A thi ambi zwenezwi ngauri hu na zwine nda khou zwi shaya, ngauri ndo guda u fushea hu sa londwi zwiimo zwanga.+ 12 Ndi a kona u tshila ndi na zwiṱuku,+ na u kona u tshila ndi na zwinzhi. Hu sa londwi zwine zwa itea vhutshiloni hanga, ndo guda zwine zwa si ḓivhiwe nga vhanzhi: u fura na u farwa nga nḓala, u vha na zwinzhi na u shaya. 13 Ngauri zwoṱhe ndi zwi koniswa nga ane a nṋea maanḓa.+

14 Naho zwo ralo, ndi a livhuwa nge na nthusa ndi maṱunguni. 15 Na inwi Vhafilipi ni a zwi ḓivha uri musi no no guda mafhungo maḓifha, musi ndi tshi ṱuwa Makedonia, a hu na tshivhidzo tshe tsha nthusa kana u tenda ndi tshi tshi thusa, nga nnḓa ha inwi;+ 16 ngauri musi ndi ngei Thesalonika, no nthumela zwine nda zwi shaya luvhili lwoṱhe. 17 A thi khou ṱoḓa tshifhiwa, zwine nda ṱoḓa ndi uri ni ite mishumo yavhuḓi ine ya ḓo ni vhuyedza vhukuma. 18 Zwa zwino a hu na zwine nda shaya, ndi na zwinzhi. Epafrodito+ o nṋea zwe na nthumela, zwi nga tshiṱhavhelo tshi nukhelelaho,+ tshi takadzaho Mudzimu. 19 Ndi ngazwo Mudzimu wanga a re na zwithu zwinzhi a tshi ḓo shumisa Kristo Yesu uri a ni ṋee zwoṱhe zwine na zwi shaya.+ 20 Mudzimu ane a vha Khotsi ashu nga a rendwe lini na lini. Amen.

21 Ni lumelise vhakhethwa vhoṱhe vha re na vhuthihi na Kristo Yesu. Na vhahashu vhane nda vha navho vha a ni lumelisa. 22 Vhakhethwa vhoṱhe vha a ni lumelisa, zwihuluhulu vha nnḓu ya Kesare.+

23 Vhahashu, ngavhe Murena Yesu Kristo a tshi fhaṱutshedza nḓila ine na humbula ngayo nga u ni sumbedza vhuthu vhuhulu.